ཧྥ་རན་སིའི་སྲིད་འཛིན་འོས་མི་ཚོ་༸གོང་ས་མཆོག་དང་མཇལ་འཕྲད་ཞུ་འདུན་འདུག

ཉེ་ཆར་ཧྥ་རན་སིའི་སྲིད་འཛིན་འོས་བསྡུའི་འགྲན་རྩོད་ཁྲོད་ཞུགས་མཁན་འོས་མི་ ༡༠ ཁྲོད་ནས་འོས་མི་ ༩ ཡིས་བོད་དོན་ལ་རྒྱབ་སྐྱོར་དང་། ༸གོང་ས་མཆོག་དང་མཇལ་འཕྲད་ཞུ་འདུན་ཡོད་པའི་རྣམ་འགྱུར་བསྟན་ཡོད་འདུག

ཉེ་ཆར་ཧྥ་རན་སིའི་སྲིད་འཛིན་འོས་བསྡུའི་འགྲན་རྩོད་རྣོ་ངར་ཤུགས་ཆེ་རུ་འགྲོ་བཞིན་པའི་སྐབས་དང་བསྟུན་ནས། གསར་ལམ་ཁག་གིས་སྔ་ཕྱིར་ཐེངས་འདིའི་སྲིད་འཛིན་འོས་མིར་ལངས་མཁན་ཚོར་བོད་རྒྱའི་གནད་དོན་སྐོར་ནས་དྲི་བ་བཏོན་པར།  སྲིད་འཛིན་འོས་བསྡུའི་འགྲན་རྩོད་ལ་ཞུགས་མཁན་ ༡༠ ཁྲོད་ནས། འོས་མི་ ༩ ཡིས་༸གོང་ས་མཆོག་དང་མཇལ་འཕྲད་ཞུ་འདོད་དང་།  བོད་རྒྱའི་གནད་དོན་ཐད་དོ་སྣང་དང་བོད་མིའི་དཀའ་ངལ་ལ་རྒྱབ་སྐྱོར་ཡོད་པའི་རྣམ་འགྱུར་བསྟན་ཡོད་འདུག  

ཟླ་འདིའི་ཕྱི་ཚེས་ ༡༩ ཉིན་ཧྥ་རན་སིའི་༼ལྟ་ཞིབ་གསར་པ༽ཞེས་པའི་དུས་དེབ་ཀྱིས་ཐེངས་འདིའི་སྲིད་འཛིན་འོས་བསྡུའི་རྒྱལ་ཁ་འཐོབ་རྒྱུར་རེ་བ་ཆེ་ཤོས་ལྡན་པའི་འོས་མི་ཧོ་ལན་ཌི་(Francois Hollande)དང་། ད་ལྟའི་སྲིད་འཛིན་སཱར་ཁའོ་སི་(Nicholas Sarkozy) གཉིས་ལ་བོད་རྒྱའི་གནད་དོན་ཐད་ཡིག་ཐོག་ནས་དྲི་བ་བཀོད་པར། སྲིད་འཛིན་སཱར་ཁའོ་སི་ཡིས་ “ཧྥ་རན་སིའི་མི་དམངས་ཀྱིས་བོད་ཀྱི་གནད་དོན་ཐད་དོ་སྣང་ཤུགས་ཆེན་པོ་ཡོད་པ་ངས་ཤེས་ཀྱི་ཡོད། ང་རང་ནི་ད་ལྟའི་བར་ཏཱ་ལའི་བླ་མ་དང་མཇལ་འཕྲད་ཞུས་མཁན་ཧྥ་རན་སིའི་སྲིད་འཛིན་ཐོག་མ་དེ་ཆགས་ཡོད། རྗེས་ཕྱོགས་ད་དུང་ཏཱ་ལའི་བླ་མ་དང་མཇལ་འཕྲད་ཞུ་རྒྱུར་འགོག་རྐྱེན་གང་ཡང་མེད” ཅེས་བརྗོད་ཡོད་པ་དང་། སྲིད་འཛིན་འོས་བསྡུའི་འགྲན་རྩོད་ཁྲོད་མི་མང་གི་རྒྱབ་སྐྱོར་ཤུགས་ཆེ་ཤོས་ཐོབ་བཞིན་པའི་འོས་མི་ཧོ་ལན་ཌི་ལགས་ཀྱིས་ཀྱང་། “ཏཱ་ལའི་བླ་མ་ནི་ནོ་བྷེལ་ཞི་བདེ་གཟེངས་རྟགས་བཞེས་མཁན་གྱི་འཛམ་གླིང་མི་མང་གིས་གུས་བརྩི་ཡོད་པའི་དབུ་ཁྲིད་ཅིག་རེད།  ཉེ་སྔོན་ཁོང་གིས་ཆབ་སྲིད་ཀྱི་འགན་དབང་ཡོངས་རྫོགས་རྩིས་སྤྲོད་བྱས་ཟིན་པ་རེད། དེར་བརྟེན། ང་རང་གི་ངོས་ནས་ཏཱ་ལའི་བླ་མ་དང་མཇལ་འཕྲད་ཞུ་རྒྱུར་འགོག་རྐྱེན་གང་ཡང་མཐོང་གི་མེད།” ཅེས་བརྗོད་ཡོད་པ་རེད།

