ཐུབ་བསྟན་དབྱིག་གཉེན།
༄༅། །བཙན་བྱོལ་བོད་མིའི་ལོ་རྒྱུས་ནང་སྔར་ལོའི་ཕྱི་ཟླ་ལྔ་པ་དེ་ཆབ་སྲིད་འཁྲུག་ཆ་དོད་ཤོས་ཀྱི་དུས་ཚོད་ཅིག་བྱུང་ཡོད་པ་དང་། དེ་ཡང་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་བོད་མི་མང་སྤྱི་འཐུས་ལྷན་ཚོགས་ལ་བཀའ་ཡིག་ཕེབས་པ་བརྒྱུད་ལོ་ངོ་གསུམ་བརྒྱ་ལྷག་ཙམ་རིང་དགའ་ལྡན་ཕོ་བྲང་པས་བོད་ཀྱི་ལུགས་གཉིས་ཆོས་སྲིད་ཀྱི་ཐུགས་འགན་བཞེས་བཞིན་པ་དེར་རླབས་ཆེན་གྱི་འགྱུར་བ་ཞིག་བཏང་སྟེ། བོད་མི་མང་གིས་འོས་བསྡུ་བྱས་པའི་མགོ་ཁྲིད་ཚོར་ཆབ་སྲིད་དང་འཛིན་སྐྱོང་གི་འགན་དབང་ཡོངས་སུ་རྩིས་སྤྲོད་གནང་རྒྱུའི་ཐག་གཅོད་གནང་བ་དེར་བོད་མི་མང་སྤྱི་འཐུས་རྣམས་ཀྱིས་བགྲོ་གླེང་གནང་སྟེ། མཐའ་མར་བཙན་བྱོལ་བོད་མིའི་བཅའ་ཁྲིམས་ལ་བསྐྱར་བཅོས་གཞི་རྒྱ་ཆེ་ཤོས་དེ་གནང་སྟེ། བཙན་བྱོལ་བོད་མིའི་ཆབ་སྲིད་ལམ་ལུགས་ལ་དུས་རབས་ཀྱི་འགྱུར་བ་དེ་བྱུང་བ་རེད།
སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་ཐུགས་འགན་འོས་བསྡུ་བྱས་པའི་མི་མང་གི་མགོ་ཁྲིད་ཚོར་རྩིས་སྤྲོད་གནང་བའི་དུས་ཚོད་དང་སྲིད་དབང་རྩིས་སྤྲོད་གནང་ཡུལ་དང་པོ་སུ་ཡིན་ངོས་འཛིན་གནང་སྟངས་ལ་བཙན་བྱོལ་བོད་མིའི་སྤྱི་ཚོགས་ནང་སྐྱོན་ཆ་ཞིག་འདུག དེ་ཡང་ཕྱི་ཟླ་ ༨ ཚེས་ ༨ ཡིན་པར་ངོས་འཛིན་བྱེད་མཁན་རིགས་གཅིག་འདུག་པ་མ་ཟད། ཕྱི་ཚེས་ ༢༨ ཉིན་རྒྱ་གར་གྱི་ཨའི་ཨཱེ་ཨན་ཨེས་ཞེས་པའི་གསར་འགྱུར་ལས་ཁུངས་ཀྱི་གསར་འགོད་པ་ཝི་ཤལ་གྷུ་ལ་ཏིས་༧གོང་ས་མཆོག་གིས་སྲིད་དབང་རྩིས་སྤྲོད་གནང་ནས་ལོ་གཅིག་འཁོར་བ་ཞེས་པའི་ མགོ་བརྗོད་འོག་གནས་ཚུལ་ཞིག་བྲིས་པའི་ནང་དུ་གནས་ཚུལ་ནོར་བ་མང་དག་ཅིག་བཀོད་འདུག་པ་བཅས་ཀྱིས་མ་འོངས་པར་བོད་མིའི་ཆབ་སྲིད་ལོ་རྒྱུས་ནང་གནས་ཚུལ་དེ་མ་དག་རྒྱུན་འབྱམས་སུ་ལྷག་ཉེན་འདུག་སྙམ། གནད་དོན་དེར་བོད་མིའི་གསར་ཤོག་དང་དུས་དེབ་ཚོས་གལ་ཆེན་དུ་ངོས་འཛིན་མི་གནང་བ་མ་ཟད། བཙན་བྱོལ་བོད་གཞུང་ངམ་དབུས་བོད་མིའི་སྒྲིག་འཛུགས་ཀྱི་གཞུང་འབྲེལ་ཡིག་ཆ་ཁག་ལའང་དེ་ལྟར་དུས་ཚིགས་ནོར་བ་ཞིག་བེད་སྤྱོད་གནང་གི་འདུག་པ་དེ་ནི་མ་འོངས་པར་ལོ་རྒྱུས་ཐོག་ནོར་འཁྲུལ་ཡོང་ཉེན་འདུག་སྙམ།
སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཆབ་སྲིད་དང་འཛིན་སྐྱོང་གི་འགན་དབང་རྩིས་སྤྲོད་གནང་བའི་དུས་མཚམས་དེ་བོད་མི་མང་སྤྱི་འཐུས་ལྷན་ཚོགས་ཀྱིས་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་ལ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ངོས་བཞེས་ཆོག་མཆན་གནང་ནས་ཁྲིམས་ཡིག་ཏུ་གཏན་འབེབས་བྱུང་བའི་ཉིན་མོ་དེ་ལ་ངོས་འཛིན་གནང་དགོས་པ་ཡིན།
དེ་བཞིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་ཐུགས་འགན་རྩིས་སྤྲོད་གནང་ཡུལ་དེ་ད་ལྟའི་བཀའ་བློན་ཁྲི་པ་བློ་བཟང་སེངྒེ་ལགས་ཡིན་པར་ངོས་འཛིན་བྱེད་ཀྱི་ཡོད་པ་དེ་ཡང་ནོར་འཁྲུལ་རེད་སྙམ། བོད་མི་མང་སྤྱི་འཐུས་སྐབས་བཅུ་བཞི་པས་ ༢༠༡༡ ཟླ་ ༥ ཚེས་༢༨ ནས་ ༣༠ བར་ཉིན་གསུམ་རིང་བཅའ་ཁྲིམས་བསྐྱར་བཅོས་ཀྱི་དམིགས་བསལ་གྲོས་ཚོགས་འདུ་བསྐོང་གནང་སྟེ། བཅའ་ཁྲིམས་བསྐྱར་བཅོས་གཏན་འབེབས་གནང་ཡོད་པ་དང་། ཕྱི་ཟླ་ ༥ ཚེས ༣༡ ཉིན་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་ལ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ངོས་བཞེས་མཆོག་ཆན་མཚན་རྟགས་ཞུ་འཁྲོལ་བྱུང་རྗེས་དངོས་སུ་ལག་བསྟར་མགོ་འཛུགས་གནང་ཡོད་ལ། དུས་དེ་ནས་བཟུང་བཙན་བྱོལ་བོད་མིའི་བཅའ་ཁྲིམས་འབྲུ་དོན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་མཚན་གནས་རྗེས་འབྲེལ་ཐུགས་འགན་ཡོངས་སུ་འོས་བསྡུ་བྱས་པའི་མགོ་ཁྲིད་ཚོར་རྩིས་སྤྲོད་གནང་བ་ཞིག་ཡིན།
དེས་ན་ལོ་རྒྱུས་ཐོག་ཆབ་སྲིད་ཀྱི་ཐུགས་འགན་རྩིས་སྤྲོད་གནང་ཡུལ་དང་པོ་དེ་བཀའ་བློན་ཁྲི་པ་ཟམ་གདོང་རིན་པོ་ཆེ་ཆགས་ཡོད་པ་དང་། ཕྱི་ཟླ་ ༨ ཚེས་ ༨ ཉིན་ཟམ་གདོང་རིན་པོ་ཆེས་བཀའ་བློན་ཁྲི་པའི་འགན་འཁུར་དེ་བློ་བཟང་སེངྒེ་ལགས་སུ་རྩིས་སྤྲོད་གནང་བ་ཞིག་རེད། བཀའ་བློན་ཁྲི་པ་བློ་བཟང་སེངྒེ་ལགས་ཀྱིས་དེ་ཉིན་དམ་འབུལ་གནང་སྐབས་མཛད་སྒོའི་དབུ་བཞུགས་ལ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཞབས་སོར་བཀོད་དེ་བཀའ་སློབ་གནང་ཡོད་ནའང་། བོད་གཞུང་བཀའ་ཤག་གི་དམ་སྦྲུག་བཀའ་དམ་བདེ་སྐྱིད་མ་དེ་བཀའ་བློན་ཁྲི་པ་ཟམ་གདོང་རིན་པོ་ཆེས་འོས་འདེམས་བྱུང་བའི་བཀའ་བློན་ཁྲིོ་པ་བློ་བཟང་སེངྒེ་ལགས་ལ་རྩིས་སྤྲོད་གནང་བ་མ་ཟད། དེ་ཡང་ཉིན་དེར་དམ་འབུལ་ཟིན་མཚམས་དེར་རྩིས་སྤྲོད་གནང་བ་བཅས་ཀྱིས་གསལ་པོ་མཚོན་ཐུབ་ཀྱི་ཡོད།
