རྒྱ་ནག་གཞུང་གིས་བརྟན་ལྷིང་སྲུང་སྐྱོབ་ལས་དོན་ཁྲོད་འགལ་འཛོལ་བྱུང་བའི་ཉེས་མིང་འོག་ལྷ་སའི་སྟོད་ལུང་བདེ་ཆེན་གྱི་ལས་བྱེད་དྲུག་གནས་དབྱུང་བཏང་འདུག
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་འདི་གར་གནས་ཚུལ་བཏང་འབྱོར་ལྟར་ན། ཉེ་ལམ་བོད་རང་སྐྱོང་ལྗོངས་ལྷ་ས་གྲོང་ཁྱེར་ཨུ་ཡོན་ལྷན་ཁང་གིས། སྟོད་ལུང་བདེ་ཆེན་རྫོང་གི་དམར་ཤོག་དྲུང་ཆེ་གཞོན་པ་ཟླ་བ་ཚེ་རིང་དང་རྫོང་དཔོན་གཞོན་པ་པ་སངས། རྫོང་མི་རིགས་ཆོས་ལུགས་ལྷན་ཁང་གི་འགན་འཛིན་ཉི་མ་དབང་འདུས་བཅས་གཙོས་པའི་ལས་བྱེད་པ་ ༦ གིས་བརྟན་ལྷིང་སྲུང་སྐྱོང་ལས་དོན་དོན་འཁྱོལ་མ་བྱས་པ་དང་། ལས་དོན་ལ་འགལ་འཛོལ་བྱུང་བའི་ཉེས་མིང་བཀལ་ཏེ་གནས་དབྱུང་བཏང་ཡོད་པ་མ་ཟད། འབྲེལ་ཡོད་ཏང་ཁྲིམས་དང་སྲིད་ཁྲིམས་གྱི་ཉེས་ཆད་བཅད་འདུག
བོད་རང་སྐྱོང་ལྗོངས་ཀྱི་གཞུང་གི་ལས་བྱེད་པར་སྤྱི་ཚོགས་བརྟན་བརླིང་སྲུང་སྐྱོབ་ཀྱི་ལས་འགན་སྤྲད་པའི་ལས་གཞི་དེ་ནི། བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེར་ཁྲིན་ཆིན་ཀོ་བསྐོ་བཞག་བྱས་པ་ནས་བཟུང་ཉེན་རྟོག་པ་དང་ལས་བྱེད་ཟུང་འབྲེལ་ཐོག་དགོན་སྡེ་དོ་དམ་ལ་ཤུགས་སྣོན་དང་གྲོང་ཁྱེར་དང་གྲོལ་རྡལ་དུ་སྤྱི་བདེ་ཉེན་རྟོག་ས་ཚིགས་གསར་རྒྱག་སོགས་ལས་གཞི་མགོ་འཛུགས་བྱས་པ་ཞིག་ཡིན་འདུག་ལ། ༢༠༡༡ ལོའི་ཟླ་ ༡ ཚེས་ ༡ ཉིན་བོད་རང་སྐྱོང་ལྗོངས་ཀྱིས་བརྟན་ལྷིང་སྲུང་སྐྱོང་ལས་དོན་ཁྲོད་མགོ་ཁྲིད་ལས་བྱེད་པའི་འགན་འཁུར་དགོས་པའི་དོན་ཚན་བཅོ་བརྒྱད་ཅན་གྱི་སྒྲིག་གཞི་ཞིག་གཏན་འབེབས་བྱས་ཡོད་འདུག་ལ། ལས་གཞི་དེའི་འོག་འདི་ལོའི་ཕྱི་ཟླ་ ༢ པའི་ནང་ལས་དོན་འགལ་འཛོལ་བྱུང་བའི་ཉེས་མིང་འོག་ལྷ་ས་དང་ཆབ་མདོ། ས་སྐྱོང་རྫོང་བཅས་ཀྱི་མགོ་ཁྲིད་ལས་བྱེད་ ༡༣ ལྷག་གནས་དབྱུང་བཏང་ཡོད་པ་མ་ཟད། ཐེངས་འདིར་སྟོད་ལུང་བདེ་ཆེན་རྫོང་གི་དམར་ཤོག་དྲུང་ཆེ་དང་རྫོང་དཔོན་གཞོན་པ། མི་རིགས་ཆོས་ལུགས་ཅུའུ་ཡི་འགན་འཛིན་བཅས་གཙོས་པའི་ལས་བྱེད་ ༦ གནས་དབྱུང་བཏང་འདུག
