གཟའ་པ་སངས་ཉིན་གངས་སྐྱིད་དཔེ་མཛོད་ཚོགས་ཁང་དུ་ཡིག་སྒྱུར་བ་ཆུང་ཚེ་རིང་ལགས་ཀྱིས། ཡིག་སྒྱུར་སྐོར་གྱི་གཏམ་བཤད་གནང་སྟེ། ཡིག་སྒྱུར་སྐབས་མི་རིགས་སོ་སོའི་རིག་གཞུང་གི་མཚོན་དོན་དང་ཁྱད་ཆོས་ལ་གོ་བ་ལེན་སྟངས་མ་ནོར་བའི་ཐོག་ནས་འབྲི་སྒྱུར་བྱ་གལ་ཆེ་སྐོར་བསྟན་སོང་།
ཕྱི་ཚེས་ ༡༣ ཉིན་རྒྱབ་གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ། ཤེས་རིག་ལས་ཁུངས་ཀྱི་ཉམས་ཞིབ་པ་དང་ཡིག་སྒྱུར་པ་ཆུང་ཚེ་རིང་ལགས་ཀྱིས། དཔེ་མཛོད་ཁང་གི་སློབ་མ་དང་ལས་བྱེད་གཙོ་བོ་བྱས་ཏེ། གངས་སྐྱིད་ཁུལ་གྱི་དོན་གཉེར་ཅན་སྐོར་ཞིག་ལ་ཁོ་རང་སྒེར་གྱི་ཉམས་མྱོང་བརྒྱུད་ཡིག་སྒྱུར་གྱི་ཤེས་བྱ་དང་། ལོ་ཙཱའི་དགོས་དམིགས་སྐོར་ལ་གཏམ་བཤད་གནང་ཡོད།
སྐབས་དེར་ཁོང་གིས་ “ཡིག་སྒྱུར་བྱེད་སྟངས་སྐོར་ལ་ད་སྔ་གཞུང་ལུགས་རང་བཞིན་གྱི་དཔེ་དེབ་ཅིག་ཕལ་ཆེར་འཛམ་གླིང་ནང་མེད་པ་དང་། ང་རང་ཉིད་ཀྱིས་ཀྱང་ཡིག་སྒྱུར་གྱི་ལས་ཀ་ནི་ཆུར་རྐྱལ་བ་ལྟ་བུ་ཞིག་ལ་ངོས་འཛིན་བྱེད་ཀྱི་ཡོད། ཆུར་མ་རྐྱལ་སྔོན་ལ་ཆུར་འདི་འདྲ་བྱེད་དེ་རྐྱལ་དགོས་རེད་དང་དེ་འདྲ་བྱེད་ནས་རྐྱལ་དགོས་རེད་ཅེས་བཤད་ཀྱང་ཆུར་རྐྱལ་མཁན་ལ་དངངས་སྐྲག་སློང་པ་ཙམ་ལས་ཕན་པ་ཆུང་པ་ཡིན། དེ་ལས་རང་ཉིད་ཆུ་ནང་འཛུལ་ཏེ་རྐྱལ་བརྒྱབ་པ་ཡིན་ན་རིམ་བཞིན་རྐང་ལག་གཡུག་པ་དང་དབུགས་གཏོང་ལེན་སོགས་ཤེས་འགྲོ་བ་ལྟར། ཆེ་ཆུང་ལ་མ་བལྟས་པར་ཡིག་སྒྱུར་ལ་འབད་བརྩོན་བྱེད་པ་ཡིན་ན་ཤེས་ཐུབ་པ་ཞིག་རེད་”ཅེས་བརྗོད་སོང་།
