འཛིན་རིམ་བཅུ་གཉིས་ཡར་རྒྱས། འཛིན་རིམ་བཅུ་པ་ཉམས་རྒུད།

འདི་ལོའི་འཛིན་རིམ་བཅུ་གཉིས་ཀྱི་རྒྱ་གར་རྒྱལ་ཡོངས་ཡིག་རྒྱུཊ་གྲུབ་འབྲས་སྔར་ལོ་ལས་བརྒྱ་ཆ་གྲངས་ཆུང་གཅིག་ལྷག་འཕར་ཡོད་པ་དང་། འཛིན་རིམ་བཅུ་བའི་ཡིག་རྒྱུགས་བརྒྱ་ཆ་གྲངས་ཆུང་གཅིག་ཙམ་མར་ཆགས་ཡོད་འདུག  ལོ་འདིའི་ཡིག་རྒྱུཊ་ནང་བུ་དང་བུ་མོ་གཉིས་ལས་བུ་མོའི་གྲུབ་འབྲས་ལེགས་པོ་བྱུང་འདུག

ལོ་འདིའི་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་བཙན་བྱོལ་བོད་མིའི་འཛིན་རིམ་བཅུ་གཉིས་ཅན་གྱི་སློབ་གྲྭ་ཁག་ ༡༥  ཡི་སློབ་མ་ ༡༣༢༠ ཐོ་འགོད་བྱས་ཡོད་པ་ལས། སློབ་ཕྲུག་  ༡༢༨༦ ཙམ་ཡིག་རྒྱུཊ་ནང་དངོས་སུ་ཞུགས་ཏེ། ཡིག་ཚད་འཕྲོད་མཁན་  ༡༡༧༧ དང་། ཡིག་རྒྱུགས་འཕྲོད་མེད་པ་ ༢༧ ། བསྐྱར་རྒྱུགས་གཏོང་དགོས་མཁན་ ༨༢ ། ཡིག་རྒྱུགས་ནང་ཞུགས་མ་ཐུབ་མཁན་ ༣༤ བཅས་འདུག

འདི་ལོའི་ཡིག་རྒྱུཊ་ཁྲོད་སྤྱི་ཡོངས་ཀྱི་ཡིག་རྒྱུགས་འཕྲོད་ཚད་བརྒྱ་ཆ་ ༩༡།༥༢ ཙམ་ཡིན་ཞིང་། དེའི་ཁྲོད་སློབ་ཕྲུག་བུ་མོའི་ཡིག་རྒྱུགས་འཕྲོད་ཚད་བརྒྱ་ཆ་ ༩༡།༥༥ དང་། སློབ་ཕྲུག་བུའི་ཡིག་རྒྱུགས་འཕྲོད་ཚད་བརྒྱ་ཆ་ ༩༡།༥༠ བཅས་ཡིན་སྟབས། སྔར་ལོའི་ཡིག་རྒྱུགས་འཕྲོད་ཚད་དང་བསྡུར་ན་བརྒྱ་ཆ་ ༡།༠༢ ཙམ་འཕར་ཡོད་འདུག

འདི་ལོའི་འཛིན་རིམ་བཅུ་གཉིས་ཀྱི་ཡིག་རྒྱུཊ་ཁྲོད་ཞུགས་པའི་སློབ་གྲྭ་ཁག་ ༡༥ ལས་ཡིག་རྒྱུཊ་འཕྲོད་ཚད་བརྒྱ་ཆ་ ༡༠༠ བླངས་པའི་སློབ་གྲྭ་ཁག་ ༦ ཡོད་པ་དག་ལས། སེ་ལ་ཀོལ་བོད་ཁྱིམ་གྱིས་ཆ་སྙོམས་བརྒྱ་ཆ་ ༧༩།༦༡ བླངས་ཏེ་བོད་པའི་སློབ་གྲྭ་ཡོངས་ལས་ཨང་དང་པོ་དང་།  གྷོལ་པ་པུར་བོད་ཁྱིམ་གྱིས་ཆ་སྙོམས་བརྒྱ་ཆ་ ༧༡།༩༩ བླངས་ཏེ་ཨང་གཉིས་པ། ཌལ་ཧོར་གཏན་སློབ་ཀྱིས་ཆ་སྙོམས་བརྒྱ་ཆ་ ༦༧།༥༣ བླངས་ཏེ་ཨང་གསུམ་པ་བཅས་ཡིན་འདུག

