རྒྱ་གཞུང་གིས་མི་ ༦༥༠༠༠ ནང་ཁྲོལ་བཀོག་འདུག

ཉེ་ཆར་གྷོ་ཋི་མཱན་ལགས་ཀྱིས་རྒྱ་གཞུང་གིས་ཉུང་མཐར་ཆོས་འཁོར་རྩ་རླུང་སྒོམ་སྒྲུབ་པ་ ༦༥༠༠༠ ལྷག་གི་ནང་ཁྲོལ་བཏོན་ཏེ་རྐྱེན་འདས་སུ་བཏང་ཡོད་བསྒྲགས་འདུག

ཟླ་འདིའི་ཕྱི་ཚེས་ ༢༦ ཉིན་ཏ་ཅི་ཡོན་དྲ་རྒྱའི་སྟེང་གནས་ཚུལ་སྤེལ་དོན། ཉེ་ཆར་འཇར་མན་དུ་ཚོགས་པའི་མིའི་དབང་པོ་བརྗེ་ལེན་ལག་རྩལ་ཐད་ཀྱི་རྒྱལ་སྤྱིའི་ཉམས་ཞིབ་ཚོགས་འདུའི་སྐབས་དང་བསྟུན་ནས། མིའི་དབང་པོ་དང་ནང་ཁྲོལ་བརྗེ་ལེན་ཐད་ངོ་རྒོལ་གནང་མཁན་རྒྱལ་སྤྱིའི་རྩ་འཛུགས་ཚོགས་པས། ༼ལམ་གྱི་བཞི་མདོ་རུ་ལྷག་པའི་དབང་པོ་བརྗེ་ལེན་གྱི་སྨན་བཅོས་རིག་པ༽ཞེས་པའི་དཔྱད་གླེང་ཚོགས་འདུ་ཞིག་བསྡུས་ཡོད་པ་དང་། ཚོགས་འདུའི་ཐོག་གསར་འགོད་པ་གྷོ་ཋི་མཱན་ལགས་ཀྱིས། རྒྱ་གཞུང་གི་གཏུམ་སྤྱོད་འོག་ཉུང་མཐར་ཆོས་འཁོར་རྩ་རླུང་སྒོམ་སྒྲུབ་པ་ ༦༥༠༠༠ ལྷག་གསོན་པོར་ནང་ཁྲོལ་བརྗེ་ལེན་གྱི་གཤག་བཅོས་འོག་འདས་གྲོངས་སུ་ཕྱིན་ཡོད་པ་བསྒྲགས་འདུག 

ཨ་རིའི་རྒྱ་ནག་གནད་དོན་ཉམས་ཞིབ་པ་ཟུར་བ་དང་གསར་འགོད་པ་གྷོ་ཋི་མཱན་(Ethan Gutmann)ལགས་ཀྱིས་བརྩམས་པའི་༼བརླག་ཟིན་པའི་རྒྱ་ནག་གསར་བ༽ཞེས་པའི་དེབ་ནང་། རྩོམ་པ་པོ་ཁོང་གིས་སྒེར་ངོས་ནས་ཉམས་ཞིབ་བརྒྱུད་ཤེས་རྟོག་བྱུང་བར། རྒྱ་ནག་ནང་ཕྱི་ལོ་ ༡༩༩༤ ལོ་ནས་བཟུང་མི་གསོན་པའི་ནང་ཁྲོལ་བཀོག་མགོ་བརྩམས་ཡོད་པ་དང་། ༢༠༠༦ ལོར་ཚད་མཐོ་ཤོས་སུ་སླེབས་པ་མ་ཟད། ༢༠༠༨ ལོའི་བར་ཉུང་མཐར་ཆོས་འཁོར་རྩ་རླུང་སྒོམ་སྒྲུབ་པ་ ༦༥༠༠༠ ལྷག་གི་ནང་ཁྲོལ་བཀོག་སྟེ་འདས་གྲོངས་སུ་ཕྱིན་ཡོད་པ་གསལ་འདོན་བྱས་ཡོད་ལ།  དེ་བཞིན། ཁོང་གིས་བོད་དང་ཡུ་གུར། ཆོས་ལུགས་འདྲ་མིན་གྱི་མི་སྣ་སོགས་ཀྱི་ཚོགས་སྡེ་ཁག་ནི་རྒྱ་གཞུང་གིས་ནང་ཁྲོལ་གསོན་པོར་འདོན་པའི་གཏུམ་སྤྱོད་ཀྱི་གནོད་འཚེ་ཕོག་ཡུལ་ཆགས་ཡོད་པ་བརྗོད་འདུག 

