འདི་ལོའི་རྒྱལ་ཡུམ་རྗེས་དྲན་རྐང་སྤོལ་གསེར་བུམ་ཨོ་རི་ས་རུ་ཁག་ལ་ཐོབ་འདུག

དེ་རིང་ཕྱི་དྲོ་རྒྱལ་ཡུམ་རྗེས་དྲན་བུམ་པའི་རྐང་སྤོལ་རྩེད་འགྲན་ཐེངས་ ༡༨ པའི་མཐའ་མའི་རྟིང་རྩོད་ཀྱི་མཇུག་སྡོམ་མཛད་སྒོ་དྷ་སྟེང་བོད་ཁྱིམ་རྩེད་ཐང་དུ་ཚོགས་ཏེ། འདི་ལོའི་གསེར་བུམ་ཨོ་རི་ས་ཕུན་ཚོགས་གླིང་ལ་ཐོབ་ཡོད་པ་རེད།  

དེ་རིང་ཕྱི་ཚེས་ ༥ ཉིན་གྱི་ཕྱི་དྲོ་ཆུ་ཚོད་ ༣ སྟེང་རྒྱལ་ཡུམ་ཆེན་མོའི་རྗེས་དྲན་བུམ་པའི་རྐང་སྤོལ་རྩེད་འགྲན་ཐེངས་ ༡༨ པའི་མཇུག་སྡོམ་མཛད་སྒོ་དྷ་སྟེང་བོད་ཁྱིམ་རྩེད་ཐང་དུ་ཚོགས་ཡོད་པ་དང་།  མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་གིས་གཙོས། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག   སྤྱི་འཐུས་རྒྱུན་ལས་རྣམ་པའི་གཙོས་བོད་མི་མང་སྤྱི་འཐུས་ཁག་ཅིག་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ།  དེ་བཞིན་དྷ་སའི་སེར་སྐྱ་མང་ཚོགས་དང་ཕྱོགས་མཐའ་ཁག་ནས་ཕེབས་པའི་ལྟད་མོ་བ་བཅས་མི་གྲངས་སྟོང་ཕྲག་མང་པོ་འཛོམས་འདུག

མཛད་སྒོའི་ཐོག་མར་བོད་ཀྱི་བདེན་དོན་འཐབ་རྩོད་ཆེད་རང་སྲོག་འབུལ་མཁན་རྒྱལ་གཅེས་དཔའ་བོ་དཔའ་མོ་རྣམས་གཙོས། རྒྱའི་བཙོན་འོག་ཏུ་གདུག་རྩུབ་མནར་གཅོད་མྱོང་བཞིན་པའི་བོད་རིགས་སྤུན་ཟླ་ཡོངས་ལ་གདུང་སེམས་མཉམ་སྐྱེད་མཚོན་ཆེད། སྐུ་མགྲོན་དང་མི་མང་ཡོངས་རྫོགས་སྐུ་བཞེངས་ཐོག་དུས་ཡུན་སྐར་མ་གཅིག་རིང་ངག་བཅད་མྱང་ངན་དང་བདེན་ཚིགས་སྨོན་ལམ་དབྱངས་གྱེར་རྗེས།  བཀའ་ཁྲི་མཆོག་གིས་མཇུག་སྡོམ་མཛད་སྒོའི་གསུང་བཤད་གནང་པ་མ་ཟད།  རྩེད་ཐང་དུ་ཕེབས་ཏེ་མཐའ་མའི་རྟིང་རྩོད་འགྲན་བསྡུར་གནང་མཁན་བལ་ཡུལ་སྦོག་ར་བཀྲ་ཤིས་དཔལ་འཁྱིལ་དང་ཨོ་རི་ས་ཕུན་ཚོགས་གླིང་རུ་ཁག་གཉིས་ཀྱི་རྩེད་འགྲན་པ་རེ་རེར་འཚམས་འདྲིའི་ཕྱག་འཇུ་དང་དྲན་རྟེན་འདྲ་པར་སྒྲོན་ཏེ། རྩེད་འགྲན་དངོས་སུ་དབུ་འཛུགས་གནང་ཡོད་ལ།  རྩེད་འགྲན་མཇུག་སྒྲིལ་རྗེས་བཀའ་ཁྲི་བློ་བཟང་སེང་གེ་མཆོག་གིས་རྒྱལ་ཁ་ཐོབ་མཁན་རུ་ཁག་དང་རྩེད་འགྲན་པ་མི་སྒེར་བཅས་ལ་གཟེངས་རྟགས་ཕུལ་ཏེ། རྒྱལ་ཡུམ་རྗེས་དྲན་བུམ་པའི་བོད་རྒྱལ་ཡོངས་རྐང་སྤོལ་རྩེད་འགྲན་ཐེངས་ ༡༨ ཡོངས་སུ་མཇུག་སྒྲིལ་གནང་སོང་།

