འཕྲོད་བསྟེན་ལས་ཁུངས་ཀྱིས་ཛ་དྲག་སྨན་བཅོས་མཐུན་འགྱུར་སྤྲོད་མཚམས་བཞག་ཡོད།

གཟའ་ཟླ་བའི་ཉིན་འཕྲོད་བསྟེན་བཀའ་བློན་མཆོག་གིས་གཙོས་འཕྲོད་བསྟེན་དྲུང་ཆེ་དང་དྲུང་འཕར་བཅས་ཀྱིས་གསལ་བསྒྲགས་ཤིག་སྤེལ་ཏེ། བོད་མིའི་སྨན་བཅོས་བལྟ་སྐྱོང་ལས་གཞིའི་ནང་མཉམ་ཞུགས་གནང་དགོས་པའི་འབོད་སྐུལ་དང་། འཕྲོད་བསྟེན་ལས་ཁུངས་ཀྱིས་ཛ་དྲག་སྨན་བཅོས་མཐུན་འགྱུར་སྤྲོད་མཚམས་བཞག་ཡོད་པ་བསྒྲགས་སོང་།

དེ་རིང་ཕྱི་ཟླ་ ༤ ཚེས་ ༡ ཉིན་གྱི་སྔ་དྲོའི་ཆུ་ཚོད་ ༡༡ དང་ཕྱེད་ཀའི་སྟེང་གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། བོད་མིའི་སྒྲིག་འཛུག་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གཙོས་པའི་འཕྲོད་བསྟེན་དྲུང་ཆེ་ཤོ་ཟུར་བསོད་ནམས་ཆོས་འཕེལ་དང་། དྲུང་འཕར་སྦྲ་གཉིས་ཚེ་རྒྱལ་བཅས་ཐུན་མོང་ཐོག བཙན་བྱོལ་བོད་མིའི་སྨན་བཅོས་བལྟ་སྐྱོང་ལས་གཞི་མགོ་འཛུགས་བྱས་ཡོད་སྐོར་གྱི་གསལ་བསྒྲགས་ཤིག་བསྐྱངས་ཏེ། བོད་མིའི་སྨན་བཅོས་བལྟ་སྐྱོང་ལས་གཞིའི་ནང་ཐོ་འགོད་བྱེད་མཁན་གཞིས་ཆཊ་ཁག་ ༣༣ ནས་ཁྱོན་མི་ ༥༢༠༠ དང་། ཐོ་འགོད་བྱེད་མཁན་ཚོས་རྒྱ་གར་ས་གནས་ཁག་ ༤༦ གི་སྒེར་གྱི་སྨན་ཁང་ཁག་ཏུ་སྨན་བཅོས་བྱ་ཆོག་གི་ཡོད་སྐོར་དང་། དེ་བཞིན། ལས་གཞི་འདིའི་ནང་ཞུགས་མིན་ལ་མ་ལྟོས་པར་འཕྲོད་བསྟེན་ལས་ཁུངས་ཀྱིས་ད་ཆར་གནང་བཞིན་པའི་ཛ་དྲག་སྨན་བཅོས་མཐུན་འགྱུར་དེ། ད་ལོའི་ཕྱི་ཟླ་ ༣ ཚེས ༣༡ ཉིན་ནས་སྤྲོད་རྒྱུ་མཚམས་འཇོག་བྱས་ཡོད་པ་བསྒྲགས་སོང་།

