རྒྱའི་ཚོགས་ཆེན་འདར་གྱིན་འདུག

ཉེ་ཆར་རྒྱ་གཞུང་དཔོན་རིགས་ནང་ཁུལ་རྩོད་རྙོག་ཤུགས་ཆེ་རུ་ཕྱིན་སྟབས། སྐབས་བཅོ་བརྒྱད་པའི་ཚོགས་ཆེན་ཕྱིར་འགྱངས་བྱ་རྒྱུར་བསྐྱར་དུ་གྲོས་བསྡུར་བྱེད་བཞིན་ཡོད་འདུག

འདི་ལོའི་ཕྱི་ཟླ་ ༩ དང་ ༡༠ ཙམ་ལ་རྒྱ་གཞུང་གི་དཔོན་རིགས་གསར་རྙིང་བརྗེ་སྤོར་གྱི་འགག་རྩའི་ཚོགས་ཆེན་སྐབས་བཅོ་བརྒྱད་པ་ཚོགས་གཏན་ཁེལ་ཡོད་ཀྱང་།  ཉེ་སྔོན་ཝང་ལི་ཅོན་དང་པའོ་ཞིས་ལའེ་གཙོས་རྒྱ་ནག་ཆབ་སྲིད་མི་སྣའི་ཁྲོད་འབར་གས་ལྟ་བུའི་དོན་རྐྱེན་རིམ་པར་བྱུང་རྗེས། རྒྱ་ནག་དམར་ཤོག་དཔོན་རིགས་ནང་ཁུལ་གྱི་དཔུང་ཁག་བར་དཔོན་རིགས་གསར་བ་འདེམས་སྒྲུག་དང་ཆབ་སྲིད་ལྷན་ཁང་གི་རྒྱུན་ལས་མི་འབོར་འཕར་ཆག་སོགས་ཀྱི་ཐད། ནང་ཁུལ་རྣོ་ངར་ལྡན་པའི་རྩོད་རྙོག་བྱུང་སྟེ་གཅིག་གྱུར་གྱི་གཏན་འབེབས་ཐག་གཅོད་གང་ཡང་མ་བྱུང་སྟབས། དམར་ཤོག་མཐོ་རིམ་དཔོན་རིགས་ནང་ཁུལ་ཚོགས་ཆེན་སྐབས་བཅོ་བརྒྱད་པ་ཕྱིར་འགྱངས་ཐད་བསྐྱར་དུ་གྲོས་བསྡུར་བྱ་དགོས་བྱུང་ཡོད་འདུག  

ཟླ་འདིའི་ཕྱི་ཚེས་ ༩ ཉིན་རོ་ཌིར་གསར་ཁང་གིས་གནས་ཚུལ་སྤེལ་བ་ལྟར་ན།  རྒྱ་གཞུང་མཐོ་རིམ་དཔོན་རིགས་ཚོས་སྐབས་བཅོ་བརྒྱད་པའི་ཚོགས་ཆེན་དེ་འདི་ལོའི་ཕྱི་ཟླ་ ༡༡ དང་། ཡང་ན་ལོ་རྗེས་མའི་ཕྱི་ཟླ་ ༡ བར་ཕྱིར་འགྱངས་བྱ་རྒྱུའི་ཐད་བསམ་བློ་གཏོང་བཞིན་ཡོད་འདུག   རྒྱ་གཞུང་གི་འདས་པའི་ཚོགས་ཆེན་རིམ་པ་ ༥ ནང་ནས། སྐབས་ ༢ ལ་ཚོགས་ཆེན་ཕྱིར་འགྱངས་བྱ་དགོས་བྱུང་ཡོད་པ་རེད།  

