དེ་རིང་སྔ་དྲོར་མདོ་སྨད་འབོ་ར་དགོན་པའི་དགེ་འདུན་པ་རྣམས་ཀྱིས་རྒྱ་གཞུང་ལ་ངོ་རྒོལ་སྐད་འབོད་བྱེད་བཞིན་ས་གནས་ཞང་སྲིད་གཞུང་གི་སྒོ་ཁར་ཕྱིན་ཡོད་ཅིང་། ད་ཆར་རྒྱ་དམག་གིས་དགོན་པའི་ཕྱོགས་ཡོངས་དམ་དྲག་བྱས་ཡོད་འདུག
ད་ལྟ་རང་གནས་ཚུལ་འབྱོར་བ་ལྟར་ན། དེ་རིང་ཕྱི་ཚེས་ ༢༠ ཉིན་གྱི་སྔ་དྲོའི་བོད་ནང་གི་ཆུ་ཚོད་ ༡༢ ཙམ་ལ་བོད་མདོ་སྨད་བླ་བྲང་བཀྲ་ཤིས་འཁྱིལ་གྱི་ལྷ་སྡེ། འབོ་ར་དགོན་པའི་གྲྭ་མང་རྣམས་ཀྱིས་ལག་ཏུ་བོད་ཀྱི་རྒྱལ་དར་འཕྱར་བཞིན། བོད་ལ་འགྲོ་བ་མིའི་ཐོབ་ཐང་དང་ཆོས་དད་རང་དབང་། སྐད་ཡིག་རང་དབང་དགོས་པ་སོགས་སྐད་འབོད་བྱེད་ཀྱིན། འབོ་ར་ཞང་སྲིད་གཞུང་གི་སྒོ་ཁར་བསྐྱོད་དེ་ངོ་རྒོལ་སྐད་འབོད་བྱས་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། ད་ཆར་འབོ་ར་དགོན་པའི་ཕྱོགས་ཡོངས་རྒྱ་ནག་གི་དྲག་ཆས་དམག་མིས་བསྐོར་ཡོད་པ་ཙམ་ལས། ངོ་རྒོལ་སྐད་འབོད་ཁྲོད་གནས་ཚུལ་ག་རེ་བྱུང་ཡོད་མེད་ཀྱི་ཞིབ་ཕྲའི་གནས་ཚུལ་ད་སྔ་ཤེས་རྟོགས་ཐུབ་ཀྱི་མི་འདུག་ཟེར།
འདི་ལོའི་ལོ་གསར་སྐབས་རྒྱ་གཞུང་གིས་འབོ་རའི་ཁྱིམ་ཚང་རེ་ལ་རྒྱ་སྒོར་ ༥༠༠༠ རེ་སྤྲད་དེ་ལོ་སར་གཏོང་རྒྱུར་སྐུལ་འདེད་བྱས་ཡོད་པ་དང་། ཉེ་ཆར་བཅོ་ལྔའི་མཆོད་པའི(ཆོ་འཕྲུལ་དུས་ཆེན།) ཉིན་འབོ་ར་དགོན་པའི་ནང་༧གོང་ས་མཆོག་གི་སྐུ་པར་སྒྲིག་ཤོམ་བྱས་པར་དམ་དྲག་བྱུང་ཡོད་སྟབས། ས་གནས་སྲིད་གཞུང་དང་དགོན་པའི་བར་འགལ་བ་ཛ་དྲག་ཏུ་གྱུར་ཡོད་འདུག
༢༠༠༨ ལོའི་ཞི་རྒོལ་ཆེན་མོའི་ནང་འབོ་ར་སེར་སྐྱ་མི་མང་གིས་རྒྱ་གཞུང་ལ་ངོ་རྒོལ་ཤུགས་ཆེན་བྱས་པ་ནས་མགོ་བཙུགས་ཏེ་ད་བར་ངོ་རྒོལ་སྔ་རྗེས་སུ་བྱུང་ཡོད་སྟབས། རྒྱ་གཞུང་གིས་དུས་རྒྱུན་འབོ་ར་དགོན་གྲོང་གཉིས་ལ་དམ་དྲག་ནན་མོ་བྱེད་ཀྱི་ཡོད་འདུག
