ད་ལོའི་ཕྱི་ཟླ་དགུ་བའི་ནང་བཙན་བྱོལ་བོད་མིའི་སོ་ནམ་གཞིས་ཀ་བཅུ་གཉིས་སྟེང་། བཞུགས་སྒར་ངྷ་ས་དང་ལྡི་ལི་གཉིས་གསར་དུ་བསྣན་ཏེ། བོད་རིགས་ན་གཞོན་ཕོ་མོ་ ༥༠ ཨི་སི་རེལ་རྒྱལ་ཁབ་ཏུ། ༼སོ་ནམ་སྦྱོང་བརྡར་དང་གླ་ཡོད་ཉམས་གསོ༽བཅས་པའི་ལས་གཞིའི་ནང་གཏོང་རྒྱུ་ཡིན་འདུག
ལོ་ལྟར་ཨི་སི་རེལ་ ( Israel) རྒྱལ་ཁྱབ་ཀྱི་བོད་མིའི་རྩ་ཚོགས་ (Israel Tibetan friendship) དང་། ཨེ་སི་རེལ་སྐྱེ་ལྡན་སོ་ནམ་མཐོ་སློབ་ ( Araba international centre for agriculture training) ། བོད་མིའི་སྒྲིག་འཛུགས་ནང་སྲིད་ལས་ཁུངས་བཅས་མཉམ་འབྲེལ་ཐོག་བཙན་བྱོལ་བོད་མིའི་སོ་ནམ་གཞིས་ཀ་ ༡༢ ཀྱི་གཞོན་སྐྱེས་མང་པོ་ཞིག་ཨེ་སི་རེལ་དུ་༼སོ་ནམ་སྦྱོང་བརྡར་དང་གླ་ཡོད་ཉམས་གསོའི༽ལས་གཞིའི་ཁོངས་སུ་གཏོང་གི་ཡོད་པ་ལྟར། ད་ལོར་བཙན་བྱོལ་བོད་མིའི་སོ་ནམ་གཞིས་ཀ་བཅུ་གཉིས་ཀྱི་སྟེང་དུ་ངྷ་རམ་ས་ལ་དང་ལྡི་ལི་བཅས་བསྣན་ཏེ། རང་ལོ་ ༢༢ ནས་ ༣༢ བར་གྱི་ཕོ་ ༤༢ དང་། མོ་༨ བཅས་བོད་རིགས་གཞོན་སྐྱེས་ ༥༠ ཙམ་གཏོང་རྒྱུ་ཡིན་འདུག
ལས་གཞི་འདིར་ཞུགས་པའི་ཆ་རྐྱེན་ཁག་ནི། འཛིན་རིམ་ ༡༠ བའི་སློབ་སྦྱོང་གི་གནས་ཚད་དང་མཉམ་པའི་དབྱིན་ཇིའི་འབྲི་ཀློག་ཐུབ་པ། རྒྱ་གར་ནང་བསྡད་ཆོག་པའི་སྐྱབས་བཅོལ་ལག་འཁྱེར་ ( RC) དང་དེབ་སེར་པོ། བཙན་བྱོལ་བོད་མིའི་དཔྱ་ཁལ་ལག་དེབ། ལྡི་ལིའི་ཨེི་སི་རེལ་སྨན་ཁང་ནས་གློ་ནད་ཊི་བྷེ་སོགས་འགོས་ནད་རིགས་མེད་པའི་བདེན་དཔང་ཡིག་ཆ་བཅས་དགོས་པ་མ་ཟད། ཐོག་མར་འཛུལ་ཞུགས་སྐབས་ཧིན་སྒོར་ ༣༠༠༠༠ ཙམ་དོ་བདག་གི་གཏའ་མ་དང་འགྲོ་གྲོན་ཆེད་ནང་སྲིད་ལས་ཁུངས་ལ་སྤྲོད་དགོས་ཀྱི་ཡོད་འདུག
༼ སོ་ནམ་སྦྱོང་བརྡར་དང་གླ་ཡོད་ཉམས་གསོའི ༽ ཞེས་པའི་ལས་གཞི་འདི་ནི། ཕྱི་ལོ་ ༡༩༩༨ ལོར་ཐོག་མར་མགོ་འཛུགས་བྱས་པ་ཞིག་ཡིན་ཞིང་། ད་ལྟའི་བར་སོ་ནམ་གཞིས་ཀ་བཅུ་གཉིས་ཀྱི་བོད་མི་ ༥༥༥ ཙམ་མངགས་གཏོང་བྱས་ཡོད་འདུག་ལ། ལས་གཞི་འདིའི་དམིགས་ཡུལ། བོད་མི་གཞོན་སྐྱེས་ཚོ་ཨི་སི་རེལ་དུ་ཕྱིན་ཏེ། འཕྲུལ་ཆས་བེད་སྤྱོད་ཀྱིས་ས་ཞིང་འདེབས་ལས་ལག་ཤེས་སློབ་སྦྱོང་གནང་རྗེས། ཕྱིར་ཁུངས་སོ་སོར་ལོག་སྟེ་བཙན་བྱོལ་བོད་མིའི་སོ་ནམ་གཞིས་སྒར་ཁག་ཏུ་ལག་ལེན་བྱ་རྒྱུ་དེ་ཡིན་འདུག་ལ། ཟླ་ ༡༠ རིང་སློབ་སྦྱོང་གི་ཞོར་དུ་ཧིན་སྒོར་འབུམ་ ༣ ཙམ་ཞིག་ལས་གླ་ལྟ་བུར་རེག་གི་ཡོད་འདུག
