༸གོང་ས་མཆོག་ཨུ་རུ་སུར་ཆིབས་བསྒྱུར་གྱི་རེ་བ།

གཟའ་མིག་དམར་ཉིན་ཨུ་རུ་སུའི་སྲིད་འཛིན་ཕུའུ་ཅིན་གྱིས། ༸གོང་ས་མཆོག་ཨུ་རུ་སུའི་ནང་ཕེབས་རྒྱུར་མཐའ་གཅིག་ཏུ་བཀག་འགོག་གནང་གི་མེད་པའི་རྣམ་འགྱུར་བསྟན་འདུག

ཕྱི་ཟླ་ ༧ ཚེས་ ༣༡ ཉིན་ཨུ་རུ་སུའི་རྒྱལ་ཡོངས་ན་གཞོན་དཔྱད་གླེང་ཚོགས་འདུ་ཞིག་གི་སྟེང་། ཨུ་རུ་སུའི་སྲིད་འཛིན་ཕུའུ་ཅིན་གྱིས་ཁལ་མུག་སྤྱི་མཐུན་རྒྱལ་ཁབ་ཀྱི་དད་ལྡན་མི་མང་གིས། འཛམ་གླིང་ནོ་སྦེལ་ཞི་བདེ་གཟེངས་རྟགས་བཞེས་མཁན་ཏཱ་ལའི་བླ་མ་མཆོག་ཨུ་རུ་སུར་ཕེབས་རྒྱུར་རེ་བ་གནང་བཞིན་པ་ཁོ་བོས་ཤེས་ཚོར་བྱུང་ཡོད་ལུགས་བརྗོད་འདུག

འཇར་མན་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན།  གསར་འགོད་པས་སྲིད་འཛིན་ཕུའུ་ཅིན་ལ། ཁལ་མུག་སྤྱི་མཐུན་རྒྱལ་ཁབ་ནང་༸གོང་ས་མཆོག་ཆིབས་བསྒྱུར་གནང་ཐུབ་ཀྱིན་ཡོད་མེད་དྲིས་པར། ཁོས་ “ ང་ཚོས་དེའི་ཕྱོགས་སུ་འབད་བརྩོན་གྱིས་གོམ་ཁ་སྒྱུར་བཞིན་ཡོད། ” ཅེས་བརྗོད་ཡོད་འདུག སྐབས་དོན་དབྱེ་ཞིབ་པ་དག་གིས་ཕུའུ་ཅིན་གྱི་རྣམ་འགྱུར་དེ་ནི། ཨུ་རུ་སུ་གཞུང་གིས་རྒྱ་ནག་ལ་འཛིན་པའི་ཕྱི་འབྲེལ་སྲིད་ཇུས་ཐད་འགྱུར་ལྡོག་འབྱུང་བཞིན་པ་ཞིག་ཡིན་སྲིད་པར་ངོས་འཛིན་གནང་གི་ཡོད་འདུག

དེ་བཞིན། ཕུའུ་ཅིན་གྱིས་དེ་སྔོན་༸གོང་ས་མཆོག་ཨུ་རུ་སུའི་ནང་ཕེབས་མ་ཐུབ་པ་དེ་ནི། རྒྱལ་སྤྱིའི་སྒང་༸གོང་ས་མཆོག་གི་གོ་བབ་དེ་ཆོས་ལུགས་ཀྱི་དབུ་ཁྲིད་ཁོ་ན་ཞིག་མ་ཡིན་པར། ཆབ་སྲིད་མི་སྣར་ངོས་འཛིན་བྱེད་བཞིན་པའི་རྐྱེན་གྱིས་ཡིན་པ་བརྗོད་ཡོད་པ་རེད།

ཨུ་རུ་སུའི་མངའ་ཁོངས་སུ་ཡོད་པའི་ཁལ་མུག་སྤྱི་མཐུན་རྒྱལ་ཁབ་དང་། ཐོ་བ་དང་བྷོ་རུ་ཡ་སྤྱི་མཐུན་རྒྱལ་ཁབ་གཉིས་ཀྱི་མི་མང་ཕལ་ཆེ་བ་ནི་ནང་པ་ཡིན་ལ། མངའ་སྡེ་རྒྱལ་ཕྲན་དེ་གཉིས་ཀྱི་དད་ལྡན་མང་ཚོགས་ཀྱིས་༸གོང་ས་མཆོག་ནི་ཁོ་ཚོའི་ཆོས་ལུགས་ཀྱི་དབུ་ཁྲིད་ལ་བཀུར་བཞིན་ཡོད། དེ་སྔོན་༸གོང་ས་མཆོག་སྔ་རྗེས་ཐེངས་ ༨ ལ་ཨུ་རུ་སུའི་ནང་ཆིབས་བསྒྱུར་བསྐྱངས་མྱོང་ཡོད་པ་དང་། ཕྱི་ལོ་ ༡༩༩༤ ལོར་༸གོང་ས་མཆོག་གིས་ཨུ་རུ་སུའི་གྲོས་ཚོགས་འོག་མ་ཌ་མཱའི་(State Duma)ནང་བཀའ་སློབ་གསུང་བཤད་གནང་ཡོད་པ་རེད།

ཕྱི་ལོ་ ༡༩༩༦ ལོར་དེ་སྔའི་ཨུ་རུ་སུའི་སྲིད་འཛིན་ཟུར་པ་ཡེལ་སིན་(Boris Yeltsin) རྒྱ་ནག་ནང་ཕྱིན་ཏེ། རྒྱལ་ཁབ་གཉིས་བར་འཐབ་ཇུས་གྲོགས་པོའི་འབྲེལ་བ་བཙུགས་པའི་རྗེས། ཨུ་རུ་སུ་གཞུང་གིས་༸གོང་ས་མཆོག་ཨུ་རུ་སུའི་ནང་ཕེབས་རྒྱུར་བཀག་འགོག་བྱེད་མགོ་བཙུགས་ཡོད་པ་རེད།

༸གོང་ས་མཆོག་ཨུ་རུ་སུའི་ནང་ཕེབས་ཐེངས་མཐའ་མ་ནི།  ༢༠༠༤ ལོར་ཁལ་མུག་ནང་ཆིབས་བསྒྱུར་གནང་བ་དེ་ཆགས་ཡོད་ལ། སྐབས་དེར་རྒྱ་གཞུང་གིས་ཨུ་རུ་སུའི་གཞུང་ལ་ངོ་རྒོལ་གནོན་ཤུགས་སྤྲད་ཡོད་འདུག