གླིང་ཚ་ཚེ་བརྟན་རྡོ་རྗེ་མ་བུ་གསུམ་ངྷ་ས་ནས་ལྷ་ས་བར་གྱི་བོད་སྐྱོད་གོམ་བགྲོད་ཉིན་ང་བཅུ་འགྲོ་བཞིན་པའི་སྐབས་འདིར། དུས་བབ་གསར་ཁང་གིས་ཁ་པར་བརྒྱུད་ཁོང་ཚོའི་གནས་ཚུལ་རྒྱུས་ལོན་དང་། གོམ་བགྲོད་སྐབས་རྒྱ་ནག་རྒྱལ་དར་འཁྱེར་དགོས་པའི་རྒྱུ་མཚན། གལ་སྲིད་བོད་ནང་བསླེབ་ཐུབ་པ་བྱུང་ན་འཆར་གཞི་གང་འདྲ་ཡོད་མེད་བཅས་ཀྱི་ཐད་རྒྱུས་ལོན་བྱས་ཡོད།
ད་ལྟ་གླིང་ཚ་ཚེ་བརྟན་རྡོ་རྗེ་མ་བུ་གསུམ་ཡུ་པེ་(UP) མངའ་སྡེའི་རྒྱལ་ས་ལུཀ་ནཱོཝ་(Lucknow) ནས་སྤྱི་ལེ་ ༡༠༠ ལྷག་བརྒལ་ཡོད་ཅིང་། ངྷ་ས་ནས་སྤྱི་ལེ་ ༡༡༥༠ ཙམ་གྱི་སར་འབྱོར་ཞིང་། རྒྱ་གར་དང་བལ་ཡུལ་ས་མཚམས་སུ་ཉིན་གྲངས་བཅོ་ལྔ་ཡས་མས་སུ་འབྱོར་ཐུབ་པའི་ཚོད་དཔག་བྱེད་ཀྱི་ཡོད་འདུག ཁོང་ཚོར་ངྷ་སའི་ཚོགས་པ་སྐྱིད་སྡུག་བཅུ་གཅིག་གིས་དུས་ལྟར་མི་སྣ་ཆེད་གཏོང་གིས་རོགས་སྐྱོར་བྱེད་ཀྱིན་ཡོད་པ་མ་ཟད། ཚོགས་པ་གཞན་ཁག་ཅིག་དང་མི་སྒེར་པ། དེ་གཞིན་ཕྱི་རྒྱལ་ཁག་ཏུ་ཡོད་པའི་བོད་རིགས་མང་པོ་ཞིག་གིས་དངུལ་དངོས་ཐོག་དངོས་ཤུགས་བརྒྱུད་གསུམ་ནས་རོགས་སྐྱོར་མཚམས་མ་ཆད་པར་བྱེད་བཞིན་ཡོད་འདུག
ཕྱི་ཚེས་ ༢༦ ཉིན་འདི་ག་གསར་ཁང་གིས་ཁ་པར་བརྒྱུད་གླིང་ཚ་ཚེ་བརྟན་རྡོ་རྗེ་ལགས་སུ། ཉེ་ལམ་རྒྱ་གར་རྒྱལ་ས་ལྡི་ལི་ནས་རྒྱ་ནག་རྒྱལ་དར་མཉམ་འཁྱེར་བྱེད་དགོས་པའི་དམིགས་སྐོར་ནས་བཅར་འདྲི་ཞུས་པར། ཁོའི་གོམ་བགྲོད་དེ་ནི་ལས་འགུལ་ཞིག་མིན་པར་འཐབ་རྩོད་ཅིག་ཡིན་པ་དང་། འཐབ་རྩོད་དེའི་རྒྱུ་མཚན་དང་དམིགས་ཡུལ། རྒྱབ་ལྗོངས་ཚང་མ་དང་ཐོག་ནས་ཁ་གསལ་བཟོས་ཡོད་པར་མ་ཟད། དེ་ནི་དབུ་མའི་ལམ་གྱི་ལྟ་གྲུབ་དང་མ་འགལ་བ། བཙན་བྱོལ་གཞུང་གི་ལངས་ཕྱོགས་དང་མ་འགལ་བ། བོད་མི་མང་གི་འདོད་བློ་དང་མ་འགལ་བའི་ཐོག རྒྱ་ནག་གཞུང་གིས་བོད་མི་མང་གི་མངོན་འདོན་ལ་ཁས་ལེན་ཡོང་རྒྱུ་དང་། དེ་ལྟར་བྱུང་ན་ཁོ་རང་ཉིད་ལ་མཚོན་ནའང་རང་དབང་ལུང་པར་ཡོད་པའི་བོད་མི་སྒེར་པ་གཅིག་གི་ངོས་ནས་ཀྱང་། མ་འོངས་པར་རྒྱ་ནག་སྤྱི་མཐུན་རྒྱལ་ཁབ་ཀྱི་མངའ་ཁོངས་ནང་འདུག་རྒྱུར་འདོད་མོས་ཡོད་པ་དང་། དེར་གུས་བརྩི་དང་ཆེ་མཐོང་ཡོད་པའི་མཚོན་རྟགས་སུ་ཕྱིའི་གནོན་ཤུགས་གང་ཡང་མེད་པའི་ཐོག་རྒྱ་ནག་རྒྱལ་དར་ལ་བརྩི་མཐོང་བྱས་ཏེ་འཁྱེར་བཞིན་ཡོད་པ་ཞིག་ཡིན་འདུག