དུས་ཡུན་དེའི་རིང་ལ་བཀའ་བློན་ཁྲི་པ་ཟམ་གདོང་རིན་པོ་ཆེས་དེའི་གོང་༧གོང་ས་མཆོག་གིས་མཚན་གནས་རྗེས་འབྲེལ་བསྐོ་གཞག་གནང་བའི་དམིགས་བསལ་སྐུ་ཚབ་དང་སྐུ་ཚབ། ཕྱི་རྒྱལ་སྐུ་ཚབ་དོན་གཅོད་དང་བཅས་བཅའ་ཁྲིམས་བསྐྱར་བཅོས་འབྲུ་དོན་བཀའ་བློན་ཁྲི་པ་ཟམ་གདོང་རིན་པོ་ཆེས་བསྐོ་གཞག་གནང་བའི་གསལ་བསྒྲགས་གནང་ཡོད་པ་དེ་ནི་ཆབ་སྲིད་ཀྱི་འགན་འཁུར་རྩིས་སྤྲོད་གནང་ཟིན་པའི་ར་འཕྲོད་རེད།
བཀའ་བློན་ཁྲི་པ་བློ་བཟང་སེངྒེ་ལགས་ཀྱིས་༧གོང་ས་མཆོག་གིས་སྲིད་དབང་གི་འགན་འཁུར་ཁོང་ལ་རྩིས་སྤྲོད་གནང་བྱུང་གསུང་གི་འདུག་པ་དེ་ཡང་ལོ་རྒྱུས་ཐོག་ནོར་འཁྲུལ་ཅན་གྱི་གཏམ་བཤད་ཡིན་པ་དང་། གཅིག་བྱས་ན་ཟམ་གདོང་རིན་པོ་ཆེས་དེ་འདྲ་ཞིག་གཏན་ནས་གསུངས་མེད་པ་དེས་མི་རྣམས་ཀྱིས་ཡིན་ཤག་ལ་ངོས་འཛིན་བྱེད་ཀྱི་ཡོད་སྲིད། དེ་ནི་གཅིག་བྱས་ན་ཟམ་གདོང་རིན་པོ་ཆེ་དང་བློ་བཟང་སེངྒེ་གཉིས་ཀྱི་མི་གཤིས་ལ་ཁྱད་པར་ཡོད་པ་དེས་ཡིན་སྲིད། ཟམ་གདོང་རིན་པོ་ཆེ་ནི་ངས་བྱས་དང་ངས་འཇོན་ལུགས་གསུང་མཁན་ཞིག་མིན་པ་དང་། བློ་བཟང་སེངྒེ་ལགས་ནུབ་ཕྱོགས་ནང་རྒྱུན་རིང་བཞུགས་པའི་དབང་གིས་ནུབ་ཕྱོགས་པའི་ཆབ་སྲིད་པའི་གོམས་གཤིས་ཕྲན་བུ་འཇགས་ཡོད་པས་དེ་ལྟར་གསུང་གི་ཡོད་སྲིད།
གནད་དོན་འདི་ཕྱོགས་གཅིག་ནས་འདིར་གླེང་དགོས་པའི་གལ་ཆེའི་གནད་དོན་ཞིག་མིན་ནའང་། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཆབ་སྲིད་ཐུགས་འགན་རྩིས་སྤྲོད་གནང་བ་དེ་བོད་ཀྱི་ཆབ་སྲིད་ལོ་རྒྱུས་ནང་ཤིན་ཏུ་གལ་ཆེའི་དུས་མཚམས་ཤིག་ཆགས་རྒྱུར་བརྟེན་དེའི་དུས་མཚམས་དང་སྲིད་དབང་རྩིས་སྤྲོད་གནང་རྗེས་འགན་འཁུར་བཞེས་མཁན་དང་པོ་སུ་ཡིན་བཅས་ལོ་རྒྱུས་ལ་གནད་འགག་ཆེན་པོ་ཡིན་སྟབས་འདིར་གླེང་པ་ཡིན།