སྨན་བཅོས་བལྟ་སྐྱོང་ལས་གཞིའི་གསལ་བསྒྲགས་ནང་འཁོད་དོན། “ འཛམ་གླིང་ཡུལ་གྲུ་མང་ཆེ་བའི་ནང་མི་མང་ལ་འཕྲོད་བསྟེན་སྲུང་སྐྱོབ་ཐོག་མཐུན་རྐྱེན་འདང་ངེས་མེད་པ་དེར། རྒྱལ་སྤྱིའི་སྟེང་དོ་སྣང་དང་སེམས་འཚབ་ཆེན་པོ་བྱེད་ཀྱི་ཡོད་པ་དང་། བཙན་བྱོལ་བོད་མིའི་སྤྱི་ཚོགས་ལ་མཚོན་ནའང་། ཁྱིམ་ཚང་རེའི་ཡོང་འབབ་ཀྱི་བརྒྱ་ཆ་ ༡༤ ཙམ་སྨན་བཅོས་ཁོ་ནའི་ཆེད་གཏོང་དགོས་ཀྱི་ཡོད་སྟབས། གལ་སྲིད་རང་ཉིད་ལ་ནད་གཞི་ཚབས་ཆེན་ཕོག་སྟེ་སྨན་ཁང་དུ་སྡོད་དགོས་བྱུང་ན་འགྲོ་སོང་གཏོང་རྒྱུའི་སེམས་ཁྲལ་ཆེན་པོ་ཡོད། བོད་མིའི་འཕྲོད་བསྟེན་དང་བླངས་ཚོགས་པའི་འགན་ལེན་འོག་བོད་མི་ཡོངས་ལ་རིམ་པ་གཉིས་པ་དང་གསུམ་པའི་སྨན་བཅོས་མཐུན་འགྱུར་སྤྲོད་ཆེད། བཙན་བྱོལ་བོད་མིའི་སྨན་བཅོས་བལྟ་སྐྱོང་ལས་གཞི་འདི་གསར་འཛུགས་བྱས་པ་ཡིན། ལས་གཞི་འདིས་བོད་མིའི་སྤྱི་ཚོགས་ནང་ཆེས་ཉམ་ཐག་རིགས་ལ་སྨན་བཅོས་འགྲོ་གྲོན་ཆ་ཚང་མཁོ་སྤྲོད་ཐུབ་པ་མ་ཟད། ཉམ་ཐག་མིན་པ་ཚོར་ཡང་ཚད་མཐོའི་མཐུན་འགྱུར་ཞུ་ཐུབ་ཀྱི་ཡོད། ལས་གཞི་འདི་ད་ལོའི་ཕྱི་ཟླ་ ༡ དངོས་སུ་འགོ་འཛུགས་བྱས་ཡོད་ལ། ལས་གཞི་འདི་སྨན་བཅོས་ཉེན་སྲུང་མཐུན་རྐྱེན་བསྐྲུན་རྒྱུའི་ངོ་བོའི་ཐོག་བོད་མིའི་སྤྱི་ཚོགས་ཀྱི་འཕྲོད་བསྟེན་སྲུང་སྐྱོབ་དང་། སྔར་ལས་གོང་མཐོར་གཏོང་ཐབས་ཀྱི་ལས་གཞི་གལ་ཆེན་ཡིན། ལས་གཞི་འདིའི་ནང་ཞུགས་མིན་ལ་མ་ལྟོས་པར་འཕྲོད་བསྟེན་ལས་ཁུངས་ཀྱིས་ད་ཆར་གནང་བཞིན་པའི་ཛ་དྲག་སྨན་བཅོས་མཐུན་འགྱུར་དེ། ད་ལོའི་ཕྱི་ཟླ་ ༣ ཚེས ༣༡ ཉིན་ནས་སྤྲོད་རྒྱུ་མཚམས་འཇོག་བྱས་ཡོད། རྒྱ་གར་ནང་གནས་སྡོིད་ལས་བྱེད་དང་དགོན་སྡེ་ཁག སློབ་གྲྭ་དང་ཚོགས་པ་སྐྱིད་སྡུག་ཁག་གི་བོད་རིགས་མང་ཚོགས་ཀྱིས། སྤྱི་ཚོཊ་དང་སོ་སོའི་འཕྲོད་བསྟེན་གལ་ཆེར་བརྩིས་ཏེ་ལས་གཞིའི་འདིའི་ནང་མཉམ་ཞུགས་ཡོང་བའི་འབོད་སྐུལ་ཞུ་བཞིན་ཡོད། ” ཅེས་འཁོད་འདུག  

