གནས་ཚུལ་འབྱོར་བ་ལྟར་ན། ཟླ་སྔོན་མའི་ཕྱི་ཚེས་ ༢༧ ཉིན་བོད་ཀྱི་རྒྱལ་ས་ལྷ་སའི་ཇོ་ཁང་མདུན་ཐང་དུ་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གཏོང་མཁན་ན་གཞོན་གཉིས་ལས་གཅིག་ནི། ཨ་མདོ་རྔ་པ་རྫོང་ཆོས་རྗེ་མ་ཞང་སོ་རུ་མ་སྡེ་བའི་རང་ལོ་ ༢༥ ཡིན་པའིི་དར་རྒྱས་ལགས་ཡིན་ཞིང་། ཁོང་གི་ཕ་མིང་ལ་ལོ་དེ་དང་མ་མིང་ཞེས་སྐྱིད། ཁོང་ཚང་ལ་སྤུན་དྲུག་ཡོད་པའི་ནང་གི་ཆུང་ཤོས་དེ་ཡིན་འདུག
ཁོང་ཆུང་དུས་རྔ་པ་ཀིརྟི་དགོན་པར་གྲྭ་པ་བྱས་ཤིང་། ལོ་ཤས་གོང་སྐྱ་སར་བབས་རྗེས་ལྷ་སར་ཡོད་པའི་ཨ་མདོ་རྔ་པའི་ཚོང་པ་ཆུ་སྐལ་ཚང་གི་ཟ་ཁང་ནང་དུ་དངུལ་གཉེར་གྱི་ལས་ཀ་བྱེད་ཀྱི་ཡོད་འདུག
དོན་རྐྱེན་དེ་བྱུང་རྗེས་ཟ་ཁང་གི་སྦྱིན་བདག་ཆུ་སྐལ་དང་བཟའ་ཟླ་སོགས་ནང་མི་ཚང་མ་རྒྱ་གཞུང་གིས་འཛིན་བཟུང་བཀག་ཉར་བྱས་ཡོད་འདུག་ལ། རྒྱ་གཞུང་གིས་དར་རྒྱས་ཀྱི་ནང་མིར་ད་ཆར་ཁོང་གང་དུ་ཡོད་མེད་གསལ་བཤད་བྱས་མི་འདུག
དེང་སྐབས་ལྷ་སར་ཡོད་པའི་ཨ་མདོ་རྔ་པའི་ད་ལོའི་སྤྱི་བ་སྒྲོལ་མ་སྐྱབས་དང་མྱུར་མགྱོགས། རྟ་མགྲིན་སྐྱབས། སངས་གྲགས་སོགས་འཛིན་བཟུང་བྱས་ཡོད་འདུག་ལ། དེ་མིན། ལྷ་སའི་ཟ་ཁང་དང་ཚོང་ཁང་སོགས་སུ་ལས་ཀ་བྱེད་ཀྱིན་པ་དང་། ལྷ་སར་གནས་སྐབས་རིང་བསྡད་ཆོག་པའི་ལག་འཁྱེར་(དན་ཏོའུ་དྲན་)མེད་མཁན། གཟའ་ལྷག་པའི་ཉིན་དམིགས་བསལ་བོད་ཆས་གྱོན་མཁན་བཅས་གང་བྱུང་འཛིན་བཟུང་བྱེད་བཞིན་ཡོད་འདུག
ཤེས་གསལ་ལ་རྔ་པའི་ཕྱོགས་ཀྱི་བོད་མི་ཚོའི་ཁ་པར་དང་གློག་ཀླད་སོགས་ལ་དམིགས་བསལ་དམ་དྲག་གིས་ད་ལྟ་ཕྱི་ཕྱོགས་སུ་མ་ཟད། ཨ་མདོ་རྔ་པ་དང་ཁྲིན་ཏུའུ་སོགས་ལ་ཡང་འབྲེལ་བ་བྱེད་རྒྱུར་དཀའ་ངལ་འཕྲད་བཞིན་ཡོད་འདུག
