བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༥༥༩ སྟེང་གི་རྩོམ་སྒྲིག་པའི་གཏམ།
སྲོག་ལྡན་སུ་ཞིག་ཡིན་རུང་འཚོ་བ་དང་འཚོ་ཐབས་གལ་ཆེན་དུ་བརྩི་བ་ནི་ལྷན་སྐྱེས་ཀྱི་རང་གཤིས་ཡིན་ལ། འགྲོ་བ་མིའི་རིགས་ཀྱང་སྐྱེས་པ་ནས་འཆི་བའི་བར་དུ་འཚོ་གནས་ཀྱི་ཆེད་དུ་འདུར་རྒྱུག་བྱེད་ཀྱི་ཡོད། འོན་ཀྱང་འཚོ་བའི་འདུ་ཤེས་ཤུགས་ཆེ་དྲགས་ཏེ་སྒེར་གྱི་འཚོ་ཐབས་གཅིག་པུ་ལས་གཞན་ཅི་གང་མི་དགོས་མཁན་ཞིག་ཡིན་ཚེ། དེ་ནི་དུད་འགྲོ་ལས་ལོགས་སུ་དགར་སྟངས་མེད་ལ་དགར་བའི་དགོས་པ་རྒྱུ་མཚན་ཡང་ཆེན་པོ་མེད།
སྤྱིར་གཞུང་ལུགས་ཀྱི་ཐོག་ནས་འཚོ་བའི་འདུ་ཤེས་ཅི་ཙམ་ཆེ་བ་དེ་ཙམ་གྱིས་དཔལ་འབྱོར་གནས་བབ་ཇེ་ལེགས་སུ་འགྲོ་བ་ཆོས་ཉིད་ཡིན་ཡང་། བཙན་བྱོལ་བོད་མིའི་སྤྱི་ཚོགས་ལ་མཚོན་ན། སྒེར་གྱི་འཚོ་བའི་འདུ་ཤེས་ཤུགས་དྲགས་ཏེ། ཆེ་ས་ནས་སྤྱི་ཚོགས་དང་ཆབ་སྲིད། དཔལ་འབྱོར་སོགས་ལ་གྱོང་རྒྱག་གི་ཡོད་ལ། ཆུང་ས་ནས་མི་སྒེར་གྱི་ཤེས་ཡོན་གོང་འཕེལ་དང་འཚོ་གནས་འཕྲོད་བསྟེན། བདེ་འཇགས་མཐུན་སྒྲིལ་བཅས་ཀྱང་དཀའ་ཉེན་ལ་གཏོད་ཀྱི་ཡོད། མི་སྒེར་གྱི་འཚོ་བའི་འདུ་ཤེས་ཐལ་སྤྱོད་ཀྱི་དབང་གིས་བོད་སྤྱི་བའི་འཚོ་གནས་འཇིག་ཉེན་ལ་ཐུག་གི་ཡོད།
སྒེར་གྱི་འཚོ་ཐབས་ལ་ཐུག་ཡོང་དུས་སྤྱི་བའི་ལས་དོན་དོར་རྐྱང་དང་རྩ་དོན་འཐབ་རྩོད་བློས་གཏོང་བ། ཕ་མ་སྤུན་མཆེད་ཀྱི་འབྲེལ་བ་རྩ་ནས་གཅོད་པ་དང་། དགའ་བོ་ཉེ་བོ་ཚོའི་བརྩེ་བ་རྨང་ནས་བཤིག་པ། སྒེར་གྱི་འཚོ་བར་ཐུག་ཡོང་དུས་རྒྱལ་ཁབ་ཀྱི་རྩ་ཁྲིམས་དང་ས་གནས་ཀྱི་ཡུལ་ཁྲིམས། མི་རིགས་ཀྱི་གོམ་སྲོལ་དག་ཀྱང་རྡོག་བརྫིས་གཏོང་བ་དང་། ཐ་ན་དམ་པའི་ལྷ་ཆོས་དང་འཇིག་རྟེན་མི་ཆོས། བོད་མིའི་བཟང་སྤྱོད་གང་ལའང་འཇིགས་ཞུམ་མེད་པའི་སྙིང་སྟོབས་ཤིག་དང་སྐྱུ་ལྤགས་ཞིག་ཡོད།
