རཱ་ཤི་ཡའི་སྲིད་འཛིན་པུ་ཊེན་རྒྱ་ནག་ཏུ་ཕྱིན་ཏེ། པེ་ཅིན་དུ་རྒྱལ་ཁབ་ ༦ གི་ཧྲང་ཧེ་མཉམ་ལས་རྩ་འཛུགས་བརྒྱུད། རཱ་ཤི་ཡའི་ཕྱོགས་ཁག་རྒྱ་སྐྱེད་ཐོག་ནུབ་ཕྱོགས་པར་ཁ་གཏད་གཅོག་རྒྱུའི་ཁ་ཕྱོགས་བཟུང་ཡོད།
ཕྱི་ཚེས་ ༥ ཉིན་རཱ་ཤི་ཡའི་སྲིད་འཛིན་གསར་པ་སྐུ་ཞབས་པུ་ཊེན་ (Vladimir Putin) རྒྱ་ནག་ཏུ་ཕྱིན་ཏེ་རཱ་ཤི་ཡ་དང་རྒྱ་ནག་གི་འབྲེལ་ལམ་དམ་ཟབ་དང་ནུབ་ཕྱོགས་པའི་ཤུགས་རྐྱེན་འགོག་ཐབས་བྱེད་ཀྱི་ཡོད། ཕྱི་ཚེས་ ༦ དང་ ༧ བཅས་ཉིན་གཉིས་རིང་རཱ་ཤི་ཡ་དང་རྒྱ་ནག ཀཱ་ཛ་ཀི་སི་ཐན། ཀེར་གྷེ་ཛི་སི་ཐན། ཊ་ཇེ་ཀེ་སི་ཐན། ཨུ་ཛི་བྷེ་ཀེ་སི་ཐན་བཅས་རྒྱལ་ཁབ་ ༦ གི་ས་ཁུལ་ཆིག་སྒྲིལ་དང་ནུབ་ཕྱོགས་པའི་ཤུགས་རྐྱེན་འགོག་ཐབས་ཞེས་པའི་ཧྲང་ཧེ་མཉམ་ལས་རྩ་འཛུགས་ལོ་འཁོར་ཚོགས་ཆེན་པེ་ཅིན་དུ་ཚོགས་ཡོད་ཅིང་། ཨེ་རན་དང་པཱ་ཀི་སི་ཐན། རྒྱ་གར། ཨབ་གྷན། སོག་པོ་བཅས་ཀྱི་སྲིད་འཛིན་དང་སྐུ་ཚབ་སྐོར་ཞིག་ཀྱང་མཉམ་ཞུགས་བྱས་ཡོད་འདུག ཚོགས་ཐོག་ཏུ་འཇིགས་སྐུལ་རིང་ལུགས་པར་འགོག་རྒོལ་བྱེད་ཕྱོགས་དང་དཔལ་འབྱོར་འཕེལ་རྒྱས་སོགས་ལ་གྲོས་མོལ་གནང་ཡོད་ཅིང་། ལྷག་པར་དུ་ཨབ་གྷན་དང་པཱ་ཀི་སི་ཐན་ནང་གི་ཎ་ཊོ་དམག་དཔུང་ཕྱིར་འཕུད་དང་། ཨ་རི་གཙོས་པའི་ནུབ་ཕྱོགས་པའི་ཤུགས་རྐྱེན་འགོག་ཐབས་བཅས་ཀྱི་ཐད་གྲོས་བསྡུར་བྱས་ཡོད་འདུག
ཟླ་སྔོན་མའི་ནང་ཝ་ཤིན་ཊོན་དུ་ཎ་ཊོའི་ཚོགས་ཆེན་ནང་པུ་ཊེན་མཉམ་ཞུགས་བྱས་མེད་པ་དང་། ཕྱི་ཚེས་ ༥ ཉིན་ཁོང་རྒྱ་ནག་ཏུ་ཕྱིན་ཏེ། རྒྱ་ནག་སྲིད་འཛིན་ཧུའུ་ཅིན་ཐའོ་དང་སྲིད་བློན་ཝུན་ཇ་པའོ། དེ་བཞིན། རྒྱ་ནག་གི་མ་འོངས་པའི་སྲིད་འཛིན་ཞིས་ཅིན་ཕིན་དང་སྲིད་བློན་ལིས་ཁི་ཆིང་བཅས་ལ་ཐུག་འཕྲད་ཀྱིས་ཨེ་རན་རྡུལ་མཚོན་དང་ཨབ་གྷན་ནང་གི་ཎ་ཊོའི་དམག་དཔུང་། སེ་རི་ཡའི་རྩོད་ཉོག་བཅས་ལ་ནུབ་ཕྱོགས་པའི་ཐེ་ཇུས་འགོག་ཐབས་ལ་གྲོས་བསྡུར་བྱས་ཡོད། ཧྲང་ཧེ་མཉམ་ལས་རྩ་འཛུགས་ཀྱི་ཚོགས་ཆེན་སྟེང་པུ་ཊེན་གྱིས་གྲོས་གཞི་བཏོན་པར། ཚོགས་ཞུགས་རྒྱལ་ཁབ་ཁག་གི་མགོ་ཁྲིད་ཚོས་གྲོས་མཐུན་མིང་རྟགས་བཀོད་དེ། ཨེ་རན་དང་ཨབ་གྷན། སེ་རི་ཡ་སོགས་ཀྱི་གནད་དོན་ཐོག་ནུབ་ཕྱོགས་པས་ཐེ་ཇུས་བྱེད་པར་གོང་གསལ་རྒྱལ་ཁབ་ཁག་གིས་མཉམ་རུབ་ངོ་རྒོལ་བྱ་རྒྱུ་མ་ཟད། མཇུག་འབྲས་ཚབས་ཆེན་འབྱུང་སྲིད་པའི་ཉེན་བརྡ་ཡང་བཏང་ཡོད།
ཆབ་སྲིད་དཔྱད་བརྗོད་པ་ཁག་ཅིག་གིས་པུ་ཊེན་ཐོག་མར་སྲིད་འཛིན་ལ་བསྡད་པ་ནས་ཨ་རི་གཙོས་པའི་ནུབ་ཕྱོགས་རྒྱལ་ཁབ་ཁག་གིས་རྒྱལ་ཁབ་གཞན་གྱི་ཆབ་སྲིད་དང་དཔལ་འབྱོར། དམག་དོན་སོགས་ཐེ་ཇུས་བྱེད་ཀྱིན་པར་ངོ་རྒོལ་བྱེད་མཁན་ཞིག་ཡིན་པ་དང་། དེ་སྔོན་ཁོས་ཨེ་རག་སྲིད་འཛིན་སཱ་ཌམ་ཧུ་སེན་དང་གྷ་ཌ་ཧྥེ། བྷག་ཤར་སོགས་དང་མཉམ་འབྲེལ་ཐོག་ནུབ་ཕྱོགས་པའི་བཙན་འཛུལ་ལ་རྒོལ་ལན་སྤྲོད་ཐབས་བྱས་ཀྱང་། སཱ་ཌམ་ཧུ་སེན་དང་གྷ་ཌ་ཧྥེ་གཉིས་འཆི་ལམ་དུ་ཕྱིན་ཡོད་པ་དང་། ད་ཆར་ཁོང་ལ་ལག་རོགས་ཤིག་ཡོད་པ་ནི་བྷག་ཤར་གཅིག་པུ་ཡིན་ཡང་། སེ་རི་ཡའི་ཟིང་འཁྲུག་དང་བསྟུན་ཏེ་ནུབ་ཕྱོགས་པས་བྷག་ཤར་སྲིད་གཞུང་མགོ་རྟིང་སློབ་འཆར་ཡོད་པ་དེར། པུ་ཊེན་གྱིས་ཨེ་ཤ་ཡའི་མཉམ་འབྲེལ་ཕྱོགས་གཏོགས་རྒྱ་སྐྱེད་བཏང་སྟེ་ཁ་གཏད་གཅོག་རྒྱུ་དང་། དེ་ལ་རྒྱ་ནག་ཧ་ང་གཙོ་གནད་ཆགས་ཡོད་སྟབས། རྒྱ་ནག་དང་རཱ་ཤི་ཡའི་བར་གྱི་དེ་སྔའི་རྩོད་རྙོག་རིགས་ཟུར་དུ་བཞག་ཏེ་ཕྱོགས་བསྒྲིལ་བྱེད་ཀྱི་ཡོད་སྐོར་གླེང་།