ཁོང་གིས། “མདོར་བསྡུས་ནས་བཤད་ན། རྒྱ་ནག་གཞུང་གིས་ངས་བཏོན་པའི་དགོས་འདུན་དོན་ཚན་ལྔ་གཙོས་བོད་མི་མང་གི་མངོན་འདོད་ལ་ཁས་ལེན་བྱས་པ་ཡིན་ན། ང་བོད་མི་གཅིག་གི་ངོས་ནས་ཡིན་ནའང་། རྒྱ་ནག་སྤྱི་མཐུན་རྒྱལ་ཁབ་ཀྱི་མངའ་ཁོངས་སུ་འདུག་རྒྱུར་གྲ་སྒྲིག་ཨང་གསར་ཡིན་པའི་བརྡ་ལན་ཞིག་རྒྱ་གཞུང་ལ་སྤྲོད་ཀྱི་ཡོད།” ཅེས་བརྗོད་བྱུང་།
ཁོ་ལ་ས་མཚམས་ཁག་ནས་དཀའ་ངལ་ཆེན་པོ་མ་སྤྲད་པར་བོད་དུ་ཡོང་བཅུག་པ་ཡིན་ན། བོད་ནང་འབྱོར་རྗེས་ག་རེ་བྱ་འཆར་ཡོད་མེད་དྲིས་པར། དང་པོ་རྒྱ་གར་ས་མཚམས་ནས་གཏོང་མིན་དེ་གནད་དོན་གཅིག་རེད། རྒྱ་གར་གཞུང་གིས་ས་མཚམས་ནས་བཏང་བ་ཡིན་ན། བལ་ཡུལ་གཞུང་གིས་ཁོང་ཚོ་བལ་ཡུལ་རྒྱལ་ཁོངས་སུ་འཛུལ་འཇུག་མིན་དང་། བལ་ཡུལ་ནས་མུ་མཐུད་འགྲོ་འཇུག་མིན་དེ་གནད་དོན་གཉིས་པ་རེད། གཅིག་བྱས་ན་ཁོང་ཚོ་བལ་ཡུལ་བཙོན་ཁང་དུ་མི་ཚེ་རྫོགས་དགོས་པའི་གནས་སྟངས་འབྱུང་སྲིད་ལ། བལ་བོད་ས་མཚམས་ནས་ཁོང་མ་བུ་གསུམ་པོ་གར་སོང་ཆ་མེད་དུ་འགྱུར་རྒྱུའི་གནས་ཚུལ་ཡང་འབྱུང་སྲིད། གང་ལྟར་ཁོང་ཚོ་བོད་དུ་འབྱོར་ཐུབ་པའི་ཉིན་ཞིག་ཤར་ཚེ། སྐབས་དེར་ཁོང་གིས་ག་རེ་བཤད་རྒྱུ་ཡིན་པ་དང་། ག་རེ་བྱ་རྒྱུ་ཡིན་པ་དུས་ལ་བབ་པའི་སྐབས་སུ་བཤད་རྒྱུ་ལས་ད་ལྟའི་ཆར་བརྗོད་རྒྱུ་མིན་ཚུལ་ལན་འདེབས་གནང་སོང་། ཁོང་གིས་ “བཙན་བྱོལ་བོད་མའི་སྤྱི་ཚོགས་ཁྲོད་ང་ཚོས་རྒྱ་ནག་རྒྱལ་དར་འཁྱེར་བཞིན་པར་སྐད་ཆ་སྣ་ཚོགས་བཤད་མཁན་འདུག ཚོགས་པ་ཡིན་ན་འདྲ། མི་སྒེར་ཡིན་ན་འདྲ། ཁ་ཡོད་ལག་ཡོད་ཡིན་ན་བརྙན་འཕྲིན་འདྲ་གྲ་སྒྲིག་ཐོག་ཤོག་དང། ངས་བཤད་དགོས་པ་དེ་བཤད་ཆོག”ཅེས་དང་། ཡང་ཁོང་གིས་ “མི་འགྱངས་པར་ང་ཚོ་རྒྱར་གར་དང་བལ་ཡུལ་ས་མཚམས་ལ་འབྱོར་ངེས་ཡིན་སྟབས། བོད་པའི་གསར་འགོད་པ་དག་གིས་ང་ཚོར་ས་མཚམས་ནས་གནས་ཚུལ་ག་རེ་འབྱུང་མིན་སྐོར་ལ་དངོས་སུ་གནས་ཚུལ་རྒྱུས་ལོན་བྱ་ཐུབ་ན་ཡག་པོ་རེད་”ཅེས་བརྗོད་བྱུང་།