འདི་ལོའི་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་གྲུབ་འབྲས་སྐྱོ་ཤོས་རྡོར་གླིང་གཏན་སློབ་ཡིན་པ་དང་། ཆ་སྙོམས་བརྒྱ་ཆ་ ༥༥། ༢༤ ཡིན་འདུག  

དེ་བཞིན། ཚན་རིག་སློབ་ཚན་ཡོད་པའི་སློབ་གྲྭ་ཁག་ ༥ ལས་སེ་ལ་ཀོལ་བོད་ཁྱིམ་གྱིས་ཆ་སྙོམས་བརྒྱ་ཆ་ ༧༩།༦༡ བླངས་ཏེ་ཨང་དང་པོ་དང་། མཱ་སུ་རི་བོད་ཁྱིམ་གྱིས་བརྒྱ་ཆ་ ༦༢།༤༦ བླངས་ཏེ་སྐྱོ་ཤོས་ཆགས་ཡོད་འདུག

འབྱུང་རིག་སྡེ་ཚན་གྱི་སློབ་གྲྭ་ཁག་ ༡༣ ལས་གྷོ་པ་པུར་བོད་ཁྱིམ་སློབ་གྲྭས་ཆ་སྙོམས་བརྒྱ་ཆ་ ༧༡།༩༩ བླངས་ཏེ་ཨང་དང་པོ་དང་། དོན་གྲུབ་གླིང་སློབ་གྲྭས་ཆ་སྙོམས་བརྒྱ་ཆ་ ༤༧།༨༦ བླངས་ཏེ་གྲུབ་འབྲས་སྐྱོ་ཤོས་ཆགས་ཡོད་འདུག

ཚོང་རིག་སྡེ་ཚན་གྱི་སློབ་གྲྭ་ཁག་ ༧ ཡོད་པ་ལས་མོན་གྷོ་གཏན་སློབ་ཀྱིས་ཆ་སྙོམས་བརྒྱ་ཆ་ ༦༤།༤༦ བླངས་ཏེ་ཨང་དང་པོ་དང་། རྡོར་གླིང་གཏན་སློབ་གྱིས་ཆ་སྙོམས་བརྒྱ་ཆ་ ༥༤།༠༢ བླངས་ཏེ་གྲུབ་འབྲས་སྐྱོ་ཤོས་ཆགས་ཡོད་འདུག

ཚན་རིག་དང་འབྱུང་རིག རྩིས་རིག་གསུམ་ནི་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་ཀྱི་སློབ་ཚན་གཙོ་བོ་གསུམ་ཡིན་ལ། འདི་ལོའི་སློབ་ཕྲུག་སྒེར་གྱི་ཡིག་རྒྱུཊ་བརྒྱ་ཆའི་ཐད་ཚན་རིག་སྡེ་ཚན་ནང་མཱ་སུ་རི་གཏན་སློབ་ཀྱི་སློབ་ཕྲུག་སིམ་རེ་ཏེ་ཀཱན་ཊ་རེ་ཡིས་ཕྱོགས་སྡོམ་བརྒྱ་ཆ་ ༩༡ བླངས་ཏེ་བོད་རིགས་སློབ་ཕྲུག་ཁྲོད་ཀྱི་ཨང་དང་པོ་དང་། སེ་ལ་ཀོལ་ བོད་ཁྱིམ་གྱི་སློབ་ཕྲུག་བསྟན་འཛིན་ཟླ་བས་ཕྱོགས་སྡོམ་བརྒྱ་ཆ་ ༩༠།༤ བླངས་ཏེ་ཨང་གཉིས་པ། སེ་ལ་ཀོལ་བོད་ཁྱིམ་གྱི་སློབ་ཕྲུག་བསྟན་འཛིན་ཤཱཀྱ་ཡིས་ཕྱོགས་སྡོམ་བརྒྱ་ཆ་ ༩༠ བླངས་ཏེ་ཨང་གསུམ་པ་བཅས་བླངས་ཡོད་འདུག

ཚོང་རིག་སྡེ་ཚན་ནང་མོན་གྷོ་གཏན་སློབ་ཀྱི་སློབ་ཕྲུག་ལྷག་པ་སྒྲོལ་མའི་ཕྱོགས་སྡོམ་བརྒྱ་ཆ་ ༩༡།༨ བླངས་ཏེ་བོད་རིགས་སློབ་ཕྲུག་ཁྲོད་ཀྱི་ཨང་དང་པོ་དང་། སྦེལ་ཀོལ་བོད་ཁྱིམ་གྱི་སློབ་ཕྲུག་བློ་བཟང་སྒྲོལ་དཀར་ཀྱི་ཕྱོགས་སྡོམ་བརྒྱ་ཆ་ ༨༧།༢ བླངས་ཏེ་ཨང་གཉིས་པ། སྦེལ་ཀོལ་བོད་ཁྱིམ་གྱི་སློབ་ཕྲུག་ཚེ་རིང་ལྷག་སྒྲོན་གྱིས་ཕྱོགས་སྡོམ་བརྒྱ་ཆ་ ༨༧ བླངས་ཏེ་ཨང་གསུམ་པ་བཅས་ཡིན་འདུག

