རྒྱ་ནག་གཞུང་གིས་རེབ་གོང་ས་ཁུལ་གྱི་སློབ་གྲྭ་ཁག་ཅིག་གི་སློབ་སྤྱི་ལས་གནས་ལས་གནས་དབྱུང་བཏང་ཡོད་པ་མ་ཟད། ས་གནས་ཀྱི་དོགས་ཡོད་མི་སྣ་བཀག་ཉར་འདྲི་བརྩད་བྱ་འཆར་ཡོད་འདུག
རྒྱ་ནག་གཞུང་གིས་འདི་ལོའི་ཕྱི་ཟླ་ ༣ པའི་ནང་མདོ་སྨད་རེབ་གོང་དུ་རང་ལུས་མེར་བསྲེགས་ཀྱི་གནས་ཚུལ་བྱུང་སྐབས་སློབ་གྲྭ་ཁག་ཅིག་གི་སློབ་མ་ཚོས་ངོ་རྒོལ་བྱས་པར་རྐྱེན་བྱས་ཏེ། རེབ་གོང་ཐོ་རྒྱའི་བོད་སྐོར་ནས་ཡིན་པའི་ཐུན་རིན་རྫོང་དབྱི་ཧྤུ་སློབ་འབྲིང་གི་སློབ་སྤྱི་རྡོ་རྗེ་རྒྱལ་དང་དགེ་འདུན་ཆོས་འཕེལ་སློབ་འབྲིང་གི་སློབ་སྦྱི། རོང་བོ་ལྷ་སྡེ་ནས་ཡིན་པའི་ཐུན་རིན་རྫོང་བཅའ་སྡོད་སློབ་ཆུང་གི་སློབ་སྤྱི་པདྨ་ཚེ་བརྟན། བཀའ་རྩེབ་གདོང་གི་ཡིན་པའི་ཐུན་རིན་རྫོང་སློབ་གསོ་ཅུའུ་ཡི་ཅུའུ་ཀྲང་ལྷ་འབུམ་མཁར་བཅས་ལས་གནས་ལས་གནས་དབྱུང་བཏང་ཡོད་པ་མ་ཟད། མི་འགྱངས་བར་རྩེ་ཁོག་རྫོང་གི་བོད་རིགས་སློབ་སྦྱི་ཁག་ཅིག་ཀྱང་གནས་དབྱུང་གཏོང་འཆར་ཡོད་པའི་གནས་ཚུལ་ཐོན་འདུག
གཞན། རྒྱ་ནག་གཞུང་གིས་ཉེ་ཆར་རེབ་གོང་ས་ཁུལ་དུ་གྲྭ་འཇམ་དབྱངས་དཔལ་ལྡན་ལགས་དང་བསོད་ནམས་དར་རྒྱས་ལགས་རྣམ་གཉིས་ཀྱིས་རང་ལུས་མེར་བསྲེགས་གནང་སྐབས་ངོ་རྒོལ་ནང་མཉམ་ཞུགས་གནང་མཁན་གྱི་བོད་མི་ཁག་ཅིག་ཉེན་རྟོག་ལས་ཁུང་དུ་འཁྲིད་དེ་འདྲི་བརྩད་བྱས་པ་ལས། མི་མང་གིས་ཡང་བསྐྱར་ངོ་རྒོལ་བྱེད་པར་དོགས་ཏེ་བཀག་ཉར་བཙོན་འཇུག་བྱས་མེད་ཀྱང་། ཉེ་ལམ་བོད་མི་མང་པོ་དབྱར་རྩྭ་དགུན་འབུ་བརྐོ་རུ་འགྲོ་བཞིན་པའི་སྐབས་དང་སྟབས་བསྟུན་ཏེ། སྐབས་དེའི་ལས་འགུལ་ནང་མཉམ་ཞུགས་གནང་མཁན་དང་དྲ་རྒྱ་སོགས་བརྒྱུད་དེ་ཕྱི་ལོག་ལ་གནས་ཚུལ་མཁོ་སྤྲོད་གནང་མཁན་བཅས་དོགས་ཡོད་རྣམས་བསྐྱར་དུ་ཉེན་རྟོག་ལས་ཁུངས་དུ་འབོད་འགུག་གིས་བཀག་ཉར་འདྲི་བརྩད་བྱ་འཆར་ཡོད་འདུག
གསར་འགོད་པ། དོན་གོ
