གཟའ་ཟླ་བ་ནས་ཉིན་གཉིས་རིང་མཱེག་སེ་ཀཱོ་ནང་སྟོབས་ཆེན་རྒྱལ་ཁབ་ ༢༠ ཚོགས་ཆེན་ཚོགས་ཡོད་ཅིང་། སྐབས་དེར་སྲིད་འཛིན་ཨོ་བྷ་མ་དང་སྲིད་འཛིན་པུ་ཊེན་གཉིས་ཐུག་འཕྲད་ཐོག་སེ་རི་ཡའི་གནད་དོན་ཐད་གྲོས་བསྡུར་དང་གསར་འགོད་གསལ་བསྒྲགས་ཤིག་སྤེལ་འདུག
ཟླ་འདིའི་ཕྱི་ཚེས་ ༡༨ ནས་ཉིན་གཉིས་རིང་མཱེག་སེ་ཀཱོ་ (Mexico) ཡི་ལཱོ་སི་ཁཱ་བྷོ་སི་(Los Cabos) གྲོང་ཁྱེར་ནང་སྟོབས་ཆེན་རྒྱལ་ཁབ་ ༢༠ ཚོགས་ཆེན་ཚོགས་ཡོད་ཅིང་། ཚོགས་ཆེན་སྟེང་འཛམ་གླིང་གི་དཔལ་འབྱོར་ཉམ་ཉེས་དང་། ལྷག་པར་དུ་ཡུ་རོབ་གླིང་གི་དཔལ་འབྱོར་ཉམ་ཉེས་ཀྱི་དཀའ་ངལ་སེལ་ཕྱོགས་སྐོར་ཤུགས་ཆེར་གླེང་ཡོད་འདུག ཚོགས་ཆེན་ཉིན་དང་པོའི་སྐབས་སྲིད་འཛིན་ཨོ་བྷ་མ་དང་རཱ་ཤི་ཡའི་སྲིད་འཛིན་པུ་ཊེན་གཉིས་ཟུར་དུ་སེ་རི་ཡའི་གནད་དོན་ཐག་གཅོད་ཡོང་ཐབས་སྐོར་ལ་ཐུག་འཕྲད་གྲོས་བསྡུར་བྱས་མཐར། སྲིད་འཛིན་གཉིས་ཀྱིས་ལྷན་དུ་གསར་འགོད་གསལ་བསྒྲགས་ཤིག་སྤེལ་ཏེ། སེ་རི་ཡའི་ནང་གི་དམར་གསོད་ཟིང་འཁྲུག་མཚམས་འཇོག་ཡོང་ཕྱིར་འཕྲལ་དུ་ཤོག་ཁག་ཚང་མས་དྲག་སྤྱོད་མཚམས་འཇོག་བྱ་དགོས་པ་ནན་སྐུལ་དང་། སེ་རི་ཡའི་མི་མང་ལ་རང་དབང་དང་དམངས་གཙོའི་ལམ་ནས་སོ་སོའི་འབྱུང་འགྱུར་གདམ་གསེས་བྱ་རྒྱུའི་གོ་སྐབས་ཤིག་འཆར་རྒྱུར་ཡིད་ཆེས་ཡོད་སྐོར་བརྗོད་འདུག
ཨོ་བྷ་མས་གསར་འགོད་པར་“པུ་ཊེན་དང་ངེད་གཉིས་ཀྱིས་རྒྱལ་ཚོགས་ཚུད་པའི་རྒྱལ་སྤྱིའི་སྤྱི་ཚོགས་དང་ལྷན་དུ་སེ་རི་ཡའི་གནད་དོན་སེལ་ཐབས་སུ་མཉམ་ལས་བྱ་རྒྱུའི་དམ་བཅའ་བཟུང་ཡོད་”ཅེས་བརྗོད་འདུག་ལ། པུ་ཊེན་གྱིས་ཀྱང་ “ཨ་རི་དང་རཱ་ཤི་ཡ་རྒྱལ་ཁབ་གཉིས་ཀྱིས་སེ་རི་ཡའི་གནད་དོན་ཐད་ལྟ་སྟངས་མང་པོ་ཞིག་གཅིག་མཐུན་བྱུང་སོང་”ཞེས་བརྗོད་འདུག