ཉེ་བའི་དུས་ནས་བོད་ནང་རང་ལུས་མེར་བསྲེགས་བྱུང་དང་འབྱུང་མུས་ཀྱི་གནས་སྟངས་འོག ཚེ་བརྟན་རྡོ་རྗེ་ལགས་ཀྱིས་བོད་དོན་འཐབ་རྩོད་ཆེད་ཨེ་ཛི་རལ་ནས་བཟའ་ཟླ་དང་བུ་བུ་མོ་གཉིས་བཅས་བཟའ་ཚང་ལ་ཁ་བྲལ་ཏེ། རྒྱ་གར་དུ་ཡོང་རྗེས་ཨ་མ་སྡོམ་པོ་སྐྱིད་དང་སྲང་མོ་ལྷ་མོ་སྐྱིད་གཉིས་ལྷན་དུ། གསུམ་བཅུའི་དུས་དྲན་ཐེངས་ ༥༣ པའི་ཉིན་ཞི་བའི་འབོད་ཚིག་ ༥ ཁྱེར་ཏེ་ངྷ་ས་ནས་ལྷ་ས་བར་གྱི་བོད་སྐྱོད་གོམ་བགྲོད་ཅིག་མགོ་འཛུགས་གནང་ཡོད། ཞི་བའི་འབོད་ཚིག་ ༥ ནི། ༡༽ ཆ་རྐྱེན་གང་ཡང་མེད་པའི་སྒོ་ནས་༧གོང་ས་མཆོག་རང་ཡུལ་དུ་ཕེབས་འཇུག་དགོས། ༢༽ ཆ་རྐྱེན་གང་ཡང་མེད་པའི་སྒོ་ནས་ཆུང་སྲིད་པཎ་ཆེན་དགེ་འདུན་ཆོས་ཀྱི་ཉི་མ་གཙོས་པའི་བོད་ཀྱི་ཆབ་སྲིད་བཙོན་པ་ཡོངས་རྫོགས་བཙོན་གྲོལ་གཏོང་དགོས། ༣༽ ཆ་རྐྱེན་གང་ཡང་མེད་པའི་སྒོ་ནས་བོད་མི་ཚོར་རང་གི་སྐད་དང་ཡི་གེ་སྦྱོང་བའི་བདག་དབང་སྤྲོད་དགོས། ༤༽བོད་མི་རྣམས་རང་ཡུལ་ནས་རང་གི་ཆོས་གོས་གོམས་གཤིས་སོགས་ཀྱི་དབང་ཆ་ཚང་སྤྲོད་དགོས། ༥༽ ད་ལྟའི་ཆེས་ཛ་དྲག་གི་སྡུག་སྦྱོང་མནར་གཅོད་གཏོང་མཁན་གྱི་དམག་མི་ཡོངས་རྫོགས་བོད་ས་ནས་ཕྱིར་འཐེན་བྱེད་དགོས་པ་བཅས་རེད།
གླིང་ཚ་ཚེ་བརྟན་རྡོ་རྗེ་ལགས་ཀྱིས་གོམ་བགྲོད་མགོ་འཛུགས་མ་བྱས་གོང་དུ་བོད་རྒྱའི་དཀའ་རྙོག་འདི་སེལ་མ་ཐུབ་པར་ལྷག་པའི་མཇུག་འབྲས་ཐད་བློ་འཚབ་ཆེན་པོས་“བོད་མི་མི་ཉུང་བ་ཞིག་ད་ལྟ་མེ་རུ་བསྒྲོན་ཟིན་པ་དང་མུ་མཐུད་དུ་བསྒྲོན་སྲིད་པ་དང་། རེ་རེ་བཞིན་སྒྲོན་ནས་འོང་ན། ཞི་བའི་མེ་ལྕེའམ་ཤེས་རབ་ཀྱི་མེ་ལྕེ། ད་དུང་སྙིང་རྗེ་ཡི་མེ་ལྕེ་འདི་དག་ཞེ་སྡང་གི་མེ་ལྕེ་རུ་མི་འགྱུར་བའི་ངེས་པ་གཏན་ནས་མེད། དེ་དུས་བོད་དང་རྒྱ་རིགས་མི་མང་ཉེས་མེད་ཆེས་མང་བོ་ཞིག་ལ་གནོད་འཚེ་ཐེབས་རྒྱུ་ཡིན་པ་ལས། རྒྱ་ནག་སྲིད་གཞུང་གི་དཔོན་ངན་དེ་དག་ལ་གྱོང་གུད་དང་འགྱོད་སེམས་རེ་སྐྱེ་སྲིད་ཀྱང་། དེ་དུས་བོད་རྒྱ་མི་མང་དཀྱུས་མ་དག་གི་ཚེ་སྲོག་གི་འགྲོ་གྲོན་གྱིས་མི་རིགས་གཉིས་ཀྱི་བར་དུ་འགལ་ཟླ་ཤུགས་ཆེར་བྱུང་སྟེ། ལོ་ངོ་ཉི་ཤུ་ཙམ་གྱི་རྗེས་སུ་བོད་མི་ཚོའི་ལག་ཏུ་མེ་མདའ་ཐོག་མི་སྲིད་པ་མིན། རྒྱུ་མཚན་ནི་བོད་མི་ཚང་མ་བྱང་ཆུབ་སེམས་དཔའ་མིན་ལ། སངས་རྒྱས་ཀྱང་དེ་བས་ཆགས་མེད། བོད་མི་རྣམས་འགྲོ་བ་མི་དཀྱུས་མ་ཤ་སྟག་ཡིན། ”ཞེས་བྲིས་ཡོད་པ་རེད།