དེ་སྔ་ནས་ལྷ་སར་གཞིས་ཆགས་ཡོད་པའི་ཁམས་དང་ཨ་མདོའི་ཕྱོགས་ཀྱི་ཚོང་པ་སོགས་ཀྱང་མུ་མཐུད་འདུག་ཐུབ་མིན་ཧ་ཅང་ཉེ་ཁ་ཆགས་ཡོད་འདུག་ཅིང་། ༢༠༠༨ ལོའི་ཞུ་རྒོལ་ལ་ཁག་བཞགས་ནས་གདན་ས་གསུམ་དུ་སློབ་གཉེར་གནང་བཞིན་པའི་མདོ་སྟོད་སྨད་ཀྱི་དགེ་འདུན་པ་ཡོད་ཚད་ཕྱིར་འཕུད་ཀྱིས་ད་ཆར་གདན་ས་གསུམ་སྟོང་ལ་ཉེ་པ་ལྟར། ༢༠༡༡ ལོར་ཨ་མདོ་རྔ་པར་གྲྭ་བློ་བཟང་ཕུན་ཚོགས་ཀྱིས་རང་ལུས་མེར་བསྲེགས་གནང་རྗེས་ལྷ་སར་ཡོད་པའི་ཨ་མདོ་རྔ་པ་ས་ཁུལ་གྱི་བོད་མི་ཚོར་ཉེས་མིང་སྣ་ཚོགས་འོག་འཛིན་བཟུང་བཀག་ཉར་དང་འདྲི་རྩད་སྣ་ཚོགས་ཀྱིས་སུན་གཙེར་བཟོ་བཞིན་ཡོད་འདུག
གཞན། གསར་དུ་ཤེས་རྟོགས་བྱུང་བར་ ༢༠༠༩ ལོའི་མཇུག་ཙམ་ལ་ཨ་མདོ་རྔ་པ་རྔ་སྟོད་སྒོ་མང་མཐའ་བའི་ཚོང་པ་ཆོས་ཁོ། རང་ལོ་ ༤༩ ཙམ་ཡིན་པ་ཁོང་བོད་དང་བལ་ཡུལ་ས་མཚམས་འགྲམ་ནས་འཛིན་བཟུང་གིས་གཞིས་ཀ་རྩེ་དང་ ལྷ་ས་ནས་ཡུན་རིང་བཀག་ཉར་བྱས་རྗེས་མཐར་རྒྱ་གར་ལ་བོད་མི་ལམ་འཇུག་བྱས་པའི་ཉེས་མིང་འོག་ལོ་
༤ བཙོན་འཇུག་ཁྲིམས་ཐག་བཅད་དེ་ད་ལྟ་ལྷ་ས་གྲྭ་བཞིས་བཙོན་ཁང་དི་བཙོན་འཇུག་བྱས་ཡོད་འདུག གོང་གསལ་གནས་ཚུལ་སྐོར་ཀིརྟི་བྱེས་པ་གྲྭ་ཚང་གི་གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་ཡིན།
གསར་འགོད་པ། དོན་འགྲུབ་བཀྲ་ཤིས།
ཡར་ཀླུང་ལྷ་རྗེས་བཤད་པ་བདེན་པར་མཐོང་། ང་ཚོས་བོད་དོན་དེ་རྒྱལ་སྤྱི་ཅན་དུ་བསྒྱུར་རྒྱུ་དང་འདས་པའི་དཔའ་བོ་དང་དཔའ་མོ་དག་གི་རེ་འབོད་དག་དྲང་བདེན་ལ་དགའ་བའི་གཞུང་དམངས་དག་ལ་ངོ་སྤྲོད་དགོས་པ་སྨོས་མེད་ཡིན་ཀྱང་སྐབས་རེ་ཉེས་མེད་ཀྱི་མི་མང་པོ་ཁྲིམས་སུ་སྦྱར་བཞིན