ཡང་ཁོང་གིས་ཚིག་འབྲུ་རེ་རེ་བཞིན་སྒྱུར་རྒྱུ་ལས་སྒྱུར་བྱའི་རྩོམ་ཡིག་གི་ཁྱད་ཆོས་མ་བརླག་པའི་སྒོ་ནས་རྩོམ་ཡིག་གི་བརྗོད་སྙིང་ཧྲིལ་བོ་བོད་ཡིག་ནང་འབྲི་ཐུབ་པ་བྱ་རྒྱུ་གལ་ཆེན་པོ་ཡིན་པ། ཡིག་སྒྱུར་སྐབས་མི་རིགས་སོ་སོའི་རིག་གཞུང་གི་མཚོན་དོན་དང་ཁྱད་ཆོས་ལ་གོ་བ་ལེན་སྟངས་མ་འདྲ་བ་ཡོད་པ་ཤེས་རྟོགས་ཐུབ་པའི་སྒོ་ནས་འབྲི་སྒྱུར་བྱེད་དགོས་པའི་སྐོར་ལ། བོད་ཡིག་ནང་ཁྱི་དང་ཝ་མོ་སོགས་ནི་ཐ་ཤད་དང་རྡར་མའི་མཚོན་དོན་ཡིན་ཡང་དབྱིན་ཡིག་ནང་དྲིན་བཟོ་ཤེས་མཁན་དང་དཔའ་བོའི་མཚོན་ཐབས་སུ་འཇོག་པ། རྒྱ་ཡིག་ནང་སེམས་པ་དམར་པོ་ནི་བོད་ཡིག་ནང་སེམས་པ་དཀར་པོའམ་ལྷག་བསམ་དཀར་པོ་ཞེས་པའི་མཚོན་ཐབས་ཡིན་སྟབས་ཚིག་སྒྱུར་བྱས་ཏེ་བོད་ཡིག་ནང་སེམས་དམར་པོ་ཞེས་བྲིས་ཚེ་གོ་རྒྱུ་མེད་པ་ལྟ་བུ་ཡིན་པར་བརྗོད་སོང་།
དེ་བཞིན་ཁོང་གིས་ཡིག་སྒྱུར་གྱི་དགོས་པ་ནི་གཞན་རིག་ནང་འདྲེན་ཐོག་བོད་ཀྱི་རིག་གནས་ཕུན་སུམ་ཇེ་ཚོགས་སུ་གཏོང་རྒྱུ་དེ་ཡིན་ཡང་། གང་བསྒྱུར་པ་དེར་གོ་རྒྱུ་མེད་པའམ་ཁ་གསལ་བཟོ་མ་ཐུབ་ཚེ་ཡིག་སྒྱུར་གྱི་དགོས་པ་འགྲུབ་ཐུབ་མེད་པ། འགྱུར་ཚད་ལྡན་གྱི་ཚད་གཞི་འཇོག་ས་ནི་མ་ཡིག་གི་ནང་དོན་ནོར་འཆུག་མེད་པར་མ་ཡིག་གི་ཁྱད་ཆོས་ཁག་ཉམས་མེད་སྟེང་། བོད་མི་སྤྱིས་བརྗོད་བདེ་བ་དང་རྟོགས་བདེ་བ་བཅས་ཡོང་ཐབས་བྱ་དགོས་པ། ཡིག་སྒྱུར་བའི་ཉུང་མཐའི་ཆ་རྐྱེན་ཐད་ནས་སྒྱུར་མཁན་ལ་མ་ཡིག་གི་ནང་དོན་གོ་ནུས་པའི་སྐད་ཡིག་གི་ཤེས་ཚད་སྟེང་། སྒྱུར་བྱེད་སྐད་ཡིག་ཚད་དང་ལྡན་པ། སྒྱུར་བྱའི་མ་རྩོམ་ལ་རྒྱུས་མངའ་ཟབ་པ་ཙམ་མ་ཟད་བརྩོན་འགྲུས་ཆེན་པོ་ཡོད་དགོས་པ་སོགས་ཀྱི་ཆ་རྐྱེན་ཚང་དགོས་ཚུལ། མ་ཡིག་ཀློག་ཚུལ་ནི་དང་པོ་རྩོམ་ཡིག་གང་དེའི