རྨེ་བ་འཇམ་དཔལ་ནོར་བུ།
མི་རིགས་ཤིག་ལ་མཚོན་ན། གང་ཞིག་དོན་དངོས་ཡིན་དང་མིན་སོགས་ཀྱི་སྐད་ཆ་ཡར་བཤད་མར་བཤད་ཇི་ལྟར་བྱས་ཀྱང་། ཐོག་མར་གནད་དུ་ངེས་དགོས་པ་ནི། མི་རིགས་དེའི་གཞི་རྩའི་རིག་གནས་ལ་གནས་ལུགས་དང་རྒྱུ་མཚན་ལྡན་པའི་ངོས་འཛིན་ཟབ་མོ་ཞིག་ཐོབ་དགོས་པ་ཡིན།
མི་རིགས་དེའི་གཞི་རྩའི་རིག་གནས་ནི་གང་ཞེ་ན། དེ་ནི་སྐད་ཡིག་སློབ་གསོའི་སྐོར་ཡིན་ལ། སྐད་ཡིག་སློབ་གསོའི་རིག་གནས་འདི་ལ་བརྟེན་ནས་མི་རིགས་རང་ཉིད་ཀྱི་ཆེས་རྨད་དུ་བྱུང་བའི་སྲོལ་རྒྱུན་དང་ཐོན་དངོས་སོགས་ལག་བརྒྱུད་བྱས་ཏེ་འོངས་དགོས་པས། རིག་གནས་འདི་ནི་འུ་ཅག་གི་གཞི་རྩའི་ཤེས་བྱ་ཡིན་དགོས་པ་བསྙོན་དུ་མེད། དོན་དངོས་འདི་ལ་སློབ་དཔོན་ཆེན་མོ་དོར་ཞི་གདོང་དྲུག་སྙེམས་བློ་མཆོག་གིས། སྐད་ཡིག་ནི་རིག་གནས་ཀྱི་བང་མཛོད་ཀྱང་ཡིན་ལ། བང་མཛོད་ཀྱི་ལྡེ་མིག་ཀྱང་ཡིན། ཞེས་གཏན་དུ་ཞུགས་པ་མེད་པའི་སྡོམ་ཚིག་འདི་འདྲ་གནང་ཡོད་པ་རེད། དེ་ནི་དངོས་གནས་བསམ་བློ་ཞིག་བཏང་ན་ཡིན་ཏེ། སྐད་ཡིག་སྤུས་ཀ་ཅན་ཞིག་མེད་ན། མདོ་རྒྱུད་ཀྱི་བསྟན་བཅོས་རིན་པོ་ཆེ་དག་གི་དགོངས་དོན་ནི་ལྟ་ཅི། མི་རིགས་རང་ཉིད་ཀྱི་འཚོ་བ་དངོས་མཚོན་པའི་དམངས་ཁྲོད་ཀྱི་རིག་གནས་མང་དག་ཅིག་གི་གསང་བ་འང་སྔོག་མི་ཐུབ་ལ། མི་རིགས་ཤིག་གི་རིག་གནས་ཞེས་ཇི་ལྟར་བཤད་ཀྱང་ཤོག་ངོས་ཀྱི་ཡི་གེ་ཙམ་དུ་ཟད་ངེས་སོ། དོན་དངོས་དེའི་ཕྱིར་ན། སྐད་ཡིག་སློབ་གསོའི་རིག་གནས་ནི་འུ་ཅག་གི་གཞི་རྩའི་ཤེས་བྱར་གྲུབ་པ་ཡིན།
དངོས་གནས་བཤད་ན། འུ་ཅག་གི་མེས་པོ་བཀའ་དྲིན་ཅན་དག་གིས་རང་ཉིད་ཀྱི་སྐད་ཆར་རང་ཉིད་ཀྱིས་ཞིབ་འཇུག་བྱས་ནས་སྐད་ཡིག་རིག་གནས་ཀྱི་རྣམ་གཞག་མང་པོ་ཞིག་མཛད་ཡོད་པས། འདི་དག་ནི་ཁོང་ཅག་གི་ཆེད་དུ་མིན་པར། ཕྱི་རབས་པ་འུ་ཅག་གི་ཆེད་དུ་ཡིན་པས། འུ་ཚོས་དུས་ཀྱི་གནས་བབས་ཀྱིས་བྱིན་པའི་སྲོག་དབུགས་སྡུད་ལེན་དང་། སྔོན་རབས་མེས་པོ་དག་གིས་བཞག་པའི་སློབ་གསོའི་རིག་གནས་ཀྱི་སྙིང་དོན་ལ་དཔུང་འཇུག་བྱེད་དགོས་མོད། དེང་སང་ཆེས་ཡིད་སྐྱོ་བ་ཞིག་ལ་འུ་ཚང་གི་གཞི་རིམ་གྱི་སློབ་མ་མང་པོ་ཞིག་གིས་བོད་རང་གི་རིག་གནས་ཀྱི་རང་རྐང་ཐུབ་པ་ཞིག་འོངས་རྒྱུར་བསམ་བློ་མི་གཏོང་བ་མ་ཟད། རང་གི་གནས་ལ་དགའ་ཞེན་དང་བརྩེ་བ་ཡོད་མཁན་ཚོར། ཨེ་ཁོས་མི་ག་གེ་མོ་ཞིག་ལ་ཁ་གཏོང་གི་འདུག ཡུལ་ག་གེ་མོ་ཞིག་ལ་ཁ་གཏོང་གི་འདུག་སོགས་ཟེར་ནས་གླེང་ལོག་སྣ་ཚོགས་ཤིག་བྱེད་ཀྱིན་འདུག
སྤྱིར་སྐད་ཆ་འདི་རིགས་ནི་ཁ་ཡ་བྱེད་དགོས་སའི་གནས་མིན་མོད། འུ་ཚང་གི་རེ་བ་ཅན་གྱི་སློབ་བུ་དག་གིས་དེ་ལྟར་གླེང་ལོག་སྣ་ཚོགས་བྱས་འོངས་ན་ངོ་མ་སེམས་ཁ་མི་བདེ་བ་ཞིག་རེད། དྲང་མོ་བཤད་ན་འུ་ཚང་གི་ད་ལྟའི་སློབ་གྲྭ་ཁག་གི་ནང་དུ་རང་གི་རིག་གནས་ལ་བློ་གཅིག་སེམས་གཅིག་གིས་དགའ་ཞེན་དང་བརྩོན་པ་མཐར་ཕྱིན་གནང་མཁན་ཅི་ཙམ་ཡོད། སློབ་གྲྭ་གཅིག་ལ་མཚོན་ན། དེའི་ནང་ནས་སློབ་མ་ཀ་ཚོད་ཅིག་གིས་བོད་ཡིག་ལ་དགའ་ཞེན་དང་བརྩོན་པ་བྱེད་ཀྱིན་འདུག དངོས་གནས་བཤད་ན་བོད་ནས་གསར་འབྱོར་བ་འགའ་ཞིག་རེད། ངས་འདི་གའི་སློབ་གྲྭ་རེ་འགའི་དགེ་རྒན་རེར་ཆེད་དུ་བཅར་འདྲི་བྱས་མྱོང་ཡོད། ཁོང་ཚོར་བཅར་འདྲི་བྱེད་སྐབས་སློབ་གྲྭ་འདི་བཟང་རབས་ཡག་རབས་ཁོ་ན་ལས་སྐྱོན་དང་མ་འདང་ས་འདི་རེད་ཟེར་ནས་སྣ་གཅིག་ཀྱང་བཤད་རྒྱུ་མི་འདུག ངོ་མ་སྐྱོན་དང་མི་འདང་ས་མེད་སོང་ནི་ཨེ་རེད་ཟེར་ན་གཏན་ནས་མ་རེད། སློབ་ཆེན་སློབ་མ་མི་རིགས་རང་ཉིད་ཀྱི་བརྡ་སྤྲོད་དང་སྤྱི་འགྲོས་ཀྱི་ཤེས་བྱའི་སྐོར་ལ་རྨོངས་བསྡད་ཡོད་པ་རེད། འདི་ནི་དངོས་གནས་མི་གླེང་ཐབས་མེད་ཅིག་རེད། །
༢༠༡༢ ། ༣ ། ༢༥ ཉིན་བྲིས།
