བཀག་བསྐྱེལ་ཁང་གིས་དེ་རིང་ང་ལ་རེ་སྐུལ་དང་འདྲི་བརྩད་སླར་ཡང་བྱས་སོང་།

དེ་རིང་བར་དུ་ང་རང་བཀག་བསྐྱེལ་ཁང་འདི་ལ་བཅུགས་ནས་ཉིན་མོ་བཅོ་བརྒྱད་འགོར་ཡོད། དེ་ཡི་རིང་དུ་ཁྲིམས་ཁང་དུ་ཐེངས་གསུམ་རིང་ལ་ཁྲིམས་རྩོད་པའི་སར་ཁྲིད་པ་རེད། ཁྲིམས་རྩོད་པས་སར་ཁྲིད་ཐེངས་རེར། ངའི་མིང་ནས་འབོད་པ་དང་ཉིན་བཀག་ཕྱིར་འགྱངས་བྱེད་པ་ལས། ང་ལ་སྐད་ཆ་གཞན་གང་ཡང་མི་འདྲི། དེ་རིང་བར་དུ་ང་རང་བཀག་བསྐྱེལ་ཁང་འདིའི་ཡིག་ཚང་དུ་ཐེངས་ཁ་ཤས་ཤིག་ལ་སྐད་བཏང་བ་ལས། དེ་རིང་བར་དུ་ང་ལ་ཐག་གཅོད་བྱེད་ཀྱི་ཡིན་ཟེར་བའི་སྐད་ཆ་གང་ཡང་བཤད་མྱོང་མེད། དེ་རིང་ང་རང་ཡིག་ཚང་དུ་སྐད་བཏང་དེ་ཁྱོད་རང་བོད་དང་རྒྱ་གར་གང་དུ་འགྲོ་འདོད་འདུག་ཟེར། ངས་ང་རང་ནི་རང་གི་ཕ་ཡུལ་བོད་དུ་འགྲོ་འདོད་ཅེས་ཞུས་དུས། ཁོ་གཉིས་ཀྱིས་ཕན་ཚུན་གྱིས་གདོང་ལ་ཞིབ་དུ་བལྟ་བཞིན་སླར་ཡང་ང་ལ་ཁྱོད་ཀྱིས་བསམ་བློ་ཡག་པོ་ཐོངས་ཟེར། ངས་ཐེ་ཚོམ་གང་ཡང་མེད་པར་དེ་རིང་བར་དུ་ཁྱེད་ཚང་གི་ཁྲིམས་ལུགས་ལ་བརྩི་བཀུར་བྱས་ནས་ང་ལ་ཉེས་ཆད་གང་ཡོད་པ་དེར་ཐག་གཅོད་བྱེད་རྒྱུར་སྒུག་པ་ཡིན། དེ་རིང་ཁྱོད་རྣམ་པ་གཉིས་ནས་ང་ལ་འདྲི་བཞིན་འདུག ངས་སྐད་ཆ་ནི་སྔར་བཞིན་ཡིན། ཁྱེད་ཅག་གི་ཁྲིམས་གཞིར་བཟུང་ང་ལ་ཐག་གཅོད་བྱས་ན་འགྲིག་གི་ཡོད་ཅེས་སླར་ཡང་ཞུས་དུས། ཁོང་གཉིས་ཀྱིས་ཁྱོད་རང་ལ་བསམ་ཚུལ་གང་ཡོད་པ་དེར་ངེད་གཉིས་ཀྱིས་བརྩི་བཀུར་བྱེད་ཀྱི་ཡོད་ཅེས་བཤད་སོང་། དེ་དུས་སླར་ཡང་སྐད་ཆ་དེ་རང་ཡིན། ང་རང་གི་དོན་དག་ཁྱེད་ཅག་གི་ཤེས་གསལ་རེད། ང་རང་ཞི་བའི་གོམ་བགྲོད་པ་རེད། རང་ཡུལ་དུ་འགྲོ་ཡི་ཡིན་ཞེས་ཞུས་པ་ཡིན།

དེ་དུས་ཁོ་གཉིས་ཀྱིས་ཐག་གཅོད་པོས་སྒོ་ནས་ང་ལ་ཁྱོད་རང་ཕྱིར་རྒྱ་གར་དུ་གཏོང་གི་ཡིན། དེ་ལས་གཞན་ང་ཚོས་ཁྱོད་རང་ཕ་ཡུལ་དུ་གཏོང་ཐུབ་ཀྱི་མི་འདུག དེ་ལྟར་ཐག་གཅོད་བྱེད་ཀྱི་ཡིན་ཟེར་བ་དེར་ངས་ཀྱང་ཁྱེད་ཅག་གི་གང་གསུངས་པ་དེར་ངས་བརྩི་བཀུར་བྱེད་རྒྱུ་ལས་ཐབས་གཞན་མེད་པ་རེད། བྱེད་ངེས་ཡིན་ཞེས་བཤད་པ་ན། ཁོ་གཉིས་ཀྱིས་གདོང་ལ་འཛུམ་གྱིས་བཀང་ཞོར་དུ་ང་ལ་དེས་ན་ཁྱོད་རང་ད་ལྟ་འོག་ཤོད་དུ་སོང་ནས་ངལ་གསོས་དེ་བསྡད་ན་འགྲིག་གི་རེད་ཅེས་དམག་མི་ཞིག་ལ་ནམ་རྒྱུན་ལྟར་ང་རང་འོག་ཁང་དུ་བསྐྱལ་དུ་བཅུགས་སོང་། རྒྱ་གར་ལ་ཅི་ལྟར་བསྐྱེལ་རྒྱུ་ཡིན་མིན་སོགས་ཀྱི་སྐོར་ནས་ང་ལ་སྐད་ཆ་གང་ཡང་བཤད་མ་སོང་། ག་དུས་བསྐྱེལ་མིན། ས་གནས་གང་དུ་བསྐྱེལ་མིན། ཡང་ན་ང་རང་རང་འགར་གཏོང་གི་ཡོད་མེད། སྒོར་མོའི་ཉེས་ཆད་ཡོད་མེད་སོགས་གང་ཡང་བཤད་མ་སོང་། གལ་སྲིད། སྒོར་ཆད་གཏོང་གི་ཡིན་ཟེར་ན་ངས་སྒོར་ཆད་ཁུར་རྒྱུ་མིན་པར་ཁྲིམས་ཆད་ཁུར་རྒྱུའི་གྲྭ་སྒྲིག་བྱས་ནས་སྒུག་བསྡད་ཡོད། ༧།༦།༡༢