་སྤྱི་ཁོག་གི་བྲོ་བ་མྱང་ཐུབ་པ་དང་། གཉིས་པ་ཚིག་འབྲུ་རེ་རེ་དང་དེ་དག་གི་གྲུབ་སྟངས། ཚིག་དང་བརྗོད་པའི་གཙོ་ཕལ། ཚིག་སོ་སོའི་འབྱུང་ཁུངས་སོགས་ཤེས་རྟོགས་བྱ་རྒྱུ། མ་ཡིག་གི་ནང་དོན་རྟོགས་ཐབས་དང་འགྱུར་ཚིག་གི་གདམ་ཀ་འོས་འཚམ་སྤྱོད་ཕྱིར་ཚིག་མཛོད་འདྲ་མིན་ལ་འཚོལ་ཞིབ་ཁུངས་གཏུགས་བྱ་དགོས་པ་སོགས་ཡིག་སྒྱུར་པ་ཞིག་ལ་ཚང་དགོས་པའི་ཆ་རྐྱེན་ཁག་ངོ་སྤྲོད་གནང་སོང་།
དངོས་སུ་སྒྱུར་འབྲི་བྱེད་སྐབས་དོ་སྣང་བྱ་ཡུལ་སྐོར་ནས་ཁོང་གིས། ཁོར་ཡུག་ཟིང་ཟིང་མེད་པ་ཞིག་ཏུ་སེམས་ལྷོད་ལ་འབབ་ཐུབ་ན་རྩོམ་ཡིག་གི་བརྗོད་བྱའི་སྣང་བརྙན་དང་མི་སྣའི་སྣང་བརྙན་སེམས་སུ་འཆར་ཐུབ་པ་བྱས་ཏེ། ཚིག་གྲུབ་སོ་སོའི་ནང་གི་གནད་འགག་ངོས་བཟུང་སྟེ་གཙོ་ཕལ་གོ་ནོར་མ་ཐེབས་པར་ཕབ་སྒྱུར་བྱ་དགོས་པ་མ་ཟད། མ་ཡིག་གི་རིམ་པ་དང་སྐད་ཡིག་གི་རིམ་པ་ཏག་ཏག་གནས་ཐུབ་པར་བྱ་རྒྱུ། ཡིག་སྒྱུར་གྱི་དཀའ་ངལ་སེལ་ཐབས་སུ་རིག་གཞུང་དང་སྐད་ཡིག་གི་བེད་སྤྱོད། ལུགས་སྲོལ་སོགས་མ་ཡིག་ནང་གི་གོ་དོན་བོད་ཡིག་ནང་ཇི་ལྟར་འབྲི་རྒྱུར་བོད་རང་གི་ཕ་སྐད་ནང་གོ་བ་ལེན་ཐུབ་པ་ཞིག་ལ་བསམ་བློ་གཏོང་དགོས་པའི་ཐད་ཁོང་གིས། དབྱིན་ཡིག་ནང་(have a sweet dream) ལྟ་བུར་མཚོན་ན། བོད་ཡིག་ནང་གཟིམ་འཇག་གནང་ངམ་གཉིད་ཡག་པོ་ཁུག་ཅེས་པའི་གོ་དོན་རེད། འོན་ཀྱང་ཐད་ཀར་དབྱིན་ཡིག་གི་ཚིག་དོན་བཞིན་རྨི་ལམ་མངར་མོ་ཞིག་ཡོད་ཅེས་བསྒྱུར་ན་གོ་རྒྱུ་མེད་པ་ལྟར། ཚིག་ལ་མ་བལྟས་པར་དོན་ལ་གོ་བ་བླངས་ཏེ་འབྲི་དགོས་པ་སོགས་ཀྱི་ལམ་སྟོན་གནང་སོང་།