སེ་རི་ཡའི་གཞུང་འཕོ་འགྱུར་གཏོང་རྒྱུར་རཱ་ཤི་ཡ་དང་རྒྱ་ནག་གིས་ངོ་རྒོལ་བྱེད་དོན་ནི། སེ་རི་ཡ་ནི་དམག་དོན་དང་ཚོང་འབྲེལ། ཕྱི་འབྲེལ་སོགས་ལ་རཱ་ཤི་ཡ་ལ་ཧ་ཅང་གལ་གནད་ཆེན་པོ་ཆགས་ཡོད་སྟབས། སེ་རི་ཡའི་གཞུང་ལ་འཕོ་འགྱུར་བཏང་སྟེ་ནུབ་ཕྱོགས་པར་རྒྱབ་རྟེན་བཅོལ་མཁན་ཞིག་སྲིད་སྟེགས་སུ་བསླེབ་ཚེ། སེ་རི་ཡ་ཙམ་མ་ཟད་དཀྱིལ་ཤར་ཡུལ་གྲུ་གཞན་དག་ནང་ནུབ་ཕྱོགས་པའི་ཤུགས་རྐྱེན་སྔར་ལས་ཆེ་རུ་འགྲོ་རྒྱུར་འཇིགས་སྣང་བྱེད་ཀྱི་ཡོད་འདུག
ད་ལོའི་ཕྱི་ཟླ་ ༢ པའི་ནང་རྒྱལ་ཚོགས་བདེ་འཇགས་ལྷན་ཁང་ནང་སེ་རི་ཡར་རྒྱལ་ཚོགས་དང་ཎ་ཊོའི་དམག་དཔུང་གཏོང་རྒྱུའི་གྲོས་བསྡུར་སྐབས། རཱ་ཤི་ཡས་ངོ་རྒོལ་བྱས་པར་རྒྱ་ནག་རཱ་ཤི་ཡའི་ཕྱོགས་སུ་ལངས་ཏེ་གྲོས་ཆོད་འཇོག་ཐུབ་མེད་ལ། ཟླ་འདིའི་ཕྱི་ཚེས་ ༡ ཉིན་བསྐྱར་དུ་རྒྱལ་ཚོགས་བདེ་འཇགས་ལྷན་ཁང་ནང་ཉེ་ཆར་སེ་རི་ཡའི་ནང་གི་མི་མང་རྡེབ་གསོད་ཆེན་མོའི་དོན་རྐྱེན་དང་འབྲེལ་ཏེ། སེ་རི་ཡའི་སྲིད་གནད་དོན་ལ་རྒྱལ་སྤྱིའི་དམག་གིས་ཐེ་ཇུས་བྱ་རྒྱུར་གྲོས་གཞི་བཏོན་ཡོད་པ་དང་། རཱ་ཤི་ཡ་དང་རྒྱ་ནག་གིས་གནད་དོན་དེའི་ཐད་རོགས་འདེགས་བྱ་དགོས་པའི་སྐུལ་མ་བཏང་ཡོད་ཀྱང་། རཱ་ཤི་ཡས་དོན་རྐྱེན་དེ་བྷག་ཤར་སྲིད་གཞུང་གཅིག་པུ་མིན་པར་གྱེན་ལངས་ཤོག་ཁག་ལ་འགན་ཡོད་ཚུལ་དང་། དོན་རྐྱེན་དེའི་མཇུག་འབྲས་ནི་ནུབ་ཕྱོགས་པས་གྱེན་ལངས་པར་རྒྱབ་རྩ་བྱས་པ་ལས་བྱུང་པ་ཞིག་ཡིན་པའི་སྐྱོན་བརྗོད་ཐོག གྲོས་དོན་ལ་ངོ་རྒོལ་བྱས་ཡོད་སྟབས་གྲོས་གཞི་ཐག་གཅོད་ཐུབ་མེད། རཱ་ཤི་ཡ་དང་རྒྱ་ནག་གཉིས་རྒྱལ་ཚོགས་བདེ་འཇགས་ལྷན་ཁང་གི་གཏན་འཇགས་རྒྱུན་ལས་དང་། ད་ཆར་རྒྱ་ནག་རྒྱུས་ལས་ཚོགས་གཙོ་ཡང་ཆགས་ཡོད་སྟབས། བདེ་འཇགས་ལྷན་ཁང་ནང་རཱ་ཤི་ཡ་དང་རྒྱ་ནག་གི་མོས་མཐུན་མ་བྱས་ཚེ་གྲོས་གཞི་གང་ཡང་ཐག་གཅོད་བྱེད་ཐབས་མེད།
