གཟའ་ཕུར་བའི་ཉིན་ཀུའུ་ཁའེ་ལའེ་ཡི་གྱོད་དོན་དེ་ནི་ཆེད་དམིགས་མི་གསོད་ཀྱི་ཉེས་དོན་ལ་ངོས་འཛིན་ཐོག དངོས་སུ་ཁྲིམས་ར་འཚོགས་རྒྱུ་གཏན་ཁེལ་ཡོད་པ་བསྒྲགས་འདུག
ཁ་སང་ཕྱི་ཚེས་ ༢༦ ཉིན། རྒྱ་ནག་ཨན་ཧའེ་ཞིང་ཆེན་ཧི་ཧྥའེ་གྲོང་ཁྱེར་མི་དམངས་ཞིབ་དཔྱོད་ཁང་གིས། ཀུའུ་ཁའེ་ལའེ་དང་ཀྲང་ཞའོ་ཅོན་གཉིས་ཀྱིས་དབྱིན་ཇའི་ཚོང་བ་ཧའེ་ཝོ་ཌི་ལྐོག་གསོད་ཀྱི་ཉེས་དོན་དེ་ནི་ཆེད་དམིགས་མི་ལྐོག་གསོད་བྱས་པའི་ཉེས་དོན་ལ་ངོས་འཛིན་ཐོག ཧི་ཧྥའེ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ལ་ཉེས་དོན་ཞུ་སྦྱོར་བྱས་པ་ལྟར། ས་གནས་ཁྲིམས་ཁང་གིས་ཉེས་དོན་རྩིས་ལེན་གྱིས་ཁྲིམས་ར་འཚོགས་རྒྱུ་ཡིན་པ་བསྒྲགས་འདུག
རྒྱ་གཞུང་ཤིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། ཞིབ་དཔྱོད་སྡེ་ཁག་གིས་གྱོད་དོན་ཞིབ་བཤེར་ཞུ་སྦྱོར་གྱི་བརྒྱུད་རིམ་ཁྲོད། ཁྲིམས་ལུགས་ལྟར་ཞུ་སྦྱོར་བྱ་ཡུལ་གྱོད་དོན་མི་སྣ་གཉིས་དང་གནོད་འཚེ་ཕོག་ཡུལ་མི་སྣའི་ཉེ་འབྲེལ་བཅས་ཀྱི་ཞུ་སྦྱོར་ཁེ་དབང་གཞིར་བཟུང་། ཞུ་སྦྱོར་བྱ་ཡུལ་གྱོད་དོན་མི་སྣ་དང་དག་འབུལ་དཔང་མི་བཅས་ཀྱི་བསམ་ཚུལ་ལ་ཉན་འཇོག་བརྟག་དཔྱད་བྱས་མཐར། ཀུའུ་ཁའེ་ལའེ་དང་མོའི་བུ་པའོ་ཀཱ་ཀཱ། དབྱིན་ཇིའི་ཚོང་བ་ཧའེ་ཝོ་ཌི་བཅས་ཀྱི་བར་དཔལ་འབྱོར་ཁེ་ཕན་གྱི་རྩོད་རྙོག་བྱུང་བར་བརྟེན། ཀུའུ་ཁའེ་ལའེ་ཡིས་རང་ཉིད་ཀྱི་བུ་པའོ་ཀཱ་ཀཱ་ཡི་བདེ་འཇགས་ཐད་ཧའེ་ཝོ་ཌི་ཡིས་ཉེན་ཁ་བཟོ་སྲིད་པའི་དོགས་པ་སྐྱེས་ཏེ། ཀྲང་ཞའོ་ཅོན་དང་ངན་འབྲེལ་གྱིས་ཆེད་དམིགས་དབྱིན་ཇིའི་ཚོང་བ་ཧའེ་ཝོ་ཌི་ལ་དུག་བླུད་དེ་ལྐོག་གསོད་བྱས་ཡོད་པ་ཁུངས་བཙན་དཔང་འཕེར་བྱུང་ཡོད་ཚུལ་བརྗོད་འདུག
པའོ་ཚང་དང་འབྲེལ་བ་ཟབ་པའི་ཧྥ་རན་སིའི་བཟོ་བསྐྲུན་པ་ཌེ་བའེ་ལིར་སི་ཉེ་ཆར་ཁམ་བྷོ་ཌི་ཡཱ་ནས་རྒྱ་ནག་ཏུ་ཁྲིད་དེ་ཉིན་བཅུ་འགོར་བའི་རྗེས་སུ། རྒྱ་གཞུང་གིས་ཀུའུ་ཁའེ་ལའེ་ཡི་གྱོད་དོན་ཐད་དངོས་སུ་ཁྲིམས་ར་འཚོགས་མགོ་བརྩམས་ཡོད་པ་རེད།
གསར་འགོད་པ། ཚེ་རིང་རྒྱལ།
