བོད་མི་མང་སྤྱི་འཐུས་ལྷན་ཚོགས་ཀྱིས་སྣེ་འཁྲིད་པའི་རྒྱ་གར་ལྷོ་ཕྱོགས་ཁུལ་གྱི་བདེན་པའི་མེ་ལྕེ་སྐོར་སྐྱོད་རུ་ཁག་དེ་ཕྱི་ཚེས་ ༢༠ ཉིན་གྱི་སྔ་དྲོའི་ཆུ་ཚོད་ ༡༠ ཐོག་སྦེལ་ཀོབ་གཞིས་ཆགས་སུ་འབྱོར་ཡོད་པ་དང་། སྐབས་དེར་ས་གནས་སེར་སྐྱ་མི་མང་ ༡༠༠༠ ལྷག་གིས་དགའ་བསུའི་སྣེ་ལེན་ཞུས་ཡོད་འདུག
ཕྱི་ཚེས་ ༢༠ ཉིན་སྔ་དྲོའི་ཆུ་ཚོད་ ༡༠ སྟེང་རྒྱ་གར་ལྷོ་ཕྱོགས་གྲོང་ཁྱེར་ཅེ་ནེའི་སློབ་ཕྲུག་ཚོགས་པའི་རྒྱུན་ལས་ཟུར་པ་བསྟན་འཛིན་དགྲ་ལྷ་དང་ཚེ་དབང་རྡོ་རྗེ་གཉིས་ཀྱིས་བདེན་པའི་མེ་ལྕེ་བསྣམས་ཏེ་སྦེལ་ཀོབ་བོད་མིའི་གཞིས་སྒར་དུ་འབྱོར་སྐབས། ཕྱོགས་བཞུགས་བོད་མི་མང་སྤྱི་འཐུས་འཇིགས་མེད་འབྱུང་གནས་ལགས་དང་སྤྱི་འཐུས་བློ་བཟང་ཡེ་ཤེས་ལགས། ལུགས་ཟུང་དང་བདེ་སླར་གཉིས་ཀྱི་ས་གནས་མགོ་འཛིན། མཉམ་འབྲེལ་ཚོགས་གཙོ། ཧིན་བོད་མཛའ་འབྲེལ་ཚོགས་པའི་ཚོགས་མི། ས་གནས་གཞོན་ནུ་དང་བུད་མེད་བཅས་ཀྱིས་རྩིས་བཞེས་གནང་ཡོད་འདུག
དེ་ནས་གཞིས་སྤྱི་རྒྱལ་བའི་ཕོ་བྲང་དུ་བདེན་པའི་མེ་ལྕེ་ཕེབས་བསུའི་མཛད་སྒོ་ཞིག་ཚོགས་ཡོད་པ་དང་། མཛད་སྒོའི་ཐོག་སྐུ་མགྲོན་གྱི་གཙོ་བོ་ཧིན་བོད་མཛའ་འབྲེལ་ཚོགས་པའི་ཚོགས་གཙོ་(J.P.Urs)ལགས་དང་། ཆོས་རིག་བཀའ་ཟུར་ཚེ་རིང་ཕུན་ཚོགས་མཆོག ཕྱོགས་བཞུགས་བོད་མི་མང་སྤྱི་འཐུས་རྣམ་གཉིས། ས་གནས་ཁྲིམས་ཞིབ་པ། ལུགས་ཟུང་དང་བདེ་སླར་གཉིས་ཀྱི་གཞིས་མགོ གཞུང་འབྲེལ་མིན་པའི་ཚོགས་པ་ཁག་གི་མི་སྣ། ས་གནས་སྐྱ་སེར་མི་མང་བཅས་མི་གྲངས་ཆིག་སྟོང་བརྒལ་བ་འདུ་འཛོམས་བྱུང་ཡོད་འདུག
མཛད་སྒོའི་ཐོག་བོད་རྒྱལ་ཁབ་ཆེན་པོའི་རྒྱལ་གླུ་སོགས་ཀྱི་སྔོན་འགྲོ་ལས་རིམ་གྲུབ་རྗེས། ལུགས་བསམ་ས་གནས་མགོ་འཛིན་ཚེ་དབང་དངོས་གྲུབ་ལགས་དང་བོད་མི་མང་སྤྱི་འཐུས་འཇིགས་མེད་འབྱུང་གནས་ལགས་རྣམ་གཉིས་ཀྱིས་སྔ་རྗེས་སུ་བདེན་པའི་མེ་ལྕེ་སྐོར་སྐྱོད་ལས་འགུལ་སྐོར་ངོ་སྤྲོད་དང་འབྲེལ། བོད་ནང་གི་རྒྱལ་གཅེས་དཔའ་བོ་དང་དཔའ་མོ་ཚོའི་ཆོད་སེམས་ལ་སྔགས་བརྗོད་དང་ཚེ་སྲོག་ཤོར་བ་རྣམས་ཀྱི་ནང་མི་ཉེ་འབྲེལ་ལ་གདུང་སེམས་མཉམ་སྐྱེད་ཞུ་རྒྱུ་མ་ཟད། ཁོང་ཚོའི་མངོན་འདོད་གང་ཡོད་པ་དེ་བསྒྲུབ་རྒྱུར་ང་ཚོ་བཙན་བྱོལ་རང་དབང་ལུང་པར་ཡོད་པ་ཚོས་ངེས་པར་དུ་བསམ་ཤེས་དང་འབད་བརྩོན་ཞུ་རྒྱུ་ཡིན་པའི་ཁས་ལེན་དང་། ལྷག་དོན་དུ་ད་ལྟའི་ཆར་ཚང་མས་བོད་དོན་ཆེད་ནུས་པ་འདོན་པའི་དུས་ལ་བབ་ཡོད་སྟབས། བཙན་བྱོལ་བོད་མི་ཚང་མ་མི་རེ་ངོ་རེ་ནས་ཟླ་རེའི་ཡོངས་ཁུངས་ནས་བོད་དོན་ལས་འགུལ་ཆེད་མ་དངུལ་ཟུར་འཇོག་གནང་དགོས་པའི་ཞེན་སྐུལ་ཡང་གནང་ཡོད་འདུག
ལྷོ་ཕྱོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས། (J.P.Urs)ལགས་ཀྱིས་རྒྱལ་སྤྱིའི་ཁྱོན་ལ་གནས་པའི་བོད་ཀྱི་གྲོགས་པོ་དང་བོད་དོན་རྒྱབ་སྐྱོར་བ་ཚོས་བོད་དོན་ཆེད་སོ་སོའི་གཞུང་ལ་གནོན་ཤུགས་སྤྲོད་དགོས་པ་དང་བོད་དོན་བདེན་མཐའ་གསལ་བའི་ལས་འགུལ་སྔར་ལྷག་སྤེལ་དགོས་པའི་འབོད་སྐུལ་གནང་བ་དང་བདེན་པའི་མེ་ལྕེ་ལས་འགུལ་བརྒྱུད་ནས་བོད་དོན་བདེན་མཐའ་སེལ་བའི་རེ་བ་དང་སྨོན་འདུན་ཡོད་པ་སོགས་ཀྱི་གཏམ་བཤད་གནང་ཡོད་འདུག
མཇུག་ཏུ་བདེ་སྐྱིད་སླར་གསོའི་ས་གནས་མགོ་འཛིན་བྱམས་པ་ཕུན་ཚོགས་ལགས་ནས་ཐུགས་རྗེ་ཆེ་ཞུའི་གསུང་བཤད་དང་འབྲེལ་ཚང་མ་སྐུ་བཞེངས་ཐོག་བདེན་ཚིག་སྨོན་ལམ་གསུང་གདོན་གནང་རྗེས་མཛད་སྒོ་མཇུག་སྒྲིལ་ཡོད་འདུག ཕྱི་ཚེས་ ༢༠ ནས་ ༢༩ ཉིན་བར་སྦེལ་ཀོབ་ཁུལ་དུ་མེ་ལྕེ་སྐོར་སྐྱོད་དང་མཚན་རྟགས་བསྡུ་རུབ་གནང་རྒྱུ་ཡིན་པ་དང་། ཕྱི་ཚེས་ ༢༦ ཉིན་པིར་ཡ་པར་ན་དང་། (Priyapatna)ཕྱི་ཚེས་ ༢༧ ཉིན་མ་ཏྲི་ཀ་རི་ (Medikeri) ཕྱི་ཚེས་ ༢༨ ཉིན་ཀུ་ཤལ་ན་གར། (Kushalnagar) བཅས་ས་གནས་རྒྱ་གར་གྲོང་སྡེ་ཁག་ནང་སྐོར་སྐྱོད་ཀྱིས་མཚན་རྟགས་བསྡུ་རུབ་གནང་འཆར་ཡོད་འདུག