ཨ་མ་ལྡོམ་པོ་སྐྱིད་མ་བུ་གསུམ་གྱིས། བོད་མི་ཤི་གསོན་གཉིས་ཀྱི་དམིགས་ཡུལ་བོད་ཀྱི་རང་དབང་དང་བདེ་སྐྱིད་ཀྱི་མངོན་འདོད་ཆེད། ཉིན་ཞག་སྒྲིལ་ནས་དཀའ་ཚེགས་བསམ་བརྗོད་ལས་འདས་པ་ཞིག་ཕྲག་ཏུ་ཁྱེར་ཏེ། བློས་གཏོང་བྱེད་པའི་ཁྱིམ་ཚང་འདིའི་བྱས་རྗེས་དང་བཀའ་དྲིན་ནི། ད་ལྟ་དང་མ་འོངས་པའི་མི་རབས་རྣམས་ཀྱིས་ཇི་ལྟར་གསབ་ནུས་སྙམ། འདི་ནི་ཁྱིམ་ཚང་ཞིག་གིས་མི་རིགས་ཀྱི་འགན་འཁྲི་གཅེས་ཉར་བྱས་པའི་དཔེ་དབྱིབས་བླ་མ་ན་མེད་པ་ཞིག་ཡིན་པར་ངོས་འཛིན་ཞུ་བཞིན་ཡོད། འདིའི་རིགས་ཞེན་དང་གཏོང་སེམས། སྙིང་སྟོབས་དང་རྣམ་དཔྱོད་ནི་ལྷ་ཀླུ་གཉེན་གསུམ་གྱི་མཆོད་གནས་ཤིག་ཅི་ལ་མིན། འདི་ནི་རྒྱལ་སྤྱི་དང་རྒྱ་ནག་གིས་དོ་སྣང་བྱེད་པའི་རེ་བ་ཡོད་ལ། ནམ་ཞིག་རི་སྙིལ་ས་གས་དང་རྡོ་ཆག་ཆུ་ཆད་ཀྱི་དུས་ཚོད་ཅིག་ཡོང་མི་སྲིད་པའི་ངེས་པ་ག་ལ་ཡོད། སྐབས་དེ་དུས་གོད་ཆག་ཐམས་ཅད་ཀྱི་འགན་འཁུར་རྒྱ་ནག་དང་རྒྱལ་སྤྱི་ལ་ཡོད་པ་ཞིག་རེད། ཨ་མ་ལྡོམ་པོ་སྐྱིད་མ་བུ་གསུམ་གྱི་ཆེད། གུས་པས་ཡིད་དུང་དུང་ངང་དགོན་པ་ན་གསོལ་བ་དང་རིམ་གྲོ་བྱེད་བཞིན་ཡོད། ཁོང་མ་བུ་གསུམ་གྱི་བསམ་དོན་འགྲུབ་པར་སྨོན་་་་་
དོན་ངོ་མར་བོད་ལ་གོམ་བགྲོད་བསྐྱོད་རྒྱུར་བློ་ཐག་ཆོད་ཚེ་བལ་ཡུལ་ས་མཚམས་ལ་སླེབས་མཚམས་གསང་བའི་ཐོག་ནས་ཐོན་དགོས། དེ་མིན་བལ་ཡུལ་གྱིས་གཏོང་རྒྱུ་མིན་པ་ནི་ཧ་གོ་གསལ་ཐིང་རེད། དེ་ལ་དོགས་པ་སྤུ་ཙམ་ཡང་མི་དགོས། བལ་ཡུལ་ས་ཐོག་ཏུ་སླེབས་མཚམས་དེ་ནས་སླར་ཡང་གོམ་བགྲོད་འགོ་བཙུགས་ཀྱིས་འགྲམ་གྱི་འགག་སྒོ་མ་བརྒྱུད་པར་ཤར་གངས་ལ་བརྒྱད་ནས་བསྐྱོད་ཐུབ་ན་བོད་ཀྱི་ས་ཐོག་ཏུ་སླེབས་ཐུབ་ངེས་རེད། དེ་མིན་རྒྱ་གར་ནང་དུ་གོམ་བགྲོད་བསྐྱོད་པ་རེད་ཟེར་བ་ཙམ་ལས་བོད་ལ་གོམ་བགྲོད་ཟེར་བ་ནི་མིང་ཙམ་དུ་འགྱུར་ངེས་སོ། །