གཞན་ཡང་། གསར་ལམ་ཁག་དང་བོད་དོན་རྒྱབ་སྐྱོར་བ་དག་གིས་བོད་རྒྱའི་གནད་དོན་དང་འབྲེལ་བའི་ཐོག་ནས། ཐེངས་འདིའི་སྲིད་འཛིན་འོས་མིར་ལངས་མཁན་རྣམས་ལ་༸གོང་ས་མཆོག་དང་མཇལ་འཕྲད་ཞུ་འདུན་ཡོད་མེད་དང་། བོད་རྒྱའི་གནད་དོན་སོགས་ཀྱི་ཐད་སྔ་ཕྱིར་དྲི་བ་བཏོན་ཡོད་པ་ལྟར།  སྲིད་འཛིན་འོས་ལྕམ་མི་ཨེ་ཝ་ཇོ་ལའེ་(Eva Joly)ལགས་ཀྱིས། “བོད་ཀྱི་གནད་དོན་དེ་ངེས་པར་དུ་གྲོས་མོལ་གྱི་ལམ་ནས་སེལ་དགོས། གལ་སྲིད་ང་རང་ལ་སྲིད་འཛིན་ཐོབ་པ་ཡིན་ན། ཏཱ་ལའི་བླ་མ་མཆོག་དང་མཇལ་འཕྲད་ཞུ་རྒྱུ་ཡིན་པར་མ་ཟད། བོད་མི་མང་གིས་འོས་འདེམས་བྱས་པའི་དབུས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་ལའང་མཇལ་འཕྲད་གནང་རྒྱུ་ཡིན། ཧྥ་རན་སིའི་སྲིད་གཞུང་གིས་རྒྱ་ནག་དང་ཚོང་འབྲེལ་ཡོད་པ་རྒྱུ་མཚན་དུ་བྱས་ཏེ། འགྲོ་བ་མིའི་ཐོབ་ཐང་གནད་དོན་སྣང་མེད་དུ་གཏོང་མི་རུང་།” ཅེས་བརྗོད་འདུག

སྲིད་འཛིན་འོས་མི་ལྕམ་མའེ་རེན་ལའེ་པེན་(Marine Le Pen)ལགས་ཀྱིས། “མ་འོངས་པར་ང་རང་ཏཱ་ལའི་བླ་མ་དང་མཇལ་འཕྲད་ཞུ་འདོད་ཡོད་ལ།   ཧྥ་རན་སི་ནི་རང་དབང་དང་བདག་དབང་ལྡན་པའི་རང་བཙན་རྒྱལ་ཁབ་ཅིག་རེད། མི་སུ་དང་ཐུག་འཕྲད་བྱེད་མིན་དེ་གཞན་སུ་ལའང་བསྟུན་མཁས་བྱེད་དགོས་དོན་ཡོད་པ་མ་རེད།” ཅེས་བརྗོད་འདུག

སྲིད་འཛིན་འོས་མི་ཧྥ་རན་ཀའོ་སི་བྷེ་རའོ་(Francois Bayrou) ལགས་ཀྱིས། “གལ་སྲིད་ཏཱ་ལའི་བླ་མ་མཆོག་ལ་ཐུགས་མོས་ཡོད་ཚེ། རང་ཉིད་ཀྱི་ངོས་ནས་ཏཱ་ལའི་བླ་མར་མཇལ་འཕྲད་ཞུ་རྒྱུར་དགའ་སྤོབས་ཆེན་པོ་ཡོད།” ཅེས་བརྗོད་ཡོད་པ་དང་། ཁོང་གི་མགྲིན་ཚབ་པ་ལྕམ་ནཱ་ཐ་ལི་ལགས་ཀྱིས་ཀྱང་། གལ་སྲིད་ཧྥ་རན་ཀའོ་སི་བྷེ་རའོ་ལགས་སྲིད་འཛིན་དུ་བདམས་ཐོན་བྱུང་བ་ཡིན་ན། ཁོང་གིས་རྒྱ་ནག་གཞུང་གིས་བོད་ཐོག་འཛིན་པའི་དྲག་གནོན་སྲིད་ཇུས་དེར་གནོན་ཤུགས་སྤྲད་དེ། རྒྱ་གཞུང་གིས་ཏཱ་ལའི་བླ་མ་མཆོག་གི་སྐུ་ཚབ་དང་ལྷན་དུ་འབྲེལ་མོལ་གནང་སྟེ་བོད་ཀྱི་གནད་དོན་སེལ་རྒྱུར་སྐུལ་འདེད་བྱ་རྒྱུ་ཡིན་པར་མ་ཟད། དབུས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་ལའང་མཇལ་འཕྲད་གནང་རྒྱུ་ཡིན་པ་བརྗོད་འདུག