བཀའ་ཁྲི་མཆོག་གིས་མཇུག་སྡོམ་མཛད་སྒོའི་གསུང་བཤད་སྐབས། “ན་ཚ་སྔོན་འགོག་ཆེད་དུས་རྒྱུན་ལུས་རྩལ་དང་རྩེད་མོ་རྩེད་རྒྱུ་ཐུགས་ལ་ཉར་རོགས། དེ་རིང་འདིར་གཞོན་སྐྱེས་མང་པོ་ཞིག་དང་། དམིགས་བསལ་སློབ་ཕྲུག་མང་པོ་ཞིག་སླེབས་ཡོད་སྟབས། དེང་སང་སློབ་གྲྭ་ཁག་ནང་ཉལ་ཐ་དང་ཆང་རག བཟི་སྨན་ཟ་མཁན་ཡོང་བསྡད་པའི་གནས་ཚུལ་གོ་ཐོས་འདུག དེ་དག་ཧ་ཅང་བློ་ཕམ་གྱི་གནས་སྟངས་རེད། དེར་བརྟེན། རྗེས་ཕྱོགས་ཉལ་ཐ་དང་ཆང་རག་ལ་ལག་པ་མི་འཆིང་བར། རྩེད་མོ་དང་འཕྲོད་བསྟེན་ལ་དོ་སྣང་གནང་རོགས་ཞུ་རྒྱུ་ཡིན།” ཅེས་གསུངས་ཏེ། བོད་མིའི་སྤྱི་ཚོགས་ནང་ཌི་བྷེ་དང་ཅེ་ནའེ་ན་ཚ་གཉིས་ཀྱི་དཀའ་ངལ་ཡོད་པ་དང་། ཌི་བྷེ་ན་ཚ་ན་མཁན་རེར་འཕྲོད་བསྟེན་ལས་ཁུངས་ནས་ཧིན་སྒོར་འབུམ་ ༤ ནས་ ༧ བར་འགྲོ་སོང་གཏོང་བཞིན་ཡོད་ལ། མ་གཞི་ན་ཚ་ན་སྟེ་སྨན་ཁང་དུ་འགྲོ་དགོས་བྱུང་སྐབས་འཕྱི་དྲག་ཡོད་སྟབས། ན་ཚ་མ་བྱུང་བའི་སྔོན་ནས་དུས་རྒྱུན་རྩེད་མོ་དང་འཕྲོད་བསྟེན་ལ་དོ་སྣང་གནང་སྟེ་སྔོན་འགོག་བྱ་རྒྱུ་གལ་ཆེན་པོ་ཡིན་སྐོར་ནན་བརྗོད་དང་། དེ་བཞིན། རྩེད་མོ་བརྒྱུད་དེ་ཕན་ཚུན་འབྲེལ་འདྲིས་དང་མཉམ་རུབ། ཆིག་སྒྲིལ་བཅས་ཡོང་དགོས་པ་ཐུགས་ལ་ཉར་དགོས་པའི་འབོད་སྐུལ་བཅས་གནང་སོང་།

