དེ་རིང་ཨོ་སི་ཊི་ལི་ཡའི་གྲོང་ཁྱེར་སི་ཌེ་ནེ་བོད་མིས་ཐེངས་ ༥༣ པའི་གསུམ་བཅུ་དུས་དྲན་སྲུང་བརྩི་བྱས་ཡོད། ས་གནས་ཀྱི་གནམ་གཤིས་དྭངས་ཤིང་དྲོ་ལ་ཚ་གདུག་གི་ཁྲོད་ས་གནས་ཌེ་ཝ་ཡེ་(Dee Why)བོད་རིགས་ཚོགས་པ་དང་ནེའུ་ཁ་སི་ཊིལ་(New Castle)བོད་རིགས་ཚོགས་པ་དང་སི་ཌི་ནེ་ས་གནས་གཞོན་ནུ་དང་སློབ་ཕྲུག་ཚོགས་པ་དང་(ATC)སོགས་མི་མང་མཉམ་འཛོམས་ཐོག་ཞོགས་པ་ཆུ་ཚོད་ ༡༠ བའི་སྟེང་སེ་ཌི་ནེ་གྲོང་ཁྱེར་དཀྱིལ་དུ་ལས་འགུལ་དང་དུས་དྲན་མགོ་འཛུགས་གནང་ཡོད།
དེ་ཡང་ས་གནས་བོད་མི་ཁག་ཅིག་གིས་དེ་སྔོན་བོད་ནས་གནས་མཇལ་ལ་ཡོང་མཁན་ཚོ་ཕྱིར་བོད་ལ་ལོག་སྐབས་རྒྱ་ནག་གིས་ཁོང་ཚོར་སྡུག་པོ་ཅི་ཙམ་གཏོང་གི་ཡོད་པའི་སྐོར་གྱི་གཏམ་བརྗོད་མི་མང་ལ་སེམས་འགུལ་ཐེབས་ཐུབ་པ་ཞིག་འཁྲབ་སོང་། དེ་དང་འབྲེལ་ཨོ་སི་ཊི་ལེ་ཡའི་ལྗང་ཁུ་ཚོགས་པ་དང་བོད་དོན་རྒྱབ་སྐྱོར་བ་ཁག་ཅིག་གིས་ཀྱང་དེང་སྐབས་བོད་ཀྱི་གནས་སྟངས་ཛ་དྲག་ཏུ་གྱུར་ཡོད་པ་དང་རྒྱ་ནག་ཕྱོགས་ནས་དེ་ལ་ངེས་བར་དུ་ཐུགས་སྣང་གནང་དགོས་བའི་དུས་དྲན་དང་འབྲེལ་བའི་གསུང་བཤད་གནང་། སློབ་ཕྲུག་ཚོགས་པས་ལྷག་དཀར་སྲུང་བརྩི་བྱེད་དོན་དང་འབྲེལ་བའི་མི་མང་གི་ས་ཡིག་བསྡུ་རུབ་སོགས་བྱས་ཏེ་སྔ་དྲོའི་ལས་རིམ་དེ་དེ་ལྟར་གྲོལ་སོང་།
དེའི་རྗེས་ཉིན་རྒྱབ་དུས་ཚོད་ ༡ ཐོག་སི་ཌི་ནེ་རྒྱ་ནག་གཞུང་ཚབ་ཁང་མདུན་དུ་མི་མང་དང་ལྷག་པར་ཏུ་རྒྱ་རིགས་དམངས་གཙོ་ཚོགས་པ་དང་། རྒྱ་བོད་མཛའ་འབྲེལ་ཚོགས་པ་སོགས་མཉམ་ཞུགས་ཀྱིས་གསུང་བཤད་གནང་དོན། རྒྱ་རིགས་དང་བོད་རིགས་གཉིས་རང་ཡུལ་ནས་གནས་མ་ཐུབ་པར་འདིར་ཡོང་དགོས་བ་ཚང་མ་གཅིག་མཚུངས་ཡིན། ཉེ་ཆར་བོད་ནང་བོད་ནང་བོད་མི་ཚོས་རང་མེར་བསྲེགས་དང་བོད་རིགས་ཚང་མ་གདུང་སེམས་མཉམ་སྐྱེད་ཡོད། རྒྱ་ནག་གཞུང་ལ་དེ་སྔོན་ནས་ངོ་རྒོལ་བྱས་ཡོད་ལ་ད་དུང་ཡིན་ཡང་རྒྱ་རིགས་དང་བོད་རིགས་ལ་རང་དབང་མ་ཐོབ་བར་མུ་མཐུད་ངོ་རྒོལ་བྱ་རྒྱུ་ཡིན་ཚུལ་སོགས་གསུང་བཤད་གནང་སོང་།
དེིའི་རྗེས་མི་དམངས་ཀྱིས་བདེན་ཚིག་སྨོན་ལམ་མི་མང་ལངས་གླུ་དང་འབོད་སྒྲ་སྣ་ཚོགས་ཀྱི་སྒོ་ནས་རྒྱ་ནག་གཞུང་ཚབ་ཁང་གི་མདུན་དུས་ཚོད་གཅིག་ལྷག་གི་རིང་ངོ་རྒོལ་སྐད་འབོད་ཤུགས་ཆེར་བྱས་ཡོད།
ས་གནས་ནས་བཀྲ་ཤིས་རྒྱ་མཚོས།
སྙིང་ཐེག་པ་ནས་ཐུགས་རྗེ་ཆེ་ཞུ། འདི་ནི་ཕྱི་སྡོད་བོད་མི་ཚོའི་འོས་འགན་ཞིག་ཀྱང་རེད།