ཧྥ་རན་སིའི་སྲིད་འཛིན་གསར་པ་དང་རྒྱལ་སྤྱིའི་དོ་སྣང་།

ཟླ་འདིའི་ཕྱི་ཚེས་ ༦ ཉིན་ཧྥ་རན་སིའི་ནང་དངོས་གཞིའི་རྒྱལ་ཡོངས་སྲིད་འཛིན་འོས་བསྡུ་བྱས་ཏེ། རང་ལོ་ ༥༧ ཡིན་པ་ཧྥ་རན་སིའི་སྤྱི་ཚོགས་རིང་ལུགས་ཆབ་སྲིད་ཚོགས་པའི་(Soialist Party )འོས་མི་སྐུ་ཞབས་ཧོ་ལན་ཌེ་(Francois Hollande) ལ་རྒྱལ་ཁ་ཐོབ་ཡོད། ཕྱི་ཚེས་ ༡༥ ཉིན་གཞུང་འབྲེལ་ཐོག་སྲིད་འཛིན་གསར་རྙིང་གི་རྩིས་སྤྲོད་རྩིས་ལེན་གྱི་མཛད་སྒོ་ཚོགས་ཡོད་ཅིང་། ཉིན་དེར་ཁོང་འཇར་མན་དུ་རྒྱལ་དོན་གཟིགས་སྐོར་ལ་ཕྱིན་ཡོད་པ་དང་། ཕྱི་ཚེས་ ༡༨ ཉིན་ཨ་རིར་སྟོབས་ཆེན་རྒྱལ་ཁབ་བརྒྱད་ཀྱི་ཚོགས་ཆེན་སྟེང་ཞུགས་ཡོད།  

ཕྱི་ཟླ་ ༤ ཚེས་ ༢༢ ཉིན་ཧྥ་རན་སིའི་སྔོན་འགྲོའི་སྲིད་འཛིན་འོས་འདེམས་སྐབས། འོས་གྲངས་ཐོ་ཤོས་ཀྱི་སྲིད་འཛིན་འོས་མི་ ༡༠ ཡོད་པ་ལས། སྤྱི་ཚོགས་རིང་ལུགས་ཆབ་སྲིད་ཚོགས་པའི་སྲིད་འཛིན་འོས་མི་ཧོ་ལན་ཌེ་ལ་བརྒྱ་ཆ་ ༢༨།༦༣ དང་། དེ་སྔའི་སྲིད་འཛིན་སཱར་ཁཱོ་ཛེ་ལ་བརྒྱ་ཆ་ ༢༧།༡༨ ཐོབ་སྟེ་ཁོང་གཉིས་དངོས་གཞིའི་འོས་བསྡུའི་ནང་བསླེབས་ཡོད། ཕྱི་ཟླ་ ༥ ཚེས་ ༦ ཉིན་དངོས་གཞིའི་འོས་བསྡུ་གནང་སྟེ་ཧོ་ལན་ཌེ་ལ་འོས་གྲངས་བརྒྱ་ཆ་ ༥༡།༦༤ དང་། སཱར་ཁཱོ་ཛེ་ལ་འོས་གྲངས་བརྒྱ་ཆ་ ༤༨།༣༦ ཐོབ་སྟེ། ཧོ་ལན་ཌེ་ཧྤ་རན་སིའི་སྲིད་འཛིན་གསར་པར་ཁྱབ་བསྒྲགས་བྱས་ཡོད།