ལས་གཞི་འདི་ནི་བཙན་བྱོལ་བོད་མི་ཚོར་རིམ་གཉིས་པ་དང་གསུམ་པའི་སྨན་བཅོས་བལྟ་སྐྱོང་ལས་གཞི་ཞིག་ཡིན་པ་དང་། ལས་གཞི་འདིའི་ནང་ཞུགས་མཁན་ཚོས་འཕྲོད་བསྟེན་ལས་ཁུངས་ལ་འགན་ལེན་དོད་སྒོར་སྔ་འདོན་ཞུ་དགོས་ལ། ཁྱིམ་ཚང་གཅིག་ལ་མི་ ༢ ནས་ ༥ བར་ཡོད་ཚེ། ལོ་རེར་འགན་ལེན་ཧིན་སྒོར་ ༣༥༦༥ སྤྲོད་དགོས་ཤིང་། ཁྱིམ་ཚང་རེར་མི་ ༥ ལས་མང་བ་ཡོད་ན། མི་རེས་ལོ་རེར་འགན་ལེན་སྒོར་ཧིན་ ༧༡༣ ཁ་སྣོན་རྒྱག་དགོས་ཀྱི་ཡོད། དེ་ལྟར་གནང་ན། ཁོང་ཚོར་ལོ་རེར་འགན་ལེན་ཧིན་སྒོར་ ༡༠༠༠༠༠ ཙམ་འཐོབ་ཀྱི་ཡོད། གྲྭ་བཙུན་དང་མི་ཧྲང་ཡིན་ན། མི་རེས་ལོ་རེར་ཧིན་སྒོར་ ༩༥༠ སྤྲོད་དགོས་ཀྱི་ཡོད་ལ། དེ་ཚོར་ལོ་རེར་འགན་ལེན་ཧིན་སྒོར་ ༥༠༠༠༠ ཙམ་འཐོབ་ཀྱི་ཡོད། སྨན་བཅོས་བལྟ་སྐྱོང་ལས་གཞི་འདིའི་ཁོངས་སུ་ཞུགས་མཁན་དག་གིས་གཞིས་ཆགས་དང་ས་གནས་ཁག་གི་འཕྲོད་བསྟེན་ལས་ཁུངས་དང་། འཕྲོད་བསྟེན་བལྟ་སྐྱོང་ཁང་། ས་གནས་མགོ་འཛིན་ལས་ཁུངས་བཅས་སུ་ཐོ་འགོད་གནང་དགོས་པ་དང་། ཐོ་འགོད་གནང་མཁན་ཚོར་ཕྱི་ཟླ་ ༤ ཚེས་ ༡ ཉིན་ནས་འཕྲོད་བསྟེན་ལས་ཁུངས་ཀྱིས་གཞུང་འབྲེལ་ཐོག་གློག་པར་བརྒྱབ་སྟེ། མི་རེར་ (Smart Card) སྟབས་བདེའི་བྱང་བུ་རེ་བཟོ་རྒྱུ་དང་། བྱང་བུ་དེ་བཟོས་རྗེས་བོད་མི་སུ་ཞིག་ལ་གློ་བུར་དུ་ན་ཚ་སོགས་བྱུང་སྐབས། དངུལ་དངོས་གཅིག་ཀྱང་འཁྱེར་མ་དགོས་པར་བྱང་བུ་དེ་བསྣམས་ཆོག་གི་ཡོད་འདུག དེ་བཞིན། འཕྲོད་བསྟེན་ལས་ཁུངས་ཀྱིས་སྨན་བཅོས་བལྟ་སྐྱོང་ལས་གཞིའི་ནང་ཞུགས་ཐབས་མེད་པའི་ཉམ་ཐག་རིགས་ལ་སྐབས་བསྟུན་གྱིས་ཞིབ་འཇུག་གང་ལེཊ་གནང་སྟེ། མི་རེར་སྨན་དོད་བརྒྱ་ཆ་ ༥༥ ཙམ་ཚོགས་ཁོངས་ནས་ནར་གཏོང་གནང་རྒྱུ་ཡིན་འདུག