དེ་རིང་གངས་ཅན་པའི་མ་བུ་གསུམ་གྱི་གནས་ཚུལ་གོ་ཐུབ་སོང་པས་གསར་འགོད་པ་ལ་ཐུགས་རྗེ་ཆེ་ཞུ། གསར་འགོད་པ་ཁྱེད་རྣམས་མེད་ན་གནས་ཚུལ་དེ་དག་ཤེས་འདོད་ཡོད་ཀྱང་ང་ཚོ་ལ་གོ་སྐབས་ཡོད་མ་རེད། དེས་ཕྱིར་ཡང་སྐྱར་ཐུགས་རྗེ་ཆེ་ཞུ། མི་མང་བོ་ཞིག་གིས་ཁོང་རྣམ་པས་རྒྱ་ནག་གི་རྒྱལ་དར་ཁྱེར་གྱི་ཡོད་པ་དེ་ལ་ལྟ་སྟངས་མི་འདྲ་མང་བོ་ཡོང་གི་ཡོད་པ་དེ། དེ་རིང་གསལ་བོ་ཆགས་པ་རེད། ཁོང་གི་བསམ་བློ་དང་ཀུན་སྤྱོད་གཉིས་ཀ་བཙན་བྱོལ་བོད་གཞུང་གི་བླང་ཕྱོགས་དང་འགལ་མེད་པ་གསལ་བཤད་བྱས་དུས། དོགས་པ་ཅན་ཚོར་གསལ་བོ་ཆགས་ཡོད་ཀྱི་རེད། དེ་ལྟར་རེ་བ་ཡོད། ད་གཙོ་ཆེ་ཤས་ཁོང་ཚོ་རེ་བ་ལྟར་ཁོ་ཚོ་རྒྱ་གར་དང་བལ་ཡུལ་གཉིས་ཀྱི་ས་མཚམས་སུ་འབྱོར་དུས། བོད་པའི་གསར་འགོད་པ་ཚོ་དུས་ཐོག་བསླེབས་ཐུབ་པར་བྱེད་ཀྱི་དེ་རེད། དེ་ནི་ཁོ་ཚོ་རེ་བ་ཡིན་ལ་ང་ཚོས་ཀྱང་དེ་ལྟར་རེ་སྐུལ་ཞི་རྒྱུ་ཡིན།
བོད་གཞུང་མང་གིས་རང་དབང་དང་མང་གཙོའི་ལམ་ནས་གཏན་འབེབས་བྱས་པའི་མངོན་འདོད་ཆེད། ལུས་སྲོག་ལོངས་སྤྱོད་དང་བཅས་པ་གཏོང་མཁན་ཨ་མ་ལྡོམ་པོ་སྐྱིད་མ་བུ་གསུམ་ནི་ཅི་འདྲའི་རླབས་ཆེན་གྱི་ཁྱིམ་ཚང་ཞིག་མིན་ནམ། མཐོང་བ་མངོན་གྱུར་ལ་འདི་ལས་གཞན་དུ་རྣམ་དཔྱོད་ཅན་དང། རིགས་ཞེན་ཅན། བློས་གཏོང་མཁན་ཞིག་གང་དུ་ཡོད། འཇིག་རྟེན་ཁྱོན་ཡོངས་ཀྱི་ཞི་བདེ་དང། འཇིག་རྟེན་མི་སྡེའི་སྤྱི་ཚོགས་ཀྱི་ལྡོག་ཏུ་མེད་པའི་འགྱུར་བའི་རང་བཞིན་གྱི་དངོས་ཡོད་གནས་ཚུལ་ལ་གཞིགས་ཏེ་གཏན་འབེབས་བྱས་པའི་གཉིས་སྨན་ལྟ་སྤྱོད་ཁྱབ་བརྡལ་ཆེད། ཁྱིམ་ཚང་ཞིག་གིས་མི་རིགས་ཤིག་དང་རྒྱལ་ཁབ་ཅིག འཇིག་རྟེན་ཁྱོན་ཡོངས་ལ་བཅངས་པའི་འདི་འདྲའི་ཆོད་སེམས་ལ་འཇིག་རྟེན་འདིར་སྐྱེ་བོ་མིག་དང་ལྡན་པ་ཞིག་ཡིན་ན་དབང་མེད་མགོ་བོ་དམའ་སར་ལྷུངས་ནས་མི་གུས་བ་སྲིད་དམ། འགྲོ་བ་མིའི་བློས་གཏོང་དང་ལྷག་བསམ་རྒྱལ་ལོ། ༧གོང་ས་སྐྱབས་མགོན་ཆེན་པོ་མཆོག་རྒྱལ་ལོ། བོད་གཞིས་བྱེས་གཉིས་ཀྱི་མངོད་འདོད་རྒྱལ་ལོ། རྒྱ་བོད་མཉམ་གནས་ཀྱི་མཛའ་བརྩེ་རྒྱལ་ལོ། དོན་དམ་གྱི་རང་དབང་རྒྱལ་ལོ། ཨ་མ་ལྡོམ་པོ་སྐྱིད་མ་བུ་གསུམ་རབ་ཏུ་རྒྱལ་ལོ། ཀུན་ཏུ་རྒྱལ་ལོ།