ཁྱེད་ཅག་གིས་བསམ་ཚུལ་བཏོན་པར་དགའ་ཡོད། དེང་སང་ངོ་མ་ཁྱད་མཚར་ཞིག་རེད། ང་ཁ་ངན་ནི་མིན་ད། བོད་སྐད་ཡིག་གི་འཆི་ལྟས་ཤིག་མ་རེད་ཟེར་ས་མི་འགྲོ་གི། དེ་ནི་དེང་སང་བོད་ནས་གསར་འབྱོར་བ་བ་མང་པོ་ཞིག སློབ་མ། གྲྭ་བ་སོགས་སུ་ཞིག་སླེབས་ཀྱང་། འདིར་ཐོན་དུས་ངས་བོད་ཀྱི་རིག་གནས་ཤིག་སློབ་དགོས་ཟེར་རྒྱུ་མེད་པར། ངས་དབྱིན་ཡིག་ཅིག་སློབ་དགོས་ཟེར་མཁན་རྐྱང་རེད་ལ། བོད་ཀྱི་རིག་གནས་སྐོར་གྱི་སྐད་ཆ་ཞིག་འདྲི་རྒྱུ་མེད་པར། དབྱིན་ཡིག་སློབ་ས་གང་དུ་ཡག་གི་རེད་སོགས་ཀྱི་སྐད་ཆ་རྐྱང་རྐྱང་འདྲི་རྒྱུ་འདུག དོན་དངོས་འདི་དག་ལ་བལྟས་ན། རྒྱ་ནག་གི་སློབ་གསོ་དེས་ང་ཚོ་གང་ཞིག་ཏུ་འདེད་ཀྱིན་ཡོད་པ་ཧ་གོ་ཡོང་གི་འདུག་ལ། རྒྱ་ནག་གི་སློབ་གསོ་དེས་ང་ཚོ་བགྱེལ་ནས་འགྲི་བཞིན་ཡོད་པ་འང་ཅི་ལ་ཧ་མི་གོ།
ངས་འདི་ན་བསམ་ཚུལ་ཞིག་ཞུ་འདོད་བྱུང། ང་ཚོ་ལ་གནས་ཚད་འདིར་ལྷུང་བར་བྱེད་པའི་རྐྱེན་གཙོ་བོ་གཉིས་མཐོང་གི་འདུག དང་པོ། གཞི་རིམ་སློབ་གསོར་དགོས་ངེས་ཀྱི་རང་གི་སྐད་ཡིག་ལ་བག་ཆགས་འཇོག་མ་ཐུབ་པ། གཉིས་པ། སློབ་མའི་འབྲེལ་ཡོད་འཁོར་ཡུག་གི་གནོན་ཤུགས་སྟེ། དེ་ཡང་ཕ་མ་དང་གྲོགས་པོ་གྲོགས་མོ། དགེ་རྒན་དང་ལས་བྱེད་སོགས་རྒྱུན་དུ་སློབ་མ་ཤུགས་རྐྱེན་ཅན་གྱི་མི་རྣམས་ཀྱིས་རང་གི་སྐད་ཡིག་ལ་མཐོང་ཆེན་མི་བྱེད་པ་དང། ཐ་ན་བོད་ཡིག་སྦྱངས་པ་ལས་དབྱིན་ཡིག་སྦྱངས་ན་མདུན་ལམ་བཟང་བ་ཡོད་པའི་སློབ་གསོ་སྤྲོད་པ་ལྟ་བུ་རེད། རྐྱེན་རྩ་འདི་གཉིས་མེད་པར་བཟོ་བར་ཤེས་ཡོན་སྲིད་ཇུས་གསར་པ་ཁྱོན་ཡོངས་ནས་ལག་བསྟར་དང་དོན་འཁྱོལ་ཡོང་བ་བྱ་དགོས་པ་དང། སྤྱི་ཚོགས་ནང་དུ་བོད་སྐད་ཡིག་ལ་མཁྱེན་རྒྱ་ཡངས་བ་དག་ལ་ཆེ་མཐོང་དང་མཐུན་རྐྱེན་གང་ལེགས་བསྐྲུན་རྒྱུ། དེ་དང་ཆབས་ཅིག