ཨོ་བྷ་མས་ཨབ་གྷན་དམག་འཁྲུག་མཚམས་འཇོག་བྱ་རྒྱུའི་ཁྱབ་བསྒྲགས།

ཨ་རིའི་སྲིད་འཛིན་ཨོ་བྷ་མ་གློ་བུར་དུ་ཨབ་གྷན་ནང་ཡོད་པའི་ཨ་རིའི་དམག་སྒར་ལ་ཕྱིན་ཏེ། ཨབ་གྷན་ནང་གི་དམག་འཁྲུག་མཚམས་འཇོག་དང་། ཨ་རིའི་དམག་དཔུང་ཕྱིར་འཐེན་བྱ་རྒྱུའི་ཁྱབ་བསྒྲགས་བྱས་ཡོད།

ཁ་སང་ཕྱི་ཚེས་ ༡ ཉིན་གྱི་དགོང་མོ་ཨ་རིའི་སྲིད་འཛིན་ཨོ་བྷ་མ་གློ་བུར་དུ་ཨབ་གྷན་རྒྱལ་ས་ཀཱ་བྷུལ་བྱང་ཁུལ་བྷ་གྷི་རམ་(Bagram) ས་གནས་སུ་ཡོད་པའི་ཨ་རིའི་དམག་གི་རྟེན་གཞིར་བསྐྱོད་དེ། བྷེན་ལཱ་ཌན་དམར་གསོད་བཏང་སྟེ་ལོ་ ༡ འཁོར་བའི་དུས་དྲན་ཐོགཨབ་གྷན་ནང་གི་དམག་འཁྲུག་མཚམས་འཇོག་དང་ཨ་རིའི་དམག་དཔུང་ཕྱིར་འཐེན་བྱ་རྒྱུའི་ཁྱབ་བསྒྲགས་བྱས་ཡོད་པ་དང་། སྐབས་དེར་ཨོ་བྷ་མས་ “འདས་པའི་ལོ་ ༡༠ ལྷག་རིང་ང་ཚོ་དམག་འཁྲུག་གི་སྤྲིན་ནག་འོག་ཕྱིན་པ་རེད། ད་ལྟ་ཨབ་གྷན་ནང་གི་དམག་འཁྲུག་མཇུག་སྒྲིལ་ལ་ཉེ་བའི་ཐོ་རེངས་འདིར། ང་ཚོས་ཞི་བདེའི་ཉི་མ་གསར་པ་ཞིག་གི་འོད་སྣང་མཐོང་བཞིན་ཡོད། ”ཅེས་སྐར་མ་ ༡༥ རིང་གི་གཏམ་བཤད་ཐུང་ངུ་ཞིག་སྤེལ་རྗེས།  ཐད་འཕུར་གནམ་གྲུར་བསྡད་དེ་ཨབ་གྷན་རྒྱལ་ས་ཀཱ་བྷུལ་དུ་ཕྱིན་ནས་ཨབ་གྷན་སྲིད་འཛིན་ཧཱ་མེ་ཌི་ཁཱར་ཛའེ་(Hamid Karzai) དང་ཐུག་འཕྲད་ཀྱིས། ཕྱོགས་གཉིས་བར་ཞི་བདེ་མཉམ་ལས་བྱ་རྒྱུའི་གྲོས་ཆོད་ལ་མིང་རྟགས་བཀོད་ཡོད་འདུག