གླི་ཚ་མ་བུ་གསུམ་ལ་འཚམ་འདྲི་དང་གདུང་སེམས་མཉམ་སྐྱེད་ཞུ། བདག་ལྟ་བུ་ཞིག་གིས་ཁྱེད་རྣམ་པར་འགྲིག་མིན་གྱི་བསམ་ཚུལ་འདོན་འོས་པར་མི་སྣང་། འོན་ཀྱང་གུང་ཁྲན་དར་དམར་གྱི་སྐོར་ལ་མི་མང་པོ་ཞིག་གིས་བསམ་ཚུལ་མི་འདྲ་བ་ཡོང་བཞིན་པར་བརྟེན་གུས་པས་ཀྱང་དེའི་སྐོར་བསམ་འཆར་ཕྲན་ཙམ་ཞིག་བརྗོད་འདོད་བྱུང་། དབུ་མའི་ལམ་གྱི་སྲོལ་གཏོད་ནས་ད་བར་དར་དམར་ཕྱར་མཁན་བྱུང་མྱོང་མེད་པ་མ་ཚད་དར་དམར་ལ་གུས་བརྩི་ཞུ་མཁན་ཡང་བྱུང་མེད། དབུ་ལམ་སྲོལ་གཏོད་མཁན་དང་ལུས་ངག་ཡིད་གསུམ་དེའི་རྗེས་སུ་འབྲང་མཁན་དག་གིས་ཀྱང་དར་དམར་སྒྲེང་བ་ལོ་རྒྱུས་ནང་དུ་མེད། བོད་ནང་གི་མི་དམངས་ཚོས་སྲོག་ལ་བསྡོས་པས་གཙན་དབང་འོག་ཏུའང་དར་དམར་སར་ཕབ་སྟེ་གངས་སེང་དར་ཆ་ལན་གྲངས་མང་པོ་འགྲེང་མཁན་དག་གིས་བལྟས་ན་བློ་ཕམ་ངེས་རེད། བོད་ནང་དུ་རྒྱ་ནག་གིས་བཙན་གྱིས་གུང་ཁྲན་དར་ཆ་སྒྲེང་བཅུག་དུས་སྙིང་གས་ཏེ་གྲོངས་མཁན་ཡང་བྱུང་བ་མ་ཚད་དགོན་པ་སྒོ་རྒྱབ་དགོས་ཐུག་པའི་དེ་རིང་ཁ་སང་གནས་ཚུལ་འབྱུང་བཞིན་པར་བརྟེན་རྒྱ་དམར་གྱི་སྐར་ལྔའི་དར་ཆ་ཁྱེད་མཉམ་དུ་མ་འཁྱེར་རོགས་ཞུ་འདོད་བྱུང་། ད་དུང་ཡང་དམངས་གཙོ་ལ་དགའ་མཁན་རྒྱ་ནག་མི་དམངས་ཀྱིས་ཀྱང་ངོས་ལེན་དང་རྒྱབ་སྐྱོར་མེད་པའི་གུང་ཁྲིན་རིང་ལུགས་ཀྱི་དར་དམར་འདི་ངེད་ཅག་བོད་མི་ཞིག་གིས་ངོ་རྒོལ་དང་འཐབ་རྩོད་སྐབས་སུ་ཁྱེར་ན་དེ་བས་ཀྱང་མཐོང་སྣང་ལའང་སྤྲེལ་ལད་ཀྱི་རྣམ་པ་མངོན་པ་མ་ཚད། ཁྱེད་མ་བུ་གསུམ་གྱི་སྙིང་སྟོབས་ཟླ་མེད་དེ་ལ་སྒྲིབ་ཡོལ་དུ་འགྱུར་བའི་ཉེན་ཁ་ཡང་མཐོང་ངོ་། ཁྱེད་མ་བུ་གསུམ་ནད་མེད་བདེ་ཐང་ཐོག་རྒྱལ་ས་ལྷ་སར་འབྱོར་ཐུབ་པའི་སྨོན་ཚིག་དང་བཅས་སོ།།
གླིང་ཚ་མ་བུ་གསུམ་རྒྱལ་དར་འཁྱེར་ཕྱོགས་ཐད་བསམ་ཚུལ་སྣ་མང་ཡོད་ཤས་ཆེ་ཡིན་ཡང་མང་ཚོགས་རྒྱ་ཆ་༨༠ % བརྒྱབ་སྐྱོར་ཡོད་ཚེ་ཁྱེད་ཀྱི་བདེན་པ་ཉིད་རྒྱལ་འགྲོ་ཡི་ཡོད་པས་ཐུགས་གཡེང་མི་དགོས་ལ། བློ་ཕམ་དེ་བས་བྱེད་མི་ཉན་ཁྱེད་རྣམས་པས་དགོས་འདུན་ནི་ཧ་ཅང་ལེགས་པོ་འདུག་སླར་ཡང་བཀྲིན་ཆེ་ཞུ་རྒྱུ་དང་། སྤྱིར་༧ གོང་ས་ཡིན་བཞིན་ནོར་བུས་བླ་མེད་བཀྲིན་དང་ ཡང་སྒོས་བོད་མི་རྩམ་བཟན་རྒྱ་ཆ་% ༩༠ རྡོག་རྩ་ཆིག་སྒྲིལ་ཡོད་པ་བརྟེན་ནམ་ཞིག་མཉམ་འཛོམས་ཀྱིས་དཔའ་རྒོད་ཡོངས་ལ་རྗེས་དྲན་དང་ བཀྲིན་ལེགས་འབུལ་ཞུ་བཅས།།
བོད་དོན་གོམ་བསྒྲོད་པ་ཕྱི་ལེ་ཇི་ཙམ་སོང་འདུག་རྩིས་བསྒྲང་བྱེད་པ་ཡང་བཟང་འདུག་སྟེ།
