ཟླ་འདིའི་ཕྱི་ཚེས་ ༩ ཉིན་ཀུའུ་ཁའེ་ལའེ་ལ་ཁྲིམས་ར་འཚོགས་ཏེ་ཁྲིམས་ཐག་གཅོད་རྒྱུ་རེད།
པའོ་ཞིས་ལའེ་ཡི་ཆུང་མ་ཀུའུ་ཁའེ་ལའེ་ལ་ཁྲིམས་ཐག་གཅོད་པའི་ཁྲིམས་ར་དེ། ཟླ་ཕྱི་ཟླ་ ༨ ཚེས་ ༩ ཉིན་རྒྱ་ནག་སྲིད་འཛིན་ཧུའུ་ཅིན་ཐའོ་ཡི་ཕ་ཡུལ་ཨན་ཧའེ་ཞིང་ཆེན་ཧི་ཧྥེ་གྲོང་ཁྱེར་དུ་འཚོགས་རྒྱུ་ཡིན་འདུག ཨ་རིའི་སའེ་ཨན་ཨན་གསར་ཁང་གིས་གནས་ཚུལ་སྤེལ་བ་ལྟར་ན། ཀུའུ་ཁའེ་ལའེ་ཡིས་ལྐོག་གསོད་བྱས་པའི་དབྱིན་ཇིའི་ཚོང་བ་ཧེ་ཝར་ཊིའི་ནང་མི་ ༢ ཀྱང་ཁྲིམས་རར་བཅར་རྒྱུ་ཡིན་པ་མ་ཟད། དབྱིན་ཇིའི་ཕྱི་འབྲེལ་མི་སྣ་ཡང་ཟུར་ཉན་དུ་བཅར་ཐུབ་རྒྱུར་རེ་བ་བྱེད་ཀྱིན་ཡོད་འདུག
གསར་ལམ་ཁག་གིས་གནས་ཚུལ་སྤེལ་བ་ལྟར་ན། རྒྱ་གཞུང་གིས་ཀུའུ་ཁའེ་ལའེ་ཡི་གྱོད་དོན་དེར་རྒྱལ་སྤྱིའི་བརྒྱུད་ལམ་ཁག་གིས་དོ་སྣང་ཤུགས་ཆེན་མི་ཡོང་བར་ཆེད་དུ་དམིགས་ཏེ། ལོན་ཊོན་ཨོ་རྩེད་མཛད་སྒོའི་ཉིན་གཅིག་གི་སྔོན་ལ་ཀུའུ་ཁའེ་ལའེ་ལ་དངོས་སུ་ཁྲིམས་བཤེར་བྱ་རྒྱུ་ཡིན་པ་ཕྱིར་བསྒྲགས་བྱས་པ་དང་། ཨོ་རྩེད་མཇུག་སྒྲིལ་ལ་ཉེ་བའི་སྔོན་ཏག་ཏག་ལ་ཁྲིམས་ར་འཚོགས་ཏེ་ཁྲིམས་ཐག་གཅོད་རྒྱུ་གཏན་ཁེལ་བྱས་པ་ཞིག་ཡིན་པ་མ་ཟད། ཀུའུ་ཁའེ་ལའེ་ལ་ལོ་ ༡༥ ནས་ཚེ་བཙོན་བར་གྱི་བཙོན་འཇུག་ཁྲིམས་ཐག་དང་། པའོ་ཚང་ཁྱིམ་ལས་ལག་རོགས་ཀྲང་ཞའོ་ཅོན་ལ་སྲོག་ཁྲིམས་གཅོད་རྒྱུ་ཡིན་པའི་ངོས་འཛིན་བྱེད་བཞིན་ཡོད་པ་རེད།
ཀུའུ་ཁའེ་ལའེ་འཇུ་བཟུང་བཀག་ཉར་བྱས་ཏེ་ད་ལྟའི་བར་ཟླ་ ༡༠ ཙམ་འགོར་གྱིན་ཡོད་པ་རེད།