གསར་འགོད་པ། བནྟེ་སྐྱབས།
དོན་དམ་གྱི་དཔའ་བོ་ཚོ། བདེན་པའི་གནས་ལུགས་ཤིག་གི་ཆེད་དུ་དམྱལ་བ་ལ་མཆོང་དགོས་ཀྱང་ཕྱིར་མིག་ཙམ་ཡང་མེད་པར་མཆོང་ཆོག་ཆོག་གི་ཁྱེད་ཅག ང་ཚོ་སྐྱོབ་མཁན་ཁྱེད་ཅག་ལས་གཞན་སུ་ཡང་མིན་པ་ང་ཚོས་ཤེས་ཡོད། ཁྱེད་ཅག་ང་ཚོའི་དུས་གསུམ་གྱི་བདག་པོ་ཡིན་པ་ཡང་ཤེས་ཡོད
བོད་ནང་གི་གནས་ཚུལ་གཅིག་རྗེས་གཉིས་མཐུད་དུ་མཐོང་ཡོང་དུས་ངོ་མ་སེམས་ནས་བཟོད་དཀའ་བ་ཞིག་རེད་འདུག
འབོ་ར་ཟེར་བ་འདིར་ཐབས་ཤེས་སྣ་མང་འཛོམས་པའི་དཔའ་རྒོལ་ཡོད་ས་ཤིག་ཡིན།
ཉིས་སྟོང་བརྒྱད་ལོར་འབོ་རས་རྟ་ཐོག་ངོ་རྒོལ་དེ་འཛམ་གླིང་གསར་འགྱུར་བརྒྱུད་ལམ་ཁག་ཏུ་རླུང་ལྟར་ཁྱབ་ཅིང་། རྟ་ཐོག་ངོ་རྒོལ་ལ་མི་མང་གིས་དོ་སྣང་གསར་བ་ཞིག་བྱས་ཡོད། འདིར་གསར་འགོད་པས་སྐད་ཆ་སྐོར་ཞིག་དགོད་བྲོ་བ་ཞིག་བཀོད་འདུག་མོད།
གནས་སྐབས་མི་གླེང་བར་བྱ། ཚིག་ཐུང་འདི་འདྲ་ཞིག་གི་ནང་དུ་དོན་སྐྱོན་རི་འདྲ་བ་མི་ཡོང་ཆེད་རྗེས་སུ་དོ་སྣང་གནང་རོགས།
བོད་ཀྱི་བདེན་པ་ནི་སུས་གླེང་ན་ཆོག་ལ། སུས་སྲུང་ནའང་ཆོག
འབོ་ར་བ་རྣམས་ལ་གདུང་སེམས་གཉམ་བསྐྱེད་དང་མྱ་ངན་གུས་འདུད་ཞུ། ཁྱེད་ཅག་གི་ཚེ་སྲོག་ལ་བར་ཆད་མེད་པར་སྨོན། གཟབ་གཟབ་གྱིས་ཨ་མའི་བུ་རྣམས།
ཕ་ཡུལ། ང་ཚོ་ཁ་ཐག་གིས་ཅི་འདྲའི་ཆོད་ཀྱང་རྒྱང་རིང་རྒྱང་རིང་ན་ཁྱེད་ཚོ་དང་མཉམ་དུ་་སྙིང་གསོན་པོ་དེ་འཕར་ལྡིང་བྱས་ནས་ཡོད། ཁྱེད་ཚོའི་དཔའ་སྤོབས་དང་མདུན་བསྐྱོད་ལ་བསམ་ན། ང་རང་མྱུར་དུ་ཁྱེད་ཀྱི་པང་ལ་ལོག་ཐུབ་ངེས།
གནས་འདི་ནི་ཆབ་སྲིད་ཀྱི་གྲགས་འགུལ་ཆེ་ས་ཞིག་ཡིན། ས་བྱི་ལོར་གནས་འདི་ནས་མེ་ལྕེ་ཞིག་མཆེད་དེ་བཙན་པོའི་གདུང་རྒྱུད་ཡིན་པའི་དཔང་རྟགས་བཞག་ཡོད།
མེ་མདའི་ཁ་ཡི་མི་རིགས་འདི། དངོས་གནས་ཛ་དྲག་རེད། དངོས་གནས་རླབས་ཆེན་རེད།