ཕྱི་ཚེས་ ༡༥ ཉིན་སྲིད་འཛིན་གསར་རྙིང་གཉིས་ཀྱིས་མཛད་སྒོའི་སྟེང་ཕན་ཚུན་ལ་ལག་འཇུ་དང་ཧོ་ལན་ཌེ་ཡིས་སྲིད་འཛིན་དམ་འབུལ་གྲུབ་མཚམས། སྲིད་འཛིན་ལས་ཁུངས་ཀྱི་རྒྱལ་དོན་གསང་བའི་ཡིག་ཆ་རིགས་རྩིས་སྤྲོད་རྩིས་ལེན་བྱས་མཐར། ཧོ་ལན་ཌེ་ཡིས་ “ང་ཚོ་གཞུང་གསར་པའི་ལས་དོན་གལ་ཆེ་ཤོས་བཟོ་ལས་འཛུགས་སྐྲུན་དང་འཆར་འགོད་ལས་རིགས། ཞིབ་འཇུག་སོགས་ཀྱི་ཐད་ཤུགས་གནོན་བརྒྱབ་སྟེ། ཧྥ་རན་སི་ཡང་བསྐྱར་འཕེལ་རྒྱས་སུ་གཏོང་རྒྱུ་དེ་ཡིན་”ཞེས་བསྒྲགས་ཡོད།

ཧོ་ལན་ཌེས་སྲིད་འཛིན་ལས་ཁུར་གྱི་དམ་འབུལ་བྱས་པའི་ཆུ་ཚོད་འགའི་རྗེས་སུ་ཁོང་སྲིད་འཛིན་དུ་བསྡད་པའི་ཕྱི་འབྲེལ་རྒྱལ་དོན་ཕྱོགས་སྐྱོད་ཐེངས་དང་པོ་དེ་འཇར་མན་ལ་གནང་ཡོད་པ་དང་། འཇར་མན་སྲིད་བློན་ལྕམ་མཱར་ཁེལ་(Angela Merkel) དང་ཐུག་འཕྲད་ཐོག ཕྱོགས་གཉིས་ཀྱིས་ཡུ་རོབ་གླིང་གི་དཔལ་འབྱོར་ཉམ་ཉེས་བསྐྱར་གསོ་བྱ་རྒྱུར་མཉམ་ལས་དང་། ད་ལོའི་ཕྱི་ཟླ་ ༣ ནང་གཏན་འབེབས་བྱས་པའི་ཡུ་རོབ་མཐུན་ཚོགས་ཀྱི་དཔལ་འབྱོར་སྲིད་ཇུས་ལ་བསྐྱར་ཞིབ་བྱ་རྒྱུར་ཧྥ་རན་སི་དང་འཇར་མན་གཉིས་ཀྱིས་མཉམ་འབྲེལ་བྱ་དགོས་པའི་བསམ་ཚུལ་བཏོན་ཡོད་འདུག ཧྥ་རན་སི་དང་འཇར་མན་གཉིས་ཡུ་རོབ་གླིང་(Eurozone)གི་བཅོས་སྒྱུར་གྱི་རྨང་རྡོ་ལྟ་བུ་ཞིག་ཆགས་ཡོད་པ་རེད།

ཕྱི་ཚེས་ ༡༨ ཉིན་ཏེ། ཧོ་ལན་ཌེ་སྲིད་འཛིན་དུ་བསླེབས་པའི་ཉིན་གསུམ་པར་ཁོང་ཝ་ཤིན་ཝོན་དུ་སྟོབས་ཆེན་རྒྱལ་ཁབ་བརྒྱད་ (G8 Summit) ཀྱི་ལྷན་ཚོགས་དང་ཆཱེ་ཁཱ་གྷོ་རུ་ཎ་ཊོའམ་ནུབ་རྒྱ་མཚོའི་གནའ་མཐུན་ལྷན་ཚོགས་(Nato) ཀྱི་ཚོགས་ཆེན་བཅས་ལ་ཕྱིན་ཡོད། ཁོང་ཧྥ་རན་སི་ནས་མ་ཐོན་གོང་ནས་ཐེངས་འདིའི་ལྷན་ཚོགས་ཁག་གི་སྔ་རྗེས་སུ་ཨ་རིའི་རིའི་སྲིད་འཛིན་དང་དབྱིན་ཇིའི་སྲིད་བློན་སོགས་ལ་ཧྥ་རན་སི་དང་ཨ་དབྱིན་སོ་སོའི་བར་གྱི་ཕྱི་འབྲེལ་སྐོར་ལ་གྲོས་བསྡུར་བྱ་རྒྱུ་ཡིན་པ་དང་། དེ་བཞིན་ལྷན་ཚོགས་སོ་སོའི་སྟེང་རྒྱལ་ཁབ་ཕན་ཚུན་བར་གྱི་ཕྱི་འབྲེལ་དང་ཡུ་རོབ་གླིང་གི་དཔལ་འབྱོར་གནད་དོན། ཨེ་རན་དང་ཨབ་གྷན། སེ་རི་ཡ་སོགས་ཀྱི་གནད་དོན་སྐོར་བཅས་ལ་ལ་གླེང་སློང་བྱ་འཆར་ཡིན་འདུག