སྲིད་འཛིན་གཉིས་ཀྱིས་གྲོས་ཆོད་ལ་མིང་རྟགས་བཀོད་རྗེས། དེ་རིང་ཞོགས་པའི་ཆུ་ཚོད་ ༧ དང་ཕྱེད་ཀའི་སྟེང་། སྲིད་འཛིན་གཉིས་ལྷན་འཛོམས་ཐོག་བསྒྲགས་གཏམ་ཞིག་སྤེལ་ཡོད་ཅིང་། སྐབས་དེར་ཨོ་བྷ་མས་འབྱུང་འགྱུར་ཟླ་འགའི་ནང་ཚུད་ཨབ་གྷན་ནང་ཡོད་པའི་ཨ་རིའི་དམག་མི་ ༨༨༠༠༠ ལས་དམག་མི་ ༢༣༠༠༠ ཕྱིར་ཨ་རིའི་རྒྱལ་ཁོངས་སུ་ལོག་ཐུབ་པ་བྱ་རྒྱུ་དང་། ལྷག་མ་རྣམས་རིམ་བཞིན་ཕྱིར་འཐེན་གྱིས་ ༢༠༡༤ བར་ཨབ་གྷན་ནང་གི་ཨ་རིའི་དམག་དཔུང་ཡོངས་རྫོགས་ཕྱིར་འཐེན་བྱ་རྒྱུ། ཨབ་གྷན་དྲག་ཆས་དམག་ལ་སྦྱོང་བརྡར་སྤྲོད་རྒྱུ་དང་འཇིགས་སྐུལ་རིང་ལུགས་པ་རྩ་མེད་བཟོ་རྒྱུ་བཅས་ལ་མུ་མཐུད་ཨ་རིའི་དམག་གིས་ཐེ་ཇུས་བྱ་རྒྱུ་ཡིན་ཡང་། དེང་ཕྱིན་ཨབ་གྷན་ནང་ཨ་དམག་གི་རྟེན་གཞི་འཛུགས་རྒྱུ་ཙམ་ལས། ཨབ་གྷན་གྱི་གྲོང་ཁྱེར་དང་རི་ལུང་ཁག་ཏུ་སྟངས་འཛིན་ཐེ་ཇུས་བྱ་རྒྱུ་མིན་པར་བསྒྲགས་ཡོད།

ཨབ་གྷན་སྲིད་འཛིན་ཧཱ་མེ་ཌི་ཁཱར་ཛའེ་ཡིས་ “འདས་པའི་ལོ་བཅུ་ལྷག་རིང་ཨ་རིའི་དམག་དཔུང་གིས་ང་ཚོར་རོགས་འདེགས་བྱས་པ་དེ་ཨབ་གྷན་མི་མང་གིས་ནམ་ཡང་བརྗེད་མི་སྲིད། ཐེངས་འདིའི་ཕྱོགས་གཉིས་ཀྱི་གྲོས་ཆོད་ནང་འཇིགས་སྐུལ་རིང་ལུགས་པར་འགོག་རྒོལ་རྩ་གཏོར་གཏོང་རྒྱུར། ཨ་རི་དང་ཨབ་གྷན་གཉིས་ཀྱིས་མུ་མཐུད་མཉམ་འབྲེལ་བྱ་རྒྱུ་མ་ཟད། ཨ་རིའི་གཞུང་གིས་གྲོས་ཚོགས་ནས་ལོ་ལྟར་ཨབ་གྷན་ལ་རོགས་དངུལ་འཚོལ་རྒྱུའི་ཁས་ལེན་ཡང་བྱས་ཡོད”ཅེས་བརྗོད་ཡོད་འདུག

ཐེངས་འདིའི་ཨོ་བྷ་མའི་བྱེད་སྟངས་ཐད་ཆབ་སྲིད་དཔྱད་པ་དག་གིས། ལོ་སྔོན་མའི་ནང་ཨེ་རག་ནང་གི་དམག་འཁྲུག་མཚམས་འཇོག་དང་དམག་དཔུང་ཕྱིར་འཐེན་བྱས་པ་ལྟར།ད་ལྟ་ཨབ་གྷན་ནང་གི་ཨ་རིའི་དམག་དཔུང་ཕྱིར་འཐེན་བྱ་རྒྱུའི་ཁྱབ་བསྒྲགས་བྱས་པ་དེ་ནི། ཨོ་བྷ་མས་རང་ཉིད་བསྐྱར་དུ་འདི་ལོའི་སྲིད་འཛིན་འོས་བསྡུའི་ཁྲོད་རྒྱལ་ཁ་འཐོབ་ཆེད་འཁྲབ་སྟོན་ཐེངས་གཅིག་བྱས་ཡོད་པར་གླེང་།