གནས་ཚུལ་འདིའི་སྐོར་ནང་སྲིད་དྲུང་འཕར་འཆི་མེད་རིག་འཛིན་ལགས་སུ་བཅར་འདྲི་ཞུས་དོན་ལྟར་ན། སྔོན་ཆད་ལས་གཞི་འདིའི་ཁོངས་སུ་བཙན་བྱོལ་བོད་མིའི་སོ་ནམ་གཞིས་ཀ་ ༡༢ མ་གཏོགས་ཚུད་ཀྱི་མེད་ཀྱང་། དེ་སྔོན་གཞིས་མགོ་ཁག་གི་ཚོགས་འདུའི་སྐབས་དང་། ལྷག་པར་དུ་བཀའ་ཤག་སྐབས་བཅུ་བཞི་བའི་ནང་གྲོས་བསྡུར་ཞིབ་མོ་གནང་མཐར། ངྷ་རམ་ས་ལ་དང་ལྡི་ལི་ཁུལ་དུ་བོད་ནས་གསར་དུ་འབྱོར་བ་ལས་མེད་མང་པོ་ཞིག་ཡོད་སྟབས། ཁོང་ཅག་ལ་གོ་སྐབས་འདི་འཐོབ་ཆེད་ད་ལོ་ངྷ་ས་དང་ལྡི་ལི་གཉིས་ལས་གཞི་དེའི་ཁོངས་སུ་བཅུག་པ་ཡིན་སྐོར་གསུངས་བྱུང་ལ། ཐེངས་སྔོན་མ་དག་དང་བསྡུར་ན་ད་ཐེངས་བུད་མེད་ཉུང་དུ་ཕྱིན་ཡོད་པ་ནི། ཐེངས་སྔོན་མ་དག་གི་སྐབས་སུ་སློབ་སྦྱོང་ལ་འགྲོ་མཁན་དག་གི་སྤྱོད་ལམ་ཡག་སྡུག་ཅི་རིགས་ཤིག་བྱུང་ཡོད་པ་དང་། ལྷག་པར་དུ་སྔ་ལོར་བོད་པའི་བུད་མེད་ནང་ཁུལ་རྙོག་གླེང་ཞིག་བྱུང་བ་བཅས་ཀྱི་དབང་གིས་ཐེངས་འདིར་བུད་མེད་ ༨ ལས་གོ་སྐབས་སྤྲོད་ཐབས་བྱུང་མེད་སྐོར་ངོ་སྤྲོད་གནང་བྱུང་།
གནས་ཚུལ་ཞིབ་ཕྲ་ཟླ་འདིའི་ཕྱི་ཚེས་ ༣༠ ཉིན་གྱི་བོད་ཀྱི་དུས་བབ་ཚགས་པར་སྟེང་འགོད་རྒྱུ་ཡིན།
གསར་འགོད་པ། དོན་གོ
ཡ་དྲ་གྲོགས་ཚོ་་་ད་གསར་འབྱོར་ཚོ་ལ་གོ་སྐབས་ཞིག་རག་རྒྱུ་ཁག་པོ་རེད་
འཛིན་གྲྭ་བཅུ་པའི་ལག་འཁྱེར་ངན་པར་དུ་དགོས་ཀྱི་ཡོད་ན་རྡ་ས་ཉར་འཁུར་དུ་ཡོད་པའི་བོད་པ་གསར་འབྱོར་ལས་མེད་དེ་ཚོ་ལ་གོ་སྐབས་རག་རྒྱུ་ཁག་པོ་ཡིན་པར་གསལ་པོ་རེད་
བོད་ནས་གསར་དུ་འབྱོར་བའི་ལས་མེད་དག་ལ་འཛིན་གྲྭ་བཅུ་པའི་ལག་འཁྱེར་མི་དགོས་པ་བཟོས་ན་མ་གཏོགས།དེ་བཞིན་སྐྱབས་བཅོལ་ལག་དེབ། དེབ་སེར་པོ་བཅས་ཡོད་དགོས་པའི་ཆ་རྐྱེན་དེ་དག་བསམ་ན་དེ་བས་ཀྱང་འཛིན་གྲྭ་བཅུ་པའི་ལག་འཁྱེར་ཡོད་པའི་གསར་འབྱོར་ལས་མེད་གཅིག་ཡོད་མེད་ལ་བསམ་བློ་གཏོང་དགོས་པ་ཞིག་རེད་སྙམ།