ཡང་ཁོང་གིས་མ་ཡིག་ནང་གི་ཚིག་གམ་ཚིག་གྲུབ་རེ་ཟུང་ལ་བོད་ཡིག་ནང་ཏག་ཏག་འབྲི་མ་ཐུབ་པའི་རིགས་ལ་དཔར་རིས་དང་མཆན། གསལ་བཤད་འབྲི་རྒྱུ་གལ་ཆེན་པོ་ཡིན་པ་མ་ཟད། མ་ཡིག་ནང་གི་མིང་དང་ཐ་སྙད་ཁག་ཅིག་བོད་ཡིག་བོད་སྐད་ནང་རྩ་བ་ནས་མེད་པ་དེ་འདྲའང་ཡོང་སྲིད་པས། དེ་འདྲའི་རིགས་ལ་སྒྱུར་པ་བོས་གསར་བཟོ་བྱ་མི་ཆོག་པ་མིན་ཡང་། གསར་བཟོ་བྱས་རིགས་ལ་ངེས་པར་དུ་གསལ་བཤད་འབྲི་རྒྱུ་གལ་ཆེན་པོ་ཡིན་པ། དེ་བཞིན་ཡིག་སྒྱུར་སྐབས་སྒྲ་རང་སོར་འཇོག་པ་ལ། སྒྲ་ཡི་ནུས་པའི་ཆ་ནས་རང་སོར་བཞག་པ། གོ་དོན་ཁ་ཤས་ཡོད་པའི་ཆ་ནས་སྒྲ་རང་སོར་བཞག་པ། བོད་ལ་མེད་པའི་ཆ་ནས་སྒྲ་རང་སོར་བཞག་པ་མ་ཟད། སྒྲ་རང་སོར་འབྲི་ཚུལ་ལ་སྔགས་ཡིག་གི་འབྲི་ཐབས་དང་བོད་ཡིག་རང་གི་འགྲོ་སྟངས་བཞིན་སྒྲ་གང་ཐོན་ལྟར་འབྲི་བ་སོགས་ཡོད་པར་བརྗོད་བྱུང་།
གསར་འགོག་པས་ཆུང་ཚེ་རིང་ལགས་སུ་བཙན་བྱོལ་སྤྱི་ཚོགས་ནང་གི་ཡིག་སྒྱུར་གྱི་ཞན་ཆ་ཆེ་ཤོས་ག་རེ་མཐོང་གི་ཡོད་སྐོར་དྲིས་པའི་ལན་དུ་ཁོང་གིས། དང་པོ་ཡིག་སྒྱུར་བྱེད་མཁན་སྡེ་ཚན་ཁག་བར་མཉམ་ལས་མཐུན་སྒྲིལ་མེད་པ་དེ་ཡིན་ཞིང་། ཤེས་རིག་དང་བོད་ཁྱིམ། བོད་ཀྱི་དཔེ་མཛོད་ཁང་སོགས་ཚོགས་སྡེ་ཁག་གིས་སོ་སོའི་ཐད་ནས་ཅིག་སྒྱུར་བཞིན་ཡོད་ཀྱང་ད་སྔ་སློབ་ཚན་ཞིག་ལ་མཚོན་ན་འཛིན་རིམ་བཅུ་གཉིས་པར་ཆ་ཚང་པ་ཞིག་སྒྱུར་ཐུབ་མེད་པ་དང་། གལ་སྲིད་ཚོགས་སྡེ་དེ་དག་བར་མཉམ་ལས་མཐུན་སྒྲིལ་ཐོག་སྡེ་ཚན་རེ་རེ་ཡིས་ཁ་ཕྱོགས་རེ་བཞུང་སྟེ་སྒྱུར་ཡོད་ཚེ་གྲུབ་འབྲས་གང་འཚམ་ཐོན་ཡོད་པ་མ་ཟད། ཐ་སྙན་རིགས་ཀྱང་གཅིག་གྱུར་ཡོང་རྒྱུར་ཕན་ཐོགས་ཆེ་བ་ཡོད་པ་དང་། གཉིས་ནས་ལོ་ཙཱ་བ་དང་ཡིག་སྒྱུར་པ་ཚད་ལྡན་འཐོན་ཐུབ་ཀྱི་མེད་པ། དེ་ནི་ཡིག་སྒྱུར་བ་གསོ་སྐྱོང་བྱེད་ཀྱི་མེད་པ་དང་། གལ་སྲིད་སྐད་ཡིག་ཡག་པོ་ཡོད་མཁན་དང་ཡིག་སྒྱུར་ལ་སྤྲོ་བ་ཡོད་རིགས་ལ་མཐུན་འགྱུར་ཐོག