་ཡོད་པས་དགེ་སྐྱོན་རྣམས་ཞིབ་ཞིང་ཕྲ་བའི་སྒོ་ནས་བརྟགས་ཏེ་གསར་འགྱུར་འགོད་ཐུབ་ན་དགེ་མཚན་བླ་མེད་དུ་ཆེ། དེ་མིན་ཉེ་བའི་ལོ་ཤས་རིང་བོད་སྐད་རླུང་འཕྲིན་གྱི་གསར་འགོད་པ་འགས་བོད་དུ་གནས་ཚུལ་རེ་བྱུང་བ་དང་ལམ་སེང་གནས་ཚུལ་བྱུང་སའི་མི་དེའི་ནང་མི་དང་ཉེ་འབྲེལ་གྱི་འབྲེལ་མཐུད་ཁ་པར་ཨང་གྲངས་བཙལ་ཏེ་ཐད་ཀར་འབྲེལ་བ་བྱས་ཏེ་གནས་ཚུལ་མང་པོ་བརྒྱུད་བསྒྲགས་བྱས་པར་ནང་མི་དེ་དག་ལ་བཟོད་དུ་མེད་པའི་དཀའ་ངལ་འཕར་མ་དུ་མ་འཕྲད་པའི་ལོ་རྒྱུས་གོ་རྒྱུ་འདུག སྐབས་དེར་ནང་མི་དེ་དག་འུ་ཐུག་ཅིང་ཐབས་ཟད་པའི་སྐབས་ཡིན་པས་གནས་ཚུལ་སྦས་གསང་མེད་པ་བཤད་ཅིང་བརྒྱུད་བསྒྲགས་བྱེད་ན་འགྲིགས་པའི་ཚུལ་བཤད་ཡོད་སྲིད་ཀྱང་འདྲི་བ་པོས་ཕ་རོལ་པོའི་མི་ཚེ་དེ་རང་གི་གསར་འགྱུར་གྱི་ཚོང་རྫས་སུ་མི་བསྒྱུར་བར་ཇི་ཙམ་བཤད་ན་འོས་པ་དང་བཤད་ན་མ་འོས་པ་ཇི་ཙམ་ཡོད་པ་ཞིབ་མོར་དཔྱད་དེ་བཤད་ན་དགོས་པའི་ཁྱབ་བསྒྲགས་ཀྱི་ཞོར་དུ་ནང་མི་དེ་དག་གི་ཁེ་དབང་ལ་བརྩི་སྲུང་བྱེད་ཐུབ། བདག་ཉིད་ཆེན་པོ་གྷན་རྡིས་ཐོབ་ཐང་ལས་འགན་གཙོ་ཆེ་བར་གསུངས་པ་འདི་འདྲའི་སྐབས་སུ་གོ་ལོས་དགོས། རྒྱལ་གཅེས་དཔའ་བོ་དང་དཔའ་མོ་རྣམས་ལ་གུས་འདུད་དང་རེ་དོན་དག་འགྲུབ་པའི་ཁ་གཡང་ཙམ་གྱི་སྨོན་འདུན་ཞུ།
བོད་འབྱོར་གནས་ཚུལ་དེ་ཚོ་ཤེས་རྟོགས་བྱེད་རྒྱུ་ནི་བཙན་བྱོལ་བས་ལས་འགན་ཡིན་རུང་དོ་ནན་ཞིབ་འཇུག་ཡག་པོ་བྱེད་རྒྱུ་དེ་བས་གལ་ཆེ་ཡིན། དེ་མིན་གོ་ཐོས་བྱུང་འཕྲལ་ས་གྲགས་གནམ་གྲགས་བྱས་ན་བོད་ནང་ཡོད་པའི་བོད་མི་མང་པོར་ཉེས་མེད་ཉེས་རྟོགས་ཀྱིས་མི་ཚེའི་མདུན་ལམ་མེད་པར་འགྱུར་བཞིན་ཡོད་པས་ཡིད་ཟབ་དགོས་གལ་མཐོང།།