སྨན་བཅོས་བལྟ་སྐྱོང་ལས་གཞི་འདིར་སྨན་བཅོས་དང་ལེན་མི་ཆོག་པ་འགའ་ཡོད་པ་ནི། དགོས་མེད་སྨན་གྲོན་འཕར་མ་གཏོང་བ་དང་། མྱོས་རྫས་དང་ཆང་རག་གིས་རྐྱེན་པས་ནད་གཞི་ཕོག་པ། སྐྱེ་སྒོ་འགོག་པའི་སྨན་བཅོས། ནད་འགོག་སྨན་ཁབ་རིམ་པ་དང་པོའི་སྨན་བཅོས་ཁོངས་ཡིན་པ། རང་སྲོག་གཅོད་པ་དང་འཁྲུག་འཛིང་ཤོར་བའི་རྨས་སྐྱོན། གདོང་དང་ལུས་པོ་མཛེས་བཟོ་སྨན་བཅོས། སྨན་བཅོས་ལས་གཞིའི་རྩ་འཛིན་ནང་མ་གསལ་བའི་སྨན་བཅོས་རིགས་བཅས་ཡིན་འདུག

འཕྲོད་བསྟེན་བཀའ་བློན་མཆོག་གིས་གསུངས་དོན་ལྟར་ན། ད་ཆར་སྨན་བཅོས་བལྟ་སྐྱོང་ལས་གཞིའི་ནང་ཞུགས་མཁན། རྒྱ་གར་གཞིས་ཆགས་ཁག་ ༣༣ ཙམ་ནས་ཁྱོན་མི་ ༥༢༠༠ མཉམ་ཞུགས་བྱས་ཡོད་པ་དང་། དེའི་ནང་མི་སྒེར་བ་ ༡༤༨༢ དང་། ནང་མི་ ༨༡༧ ཙམ་མཉམ་ཞུགས་གནང་ཡོད་འདུག སྨན་བཅོས་བལྟ་སྐྱོང་ལས་གཞི་འདིར་རྒྱ་གར་ས་གནས་མི་འདྲ་བ་ ༤༦ ཙམ་གྱི་སྒེར་གྱི་སྨན་ཁང་ཁག་ཏུ་སྨན་བཅོས་བྱ་ཆོག་གི་ཡོད་འདུག་ལ། ཧི་ལ་ཅལ་མངའ་སྡེ་ལ་མཚོན་ན། ངྷ་ས་བདེ་ལེགས་སྨན་ཁང་དང་དབུས་སྨན་རྩིས་ཁང་། པཱ་ལིན་པུར། མན་ཌེ། བྷིར། མཱ་ཎ་ལི། སིམ་ལཱ་བཅས་ཀྱི་སྨན་ཁང་ཆེ་ཁག་ཏུ་སྨན་བཅོས་གནང་ཆོག་གི་ཡོད་འདུག

གསར་འགོད་པས་རྒྱ་གར་དང་བོད་མིའི་སྨན་བཅོས་བལྟ་སྐྱོང་བར་ཁྱད་པར་གང་འདྲ་ཡོད་མེད་སྐོར་དྲིས་པར་དྲུང་འཕར་ཚེ་རྒྱལ་ལགས་ཀྱིས་ལན་འདེབས་བྱས་དོན། “ རྒྱ་གར་སྨན་བཅོས་བལྟ་སྐྱོང་དང་བོད་མིའི་སྨན་བཅོས་བལྟ་སྐྱོང་ལས་གཞི་གཉིས་བར་གནམ་སའི་ཁྱད་པར་ཡོད། རྒྱ་གར་གྱི་ (Insurance Company) འགན་ལེན་ཚོགས་པ་ནི་ཚོང་དང་ཁེ་བཟང་ཁོ་ནའི་ཆེད་དུ་རེད། ང་ཚོའི་ལས་གཞི་འདི་སྤྱི་ཚོགས་ཀྱི་བདེ་རྩ་དང་སྤྱི་ཚོགས་ཀྱི་འཕྲོད་བསྟེན་ཡར་རྒྱས་གཏོང་ཆེད་ཡིན་སྟབས། ང་ཚོར་ག་རེ་རག་པ་དེ་ཕྱིར་མང་ཚོགས་ནང་གཏོང་དགོས་པ་རེད་མ་གཏོགས་ཁེ་བཟང་ལ་བསམ་བློ་བཏང་ཡོད་པ་མ་རེད། རྒྱ་གར་གྱི་འགན་ལེན་ཚོགས་པ་ཁག་ལ་ཆ་མཚོན་ན། ལོ་ ༦༠ བརྒལ་ཡོད་ན་སྨན་བཅོས་འགན་ལེན་ལས་གཞི་ནང་ཚུད་ཀྱི་མེད་ལ། དེ་བཞིན་སྔོན་ཆད་གློ་ནད་ཊེ་བྷེ་དང་། ནད་གཞི་འདྲ་མིན་བྱུང་མཁན་ཡིན་ནའང་ལས་གཞིའི་དེའི་ནང་ཚུད་ཀྱི་མ་རེད། ཁོང་ཚོར་ཆ་རྐྱེན་མང་པོ་ཞིག་ཚང་དགོས་པ་རེད། བོད་མིའི་སྨན་བཅོས་བལྟ་སྐྱོང་ལས་གཞི་འདི་བོད་མིའི་བདེ་རྩ་ཁོ་ནར་གཟིགས་པ་ཞིག་ཡིན་སྟབས། ང་ཚོས་དབྱེ་བ་འབྱེད་ཀྱི་ཡོད་པ་མ་རེད། ལས་གཞི་འདིར་བགྲེས་སོང་ལོ་ ༩༠ ཅན་ཞིག་བསླེབ་པ་ཡིན་ནའང་བཀྲ་ཤིས་བདེ་ལེགས་ཞུ་རྒྱུ་ཡིན་ལ། སྔོན་མ་ན་ཚ་བྱུང་མྱོང་མཁན་ཞིག་ཡིན་ཡང་ཕེབས་རོགས་ཟེར་རྒྱུ་ཡིན། ” ཞེས་བརྗོད་བྱུང་།