སྔོན་སྲོང་བཙན་སྒམ་པོ་དང་ཁྲི་སྲོང་ལྡེའུ་བཙན་སོགས་ཀྱི་སྐབས་ཡིག་སྒྱུར་ཁང་གསར་རྒྱག་དང་ལོ་ཙཱ་བ་གསོ་སྐྱོང་བྱས་པ་ལྟར། བཙན་བྱོལ་སྤྱི་ཚོགས་ནང་ཡིག་སྒྱུར་ཆེད་ལས་པ་གསོ་སྐྱོང་བྱས་པ་ཡིན་ན་ཡིག་སྒྱུར་པའི་སྟོང་ཆ་ཞིག་བསྐང་ཐུབ་པའི་རེ་བ་ཆེན་པོ་ཡོད་པར་བརྗོད་བྱུང་།
ཆུང་ཚེ་རིང་ལགས་ནི་ཤེས་རིག་ལས་ཁུངས་ཀྱི་ཉམས་ཞིབ་པ་དང་། ཁོང་གིས་ད་སྔ་འདི་ག་དུས་བབ་གསར་ཁང་གིས་དཔར་འགྲེམས་བྱས་པའི་འབའ་པ་ཕུན་ཚོགས་དབང་རྒྱལ་གྱི་སྲིད་དོན་མི་ཚེ་༼བོད་མི་གསར་བརྗེ་བ་ཞིག ༽ཞེས་པ་དང་། བོད་ཀྱི་དཔེ་མཛོད་ཁང་གིས་དཔར་འགྲེམས་ཞུས་པའི་བཀྲ་ཤིས་ཚེ་རིང་གི་མི་ཚེའི་ལོ་རྒྱུས་༼ཕ་ཡུལ་གྱི་ཕན་བདེ་ཆེད་དུ ༽ ཞེས་པ་སོགས་དཔེ་དེབ་བཅུ་གྲངས་ཤིག་སྐད་ཡིག་གཞན་ནས་བོད་བསྒྱུར་ཞུས་ཡོད་པ་དང་། ད་ལྟའང་དབྱིན་ཡིག་གི་དཔེ་དེབ་གཉིས་ཙམ་བོད་སྒྱུར་བྱེད་མུས་ཡིན་འདུག
གསར་འགོད་པ། བནྡེ་སྐྱབས།
རེད། ཆུང་ཚེ་རིང་ལགས་ནི་སྒྱུར་བ་པོ་སྤུས་ལེགས་ཤིག་ཡིན་པ་མ་ཟད། སྤྱིར་མི་སེམས་བཟང་ཅན་དང་ཕྱོགས་ལྷུང་མེད་པ། ཁྱད་གསོད་དང་མཁས་ཉམས་མེད་པ་ཞིག་ཀྱང་ཡིན་པ་ང་རང་ལའང་མྱོང་བ་ཡོད། ཁོང་གིས་’ཡིག་སྒྱུར་ནི་ཆུར་རྐྱལ་བ་འདྲ་བོ་རེད་’ཟེར་བ་དཔེ་འཇོག་སྟངས་ཧ་ཅང་ཡག་པོ་འདུག དེ་བས་ཡིག་སྒྱུར་ནི་ལག་ལེན་རེད། ངས་བསམ་ན་ཡིག་སྒྱུར་ནི་ད་དུང་ཆུར་རྐྱལ་སྐབས་ལུས་པོའི་ཡན་ལག་ཆ་ཚང་ལ་འགུལ་སྐྱོད་ཐེབས་པ་ལྟར་ཡིག་སྒྱུར་ཡང་ཕྱོགས་ཡོངས་ནས་ཡར་རྒྱས་ལ་ཕན་ཐོགས་ཆེན་པོ་འདུག་་་་་