དེ་རིང་གི་མཐའ་མའི་རྟིང་རྩོད་འགྲན་བསྡུར་སྐབས། སྦོག་ར་བཀྲ་ཤིས་དཔལ་འཁྱིལ་དང་ཨོ་རི་ས་ཕུན་ཚོགས་གླིང་རུ་ཁག་གཉིས་ཀྱིས་ཕར་ཚུར་ལ་སྤོ་ལོ་རེ་རེ་བླུགས་ཏེ་འདྲ་མཉམ་ཆགས་ཡོད་པ་དང་། དེ་རྗེས་བསྐྱར་དུ་དུས་ཡུན་སྐར་མ་ ༣༠ རིང་རྩེད་འགྲན་བྱས་ཀྱང་ཕྱོགས་གཉིས་བར་རྒྱལ་ཕམ་དབྱེ་བ་འབྱེད་མ་ཐུབ་པར་བརྟེན། མཐའ་མར་རྐང་རྩེད་བ་རེ་རེས་ཐད་ཀར་སྒོ་ནང་དུ་སྤོ་ལོ་བླུགས་རེ་ཡི་རྩེད་འགྲན་བརྒྱུད། སྦོག་ར་བཀྲ་ཤིས་དཔལ་འཁྱིལ་རུ་ཁག་གིས་སྤོ་ལོ་ ༢ དང་། ཨོ་རི་ས་ཕུན་ཚོགས་གླིང་རུ་ཁག་གིས་སྤོ་ལོ་ ༤ བཅས་བླུགས་ཏེ། རྒྱལ་ཡུམ་ཆེན་མོའི་དྲན་རྟེན་གསེར་གྱི་རྟགས་མའི་བུམ་པ་དེ་ཨོ་རི་ས་ཕུན་ཚོགས་གླིང་ལ་ཐོབ་ཡོད་པ་དང་།  དེ་བཞིན། ཨང་དང་པོ་ཐོབ་མཁན་རུ་ཁག་ལ་ཧིན་སྒོར་འབུམ་ ༡ དང་། ཨང་གཉིས་པ་ཐོབ་མཁན་ལ་ཧིན་སྒོར་ཁྲི་ ༦ བཅས་བྱ་དགའ་བསྩལ་ཡོད་པ་རེད།

གཞན་ཡང་། འདི་ལོའི་རྩེད་འགྲན་ཁྲོད་བཟང་སྤྱོད་ཡག་ཤོས་ཀྱི་གཟེངས་བསྟོད་བྱ་དགའ་ཌལ་ཧོར་ཕུན་ཚོགས་གླིང་རུ་ཁག་ལ་ཐོབ་ཡོད་པ་དང་།  རྩེད་འགྲན་ཧྲིལ་བོའི་ནང་སྤོ་ལོ་མང་ཤོས་བླུགས་མཁན་ནི་བཀྲ་ཤིས་དཔལ་འཁྱིལ་རུ་ཁག་གི་ཨང་གྲངས་ ༧ ནོར་བུ་རྡོ་རྗེ་དང་།  ཕུན་ཚོགས་གླིང་རུ་ཁག་གི་ཨང་གྲངས་ ༧ པ་བྱང་ཆུབ་རྒྱལ་མཚན་གཉིས་ཆགས་ཡོད་པ་དང་། ཁོང་གིས་སྤོ་ལོ་ ༧ རེ་བླུགས་ཡོད་པ་རེད། ཁོང་གཉིས་ལ་བྱ་དགའ་ཧིན་སྒོར་ ༥༠༠༠ རེ་བསྩལ་འདུག

འདི་ལོའི་རྩེད་འགྲན་སྐབས་ལོ་སྔོན་མ་དག་དང་བསྡུར་ན་ལྟད་མོ་གཟིགས་མཁན་གྱི་མི་འབོར་དང་རྒྱབ་སྐྱོར་གྱི་རྣམ་འགྱུར་སྟོན་སྟངས། རྐང་སྤོལ་རྩེད་མཁན་རུ་ཁག་ཕན་ཚུན་བར་མཐུན་ལམ་དང་། རྩེད་མོ་རྩེད་སྟངས་སོགས་ཕྱོགས་ཡོངས་ནས་ཡར་རྒྱས་ཀྱི་རྣམ་པ་གསར་བ་ཞིག་སླེབས་འདུག 

མཐའ་མའི་རྟིང་རྩོད་རྩེད་འགྲན་གནང་མཁན་རུ་ཁག་གཉིས་ཀྱི་རྗེས་དྲན་འདྲ་པར།

སྤོ་ལོ་མང་ཤོས་བླུགས་མཁན་ནོར་བུ་རྡོ་རྗེ་དང་བྱང་ཆུབ་རྒྱལ་མཚན།

རྒྱལ་ཁ་ཐོབ་མ་ཐག་པའི་རྩེད་འགྲན་ར་བའི་རྣམ་པ།