རྒྱལ་སྤྱིའི་ཆབ་སྲིད་དབྱེ་ཞིབ་པ་དག་གིས་པུ་ཊེན་གྱིས་རང་གི་ཕྱོགས་གཏོགས་རྒྱ་སྐྱེད་ཐོག་ཨ་རི་དང་ཨ་རིའི་ཕྱོགས་གཏོགས་པ་ཚོར་ཁ་གཏད་གཅོད་རྒྱུའི་དཔུང་ཁག་སྐྲུན་ཐབས་བྱེད་ཀྱིན་པ་དེ་ནི། དེ་སྔའི་འཛམ་གླིང་དམག་འཁྲུག་གཉིས་པའི་རྗེས་སུ་ཨུ་རུ་སུ་ཕྱོགས་གཏོགས་དང་ཨ་རི་ཕྱོགས་གཏོགས་སོ་སོར་གྱེས་ཏེ་མ་རྩ་རིང་ལུགས་དང་སྤྱི་ཚོགས་རིང་ལུགས་པར་བྱུང་པའི་གྲང་དམག་ལྟ་བུ་ཞིག་བསྐྱར་དུ་འབྱུང་ཉེན་ཡོད་སྐོར་བཤད།
པུ་ཊེན་དང་ཁོང་གི་ཆབ་སྲིད་ཀྱི་མི་ཚེ།
པུ་ཊེན་ ༡༩༥༢ ལོར་ཞིང་པའི་ཁྱིམ་ཚང་ཞིག་ཏུ་སྐྱེས་ཤིང་། ཁོང་གིས་ཁྲིམས་ལུགས་སློབ་སྦྱོང་དང་དཔལ་འབྱོར་རིག་པའི་འབུམ་རམས་པ་ཐོན་ཡོད་པ་དང་། ༡༩༧༥ ལོ་ནས་ཁོང་སྐབས་དེའི་ཨུ་རུ་སུའི་ཕྱི་སྲིད་གསང་པའི་ལུས་ཁུངས་སུ་ཞུགས་ཡོད་པ་མ་ཟད། ༡༩༨༥ ལོ་ནས་ཤར་འཇར་མན་ནང་གསང་བའི་མི་སྣ་བྱས་ཏེ་ལོ་མང་བསྡད། ༡༩༩༠ ལོར་ཤར་འཇར་མན་འཐོར་བཤིག་ཏུ་ཕྱིན་རྗེས་ཁོང་ཕྱིར་ལོག་སྟེ། སྐབས་དེའི་སན་ཊི་པེ་ཊར་སི་བྷག་(St.Petersburg) གྲོང་ཁྱེར་སྤྱི་ཁྱབ་པ་ཨ་ནཱ་ཊོ་ལེ་(Anatoly Sobchak)ཡིས་པུ་ཊེན་གྲོང་ཁྱེར་དེའི་ཕྱི་འབྲེལ་ཚོགས་ཆུང་གི་འགན་འཛིན་དུ་བསྐོ་བཞག་ཐོག ཨ་ནཱ་ཊོ་ལེ་ཡིས་ཁོང་ཆབ་སྲིད་མི་སྣ་རླབས་ཆེན་ཞིག་ཏུ་གསོ་སྐྱོང་བྱས། རྗེས་སུ་ཨ་ནཱ་ཊོ་ལེ་ལ་ལྐོག་ཟ་རུལ་སུངས་ཀྱི་ནག་ཉེས་ཕོག་སྐབས། པུ་ཊེན་གྱིས་རང་ནུས་ཡོད་ཚད་བཏོན་ཏེ་རང་གི་དགེ་རྒན་གྱི་ནག་ཉེས་དག་ཐབས་བྱས་པ་དེས། སྐབས་དེའི་རཱ་ཤི་ཡའི་སྲིད་འཛིན་བྷོ་རེ་སི་(Boris Yeltsin) ལ་པུ་ཊེན་ནི་རང་གི་དགེ་རྒན་ལ་ལྷག་བསམ་རྣམ་དག་ཡིན་པའི་སེམས་འགུལ་ཐེབས་ཡོད་པར་གླེང་།