སྲིད་འཛིན་འོས་མི་ཧྥེ་ལེ་ཕའེ་ཕའོ་ཋོ་(Philippe Poutou)ལགས་ཀྱིས། “ཏཱ་ལའི་བླ་མ་དང་མཇལ་འཕྲད་ཞུ་རྒྱུར་འདོད་པ་ཡོད་ལ། བོད་མིར་རང་ཐག་རང་གཅོད་ཀྱི་ཁེ་དབང་ངེས་པར་དུ་སྤྲོད་དགོས་པ་རེད།” ཅེས་བརྗོད་དེ། རྒྱ་གཞུང་གིས་བོད་ཐོག་འཛིན་པའི་དྲག་གནོན་སྲིད་ཇུས་ལ་སྐྱོན་བརྗོད་དང་། བོད་ནང་གི་ཆབ་སྲིད་བཙོན་པ་ཡོངས་རྫོགས་གློད་བཀྲོལ་བཏང་སྟེ། གྲངས་ཉུང་མི་རིགས་ཀྱི་ཁེ་དབང་ལ་བརྩི་མཐོང་སྤྲོད་དགོས་པའི་རེ་སྐུལ་གནང་ཡོད་པ་རེད།

སྲིད་འཛིན་འོས་མི་ལྕམ་ནེ་ཐའེ་ལི་ཨར་ཐཱ་ཌི་(Nathalie Arthaud)ལགས་ཀྱིས། ང་རང་ངོས་ནས་རྒྱ་གཞུང་གིས་ཆ་རྐྱེན་གང་ཡང་མེད་པའི་ཐོག་ནས་བོད་མིར་རང་ཐག་རང་གཅོད་ཀྱི་ཁེ་དབང་སྤྲོད་དགོས་པར་རྒྱབ་སྐྱོར་དང་། རྒྱ་གཞུང་གིས་བོད་ཐོག་འཛིན་པའི་དྲག་གནོན་སྲིད་ཇུས་ལ་སྐྱོན་བརྗོད་བྱ་རྒྱུ་ཡིན་སྐོར་བརྗོད་ཡོད་པ་དང་། དེ་བཞིན། སྲིད་འཛིན་འོས་མི་ཇའེ་ཁུ་སི་ཆི་མའེ་ནའེ་ཌི་(Jacques Cheminade)ལགས་ཀྱིས་ཀྱང་། “ངས་བསམ་ཚུལ་ནི་བོད་རྒྱ་གཉིས་ཀྱིས་བར་གནས་རྒྱལ་ཁབ་གསུམ་པ་ཞིག་བརྒྱུད་དེ། གྲོས་མོལ་གྱི་ལམ་ནས་ཕྱོགས་གཉིས་ཀྱི་འགལ་བ་རྣམས་སེལ་དགོས།” ཅེས་བརྗོད་ཡོད་པ་རེད།

སྲིད་འཛིན་འོས་མི་མའེ་ལི་ཁོན་(Jean Luc Melechon)ལགས་ཀྱིས་ཐད་ཀར་བོད་རྒྱའི་གནད་དོན་གྱི་དྲི་བར་ལན་འདེབས་བྱས་མེད་ཀྱང་།  ཧྥ་རན་སིའི་བོད་རང་བཙན་སློབ་ཕྲུག་ཚོགས་པའི་འགན་འཛིན་ཝེ་ལིས་ཁི་སི་ལགས་ཀྱིས་བརྗོད་དོན་ལྟར་ན།  ཁོང་གི་ཆབ་སྲིད་ཚོགས་པའི་སྲིད་འཛིན་གཞོན་པ་ཇའེ་ཁུ་སི་(Jacques Généreux)ལགས་ཀྱིས་ཧྥ་རན་སིའི་རིག་གནས་བརྙན་འཕྲིན་བརྒྱུད་བོད་ཀྱི་གནད་དོན་ཐད་རྒྱབ་སྐྱོར་ཡོད་པ་ཡོངས་བསྒྲགས་བྱས་ཡོད་འདུག

ཧྥ་རན་སའི་སྲིད་འཛིན་འོས་མིས་བོད་རྒྱའི་གནད་དོན་གླེང་སློང་དང་༸གོང་ས་མཆོག་དང་མཇལ་འཕྲད་གནང་འདུན་ཡོད་པའི་སྐོར་གྱི་གནས་ཚུལ་རྣམས།  རྒྱ་ནག་གནས་འཕྲིན་དྲ་རྒྱ་ཞིན་ལིང་ཝེ་པའོ་སྟེང་དུའང་བརྒྱུད་འགོད་བྱས་འདུག