ཁོང་གིས་མུ་མཐུད་དུ་འཕྲོད་བསྟེན་ལས་ཁུངས་ཀྱིས་ངྷ་སའི་ཌེན་ཌ་སྨན་ཁང་དང་ཅན་ངྷི་གྷར་སྨན་ཁང་ལ་མཉམ་འབྲེལ་མ་བྱས་པའི་སྐོར་ལ་ལན་འདེབས་བྱས་དོན།  “ ང་ཚོས་འབྲེལ་བ་བྱེད་ས་ཚང་མ་སྒེར་གྱི་སྨན་ཁང་ཆགས་ཡོད། གཞུང་གི་སྨན་ཁང་ཁག་དང་འབྲེལ་མ་བྱས་པའི་རྒྱུ་མཚན། ཉེ་ཆར་ང་ཚོས་ཌེན་ཌ་དང་ཅན་ངྷི་སྒར་སོགས་གཞུང་གི་སྨན་ཁང་ཆེ་ཁག་ལ་འབྲེལ་བ་བྱས་ཡོད་ཀྱང་། ཕར་འབྲེལ་བ་ག་ཚོད་བྱས་ཀྱང་ཚུར་ལན་ཡག་པོ་ཞིག་གནང་གི་མི་འདུག མ་གཞི་ཁོང་ཚོ་གཞུང་གི་སྨན་ཁང་གི་སྨན་པ་ཡིན་སྟབས། གསོལ་ཕོགས་ཏག་ཏག་རག་འགྲོ་ཡི་ཡོད་པ་རེད། ནད་པ་ཡོང་མིན་ལ་ལས་བྱེད་ཚོར་ཁྱད་པར་ཡོད་པ་མ་རེད། ཡིན་ནའང་། ང་ཚོས་སྒེར་གྱི་སྨན་ཁང་ཁག་ལ་འབྲེལ་བྱས་སྐབས། ག་དུས་འབྲེལ་བ་བྱས་ན་ལན་ཏག་ཏག་གནང་གི་འདུག འབྲེལ་བའང་གནང་བདེ་བོ་ཞིག་ཡོད་པ་རེད། དེའི་ཐོག་ནས་ང་ཚོས་སྒེར་གྱི་སྨན་ཁང་ཁག་བདམས་པ་ཡིན། ” ཞེས་བརྗོད་སོང་།  

སྨན་བཅོས་བལྟ་སྐྱོང་ལས་གཞིའི་ནང་རྒྱ་གར་ནང་གནས་སྡོད་བོད་མི་མ་གཏོགས་འབྲུག་དང་བལ་ཡུལ་གྱི་བོད་མི་རྣམས་མཉམ་ཞུགས་གནང་ཆོག་གི་མི་འདུག

གསར་འགོད་པ། དཔལ་ལྡན།