༡༩༩༦ ལོ་སྲིད་འཛིན་བྷོ་རེ་སི་ཡིས་པུ་ཊེན་ཐད་གར་སྲིད་འཛིན་ལས་ཁུངས་སུ་གནས་སྤོར་བྱས་ཏེ། ལོ་བཞི་ཙམ་ནང་སྲིད་འཛིན་ལས་ཁུངས་ཀྱི་སྔོན་རྩིས་འགན་འཛིན་ནས་འཛིན་སྐྱོང་འགན་འཛིན་དང་། སྲིད་འཛིན་སྤྱི་ཁྱབ་ལས་ཁུངས་ཀྱི་འགན་འཛིན། རཱ་ཤི་ཡ་སྤྱི་མཐུན་རྒྱལ་ཁབ་ཀྱི་བདེ་འཇགས་ལས་དོན་འགན་འཛིན། བདེ་སྲུང་ལྷན་ཁང་གི་དྲུང་ཆེ་བཅས་སུ་རིམ་བཞིན་གནས་སྤོར་བྱས། ༡༩༩༩ ཕྱི་ཟླ་ ༨ ནང་སྲིད་འཛིན་བྷོ་རེ་སི་ཡིས་སྐབས་དེའི་སྲིད་བློན་སཱེར་གྷའེ་(Sergei Stepashin) ལས་གནས་ནས་ཕབ་སྟེ་པུ་ཊེན་སྲིད་བློན་དུ་བསྐོ་བཞག་བྱས། དེ་ནི་བསླེབ་ལ་ཉེ་བའི་རཱ་ཤི་ཡའི་སྲིད་འཛིན་འོས་བསྡུའི་ཁྲོད་པུ་ཊེན་ལ་རྒྱལ་ཁ་འཐོབ་རྒྱུར་ལམ་ཁ་བཟོས་པ་ཞིག་ཡིན་པར་ཆབ་སྲིད་དཔྱད་བརྗོད་པ་དག་གིས་བཤད། འོན་ཀྱང་ལོ་དེ་གའི་ཕྱི་ཟླ་ ༡༢ ཟླ་མཇུག་ཏུ་སྲིད་འཛིན་ཁོང་ལས་གནས་ནས་དགོངས་ཞུ་བྱས་ཏེ་ ༢༠༠༠ ལོའི་སྲིད་འཛིན་འོས་བསྡུ་མ་བསླེབ་པར་པུ་ཊེན་སྲིད་འཛིན་ལས་ཚབ་ཏུ་བསྐོས།
༢༠༠༠ ཟླ་ ༣ ནང་གི་རཱ་ཤི་ཡའི་སྲིད་འཛིན་འོས་བསྡུའི་ཁྲོད་པུ་ཊེན་ལ་འོས་གྲངས་བརྒྱ་ཆ་ ༥༣ རག་སྟེ་སྲིད་འཛིན་འོས་བསྡུའི་རྒྱལ་ཁ་ཐོབ། ༢༠༠༤ ལོའི་སྲིད་འཛིན་འོས་བསྡུའི་ཁྲོད་ཁོང་ལ་འོས་གྲངས་བརྒྱ་ཆ་ ༧༡ ལ་ཐོབ་སྟེ་བསྐྱར་དུ་རཱ་ཤི་ཡའི་སྲིད་འཛིན་ཆགས། ༢༠༠༨ ལོའི་སྲིད་འཛིན་འོས་བསྡུའི་སྐབས་རཱ་ཤི་ཡའི་རྩ་ཁྲིམས་ནང་མི་གཅིག་བསྟུད་མར་སྲིད་འཛིན་སྐབས་གཉིས་ལྷག་ཡོང་མི་ཆོག་སྟབས། ཁོང་གི་རྒྱབ་སྐྱོར་འོག་སྐབས་དེའི་སྲིད་བློན་གཞོན་པ་ཌི་མེ་ཊི་རེ་(Dmitry