རྒྱ་གར་ལྷོ་ཕྱོགས་གནས་སྡོད་ཀུན་བཟང་བསྟན་འཛིན་ལགས་ཀྱིས་འདི་གར་ཁུངས་ལྡན་གནས་ཚུལ་མཁོ་སྤྲོད་བྱས་པ་ལྟར་ན། རྒྱ་ནག་གཞུང་གིས་འདི་ལོའི་ཕྱི་ཟླ་ ༣ པའི་ཚེ་ ༡༨ ཉིན་གྱི་འབའ་རྫོང་གི་ཞི་རྒོལ་ལ་རྐྱེན་བྱས་ཏེ། ཉེ་ལམ་མི་སྐྱ་དང་རྡོ་རྗེ་རྒྱལ་ལ་ལོ་ ༡ ཟླ་བ་ ༣ གྱི་དུས་བཀག་བཙོན་འཇུག་གི་ཁྲིམས་ཐག་བཅད་དེ་ཟི་ལིང་གི་བཙོན་ཁང་ཞིག་ཏུ་འཁྲིད་ཡོད་མ་ཟད། ཉིན་ཤས་གོང་ཡང་བསྐྱར་གྲྭ་འཇམ་དཔལ་བཟང་པོ་ལ་ལོ་ ༡ དང་། གྲྭ་ཀུན་བཟང་དབྱངས་གྲོལ་ལགས་ལ་ལོ་ ༡ དང་ཟླ་བ་ ༦ བཅས་ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་དེ་ཟི་ལིང་གྲོང་ཁྱེར་གྱི་བཙོན་ཁང་ཞིག་ཏུ་འཁྲིད་ཡོད་པ་དང་། གཞན། ཁོ་ནག་སྡེ་བའི་བུད་མེད་ཅིག་ལ་ལོ་ ༡ ཟླ་བ་ ༣ དང་། ཁོ་རྒན་སྡེ་བའི་རིན་ཆེན་རྒྱལ་ཚང་གི་མནའ་མ་ལ་ཟླ་བ་ ༦ བཅས་ཀྱི་ཁྲིམས་ཐག་བཅད་དེ་འབའ་རྫོང་མི་དམངས་ཁྲིམས་ཁང་དུ་བཙོན་འཇུག་བཀག་ཉར་བྱས་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། ཉིན་ཤས་གོང་རྒྱ་ནག་གཞུང་གིས་རྡུང་ལེན་པ་རྡོ་རྗེ་ཚེ་བྷེ་གཙོས་སྐྱ་སེར་ཕོ་མོ་ཁག་ཅིག་གློད་ཀྲོལ་བཏང་ཡོད་ཀྱང་། གྲྭ་ཡེ་ཤེས་རྡོ་རྗེ་དང་ཚུལ་ཁྲིམས་རིན་ཆེན། བསྟན་འཛིན་རང་ཤར། བློ་བཟང་བཅས་མི་ ༤ དང་། མི་སྐྱ་རྡོ་རྗེ་དོན་འགྲུབ་དང་གུ་རུ་རྡོ་རྗེ། ཚེ་བརྟན་རྒྱལ། ཚེ་རིང་དབང་རྒྱལ་བཅས་མི་ ༤ ད་ལྟའི་ཆར་ཡང་འབའ་རྫོང་མི་དམངས་ཁྲིམས་ཁང་དུ་བཀག་ཉར་བྱས་ཡོད་པ་མ་ཟད། ད་ལྟའི་ཆར་རྒྱ་གཞུང་གིས་འབའ་རྫོང་གི་ས་གནས་ཡོངས་སུ་དམག་མི་དང་ཉེན་རྟོག་མི་སྣ་འགྲེམས་འཇོག་གིས་དགོན་གྲོང་གཉིས་ལ་བཀག་སྡོམ་དང་དམ་དྲག་བྱེད་ཀྱི་ཡོད་འདུག
ངོ་མ་ཡ་ང་བ་ཞིག་རེད། ལས་འབྲས་ཤིག་ཡོད་ན། བོད་ཀྱི་བདེན་མཐའ་མྱུར་དུ་སེལ་བར་ཤོག