དུས་རབས་ཕྱེད་ལྷག་ལ་རྩ་དོན་འཐབ་རྩོད་ལ་གྲུབ་འབྲས་མ་ཐོན་པའང་མཐར་གཏུགས་ན་བོད་མི་ཚོར་སྒེར་གྱི་འཚོ་བའི་འདུ་ཤེས་ཤུགས་དྲགས་པ་འདིས་ལན་ལ། ལོ་ངོ་སུམ་ཅུར་ཤེས་ཡོན་འཐུས་ཤོར་དུ་ཕྱིན་པ་ཡང་ཤུགས་དྲག་པའི་འདུ་ཤེས་འདིས་བསྐྱལ། གཞིས་ཆགས་སྲ་བརྟན་མེད་པར་ཁ་འཐོར་ཡུ་འཐོར་དུ་འགྲོ་བཞིན་ཡོད་པའང་འདི་ཤེས་འདིས་ཕུང་ལ། སློབ་གྲྭ་སློབ་མའི་སྟོང་གི་ཡོད་པ་དང་དགོན་པར་གྲྭ་རྒྱུན་ཆད་ཀྱི་ཡོད་པའང་འདུ་ཤེས་འདིས་བརླགས།
སྔོན་ཆད་བོད་ནང་འཚོ་གནས་ཀྱི་འདུ་ཤེས་ཞན་པ་དང་། བདག་འཛིན་གྱི་བསམ་བློ་ཆུང་དྲགས་པའི་དབང་གིས་ཁེ་དང་རྒྱལ་ཁ་ཡོད་ཚད་གཞན་ལ་བྱིན་ཏེ། གྱོང་དང་ཕམ་ཁ་ཡོངས་རྫོགས་རང་གིས་འཁུར་གྱི་ཡོད་པ་དང་། གོ་སྐབས་ཁེ་སྤོགས་ཡོད་ཚད་གཞན་ལ་ཤོར་ཏེ་བོད་པ་རྗེས་ལུས་ནས་ཡང་ལུས་ཐེབས་ཀྱི་ཡོད་པའི་སེམས་ཚོར་ཞིག་ཤེས་ཡོན་པའི་སྡེ་ལ་བྱུང་ཡོད་ཀྱང་། དེ་ཡང་མཐར་གཏུགས་ན་སྒེར་བའི་གནས་སྐབས་ཀྱི་སྐྱིད་ཐབས་བདེ་ཐབས་ལ་མགོ་འཁོར་ཏེ། བོད་མི་རིགས་སྤྱིའི་འཚོ་གནས་སྐྱ་ཟད་སྔོ་གཏུགས་ཆགས་ཀྱི་ཡོད་པའི་ངུ་འབོད་ཅིག་ཡིན།
བཙན་བྱོལ་ནང་གི་མི་རབས་རྒན་པ་ཚོས་བཤད་ན། བོད་པ་བཙན་བྱོལ་དུ་ཐོག་མར་འབྱོར་སྐབས། མི་ཚང་མར་སྤྱི་སེམས་ཆེ་ཞིང་བློ་རྩ་བརྟན་པ། ལུས་སྲོག་ལོངས་སྤྱོད་ཡོངས་རྫོགས་འཐབ་རྩོད་ཐོག་གཏོང་ཕོད་མཁན་ཤ་སྟག་ཡིན་ཚུལ་བཤད་མོད། དུས་མཚམས་གང་ཞིག་ཏུ་འགྱུར་བ་དང་རྒྱུ་སྐྱེན་ཅི་ཞིག་གིས་བརླགས་པ་མི་ཤེས་མོད། ད་ཆར་བཙན་བྱོལ་བོད་མི་ཚོར་སྒེར་གྱི་འཚོ་གནས་ཀྱི་དངངས་སྐྲག་དང་འཚོ་ཐབས་ཀྱི་ཧམ་སེམས་དབང་གིས་རང་ཉིད་ཆབ་སྲིད་སྐྱབས་བཅོལ་བ་ཡིན་པ་དང་། རང་གི་ལུང་པ་གཞན་ལག་ཏུ་ཡོད་པའི་དྲན་ཤེས་ཀྱང་ཉམས་ཏེ། སྒེར་གྱི་འཚོ་ཐབས་དེ་ཡོད་ཚད་ནས་ཡོད་ཚད་ཀྱི་གོང་དུ་འཇོག་པའི་རིམས་ནད་ཀྱིས་བཏབས་ཏེ། བོད་སྤྱི་བའི་ལས་དོན་དང་ཡང་སྒོས་བཙན་བྱོལ་སྤྱི་ཚོགས་ཕྱི་ཕམ་ནང་ཕུང་དུ་གཏོང་བཞིན་ཡོད།