འབྱུང་རིག་སྡེ་ཚན་ནང་བོད་ཁྱིམ་གྷོ་པ་པུར་སློབ་གྲྭའི་སློབ་ཕྲུག་ཡཱང་ཡེན་ཧྤུང་གིས་ཕྱོགས་སྡོམ་བརྒྱ་ཆ་ ༨༨།༨ བླངས་ཏེ་ཨང་དང་པོ་དང་། མཱ་སུ་རི་བོད་ཁྱིམ་གྱི་སློབ་ཕྲུག་ཡེ་ཤེས་ཟླ་བས་ཕྱོགས་སྡོམ་བརྒྱ་ཆ་ ༨༦།༨ བླངས་ཏེ་ཨང་གཉིས་པ། གྷོ་པ་པུར་བོད་ཁྱིམ་སློབ་གྲྭའི་སློབ་ཕྲུག་བསྟན་འཛིན་ཨོ་རྒྱན་གྱིས་ཕྱོགས་སྡོམ་བརྒྱ་ཆ་ ༨༦།༦ བླངས་ཏེ་ཨང་གསུམ་པ་བཅས་ཡིན་འདུག

འཛིན་རིམ་བཅུ་བའི་ཡིག་རྒྱུགས་ཁྲོད་བཙན་བྱོལ་བོད་མིའི་སློབ་གྲྭ་ཁག་ ༢༨ གྱི་སློབ་ཕྲུག་ཁྱོན་ ༡༨༤༩ མཉམ་ཞུགས་བྱས་ཡོད་པ་ལས་སློབ་ཕྲུག་ ༡༨༡༨ ཡིས་ཡིག་རྒྱུགས་འཕྲོད་ཡོད་པ་དང་། སློབ་ཕྲུག་ ༣༡ བསྐྱར་རྒྱུགས་ནང་ཞུགས་དགོས་ཀྱི་ཡོད་འདུག 

འདི་ལོར་སྤྱིའི་ཡིག་རྒྱུགས་ཀྱི་འཕྲོད་ཚད་བརྒྱ་ཆ་ ༩༨།༣༢ ཡིན་པ་དང་། དེའི་ཁྲོད་བུ་མོ་བརྒྱ་ཆ་ ༩༨།༨ ཡིས་ཡིག་རྒྱུགས་འཕྲོད་ཅིང་། བུ་བརྒྱ་ཆ་ ༩༧།༨༥ ཡིས་ཡིག་རྒྱུགས་འཕྲོད་ཡོད་འདུག བུ་དང་བུ་མོ་གཉིས་ལས་བུའི་བརྒྱ་ཆ་དམའ་བ་མ་ཟད། ཐེངས་འདིར་སྔར་ལོ་ལས་བརྒྱ་ཆ་ ༠།༩༣ མར་ཆགས་ཡོད་འདུག

ལོ་འདིའི་འཛིན་རིམ་བཅུ་གཉིས་ཀྱི་བོད་ཡིག་ཡིག་རྒྱུགས་ནང་ཁྱོན་བསྡོམས་སློབ་ཕྲུག་ ༡༡༢༠ ཞུགས་ཡོད་པ་དང་། དེའི་ཁྲོད་བརྒྱ་ཆ་དགུ་བཅུ་ཡན་བླངས་པའི་སློབ་ཕྲུག་ ༢༧ དང་། ཡིག་རྒྱུགས་མ་འཕྲོད་མཁན་ ༢ ཡོད་འདུག འཛིན་རིམ་བཅུ་བའི་བོད་ཡིག་ཡིག་རྒྱུགས་ཁྲོད་སློབ་ཕྲུག་ ༡༦༩༡ ཞུགས་ཡོད་པ་དང་། དེའི་ནང་བརྒྱ་ཆ་ ༡༠% ཆ་ཚང་བླངས་ཡོད་མཁན་སློབ་མ་ ༣༥ དང་། ཡིག་རྒྱུགས་འཕྲོད་མེད་པའི་སློབ་མ་ ༡༥  བཅས་ཡོད་འདུག

གསར་འགོད་པ། དོན་གོ