གཞི་རྩའི་བོད་མི་ཚོས་ལོ་རྒྱུས་ཀྱི་དུས་ཚིགས་ལ་གལ་ཆེར་ངོས་འཛིན་གནང་གི་མེད་པ་དེ་དཔེ་མཚོན་མང་པོ་ཡོད། དཔེར་ན་བཀའ་བློན་ཁྲི་པ་ཞེས་པའི་ཆབ་སྲིད་ཀྱི་གོ་གནས་ལ་ཆ་མཚོན་ན། བཙན་བྱོལ་བོད་མིའི་ལོ་རྒྱུས་ནང་བཀའ་བློན་ཁྲི་པ་ཞེས་པའི་ཆབ་སྲིད་ཀྱི་གོ་གནས་དེ་ ༡༩༩༢ ལོར་བཅའ་ཁྲིམས་གཏན་འབེབས་གནང་རྗེས་བྱུང་བ་ཞིག་ཡིན་པ་དང་། དེའི་གོང་བཀའ་ཤག་ནང་བཀའ་བློན་ཁྲི་པ་ཞེས་པ་ཞིག་ཡོད་པ་དེ་སྔའི་བཙན་བྱོལ་བོད་གཞུང་གི་ཡིག་ཆ་སོགས་གང་ལའང་གསལ་མེད།
དེ་སྔོན་བཀའ་ཤག་ཏུ་བཀའ་བློ་སྐུ་བགྲེས་དང་། ཡང་ན་རྒྱུན་བཞུགས་བཀའ་བློན་ཞེས་པ་དེས་བཀའ་ཤག་བཀོད་འདོམས་གནང་གི་ཡོད་པ་དེ་ལོ་རྒྱུས་ཀྱི་ཡིག་ཆའི་ནང་གསལ་ཡོད་པ་མ་ཟད། བཀའ་ཟུར་རིམ་པའི་ལོ་རྒྱུས་ནང་བཀའ་བློན་ཁྲི་པའི་ཐུགས་འཁུར་བཞེས་པའི་དུས་ཚེས་སོགས་གསལ་མེད། འོན་ཀྱང་རྗེས་སུ་བཀའ་བློན་ཟུར་པ་འགའ་ཞིག་ལ་དེ་ལྟར་བཀའ་བློན་ཁྲི་ཟུར་ཞེས་གསར་ཤོག་སོགས་ཀྱིས་རང་མཚམས་བེད་སྤྱོད་བྱེད་སྲོལ་འདུག་པ་དེ་ནི་ཞིབ་ཏུ་མ་གཟིགས་པར་མཚན་གནས་དེ་བེད་སྤྱོད་བྱས་པ་ཞིག་རེད། བཙན་བྱོལ་བོད་གཞུང་ཕྱི་དྲིལ་ལས་ཁུངས་དང་འོས་བསྡུ་ལས་ཁུངས་ཀྱི་ཡིག་ཆ་རེ་ཟུང་ནང་དེ་འདྲའི་མཚན་གནས་བེད་སྤྱོད་གནང་བ་མཐོང་རྒྱུ་འདུག་པ་དེ་ནི་གཞུང་འབྲེལ་ཡིག་ཆར་རྒྱབ་ལྗོངས་ཀྱི་གནས་ཚུལ་ཞིབ་ཏུ་མ་གཟིགས་པའི་སྐྱོན་རེད།
༢)ཡིན་ན་ཡང། གོང་ས་མཆོག་གིས་སྲིད་དབང་རྩིས་སྤྲོད་གནང་རྗེས་སུ།་མི་མང་གིས་གདམས་པའི་བཀའ་ཁྲི་དང་བོ་དེ་ཡིན་ཞེས་ཞིབ་ཆ་ཞིག་མི་འབྱེད་རང་འབྱེད་རེད། གོང་སས་སྲིད་སྐྱོང་སྟག་བྲག་གིས་སྤྲད་པའི་སྲིད་དབང་བློ་སེང་ལ་རྩིས་སྤྲད་ཡོད་དོ་ཞེས་པའི་བཀའགསུང་དེ་སྟོང་སྒྲོག་འབུམ་བསྒྲོགས་པས་སོ།།
གོང་ས་མཆོག་གིས་སྲིད་སྐྱོང་བ་ཞེས་འདོག་འདོད་ཤུགས་ཆེན་གསུངས་ཀྱང། གྲོས་ཚོགས་ལ་རྣ་བ་དང་དཔྱོད་རིག་གཉིས་ཀ་མེད་པ་འདི་ཡང་ཅི་ཡིས་ནོངས་སམ།
དེ་རིང་བར་ཉིན་བརྒྱད་འགོར་ཡང་བསམ་ཚུག་གཅིག་ཀྱང་སླེབས་མེད་པ་ནི་དྲ་ལམ་འདིེ་མི་སྲིད་པའི་གནས་ཚུལ་ཞིག་རེད། གླེང་མ་ཤེས་བར་སྡད་ཡོད་པ་འདྲ། མཐོ་མི་རུང་བླ་མའི་དབུ།་དམའ་མུ་རུང་བླ་མའི་ཆིབ་པ།་ཞེས་པར་སྙམ།
དོན་ངོ་མས་བཤད་ན། སྲིད་སྐྱོང་བློ་སེང་ནི། སྲིད་དབང་རྩིས་སྤྲོད་ཡུལ་དང་བོ་དེ་མིན་པ་བྱུང་ཟིན་པའི་གནས་ཚུལ་དངོས་ཀྱིས་ར་འཕྲོད་པས་དཔྱད་པ་ཅི་ལ་དགོས།