བོད་དོན་ལ་རྒྱབ་སྐྱོར་གནང་རོགས།

ཁ་སང་བཀའ་བློན་ཁྲི་པ་མཆོག་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་དྲུང་ཆེ་མཆོག་གི་མཚན་ཐོག་ཏུ་སྙན་ཞུ་ཞིག་ཕུལ་ཏེ། བོད་མིའི་དགོས་འདུན་ལ་བསམ་ཞིབ་དང་བོད་དོན་ལ་རྒྱབ་སྐྱོར་གནང་རྒྱུའི་འབོད་སྐུལ་ཞུས་འདུག

ཁ་སང་ཕྱི་ཚེས་ ༡༦ ཉིན་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེངྒེ་མཆོག་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་བྷན་ཀེ་མོན་མཆོག་གི་མཚན་ཐོག་ཏུ་སྙན་ཞུ་ཞིག་ཕུལ་ཡོད་པ་དང་། བཀའ་ཁྲི་མཆོག་གིས་ཕུལ་པའི་སྙན་ཞུའི་ནང་། ཕྱི་ལོ་  ༢༠༠༩ ལོ་ནས་བཟུང་བོད་ནང་བོད་མི་ཚོས་རང་ལུས་མེར་སྲེག་བཏང་བའི་ལས་འགུལ་མགོ་འཛུགས་གནང་སྟེ། ད་བར་བོད་མི་ ༢༨ ཀྱིས་རང་ལུས་མེར་སྲེག་བཏང་ཡོད་པ་དང་། འདི་ལོ་གཅིག་པུར་བོད་མི་ ༡༥ ཡིས་རང་ལུས་མེར་སྲེག་བཏང་ཡོད། བོད་མི་དེ་དག་གིས་རྒྱ་གཞུང་གི་དམ་བསྒྲགས་ཀྱི་སྲིད་བྱུས་ལ་ངོ་རྒོལ་དང་། ༸གོང་ས་མཆོག་བོད་ནང་གདན་འདྲེན་ཞུ་དགོས་དགོས་འདུན་བཏོན་ཏེ་མེར་སྲེག་བཏང་ཡོད་ཀྱང་། རྒྱ་ནག་གཞུང་གིས་བོད་མིའི་ལས་འགུལ་དེ་རྒྱལ་ཁབ་ཁ་བྲལ་གྱི་ངན་བྱུས་ཡིན་པའི་སྙོན་འཛུགས་འོག ཁ་བྲལ་ལ་ངོ་རྒོལ་ཞེས་ཉེས་མིང་བཏགས་ཏེ་དྲག་གནོན་བྱ་རྒྱུའི་དྲིལ་བསྒྲགས་བྱས་དང་བྱེད་མུས་ཡིན་སྟབས། བོད་གཞིས་བྱེས་གཉིས་ཀྱི་བོད་མི་ཡོངས་ཀྱིས་འཛམ་གླིང་མཉམ་འབྲེལ་རྒྱལ་ཚོགས་ལ། བོད་ཀྱི་ས་ཁུལ་སྤྱི་དང་ལྷག་པར་རང་ལུས་མེར་སྲེག་གཏོང་སའི་ས་ཁུལ་ཁག་ཏུ་དམིགས་བསལ་སྐུ་ཚབ་ཆེད་གཏོང་བྱས་ཏེ། དངོས་ཡོད་གནས་ཚུལ་ཇི་ཡིན་རྟོག་ཞིབ་གནང་རོགས་ཞེས་འབོད་སྐུལ་ཞུ་རྒྱུ་ཡིན། ཞེས་བཀོད་འདུག

ཡང་སྙན་ཞུའི་ནང་། འདི་ལོ་ཕྱི་ཟླ་ ༣ ཚེས་ ༡༠ ཉིན་གྱི་བོད་མིའི་རང་དབང་སྒེར་ལངས་ཐེངས་ ༥༣ པའི་སྐབས་ཀྱི་ང་རང་གི་གཏམ་བཤད་ནང་། བོད་མིའི་སྒྲིག་འཛུགས་འཛིན་སྐྱོང་བཀའ་ཤག་གིས་བོད་མི་དང་གྲོས་ཚོགས། རྒྱལ་སྤྱིའི་གཞུང་འབྲེལ་མིན་པའི་ཚོགས་སྡེ་ཁག དེ་བཞིན་ཨ་རིའི་གྲོང་ཁྱེར་ནེའུ་ཡོག་འཛམ་གླིང་མཉམ་འབྲེལ་རྒྱལ་ཚོགས་མདུན་ཐང་དུ་ཟས་བཅད་ངོ་རྒོལ་གནང་བཞིན་པའི་བོད་མི་ ༣ བཅས་ཚང་མར་འབོད་སྐུལ་ཞུས་པ་བསྐྱར་ནན་ཞུ་རྒྱུ་ཡིན། བོད་མིའི་སྒྲིག་འཛུགས་ཀྱིས་རྒྱ་ནག་དང་ཁ་བྲལ་ལམ་རང་བཙན་རྩོད་ཀྱི་མེད། ང་ཚོས་གྲོས་མོལ་གྱི་ལམ་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སྒྲོམ་གཞིའི་འོག་ཡོད་པའི་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་རྩོད་བཞིན་ཡོད། བོད་མི་ཚོའི་རང་དབང་གི་འཐབ་རྩོད་དེ་འཚེ་བ་མེད་པའི་འཐབ་རྩོད་ཀྱི་མིག་དཔེར་འོས་པ་ཞིག་ཡིན་པ་མ་ཟད། འོས་འཚམ་ལྡན་པའི་ཆབ་སྲིད་དང་མང་གཙོའི་བཅོས་བསྒྱུར་ཞིག་ཀྱང་ཡིན། ད་ལྟའི་བོད་ནང་གི་ཛ་དྲག་གནས་སྟངས་ཐད་ཨ་རི་དང་འཇར་མན། ཧྥ་རན་སི། ཨི་ཊ་ལི། ཅེག་སྤྱི་མཐུན་རྒྱལ་ཁབ། པོ་ལན་ཌི། སུད་སི། ཨོ་སི་ཊོ་ལི་ཡ། ཁེ་ཎ་ཌ། ལྷོ་ཨ་ཧྤི་རི་ཀ་གཙོས་པའི་རྒྱལ་ཁབ་ཁག་གིས་གྲོས་ཆོད་དང་གཏམ་བཤད་བརྒྱུད་སེམས་འཚབ་ཀྱི་རྣམ་པ་བསྟན་ཡོད་སྟབས། འཛམ་གླིང་མཉམ་འབྲེལ་རྒྱལ་ཚོགས་ཀྱིས་འགྲོ་བ་མིའི་ཐོབ་ཐང་དང་འབྲེལ་བའི་ལམ་སྟོན་བཀའ་ཁྱབ་ལྟར། དཀའ་ངལ་གྱི་དུས་འདིར་བོད་མིའི་དགོས་འདུན་ལ་བསམ་ཞིབ་ཐོག་རྒྱབ་སྐྱོར་གནང་རྒྱུའི་རེ་བ་བྱེད་བཞིན་ཡོད། ཅེས་བཀོད་འདུག

                                                                                                              གསར་འགོད་པ། དོན་གོ