ཨོ་བྷ་མ་ཨབ་གྷན་དུ་ཕྱིན་ཏེ་བྷེན་ལཱ་ཌན་དམར་གསོད་ཀྱི་དུས་དྲན་ལ་ཞུགས་པ་དང་། ཨབ་གྷན་ནང་གི་དམག་འཁྲུག་མཚམས་འཇོག་དང་ཨ་དམག་ཕྱིར་འཐེན་བྱ་རྒྱུའི་ཁྱབ་བསྒྲགས་བྱས་པའི་ཐད། ཨ་རིའི་སྤྱི་མཐུན་ཚོགས་པའི་སྲིད་འཛིན་འོས་མི་རོམ་ནེ་(Mitt Romney) ཡིས། དེ་སྔོན་ཨེ་རག་ནང་གི་ཨ་དམག་ཕྱིར་འཐེན་གྱི་དུས་ཆད་བསླེབ་ལ་ཉེ་སྐབས་ཨོ་བྷ་མས་སྔ་ནུར་བྱས་པ་དང་། ཨབ་གྷན་ནང་གི་དམག་དཔུང་ཕྱིར་འཐེན་གྱི་དུས་ཆད་ ༢༠༡༤ ཡིན་པ་དེ་བསྐྱར་དུ་སྔ་ནུར་ཐོག་ཨ་དམག་གང་འཚམ་འཕྲལ་དུ་ཕྱིར་འཐེན་བྱ་རྒྱུའི་ཁྱབ་བསྒྲགས་བྱས་པ་དང་། ལྷག་པར་དུ་བྷེན་ལཱ་ཌན་དམར་གསོད་བཏང་པའི་དུས་དྲན་ལ་ཞུགས་པ་བཅས་ནི། ཁོ་རང་ཉིད་ཀྱི་རྒྱལ་ཁ་ཡིན་པར་འཁྲབ་སྟོན་བྱས་པ་ཞིག་ལས།ཨོ་བྷ་མས་ལག་ལེན་སྟེང་ཁོང་གི་སྲིད་འཛིན་ལས་ཡུན་རིང་གྲུབ་འབྲས་ལྡན་པའི་ལས་དོན་ཞིག་བསྒྲུབས་ཐུབ་མེད་པའི་སྐྱོན་བརྗོད་བྱས་ཡོད།

འདས་པའི་ལོ་ ༡༠ ལྷག་གི་ཨབ་གྷན་དམག་འཁྲུག་ཁྲོད་ཨ་རིའི་དམག་མི་ ༡༨༠༠ རྐྱེན་ལམ་དུ་ཕྱིན་ཡོད་པ་དང་། འདས་པའི་ཨེ་རག་དང་ཨབ་གྷན་དམག་འཁྲུག་ཐད་ཨ་རིའི་གཞུང་གིས་འགྲོ་གྲོན་ཨ་སྒོར་ཐེར་ཆེན་ ༡།༣ ཙམ་བཏང་ཡོད་པ་དེ་ནི། ཨ་རིའི་དཔལ་འབྱོར་ཉམ་ཉེས་ཀྱི་རྒྱུ་རྐྱེན་གཙོ་བོ་ཞིག་ཆགས་ཡོད་སྟབས། ཉེ་དུས་ཨ་རིའི་མང་ཚོགས་ཁྲོད་བསམ་ཚུལ་བསྡུ་ལེན་བྱས་པར་མང་ཚོགས་བརྒྱ་ཆ་ ༦༠ ཡིས་ཨབ་གྷན་ནང་ཨ་རིའི་ཐེ་ཇུས་ལ་ངོ་རྒོལ་བྱས་ཡོད་འདུག

གསར་འགོད་པ། བནྡེ་སྐྱབས།