བོད་མི་རིགས་དང་བོད་ཀྱི་སྐད་ཡིག་དབར་གྱི་ཚེ་སྲོག་ལྟ་བུའི་འབྲེལ་བ་འདི་ངོས་འཛིན་གསལ་པོ་ཡོང་ཕྱིར་ཚོགས་སྡེ་དང་མི་སྒེར་ཚང་མས་འགན་འཁུར་ལྡན་པའི་ཐོག་ནས་སློབ་གསོ་རྒྱ་ཁྱབ་ཏུ་སྤེལ་དགོས་ལ། དེ་ཡང་ཁ་ནས་བཤད་བསྡད་པ་ཙམ་མིན་པར་ལག་ལེན་རང་གི་སྟེང་ནས་མིག་དཔེར་བསྟན་ཐུབ་པ་བྱ་དགོས། སྤྱི་ཚོགས་ནང་དུ་སློབ་གསོ་སྤེལ་སྐབས་མཁན་ཆེན་ཚུལ་ཁྲིམས་བློ་གྲོས་ཀྱི་གསུངས་པ་ལྟར〞གནད་ལ་ཁེལ་བ། མཐར་མ་ལྷུང་བ། དོན་གྱི་ནང་ཉམས་ཟིན་པ།〝སྟེ་མན་ངག་འདི་གསུམ་ངེས་པར་དུ་དྲན་པར་བྱ་དགོས་སྙམ།
མི་རིགས་ཀྱི་སྐད་དང་ཡི་གེ་ནི་མི་རིགས་དེའི་ངོ་བོ་ངོས་འཛིན་སྤྱད་དང་། མི་རིགས་རང་བཞིན་གྱི་བསམ་བློའི་ལག་ཆ་ཡིན་ནི་རེད། མི་རིགས་རང་གི་ཡུལ་སྲོལ་གོམས་གཤིས་དང་། སྐད་ཡིག་བཅའ་དག་ཅིག་མེད་ན་དེ་འདྲའི་མི་དེ་མི་རིགས་དེའི་དབང་བོ་སྐྱོན་ཅན་ལྟ་བུ་རེད། གཞིས་ཆགས་ཀྱི་མཐོ་སློབ་ཁག་གི་གཞིས་ཆགས་ཀྱི་སློབ་མ་མང་ཆེ་བ་མི་རིགས་རང་གི་མི་བུ་ཞིག་ལ་བརྩི་ཐབས་མི་འདུག རྒྱུ་མཚན་ངས་གོང་དུ་བཤད་པའི་མི་རིགས་ཀྱི་མཚན་ཉིད་དེ་མི་ཚང་བས་སོ། །དེས་ན་ང་ཚོས་རྒྱུན་དུ་སྡུག་སྐད་འདི་འདྲ་མི་འདོན་ཀ་མེད་རེད།
ཨ་ཁུ་རྨེ་བའི་བསམ་ཚུལ་ལ་རྒྱབ་སྐྱོར་ཡོད་འོན་ཀྱང་། ཤ་ཚ་བའི་གཏམ་ལ་སྙན་པོ་མེད། །
སྐད་ཡིག་གི་རིན་ཐང་ངོ་སྤྲོད་གནང་བར་བཀའ་དྲིན་ཆེ་ཞུ་འོས་ཀྱང། དུས་རབས་ཕྱེད་ཙམ་གླེང་བས་ཤེས་འདོད་མེད་པས་མ་གཏོགས་མ་ཤེས་པ་མེད་ཙང་། དུས་ཚོད་འཕྲོ་བརླག་གོ དེས་ཕྱིར་སྐད་ཡིག་རྩ་མེད་བཟོ་བར་གདོང་ལེན་ཇིར་ལྟར་གནང་དགོས་ཐད་རྩོམ་ཡིག་བྲིས་ན་དོན་ཡོད་རེད། རིག་འདོན་པ་དང་རྩོམ་པོ་དག་གིས་ཀྱང་དོན་ཡོད་ལས་དོན་མེད་མི་འབྲི་བར་རེ་སྐུལ་ཞུའོ།། གཞན་དུས་བབ་ཀྱིས་ཀྱང་རིག་པ་འདོན་པ་དག་ལས་སྐྱོན་བརྗོད་དག་མི་འགོད་བར་རེ་སྐུལ་སླར་ཡང་ཞུའོ།།གང་ཞེ་ན་་་རིག་པ་འདོན་་སར་སྐྱོན་བརྗོད་ལྟར་སྣང་གིས་བརྒྱ་ཆའི་དྲུག་ཅུ་ཡར་སྟོད་བརྒལ་འདུག་གོ།།