རྒྱ་གར་ལྷོ་ཕྱོགས་གནས་སྡོད་ཀུན་བཟང་བསྟན་འཛིན་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། རྒྱ་ནག་གཞུང་གིས་ཟླ་འདིའི་ཕྱི་ཚེས་ ༡༤ ཉིན་གྱི་དགོང་མོ་འབའ་ཤིང་ཁྲི་དགོན་པའི་རང་ལོ་ ༤༠ ཡས་མས་ཡིན་པའི་མཁན་པོ་གདན་གྲོལ་ལགས་དང་། གཞན་གྲྭ་བ་གསུམ་གློ་བུར་དུ་འཛིན་བཟུང་བྱས་ཏེ་ད་ལྟའི་ཆར་གར་ཡོད་ཅི་བྱུང་གི་གནས་ཚུལ་ཅི་ཡང་མེད་པར་ལྷག་ཡོད་པ་མ་ཟད། འབའ་ཤིང་ཁྲི་དགོན་པར་ཉེན་རྟོག་པ་དང་དམག་མི་ ༣༡ དང་ལས་བྱེད་མི་སྣ་བཅས་བསྡོམས་མི་ ༥༠ ལྷག་མངགས་གཏོང་གིས་རྒྱལ་གཅེས་ཆོས་གཅེས་ཀྱི་སློབ་གསོ་སྤེལ་གྱིན་པར་མ་ཟད། ཉིན་མཚན་དབྱེར་མེད་དུ་དགོན་པའི་མཐའ་བསྐོར་ཏེ་དགོན་པར་དམ་དྲག་དང་། རྫོང་གི་ས་གནས་ཡོངས་སུ་དམག་མི་འགྲེམས་འཇོག་གིས་དམ་དྲག་ཤུགས་ཆེར་བྱེད་ཀྱི་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། རྒྱ་ནག་གཞུང་གིས་འདི་ལོའི་ཕྱི་ཟླ་ ༣ པའི་ཚེས་ ༡༨ ཉིན་མཚོ་སྔོན་འབའ་རྫོང་སེར་སྐྱ་བོད་མི་སྟོང་ཕྲག་མང་པོས་རྒྱ་གཞུང་གི་དྲག་གནོན་སྲིད་ཇུས་ལ་ངོ་རྒོལ་བྱེད་སྐབས། བོད་མི་སྐྱ་སེར་ ༦༠ མ་ཟིན་ཙམ་ཞིག་འཛིན་བཟུང་བྱས་ཏེ། ཉེ་ཆར་བོད་མི་ཁག་ཅིག་ཀློད་གྲོལ་བཏང་ཡོད་ཀྱང་། ཤིང་ཁྲི་དགོན་པའི་གྲྭ་ཚུལ་ཁྲིམས་རིན་ཆེན་དང་ཡེ་ཤེས་རྡོ་རྗེ། ཤེས་རབ་དཔལ་བཟང་། པདྨ་རིག་འཛིན། བྱང་ཆུབ་ནོར་བུ། གཞན་ཕན་མཐའ་ཡས། ཕྱོགས་ལས་རྣམ་རྒྱལ། བསྟན་འཛིན་རང་ཤར། བཟོད་པ་རྒྱལ་མཚན། བློ་བཟང། བྱང་ཆུབ་རྒྱལ་མཚན། གུ་རུ་རྡོ་རྗེ། འཇམ་དབྱངས་རྒྱ་མཚོ། དགེ་འདུན་ཆོས་འཕེལ་བཅས་གྲྭ་བ་ ༡༤ རྫོང་ཁྲིམས་ཁང་དུ་བཀག་ཉར་བྱས་ཏེ། ཉིན་མཚན་དབྱེར་མེད་དུ་སློབ་གསོ་སྤྲོད་ཀྱི་ཡོད་འདུག་ལ། མི་སྐྱ་རྡོ་རྗེ་ཚེ་བྷེ་དང་རྡོ་རྗེ་རྒྱལ། རྡོ་རྗེ་དོན་འགྲུབ། དཔའ་ཐར་རྒྱལ། ཚེ་བརྟན་རྒྱལ་བཅས་མི་སྐྱ་ ༥ ད་ལྟའི་ཆར་ཡང་གར་ཡོད་ཀྱི་གནས་ཚུས་མ་ཤེས་པར་ལྷག་འདུག
གཞན། ཕྱི་ཟླ་ ༣ པའི་ཚེས་ ༡༨ ཉིན་གྱི་ངོ་རྒོལ་སྐབས་མི་ཚོགས་ཁྲོད་འགད་རྫས་གཡུགས་ཏེ་བོད་མི་ཞིག་ལ་རྨས་སྐྱོན་ཚབས་ཆེན་ཕོག་ཡོད་པ་ལྟར། བོད་མི་ཁོང་ཟི་ལིང་གྲོང་ཁྱེར་གྱི་དམག་མིའི་སྨན་ཁང་ཞིག་ཏུ་སྨན་བཅོས་བྱེད་ཀྱིན་ཡོད་ཀྱང་། ཀླད་པར་རྨས་སྐྱོན་ཚབས་ཆེན་ཕོག་ཡོད་པའི་གནས་སྟངས་ཛ་དྲག་ཏུ་གྱུར་ཡོད་ཡོད་འདུག་ལ། ཉེ་ལམ་རྒྱ་ནག་གཞུང་གིས་ས་གནས་གཞན་ནས་སྨན་ཁང་དུ་འཚམས་འདྲིར་ཡོང་མཁན་དག་བཀག་འགོག་བྱས་ཡོད་པ་མ་ཟད། ད་ལྟའི་ཆར་ཁོང་གི་ནང་མིར་ཡང་མཚམས་རེར་མ་གཏོགས་ཐུག་འཕྲད་བྱེད་མི་ཆོག་པར་བཟོས་ཏེ་དམ་དྲག་བྱེད་ཀྱི་ཡོད་འདུག
རྒྱལ་གཅེས་པ་ཚོར་གདུང་སེམས་མཉམ་བསྐྱེད་དང་མགྱོགས་མྱུང་ངང་བཙོན་གྲོལ་ཡོང་བའི་སྨོན་ལམ།་་་་རྒྱ་འདྲེས་གནོད་པ་གང་སར་ཁྱབ་ཀྱིན་འདུག་་་་