དེ་རིང་ཐའེ་ཝན་གྱི་རྒྱལ་ས་ཐའེ་པེ་རུ་བོད་བརྒྱུད་ནང་བསྟན་དར་སྤེལ་གནང་ཕྱོགས་སྐོར་ལ་བགྲོ་གླེང་ཚོགས་ཐེངས་གཉིས་པ་དེ་ཚོགས་ཡོད་འདུག
ཐའེ་ཝན་དུ་གནས་བཞུགས་མཁན་པོ་ཚེ་རིང་བཀྲ་ཤིས་ལགས་ཀྱིས་གནས་ཚུལ་བཏང་འབྱོར་བྱུང་བ་ལྟར་ན། ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་གོ་སྒྲིག་འོག དེ་རིང་ཞོགས་པར་ཐའེ་ཝན་གྱི་རྒྱལ་ས་ཐའེ་པེ་རུ་བོད་བརྒྱུད་ནང་བསྟན་དར་སྤེལ་གནང་ཕྱོགས་སྐོར་གྱི་བགྲོ་གླེང་ཐེངས་གཉིས་པ་དེ་གནང་ཡོད་འདུག་ཅིང་། མཛད་སྒོའི་སྟེང་བོད་མིའི་སྒྲིག་འཛུགས་ཐའེ་ཝན་སྐུ་ཚབ་དོན་གཅོད་ཁང་གི་དགེ་བཤེས་འཇམ་དཔལ་ཆོས་འཛིན་དང་དགེ་བཤེས་ཆོས་ཀྱི་དབང་པོ། ཨ་ཀ་སྤྲུལ་སྐུ་སོགས་དགེ་ལུགས་ཀྱི་དགེ་བཤེས་དང་སྤྲུལ་སྐུ ཤེས་རབ་གླིང་གི་མཁན་པོ་ཀར་བསྟན་དང་མཁན་པོ་འཕགས་སྐྱབས་སོགས་བཀའ་བརྒྱུད་ཀྱི་མཁན་སྤྲུལ་དང་སློབ་དཔོན། གསེར་རྟ་མཁན་པོ་ཆོས་དབྱིངས་དང་མཁན་པོ་ཀརྨ་དོན་གྲུབ་སོགས་རྙིང་མའི་ཕྱོགས་ཀྱི་མཁན་པོ་དང་སྤྲུལ་སྐུ། རྫོང་སར་བཤད་གྲྭའི་མཁན་པོ་བསམ་འགྲུབ་དང་སློབ་དཔོན་བསོད་ནམས་ཕུན་ཚོགས་སོགས་ས་སྐྱའི་ཕྱོགས་ཀྱི་མཁན་པོ་དང་སློབ་དཔོན། སྤྲུལ་སྐུ་བཀྲ་ཤིས་རྒྱ་མཚོ་སོགས་ཇོ་ནང་ཕྱོགས་ཀྱི་མཁན་སྤྲུལ་བཅས་ཆོས་བརྒྱུད་ཁག་ལྔ་ལས་གྲུབ་པའི་གདན་ཞུས་མཁན་སྤྲུལ་དགེ་བཤེས་༣༥ ཙམ་མཉམ་ཞུགས་གནང་ཡོད་འདུག
བགྲོ་གླེང་ཐོག་བརྗོད་གཞི་ཁག་གཉིས་ཡོད་པ་ནི། ༡༼ བོད་བརྒྱུད་ནང་བསྟན་གྱི་ལྟ་གྲུབ་དང་ཐུན་མིན་ཕྱག་ལེན། དེ་བཞིན་རིག་གཞུང་གི་རྒྱབ་ལྗོངས་དང་འབྲེལ་བའི་སྣང་ཚུལ་སོགས་ལ་གཞན་གྱིས་དོགས་པ་འདྲ་མིན་བསླངས་པ་དང་སློང་བཞིན་པ་དག་ལ་གཅིག་གྱུར་གྱི་ལན་འདེབས་གསལ་བཤད་གནང་ཕྱོགས༽དང་། ༢༼ ཐའེ་ཝན་གྱི་ས་གནས་འདིར་གནས་པའི་བོད་བརྒྱུད་ནང་བསྟན་གྱི་ཆོས་བརྒྱུད་ཁག་ཐུན་མོང་ནས་བོད་བརྒྱུད་ནང་བསྟན་ལ་ཕན་པ་དང་། ཐའེ་ཝན་མི་མང་ལ་ཕན་པ། ཆོས་བརྒྱུད་རིས་མེད་ཀྱི་མཐུན་ལམ་ལ་ཕན་པ་བཅས་ཀྱི་རང་བཞིན་ལྡན་ཞིང་། ལག་ཏུ་བསྟར་ཐུབ་ངེས་ཀྱི་ལས་དོན་སྐོར་ལ་བློ་འདོན་གྲོས་བསྡུར་བརྒྱུད་གཏན་འབེབས་ཀྱི་གྲོས་ཆོད་འཇོག་ཐུབ་པ་བྱ་རྒྱུ ༽ ཞེས་པའི་བརྗོད་གཞི་གཉིས་ཀྱི་ཐོག་བགྲོ་གླེང་གནང་ཡོད་འདུག
བགྲོ་གླེང་གི་མཇུག་ཏུ་ཚོགས་འདུ་གོ་སྒྲིག་གནང་མཁན་མཁན་པོ་ཆོས་ཉིད་དོན་རྟོགས་ལགས་ཀྱིས་ཞིབ་འཇུག་ཚོགས་པའི་འབྱུང་འགྱུར་གྱི་ལས་འཆར་སྐོར་དང་ཐུགས་རྗེ་ཆེ་ཞུའི་གཏམ་བཤད་གནང་རྗེས་ཉིན་འདིའི་བགྲོ་གླེང་མཇུག་བསྒྲིལ་ཡོད་འདུག དེ་དང་མཉམ་དུ་འདི་ལོའི་ཕྱི་ཟླ་ ༩ ཚེས་ ༡༥ དང་ ༡༦ གཉིས་ལ་ཚོགས་གཏན་ཁེལ་བའི་ཞིབ་འཇུག་ཚོགས་པའི་ཐེངས་གཉིས་པའི་ལྷོ་རྒྱ་བོད་གསུམ་གྱི་མཁས་པའི་ལྷན་ཚོགས་ཚོགས་གཏན་ཁེལ་བའི་གསལ་བསྒྲགས་བསྐྱངས།
དེ་ཡང་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ་ནི་སྤྱི་ལོ་ ༢༠༠༩ ལོར་ཐའེ་ཝན་དུ་ས་སྐྱ་བདག་ཆེན་རིན་པོ་ཆེ་མཆོག་གིས་དབུ་འབྱེད་གནང་ཡོད་ཅིང་། གཞུང་འབྲེལ་ཚད་ལྡན་དེབ་སྐྱེལ་བྱས་པའི་ཁྲིམས་མཐུན་ཚོགས་པ་ཞིག་དང་། བོད་བརྒྱུད་བསྟན་ལ་ཞབས་འདེགས་ཞུ་བའི་ཆོས་བརྒྱུད་གྲུབ་མཐའ་རིས་མེད་ཀྱི་ཚོགས་པ་ཞིག་ཡིན།