རྒྱ་གཞུང་གི་ཚོགས་ཆེན་ཕྱིར་འགྱངས་བྱ་དགོས་དོན་གཙོ་བོ་ནི། སྐབས་རྗེས་མིའི་རྒྱ་གཞུང་དཔོན་རིགས་གསར་པ་རྣམས་སྐབས་བཅོ་བརྒྱད་པའི་ཚོགས་ཆེན་ཐོག་འདེམས་སྒྲུག་ཁྱབ་བསྒྲགས་བྱས་རྗེས། ལོ་རྗེས་མའི་ཕྱི་ཟླ་ ༣ པའི་རྒྱལ་ཡོངས་ཚོགས་ཆེན་གཉིས་ཀྱི་སྐབས་གཞི་ནས་སྲིད་དབང་འཛིན་དགོས་སྟབས། བར་བརྒལ་གྱི་དུས་ཡུན་ཇེ་ཐུང་དུ་གཏོང་ཆེད་དང་། ཡང་ཕྱོགས་གཞན་ཞིག་ནས་ད་ལྟའི་དབང་འཛིན་དཔོན་རིགས་དག་གི་ལས་ཡུན་ཇེ་རིང་དུ་བཏང་སྟེ། མཐོ་རིམ་དཔོན་རིགས་ནང་ཁུལ་དུ་རྩོད་གཞིར་གྱུར་བའི་སྐབས་རྗེས་མའི་དཔོན་རིགས་གསར་འདེམས་ཐད་བསྐྱར་དུ་གྲོས་བསྡུར་གྱི་དུས་ཚོད་རག་ཆེད་ཡིན་འདུག 

དེང་སྐབས་ཧུའུ་ཡི་ཕྱོགས་གཏོགས་དཔོན་རིགས་དག་གིས་རྒྱ་གཞུང་གིས་ཆེས་མཐོའི་དབང་འཛིན་སྡེ་ཁག་སྟེ། ཆབ་སྲིད་ལྷན་ཁང་གི་རྒྱུན་ལས་མི་དགུའི་གྲངས་ཚད་ཉུང་འཕྲི་བྱས་ཏེ་མི་ ༧ བཟོ་དགོས་པའི་རེ་འདུན་བཏོན་ཡོད་པ་དང་། ཅཱང་ཤོག་ཁག་གི་དཔོན་རིགས་ཚོས་མི་ ༡༡ ལ་འཕར་སྣོན་བྱ་དགོས་པའི་རྩོད་རྙོག་བྱུང་ཡོད་འདུག གཞན་ཡང་། ད་ལྟའི་ཆར་རྒྱ་ནག་དམར་གཞུང་གི་ཆེས་མཐོའི་གོ་གནས་སྲིད་འཛིན་དང་སྲིན་བློ་གཉིས་འདེམས་སྒྲུག་གཏན་འབེབས་ཟིན་ཡོད་པ་མ་གཏོགས། གཞན་པའི་ཆབ་སྲིད་ལྷན་ཁང་གི་ལས་གནས་རྣམས་ད་དུང་གཅིག་གྱུར་གྱི་འདེམས་སྒྲུག་གཏན་འབེབས་བྱ་ཐུབ་མེད་པར་ལྷག་ཡོད་འདུག 

གཞན་ཡང་། ཉེ་ཆར་རྒྱལ་སྤྱིའི་གནས་འཕྲིན་དྲ་རྒྱ་ཁག་ནང་། ད་ལྟའི་རྒྱ་གཞུང་ནི་དོན་གྱིས་དབུས་དམར་ཤོག་གཞུང་གཉིས་ཆགས་ཏེ་ནང་ཁུལ་ཁྱོ་ཤི་ང་གསོན་གྱི་ཆབ་སྲིད་བདག་དབང་འཕྲོག་རྩོད་རྙོག་འཛིང་ཁྲོད་ལྷུང་ཡོད་པ་དང་།  ཅཱང་ཤོག་ཁག་ལ་ཆབ་སྲིད་གནོན་ཤུགས་སྤྲོད་ཆེད་ཝུན་ཇ་པའོ་ཡིས་སྲིད་བློན་གྱི་ལས་གནས་ནས་རྩ་དགོངས་བྱ་འཆར་བྱས་ཡོད་སྐོར་སོགས་གླེང་སློང་སྣ་ཚོགས་ཁྱབ་ཡོད་པ་རེད།

གསར་འགྱུར་བརྒྱུད་ལམ་ཁག་གིས་སྐབས་བཅོ་བརྒྱད་པའི་ཚོགས་ཆེན་ཕྱིར་འགྱངས་ཀྱི་གནས་ཚུལ་ཐད་རྒྱ་གཞུང་འབྲེལ་ཡོད་སྡེ་ཁག་ལ་དོགས་འདྲི་བྱས་ཡོད་ཀྱང་།  རྒྱ་གཞུང་གིས་ལན་འདེབས་གསལ་བྱེད་གང་ཡང་བྱས་མེད་པ་རེད།

གསར་འགོད་པ། ཚེ་རིང་རྒྱལ།