Medvedev)ལ་སྲིད་འཛིན་གྱི་རྒྱལ་ཁ་ཐོབ། དི་མེ་ཊི་རེ་ཡིས་པུ་ཊེན་ཁོང་གི་གཞུང་གསར་པའི་སྲིད་བློན་དུ་བསྐོས། མི་མང་པོ་ཞིག་གིས་ཌི་མེ་ཊི་རེ་སྲིད་འཛིན་ཡིན་རུང་ཁོང་པུ་ཊེན་གྱི་སྟངས་འཛིན་འོག་ཡོད་པའི་བསམ་ཚུལ་ཤུགས་ཆེན་པོ་བྱུང་ཡོད་པ་རེད།
ལོ་སྔོན་མར་སྲིད་འཛིན་ཌི་མེ་ཊི་རེ་ཡིས་ ༢༠༡༢ ལོའི་རཱ་ཤི་ཡའི་སྲིད་འཛིན་འོས་གཞིར་པུ་ཊེན་ལ་རྒྱབ་སྐྱོར་བྱས་རྗེས་པུ་ཊེན་གྱིས་རང་ཉིད་སྲིད་འཛིན་འོས་མིར་ལངས་རྒྱུའི་ཁྱབ་བསྒྲགས་བྱས་པ་ལྟར། ཁོང་ལ་ ༢༠༡༢ ལོའི་རཱ་ཤི་ཡའི་སྲིད་འཛིན་འོས་བསྡུའི་ཁྲོད་རྒྱལ་ཁ་ཐོབ་སྟེ་སྐབས་གསུམ་རིང་གི་རཱ་ཤི་ཡའི་སྲིད་འཛིན་ཆགས་ཡོད། སྔོན་ཆད་རཱ་ཤི་ཡའི་སྲིད་འཛིན་ལས་ཡུན་ལོ་ ༤ ཡིན་ཡང་། ༢༠༠༨ ལོར་རྩ་ཁྲིམས་བསྐྱར་བཅོས་ཀྱིས་ ༢༠༡༢ ལ་ནས་སྲིད་འཛིན་ལས་ཡུན་ལོ་ ༦ བཟོས་ཡོད། ཆབ་སྲིད་དཔྱད་བརྗོད་པ་དག་གིས་པུ་ཊེན་མུ་མཐུད་སྐབས་རྗེས་མའི(༢༠༡༨ ནས་ ༢༠༢༤) སྲིད་འཛིན་ལ་རེ་བ་འཛིན་གྱི་ཡོད་པར་གླེང་གི་ཡོད་ཀྱང་། པུ་ཊེན་གྱིས་སྐབས་རྗེས་མའི་སྲིད་འཛིན་འོས་བསྡུའི་འགྲན་རྩོད་ནང་ཞུགས་མིན་ཐད་ད་དུང་ཐག་གཅོད་གང་ཡང་མེད་ཚུལ་བརྗོད་ཡོད།
པུ་ཊེན་དྲག་རྩལ་དང་རླངས་འཁོར་རྩེད་འགྲན། རི་དྭགས་རྔོན་པ། རི་འཛེགས། དམག་འཐབ་གནམ་གྲུ་གཏོང་རྒྱུ། རོལ་དབྱིངས་དང་གླུ་གཞས་གཏོང་རྒྱུ་སོགས་རྩེད་རིགས་ཆེ་ཁག་ཚང་མར་མཁས་པ་མ་ཟད། དམིགས་བསལ་ཉེན་ཁ་ཅན་གྱི་རྩེད་མོའི་ཐོག་ནས་རང་ཉིད་ཀྱི་འཇོན་ཐང་དང་གཟི་བརྗིད་མངོན་ཐབས་བྱེད་རྒྱུར་དགའ་བོ་ཡོད་པ་ཞིག་དང་། རཱ་ཤི་ཡའི་ནང་ཁོང་ལ་དྲག་རྩལ་འགྲན་བསྡུར་གྱི་རྟགས་མ་ཐེངས་མང་ཐོབ་མྱོང་ཡོད་པ་དང་། ཉི་ཧོང་གི་དྲག་རྩལ་འགྲན་བསྡུར་ཞིག་གི་སྐབས་ཁོང་ལ་སྐེ་རག་ནག་པོའི་(Black Belt) རྟགས་མ་ཡང་ཕུལ་ཡོད་འདུག
༡༩༩༡ ལོར་ཨུ་རུ་སུ་འཐོར་བཤིག་ཏུ་ཕྱིན་རྗེས་རཱ་ཤི་ཡའི་ནང་དཔལ་འབྱོར་དང་ཆབ་སྲིད་བརྟན་བརླིང་མེད་པའི་དཀའ་ངལ་ཆེན་པོ་འཕྲད་ཡོད་སྟབས། ཁོང་སྲིད་འཛིན་དུ་བསླེབས་རྗེས་ཆབ་སྲིད་དང་དཔལ་འབྱོར་སྲིད་ཇུས་ལ་བཅོས་བསྒྱུར་བཏང་པ་མ་ཟད། རྒྱལ་ཁོངས་བརྟན་བརླིང་མེད་པའི་ས་ཁུལ་ཁག་ཏུ་ཁོ་རང་ཉིད་ཀྱིས་དམག་འཐབ་གནམ་གྲུ་བཏང་སྟེ་ངོ་ལོག་པ་ཞི་འཇགས་བཏང་པ་སོགས། རྒྱལ་ཁོངས་བརྟན་བརླིང་འཕེལ་རྒྱས་སུ་གཏོང་ཐུབ་པ་དེས་རཱ་ཤི་ཡའི་མི་མང་གི་སེམས་ཁོངས་སུ་ཁོང་གིས་གཟི་བརྗིད་ཀྱི་སྣང་བརྙན་བསྐྲུན་ཡོད།
པུ་ཊེན་ལ་རྒྱལ་སྤྱི་ཐོག་སྐྱོན་བརྗོད་བྱེད་མཁན་ཡང་ཧ་ཅང་མང་པོ་ཡོད་པ་མ་ཟད། རཱ་ཤི་ཡའི་མང་ཚོགས་ཁྲོད་དུ་ཡང་། པུ་ཊེན་ནི་རཱ་ཤི་ཡ་གཅིག་གྱུར་དང་རྒྱལ་ཁོངས་བརྟན་བརླིང་ཆེད་མི་མང་ལ་དྲག་གནོན་དང་འགྲོ་བ་མིའི་ཐོབ་ཐང་རྡོལ་རོལ་གཏོང་མཁན་ཞིག་ཡིན་པའི་སྐྱོན་བརྗོད་བྱེད་མཁན་ཧ་ཅང་མང་། ཆབ་སྲིད་དཔྱད་བརྗོད་པ་མང་པོས་ཁོང་ལ་དེ་སྔའི་ཨུ་རུ་སུ་དམར་པོའི་ལྟ་གྲུབ་ཤུགས་ཆེན་པོ་ཡོད་པར་གླེང་། ཁོང་ ༢༠༠༠ ལོར་སྲིད་འཛིན་ཆགས་པའི་ལོ་དེར་རཱ་ཤི་ཡའི་རྒྱལ་གླུར་འགྱུར་བ་བཏང་སྟེ། དེ་སྔའི་ཨུ་རུ་སུའི་རྒྱལ་གླུའི་ནང་དོན་ཡོད་པ་ཞིག་བཟོས་ཡོད་འདུག་ལ། ཁོང་གིས “ཨུ་རུ་སུ་འཐོར་བཤིག་ཏུ་ཕྱིན་པ་དེ་ནི་དུས་རབས་ ༢༠ པའི་ནང་གི་ས་ཁོངས་ཆབ་སྲིད་ཀྱི་རྐྱེན་ངན་ཆེ་ཤོས་”ཤིག་ཏུ་ངོས་འཛིན་བྱེད་ཀྱིན་ཡོད་འདུག
གསར་འགོད་པ། བནྡེ་སྐྱབས།
གླ་སུ་གློའུ་སེ་ ཧོས་ཀྱི་ཁ་ལ་ཉན་ན་མཇུག་འབྲས་མི་ཡག་ཡ།