ལོ་རབ་དགུ་བཅུའི་ནང་བཙན་བྱོལ་ལ་འབྱོར་བའི་ཤེས་ཡོན་པས་བོད་ཡིག་ཐོག་དམིགས་གསལ་བཙན་བྱོལ་ནང་ཡར་རྒྱས་སོང་ཡོད་ལ་དེང་སྐབས་ལོ་ཙ་བ་ཡང་མི་ཉུང་བ་ཞིག་ཐོན་བཞིན་ཡོད་པས་ནི་དགའ་བ་འོས་པའི་བྱ་བ་ཞིག་ཡིན། ཡིན་ནའི་བཙན་བྱོལ་ནང་ས་སྐྱེས་རྡོ་སྐྱེས་བའི་བོད་མི་ན་གཞོན་དེ་ཚོས་བོད་ཡིག་གམ་དབྱིན་ཡིག་ཐོག་གྲུབ་འབྲས་དེ་ལྟ་བུ་ཐོན་མི་ཐུབ་པའི་རྒྱུ་མཚན་ཅི་ཡིན་ནམ།
Dial = སྐོར། ཡང་ན། སྐོར་ཅིག
Call = གཏོང་། ཡང་ན། ཐོང་ཤིག
Cancel = བསྲུབ། ཡང་ན། སླུབས་ཤིག
Ok = འགྲིགས། ཡང་ན། འགྲིགས་འདུག
End = རྫོགས། ཡང་ན། རྫོགས་ཟིན།
Slide = དོ་སྣང་།
On = སྤོར། ཡང་ན། སྤོར་ས། སྤོར་ཤིག
Off = སོད། ཡང་ན། གསོད་ས། སོད་ཅིག
དཔྱད་གཞི་ཙམ་མོ།
སྐད་གཉིས་སྨྲ་བ་པོ་རྣམས་ལ་ཆེད་ཞུ
ཁྱོད་རྣམ་པར་ཞུ་རྒྱུར། iphone་དང་།mac bookགཉིས་ནང་གི་དབྱིན་ཡིག་ཡོད་ཚད་བོད་བསྒྱུར་བྱེད་ཐུབ་ན་ད་གཟོད་བོད་ཡིག་ཅན་གྱི་iphoneདང་macbookཐོན་པར་དཀའ་ངལ་མེད།
བཀྲིས་བདེ་ལེགས་ཞུ།
དཔེར་ན། Dial, Call, Cancel, Ok, End, Slide, On, Off
‘འདི་རིགས་
ཤེས་ཡོན་ཅན་ཟེར་ན་ཆུང་ཚེ་ལགས་འདྲ་བོ་དེ་འདྲ་དགོས་པ་རེད། ཕྱོགས་ལྷུང་མེད་ཅིང་འུར་གཏམ་ཆུང་བ། སྤྱི་པའི་དོན་དུ་རང་ནུས་ཡོད་རྒུ་ཡིས་འབད་ཐབས་བྱེད་མཁན་ཞིག་རེད། ཆུང་ཚེ་ལགས་ཀྱི་མཛད་འཕྲིན་རྒྱས་པའི་སྐབས་འདིར་བཙན་བྱོལ་ནང་གི་ཤེས་ཡོན་པར་འཆེས་པའི་འུད་ཤོབ་ཅན་གྱི་མི་སྣ་དེ་ཚོར་ཤུགས་རྐྱེན་ཞིག་ཐེབས་རེ་ཡོད། ཆུང་ཚེ་ལགས། མུ་མཐུད་འབད་ཐབས་གནང་རོགས་གནང་། ང་ཡང་ཡིག་སྒྱུར་ལ་དགའ་ཞེན་ཡོད་མཁན་ཞིག་དང་དེའི་ཐད་འབད་ཐབས་གང་ཡོད་བྱེད་མཁན་ཞིག་ཡིན། བཀྲིས་བདེ་ལེགས།