ཧོ་ལན་ཌེ་ནི་རྒྱལ་སྤྱིའི་གླེང་སྟེགས་སུ་ཐེངས་དང་པོར་བུད་པ་ཞིག་ཡིན་པ་དང་། ཧྥ་རན་སི་ནི་ཡུ་རོབ་གླིང་དང་རྒྱལ་སྤྱིའི་སྤྱི་ཚོགས་ཀྱི་གནད་དོན་ལ་ཤུགས་རྐྱེན་ཆེན་པོ་ཐེབས་མཁན་ཞིག་ཡིན་སྟབས། རྒྱལ་སྤྱིའི་ཁྱོན་ཡོངས་དང་དབུ་ཁྲིད་མི་སྣ་ཚོས་ཧོ་ལན་ཌེའི་མི་གཤིས་དང་ལངས་ཕྱོགས། ལྟ་གྲུབ་སོགས་ཀྱི་ཐད་དོ་སྣང་ཆེན་པོ་བྱེད་ཀྱི་ཡོད་པ་རེད།

ཧོ་ལན་ཌེ་ཐོག་མ་སྲིད་འཛིན་འོས་གཞིར་ལངས་སྐབས་རྒྱ་ནག་ནི་དགྲ་བོ་དངོས་ཡིན་ཚུལ་བརྗོད་ཡོད། ཁོང་གིས་ “ངས་གང་ལ་དགྲ་བོར་འབོད་དགོས་པར་རྒྱུ་རྐྱེན་ཡོད། དཀའ་ངལ་དངོས་རྒྱ་ནག་རེད། ཁོ་ཚོས་གཡོ་ཟོལ་མགོ་སྐོར་མི་གཏོང་ས་གཅིག་ཀྱང་མེད་”ཅེས་བརྗོད་ཡོད་པ་དང་། གནད་དོན་དེའི་ཐད་ཧྲང་ཧེ་ཧྥུ་ཌན་(Fudan University) སློབ་གྲྭ་ཆེན་མོའི་ཡུ་རོབ་ཉམས་ཞིབ་ཚན་པའི་འགན་འཛིན་ཌེན་ཆུན་(Ding Chun) གྱིས་ “ཧྥ་རན་སིའི་དཔལ་འབྱོར་འཕེལ་ཚད་རང་སོར་ལྷག་ཡོད་སྟབས། འཕེལ་རྒྱས་འགྲོ་བཞིན་པའི་རྒྱ་ནག་གི་ཆབ་སྲིད་དང་། ལྷག་པར་དུ་རྒྱ་ནག་གི་དཔལ་འབྱོར་སྟོབས་ཐད་ཧྥ་རན་སིས་རྒྱ་ནག་ཕྱོགས་སུ་བཟུང་པའི་བརྟན་བརླིང་མེད་པའི་ཕྱི་འབྲེལ་དེ་རྒྱུན་རིང་པོར་བསྲིང་མི་ཐུབ། ཧོ་ལན་ཌེ་ཡིས་ཧྥ་རན་སིའི་དཔལ་འབྱོར་ལ་འགྱུར་བ་གཏོང་དགོས་ན་ཁོང་ལ་རྒྱ་ནག་མེད་ཐབས་མེད་”ཅེས་བརྗོད་འདུག