དེ་བཞིན། ཉེ་ཆར་ཨ་རིའི་རྒྱལ་ས་ཝ་ཤིན་ཊོན་དུ་ཆོས་འཁོར་རྩ་རླུང་སྒོམ་སྒྲུབ་པར་གནོད་འཚེ་གཏོང་བའི་བྱ་སྤྱོད་ལ་ངོ་རྒོལ་གྱི་འདུ་འཛོམས་སྐབས། ཨ་རིའི་གཞུང་འབྲེལ་མིན་པའི་ཚོགས་པ་དང་རྒྱལ་ཚོགས་འཐུས་མི་མང་པོ་ཞིག་གིས་ཀྱང་། རྒྱ་གཞུང་གིས་ཆོས་འཁོར་རྩ་རླུང་སྒོམ་སྒྲུབ་པ་རྣམས་ཀྱི་ནང་ཁྲོལ་གསོན་འགོག་གི་གཏུམ་སྤྱོད་དེར་ཡོངས་ཁྱབ་སྐྱོན་བརྗོད་གནང་ཡོད་ལ། འདུ་འཛོམས་ཀྱི་སྐབས་དང་བསྟུན་ནས་ཁེ་ན་ཊའི་འགྲོ་བ་མིའི་ཐོབ་ཐང་ཁྲིམས་རྩོད་པ་མའེ་ཊེ་སི་ (David Matas)ལགས་ཀྱིས་བརྩམས་པའི་ ༼རྒྱལ་ཁབ་ཀྱི་ནང་ཁྲོལ༽ཞེས་པའི་དེབ་དེ་དབུ་འབྱེད་འགྲེམས་སྤེལ་བྱས་ཡོད་ལ།  རྩོམ་པ་པོ་ཁོང་གིས་ “ མིའི་རིགས་ཀྱིས་ནང་ཁྲོལ་བརྗེ་ལེན་གྱི་ལག་རྩལ་ཞིབ་འཇུག་གི་དམིགས་ཡུལ་ནི་མི་སྐྱོབ་རྒྱུ་དེ་ཡིན་མོད། ད་ལྟ་རྒྱ་གཞུང་གིས་གང་འདོད་དུ་མི་བསད་དེ་སོ་སོའི་ཁེ་ཕན་སྒྲུབ་ཀྱིན་འདུག” ཅེས་བརྗོད་ཡོད་པ་རེད།

དེ་སྔོན། ཨུ་སི་རལ་(Israel)གྱི་ནང་ཁྲོད་བརྗེ་ལེན་གྱི་སྨན་པའི་ལག་རྩལ་མཐུན་ཚོགས་ཀྱི་ཚོགས་གཙོ་ལའེ་ཝེ་ (Dr. Jacob Lavee)ལགས་དང་། ཁེ་ན་ཊའི་དཀྱིལ་ཤར་ཨེ་ཤ་ཡའི་བཟོ་ཚོང་(APD) མགོ་གཙོ་ཁཱེལ་གྷོར་ལགས་(David Kilgour) གཉིས་ཀྱིས་མཉམ་འབྲེལ་ཐོག་བརྩམས་པའི་༼ཁྲག་དྲི་ཐུལ་བའི་ནང་ཁྲོལ་གསོན་པོ༽ཞེས་པའི་དེབ་ནང་། རྒྱ་གཞུང་གིས་ཆོས་འཁོར་རྩ་རླུང་སྒོམ་སྒྲུབ་པའི་ནང་ཁྲོལ་གསོན་འགོག་བྱེད་བཞིན་པའི་གཏུམ་སྤྱོད་དེ་ནི། གོ་ལ་ཟླུམ་པོ་འདིའི་ལོ་རྒྱུས་ཐོག་བྱུང་མ་མྱོང་བའི་སྐྱི་གཡའ་བའི་ནག་ཉེས་ཆེན་པོ་ཞིག་ཡིན་པ་བརྗོད་འདུག

གསར་འགོད་པ། ཚེ་རིང་རྒྱལ།