སེ་རི་ཡའི་གནད་དོན་ཐག་གཅོད་ཐད་གྲུབ་འབྲས་གང་ཡང་མ་སོན་པར་བརྟེན། ཀོ་ཧྥེ་ཨན་ནན་གྱིས་ཨ་རབ་མཐུན་ཚོགས་དང་རྒྱལ་ཚོགས་སྐུ་ཚབ་ནས་དགོངས་ཞུ་བྱས་འདུག
ཁ་སང་ཕྱི་ཚེས་ ༢ ཉིན་ཨ་རབ་མཐུན་ཚོགས་དང་རྒྱལ་ཚོགས་སྐུ་ཚབ་རྒྱལ་ཚོགས་དྲུང་ཆེ་ཟུར་པ་ཀོ་ཧྥེ་ཨན་ནན་(Kofi Annan) གྱིས་སེ་རི་ཡའི་ཟིང་འཁྲུག་ཞི་འཇགས་ཡོང་རྒྱུར་འདས་པའི་ཟླ་བ་མང་པོའི་རིང་འབད་བརྩོན་བྱས་ཀྱང་། རཱ་ཤཱི་ཡ་དང་རྒྱ་ནག་གཉིས་ཀྱིས་རྒྱལ་ཚོགས་བདེ་འཇགས་ལྷན་ཁང་གི་གྲོས་དོན་ལ་རིམ་པར་ངོ་རྒོལ་གྱིས་འགོག་རྐྱེན་སྤྲད་ཡོད་པ་མ་ཟད། སེ་རི་ཡའི་ད་ལྟ་དང་མ་འོངས་པ་མི་གཅིག་གི་གནད་དོན་ཞིག་མིན་པར་བརྟེན། ཨ་རི་དང་ཨ་རིའི་ཕྱོགས་གཏོགས་རྒྱལ་ཁབ་དག་གིས་ཀྱང་། སྲིད་འཛིན་བྷ་ཤར་གཅིག་པུ་དམིགས་འབེན་དུ་མ་བཟུང་པར་ཁྱོན་ཡོངས་ནས་ཞི་འཇགས་ཡོང་ཐབས་བྱ་དགོས་མོད། རྒྱལ་ཁབ་དག་གིས་སོ་སོའི་ལངས་ཕྱོགས་ཙམ་ལས་ཁྱོན་ཡོངས་ནས་འགན་འཁུར་གྱི་མེད་པས། ཁོང་གི་ཞི་འགྲིག་གི་ལས་དོན་ཡོང་ཐབས་མེད་པར་བརྗོད་དེ་དགོངས་ཞུ་བྱས་པའི་གསལ་བསྒྲགས་སྤེལ་འདུགགསར་ལམ་ཁག་ཏུ་གནས་ཚུལ་ཐོན་པའི་ནང་། ཨན་ནན་གྱིས་དགོངས་ཞུ་བྱས་རྗེས། ཨོ་བྷ་མས་སྲིད་འཛིན་བྷ་ཤར་དང་ཁོའི་སྲིད་གཞུང་ཕམ་པར་རྒྱག་ཆེད་གསང་པའི་སྒོ་ནས་ཨ་རིའི་གསང་པའི་ལས་ཁུངས་དང་འབྲེལ་ཡོད་སྡེ་ཚན་ཁག་ལ།སེ་རི་ཡའི་གྱེན་ལངས་ཤོག་ཁག་ལ་མཚོན་ཆ་མཁོ་སྤྲོད་བྱ་ཆོག་པའི་དབང་ཚད་སྤྲད་ཡོད་འདུག
ཨན་ནན་གྱིས་སྐུ་ཚབ་ནས་དགོངས་ཞུ་བྱས་པའི་རྗེས་སུ་མཉམ་འབྲེལ་རྒྱལ་ཚོགས་ཀྱི་གྲོས་ཚོགས་ཨ་མའི་ནང་གནད་དོན་དེའི་ཐད་གླེང་སློང་ཆེན་པོ་བྱུང་ཡོད་པ་མ་ཟད། ཐེངས་འགར་རྒྱལ་ཚོགས་བདེ་འཇགས་ལྷན་ཁང་ནང་གྲོས་གཞི་བཏོན་པ་ཁག་ལམ་ལྷུང་མ་བྱུང་སྟབས། མི་འགྱངས་པར་རྒྱལ་ཚོགས་ཀྱི་གྲོས་ཚོགས་ཨ་མའི་ནང་སེ་རི་ཡའི་གནད་དོན་ཐད་མང་མོས་ཐག་གཅོད་ཀྱི་གྲོས་གཞི་འདོན་རྒྱུ་ཡིན་འདུག
གསར་འགོད་པ། བནྡེ་སྐྱབས།