ཧོ་ལན་ཌེ་ནི་ཉེ་ཆར་ཧྥ་རན་སིའི་སྲིད་འཛིན་འོས་བསྡུའི་འགྲན་རྩོད་ཁྲོད་ཞུགས་མཁན་འོས་མི་ ༡༠ ལས་འོས་མི་ ༩ ཡིས་བོད་དོན་ལ་རྒྱབ་སྐྱོར་དང་༸གོང་ས་མཆོག་དང་མཇལ་འཕྲད་ཞུ་འདུན་གྱི་རྣམ་འགྱུར་བསྟན་ཡོད་པའི་གྲས་ཀྱི་གཅིག་ཡིན་ཞིང་། ཁོང་གིས་ “ཏཱ་ལའི་བླ་མ་ནི་ནོ་བྷེལ་ཞི་བདེ་གཟེངས་རྟགས་བཞེས་མཁན་གྱི་འཛམ་གླིང་མི་མང་གིས་གུས་བརྩི་ཡོད་པའི་དབུ་ཁྲིད་ཅིག་རེད། ཉེ་སྔོན་ཁོང་གིས་ཆབ་སྲིད་ཀྱི་འགན་དབང་ཡོངས་རྫོགས་རྩིས་སྤྲོད་བྱས་ཟིན་པར་བརྟེན། ང་རང་གི་ངོས་ནས་ཏཱ་ལའི་བླ་མ་དང་མཇལ་འཕྲད་ཞུ་རྒྱུར་འགོག་རྐྱེན་གང་ཡང་མཐོང་གི་མེད” ཅེས་བརྗོད་ཡོད་པ་རེད།

ཧོ་ལན་ཌེ་ཁོང་ ༡༩༩༧ ནས་ ༢༠༠༨ བར་སྤྱི་ཚོགས་རིང་ལུགས་ཆབ་སྲིད་ཚོགས་པའི་མགོ་ཁྲིད་ཀྱི་འགན་བཞེས་ཡོད་པ་དང་། ཁོང་གིས་ ༡༩༩༣ ལོར་མི་ཞིག་གིས་བྱིས་པ་སྐོར་ཞིག་བྱིས་གསོ་ཁང་ཞིག་ཏུ་བཙན་བཀག་བྱས་སྐབས་དཔའ་མཛངས་ཟུང་འབྲེལ་ཐོག་བྱིས་པ་རྣམས་ཉེན་ཁ་ལས་སྐྱབས་པའི་གནས་ཚུལ་ཞིག་བྱུང་པ་ནས་སྤྱི་ཚོགས་ཁྲོད་དོ་སྣང་ཆེན་པོ་སླེབས་མགོ་ཚུགས་ཡོད་པ་རེད། ཉམས་ཞིབ་པ་ཚོས་ཧོ་ལན་ཌེ་ནི་ཕྱི་འབྲེལ་སྲིད་ཇུས་ཐད་སཱར་ཁཱོ་ཛེ་ལས་གཟབ་ནན་དང་བཏང་སྙོམས་ཅན་ཞིག་ཡིན་པར་ཚོད་དཔག་བྱེད་ཀྱི་ཡོད། སཱར་ཁཱོ་ཛེ་ཡིས་འཇོར་ཇི་ཡ་(Georgia) དང་རཱ་ཤི་ཡའི་རྩོད་རྙོག ལེ་བྷེ་ཡའི་ཟིང་འཁྲུག་སོགས་རྒྱལ་སྤྱིའི་ནང་གི་རྩོད་རྙོག་འདྲ་མིན་ལ་ཐེ་ཇུས་བྱས་ཡོད།

གསར་འགོད་པ། བནྡེ་སྐྱབས།