རྒྱ་གར་ལྷོ་ཕྱོགས་འབྲས་སྤུངས་དགོན་པའི་གྲྭ་སྐལ་བཟང་ལགས་ཀྱིས་གསར་ལམ་དུ་གནས་ཚུལ་མཁོ་སྤྲོད་བྱས་པ་ལྟར་ན། འདི་ལོའི་ཕྱི་ཟླ་ ༡ པའི་ཚེས་ ༢༣ ཉིན་ཁམས་བྲག་མགོ་རྫོང་དུ་བོད་མི་སྐྱ་སེར་གཉིས་ཀྱིས་རྒྱ་ནག་གི་དྲག་གནོན་སྲིད་བྱུས་ལ་མི་འདོད་པའི་རྣམ་འགྱུར་བསྟན་ཏེ། ངོ་རྒོལ་སྐད་འབོད་བྱས་སྐབས་རྒྱ་ནག་དྲག་ཆས་དམག་མིས་བོད་མི་ཁག་ཅིག་དམར་གསོད་དང་བོད་མི་ཚོ་མུ་མཐུད་འཛིན་བཟུང་བྱེད་ཀྱིན་པའི་གནས་ཚུལ་ཐོན་བཞིན་པ་ལྟར། ཟླ་འདིའི་ཕྱི་ཚེས་ ༢ ཉིན་སི་ཁྲོན་ཞིང་ཆེན་དང་དཀར་མཛེས་བོད་རིགས་རང་སྐྱོང་ཁུལ་གྱི་ཉེན་རྟོག་པ་བཅས་ཀྱིས། བྲག་མགོ་དགོན་པའི་ཕྱག་མཛོད་རྒན་པ་དགེ་བཤེས་བསྟན་འཛིན་དཔལ་བཟང་ལགས་སྐབས་དེའི་ལས་འགུལ་གྱི་སྣེ་ཁྲིད་པ་གཙོ་བོ་ཡིན་པའི་ཉེས་མིང་འོག་འཛིན་བཟུང་བཙན་ཁྲིད་བྱས་ཏེ། ད་ལྟའི་ཆར་གར་ཡོད་ཅི་བྱུང་གི་གནས་ཚུལ་ཤེས་ཀྱི་མེད་པར་ལྷག་ཡོད་འདུག
ཡང་གནས་ཚུལ་མཁོ་སྤྲོད་པས་བརྗོད་པ་ལྟར་ན། བྲག་མགོ་ཁུལ་དུ་ཞི་རྒོལ་གྱི་གནས་ཚུལ་བྱུང་རྗེས་དམག་མི་སྟོང་ཕྲག་མང་པོ་འགྲེམས་འཇོག་གིས་དམ་དྲག་བྱས་ཡོད་པ་མ་ཟད། ཉེ་ལམ་བྲག་མགོ་དགོན་པའི་ནང་དམག་མི་དང་ལས་བྱེད་མི་སྣ་མང་དུ་བཏང་སྟེ། གྲྭ་བ་བཞི་ལ་ལས་བྱེད་གཅིག་རེ་བསྐོ་བཞག་གིས་གྲྭ་བ་ཚོའི་འགྲོ་འདུག་སྤྱོད་གསུམ་དང་ཆོས་ཕྱོགས་ཀྱི་བྱེད་སྒོ་ཁག་ལ་དམ་དྲག་ཤུགས་ཆེར་བྱེད་ཀྱི་ཡོད་འདུག་ལ། ས་གནས་མི་མང་ལ་མཚོན་ནའང་། ད་ལྟའི་ཆར་ས་གནས་ཀྱི་རྫོང་དང་ཞང་གི་གཞུང་ལམ་ཁག་ཏུ་དམག་མི་འགྲེམས་འཇོག་གིས་ལྟ་རྟོག་བྱེད་ཀྱིན་པ་མ་ཟད། རོང་འབྲོག་གཉིས་སུ་སློབ་གསོ་རུ་ཁག་བཙུགས་ཏེ་སློབ་གསོ་སྤྲོད་ཀྱིན་པ་སོགས་དམ་དྲག་ཤུགས་ཆེར་བྱེད་ཀྱི་ཡོད་འདུག
དགེ་བཤེས་བསྟན་འཛིན་དཔལ་བཟང་ལགས་ནི། བྲག་མགོ་ནོར་བ་གྲོང་ཚོའི་ཕ་དོན་གྲུབ་བཀྲ་ཤིས་དང་མ་བདེ་དབང་གཉིས་ཀྱི་བུ་ཡིན་པ་དང་། ཕྱིས་སུ་བྲག་མགོ་དགོན་པའི་ཆོས་སྒོར་ཞུགས་ཏེ་སློབ་གཉེར་གནང་འདུག ༡༩༨༦ ལོར་བཙན་བྱོལ་དུ་ཕེབས་ཏེ་ལྷོ་ཕྱོགས་འབྲས་སྤུངས་བློ་གསལ་གླིང་གྲྭ་ཚང་གི་ཆོས་སྒོར་ཞུགས་ཡོད་པ་དང་། ༢༠༠༩ ལོར་ཕྱིར་རང་ཡུལ་དུ་ཕེབས་ནས་དགོན་པའི་ཕྱག་མཛོད་ཀྱི་འགན་བཞེས་འདུག
གསར་འགོད་པ། དོན་གོ
ཉེས་མེད་བཙོན་དུ་འཛིན་པའི་སྨྱོ་ཧམ་ཆེ་བའི་སྒེར་གཅོད་པ་དག་ལ་འགལ་ཟླ་ཞིག་མི་དགོས་་་་གང་ལྟར་བོད་པའི་གྲྭ་བཙུན་དང་གཞོན་སྐྱེས་སློབ་སྦྱོང་བ་དེ་དག་ཐབས་གང་དྲག་གིས་མེད་པར་བཟོ་དགོས་པ་ཁོང་ཚོས་ལས་འགན་རེད་་་་འོན་ཀྱང་དུས་ནམ་ཡང་སྟོང་བསམ་དེ་འགྲུབ་མི་སྲིད་་་་
ཉེས་པ་ཅི་ཡང་མེད་ཀྱང་ཉེས་ཁྲིམས་བཅས་ཡོད་ལབ་ན། འགལ་ཟླ་ཞིག་དང་མི་སྲིད་པ་འདྲ་བོ་འདུག་ནའང་། སྨྱོ་ཧམ་ཅན་ཚོར་ཐབས་ཤེས་གང་ཡོད་དམ།