གསར་ལམ་ཁག་ཏུ་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༣ ཉིན་རྒྱ་ནག་གཞུང་གིས་ཟི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་གསེར་རྟ་རྫོང་མགོན་མཆོག་སྡེ་བའི་ཕ་བསོད་རྒྱལ་གྱི་བུ། རང་ལོ་ ༣༡ ཡིན་པའི་བསམ་འགྲུབ་ཞུ་བར་ཆབ་སྲིད་ཀྱི་ལས་འགུལ་སྤེལ་བའི་དོགས་གཞིའི་འོག་འཛིན་བཟུང་བཀག་ཉར་བྱས་ཏེ། ད་ལྟའི་ཆར་ནང་མིས་ཁོང་འཛིན་བཟུང་བྱས་དོན་དང་གར་ཡོད་ཅི་བྱུང་གི་གནས་ཚུལ་ཅི་ཡང་ཤེས་ཀྱི་མེད་པ་མ་ཟད། གཞན། གསེར་རྟ་རྫོང་གི་བོད་མི་གཡུ་སྦྲང་ཞེས་པ་ཞིག་ཀྱང་ཉེ་སྔོན་རྒྱ་གཞུང་གིས་འཛིན་བཟུང་བཙོན་འཇུག་བྱས་ཏེ་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག
གནས་ཚུལ་ཤེས་རྟོགས་བྱུང་བ་ལྟར་ན། ཕྱི་ལོ་ ༢༠༠༨ ལོ་ནས་བཟུང་གསེར་རྟ་རྫོང་གི་སྐྱ་སེར་གཉིས་ཀྱིས་རྒྱ་གཞུང་གི་དྲག་གནོན་སྲིད་ཇུས་ལ་ངོ་རྒོལ་སྐད་འབོད་དང་རྔམ་སྟོན་ཁྲོམ་སྐོར་སོགས་ཀྱི་ལས་འགུལ་རབ་དང་རིམ་པ་སྤེལ་བར་རྐྱེན་བྱས་ཏེ། རྒྱ་གཞུང་གིས་ད་ལྟའི་བར་ས་གནས་སུ་དམག་མི་སྟོང་ཕྲག་མང་པོ་འགྲེམས་འཇོག་གིས་དམ་དྲག་ལྟ་རྟོག་བྱེད་ཀྱིན་པར་མ་ཟད། ས་གནས་བོད་མི་ཁག་ཅིག་ལ་ས་གནས་ཀྱི་ལས་འགུལ་རིམ་པའི་ནང་མཉམ་ཞུགས་བྱས་པའི་ཉེས་འཛུགས་དང་། ཆབ་སྲིད་དང་འབྲེལ་ལས་ཀ་བྱེད་ཀྱིན་པའི་དོགས་གཞིའི་འོག་གང་བྱུང་འདྲི་བརྩད་དང་འཛིན་བཟུང་བཀག་ཉར་བྱེད་ཀྱི་ཡོད་འདུག