ཁྱེད་ཀྱང་དངོས་གནས་བོད་དོན་སྒྲུབ་མཁན་ཞིག་ཡིན་ན། ཁོང་ཚོ་དང་མཉམ་ཞུགས་བྱས་ན་དགེ་མཚན་མི་ཆེ་འམ། དེ་མིན་བཙན་གཤོལ་པ་འབུམ་ཚོ་ཁ་ཤས་ནང་ན། བོད་དོན་སྒྲུབ་མཁན་མི་ཚང་གཅིག་གི་གཟའ་མི་མ་གཏོགས་མེད་ན་ངོ་ཚ་མ་རེད་དམ།
མཐོ་བཀའ་ཁྲི་ནས་བཟུང་སྟེ་བོད་དོན་གོམ་བསྒྲོད་བྱས་ནས་ཡག་ཤོས་རེད།
གླིང་ཚའི་ཁྱེད་ནང་མི་གསུམ་གྱི་ཚེ་སྲོག་ལ་གནོད་པ་མི་འོང་བའི་སྨོན་འདུན་ཡོད།
བོད་མི་བསྒྲིགས་འཛུགས་ཀྱི་ལང་ཕྱོགས་ཐོག་ཤར་བསྐྱོད་གནང་མཁན་སྙིང་སྟོབས་དང་ལྷག་བསམ་ལྡན་པའི་དཔའ་རྒོལ་ཁྱེད་མ་སྨད་གསུམ་ལ་འཚམ་འདྲི་བཀྲ་ཤིས་བདེ་ལེགས་ཞུས།
ཡུས་པེའི་ལུང་པ་ནི་ཚ་ཤས་ཤིན་ཏུ་ཆེ་བའི་ལུང་པ་རེད། ཁྱེད་མ་བུ་གསུམ་གྱི་སྐུ་ངལ་མྱངས་སོང་། དེས་ན་ཁྱེད་མ་བུ་གསུམ་ལ་བཀའ་དྲིན་ཆེ་ཞུ་རྒྱུ་ཡིན། ཁྱེད་མ་བུ་གསུམ་སྒང་པ་བོད་པའི་སྐྱིད་སྡུག་གི་ཆེད་དུ་འདི་ལྟར་དཀའ་སྡུག་ཕྲག་ཏུ་ཁུར་ནས་ཕེབས་པའི་སྙིང་སྟོབས་དང་ཆོད་སེམས་ལ་ཡིད་རང་བླ་མེད་ཡོད། མཇུག་མཐར་ཁྱེད་མ་བུ་གསུམ་བྱ་བ་ལམ་འགྲོ་དང་ཐུགས་བཞེད་ལྷུན་གྲུབ་ཡོང་སྨོན་ཞུ།
གླིང་ཚ་མ་བུ་གསུམ་གྱི་སྙིང་སྟོབས་ལ་ཡིད་རངས་དང་ཁོང་གསུམ་གྱིས་སྤེལ་བའི་འཐབ་རྩོད་ལ་བསྔགས་བརྗོད་ཞུ་རྒྱུ་ཡིན། ཡིན་ནའང་བློ་ཕམ་དགོས་པ་ཞིག་ལ་རང་རེའི་གསར་འགོད་པ་རྣམས་འཐབ་རྩོད་འདིའི་སྐོར་གྱི་གནས་ཚུལ་མཁོ་གཏོང་བྱ་མཁན་ཧ་ཅང་ཉུང་ཉུང་རེད་འདུག མི་རྣམས་ཀྱིས་ཁོང་མ་བུ་གསུམ་གྱི་འཐབ་རྩོད་ཀྱི་རྣམ་པར་གླེང་སློང་གང་ཞིག་བྱས་མིན་ལ་མ་ལྟོས་པར་ཁོང་ཚོའི་འཐབ་རྩོད་ལ་མཁོ་ཆེ་ཤོས་དང་མི་མང་གི་རེ་བ་ཆེ་ཤོས་ནི་གསར་འགོད་པས་ཁོང་ཚོའི་གནས་ཚུལ་དང་དགོངས་འཆར་མང་ཙམ་བསྡུ་ལེན་གྱིས་གཞིས་བྱེས་གཉིས་ཀྱི་མི་མང་ནས་དུས་ནས་དུས་སུ་ཤེས་རྟོགས་དགོས་པ་དེ་ཡིན།
ཐོག་མར་ཁྱེད་མ་བུ་གསུམ་ལ་འཚམས་འདྲི་ཞུ། གཉིས་པར་རྒྱ་ནག་གི་རྒྱལ་དར་ཁྱེར་བའི་དགོས་པ་དམིགས་ཡུལ་རྣམས་གསལ་པོར་བཤད་འདུག་པས། གུས་བརྩི་དང་ཡི་རང་ཡོད།