ཆུང་ཚེ་རིང་ལགས་ཐུགས་རྗེ་ཆེ།
ཁྱེད་ཀྱིས་ད་དུང་ཕ་ཡུལ་གྱི་ཕན་བདེའི་ཆེད་དུ་ཞེས་པའི་བསྒྱུར་རྩོམ་དེ་ཧ་ཅང་གི་ཡག་པོ་འདུག
མིང་དོན་མཚུངས་པའི་ཡིག་སྒྱུར་བ་ཞིག་རེད། བཀྲ་ཤིས་བདེ་ལེགས་ཞུ།
སྒྲུང་རྩོམ་གྱི་རིགས་མང་ཙམ་སྒྱུར་རོགས།
གསར་འགོད་པས་གཏམ་བཤད་ཀྱི་ནང་དོན་རྒྱས་འབྲི་གནང་བར་ཐུགས་རྗེ་ཆེ། ད་དུང་འདི་ལས་རྒྱས་ཙམ་བཀོད་ཡོད་པ་ཡིན་ན། ངེད་ཀློག་པ་པོ་དོན་ཉེར་ཅན་དག་ལའང་འདི་ལས་ལྷག་ཅིག་ཕན་ཐོགས་འབྱུང་ངེས་ཡིན།
རེད་ཡ་ ཆུང་ཚེ་རིང་ལགས་ནི་མི་རབས་གསར་པའི་ནང་གིས་ནོར་བུ་ཡིན་། ཁོང་སྐུ་ཚེ་རིང་བ་ཤོག
ཆུང་ཚེ་རིང་ལགས་ནི་བོད་ཀྱི་ལོ་ཙྭ་པ་ཡག་ཤོས་རེད་ཟེར་ན་ཆོག་པ་ལྟ་བུ་མཐོང་ངོ་མ་བཀྲིན་ཆེ་རྗེས་སུ་ད་དུང་འཛམ་གླིང་ཐོག་གི་དཔེ་དེབ་གྲགས་ཆེན་གང་མང་རེ་བསྒྱུར་རོགས་ཞུ་རྒྱུ་ཞེས་ཐུགས་རྗེ་ཆེ།
ཆུང་ཚེ་རིང་ལགས་ཀྱི་འབའ་བ་ཕུན་ཚོགས་དབང་རྒྱལ་གྱི་གསར་བརྗེ་ཞེས་དཔེ་དེབ་དེ་ཧ་ཅང་གི་ཡིག་སྒྱུར་ཡག་པོ་གནང་འདུག་པས་ཐུགས་རྗེ་ཞུ་བ་དང་སྦྲགས། ད་དུང་སྐབས་དེ་དུས་ཀྱི་ཆབ་སྲིད་ཀྱི་ཁོར་ཡུག་ཚོར་བ་ཧ་ཅང་གི་ཆ་རྒྱུས་ཡོད་པར་སོང་། དཔེ་དེབ་སྐད་གྲགས་ཆེ་བ་དེ་རིགས་ཡིག་སྒྱུར་གནང་བའི་རེ་བ་ཆེ།
ཆུང་ཚེ་རིང་ལགས་ནས་ད་ཕན་དཔེ་དེབ་ཡག་པོ་ཁ་ཤས་བསྒྱུར་སོང་། བསྒྱུར་བ་དེ་དག་ཀྱང་གོ་བདེ་བོ་འདུག ཐུགས་རྗེ་ཆེ། ད་དུང་ལོ་རྒྱུས་ཙམ་མ་ཡིན་པར། ཕྱི་རྒྱལ་གྱི་སྒྲུང་དེབ་མང་ཙམ་བོད་ཡིག་ལ་བསྒྱུར་བའི་རེ་བ་ཡོད།