བཤད་འདོད་པ་གཙོ་བོ་དེ། བལ་ཡུལ་གྱི་ས་མཚམས་ནས་ཁྱེད་མ་བུ་གསུམ་གྱི་དཀའ་ངལ་དེ་རེད། དེ་སྐབས་བྱུང་ན་ཉིན་འགའི་སྔ་རོལ་ནས་བོད་ཀྱི་གསར་འགོད་པ་ཚོ་དང་། དེ་མིན་སྐབས་ཐོག་དེར་བོད་ཀྱི་གསར་འགོད་པ་མ་ཟད། རྒྱ་གར་གྱི་གསར་འགོད་པ་ཡང་དགོས་ཀྱི་འདུག
གལ་སྲིད་རྟག་པ་མཐའ་བཟུང་གིས་དབང་གིས། ཁྱེད་མ་བུ་གསུམ་བལ་ཡུལ་ནང་འཛུལ་ཐུབ་པར་བྱུང་ན་ཡང་། དེ་ནས་བཟུང་གློག་ཀླད་ཙམ་མ་ཟད། ཁ་པར་ཡང་དུས་ཡུན་མང་པོར་ལན་ཆད་འགྲོ་གི་ཡོད་པ་དང་།
ལྷག་དོན་ལམ་བར་དུ་སུས་ཀྱང་གོ་མེད་ཚོར་མེད་དུ་འཇུ་བཟུང་བྱེད་ཉེན་ཡོད། དེ་སྐབས་མདོ་སྨད་དབུས་རྒྱུན་གྱིས་གོ་སྒྲིག་འོག བལ་ཡུལ་དབུས་དང་དེ་མིན་བལ་ཡུལ་སྤོག་ར་སོགས་ནས། ཁྱེད་རྣམ་པར་ལྟ་རྟོགས་དང་རྒྱུས་ལོན་ཆེད། མི་སྣ་དགོས་ཀྱི་ཡོད།
ཁོང་མ་བུ་གསུམ་གྱི་སྙིང་སྟོབས་ལ་རྗེས་སུ་ཡི་རངས་ཡོད་ལ། ཐོག་མར་དྷ་ས་ནས་གོམ་བགྲོད་འགོ་འཛུགས་སྐབས། དངོས་གནས་བརྗོད་མི་ཤིས་པའི་ཚོར་བ་ཞིག་སྐྱེས་སོང་། ཡིན་དང་སྐབས་བོད་ནས་རྒྱ་ནག་གི་རྒྱལ་དར་ང་ཚོའི་དགོན་པའི་ནང་དང་ཁྱིམ་ཚང་། གྲོང་པ་སོགས་ཀྱི་ནང་འཕྱར་མི་ཆོག་ཅེས་གོ་རྒོལ་གཅིག་རྗེས་གཉིས་མཐུད་དུ་ཡོང་གི་ཡོད་པ་རེད། དེ་ལ་བརྟེན་ནས་བོད་མིར་དྲག་གནོན་བྱས་པ་ཡང་མང་པོ་རེད། དེ་ན་ཁྱེད་མ་བུ་གསུམ་གྱིས་རྒྱ་ནག་གི་རྒྱལ་དར་དེ་འཕྱར་རྒྱུ་སྔ་དྲགས་སོང་།
ཁྱེད་ཀྱིས་རྒྱ་ནག་གི་རྒྱལ་དར་འཕྱར་བ་ལ་བརྟེན་ནས་བོད་མི་སྒེར་བ་དང་ཚོགས་སྡེ་རེ་ཟུང་ལ་གོམ་བགྲོད་དེར་རྒྱབ་སྐྱོར་བྱེད་རྒྱུར་འགོག་རྐྱེན་བཟོས་འདུག
ཐོག་མར་ཁྱེད་ཅག་དྷ་ས་ནས་འགྲོ་སྐབས་རྒྱ་ནག་གི་རྒྱལ་དེ་ཁྱེར་མེད་པས། བོད་མི་མང་པོས་སེམས་ཚོར་ཆེན་པོ་བསྟོད་བསྔག་དང་སྐྱེལ་མ་བྱས་སོང་།
ད་བཤད་མི་ཤེས། ཁྱེད་མ་བུ་གསུམ་བོད་དུ་སླེབས་པ་དང་རྒྱ་དར་འཕྱར་ནས་རྒྱ་གཞུང་ལ་དགོས་འདོན་ཞིག་བཏོན་ཡང་། ཅུང་འོས་པར་སྣང་། ཡིན་ཡང་བོད་དུ་སླེབས་མི་སྲིད་པ་ལྟ་བུ་རེད་འདུག
ངོ་མ་སྙིང་སྟོབས་ཟེར་བ་དེ་འདྲར་ཟེར་ནོ་རེད། ཨ་རོགས་ཚོ།
ངོ་མ་སྙིང་སྟོབས་ཟེར་བ་དེ་འདྲར་ཟེར་ནོ་རེད། ཨ་རོ་ཚོ།
བཀྲིན་བླ་མེད་དུ་ཆེ་དུས་བབ་ལགས་ད་ང་ཚོའི་ཧ་གོ་དོན་གསལ་བྱུང་སོང་། ཁོང་འབྱུང་ཁམས་དྭངས་གསལ་ངང་རེ་འདུན་སྒྲུབ་པའི་སྐྱབས་སྨོན་ཞུ།།