གྲྭ་བློ་བཟང་ཚུལ་ཁྲིམས་ས་གནས་གཞན་དུ་འཁྱེར་འདུག

ཁ་སང་གཟའ་ཟླ་བའི་ཉིན་རྔ་པ་ཀིརྟི་དགོན་པའི་གྲྭ་བློ་བཟང་ཚུལ་ཁྲིམས་ལགས་ཀྱིས་རང་ལུས་མེར་བསྲེཊ་བཏང་རྗེས།  ཉེན་རྟོག་པས་ལུས་སྟེང་གི་མེ་བསད་དེ་ས་གནས་གཞན་ཞིག་ཏུ་འཁྱེར་འདུག  

བཞུགས་སྒར་ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་ཀ་ཉག་ཚེ་རིང་དང་བློ་བཟང་ཡེ་ཤེས་ལགས་རྣམ་གཉིས་ཀྱིས་འདི་གར་གནས་ཚུལ་བཏང་འབྱོར་བྱུང་བ་ལྟར་ན། ཁ་སང་ཕྱི་ཚེས་  ༦ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༥ དང་སྐར་མ་ ༥ ཙམ་ལ་རྔ་པ་ཀིརྟི་དགོན་པའི་རང་ལོ་ ༢༡ ཡིན་པའི་གྲྭ་བློ་བཟང་ཚུལ་ཁྲིམས་ལགས་ཀྱིས། ཀིརྟི་དགོན་པའི་ཉེ་འདབས་ཀྱི་དཔའ་བོའི་སྲང་ལམ་ནས་རང་ལུས་མེར་བསྲེས་ཀྱིས་སྐད་འབོད་བྱེད་བཞིན་ཁྲོམ་གཞུང་དུ་རྒྱུགས་ཡོད་པ་དང་། སྐབས་དེར་ནམ་རྒྱུན་ལམ་ཁ་དེའི་ནགས་ལས་ཁང་གི་ར་སྐོར་ནང་ཡིབ་སྡོད་བྱས་ཡོད་པའི་དྲག་ཆས་ཉེན་རྟོག་པ་དང་། དམིགས་བསལ་ཉེན་རྟོག་པ་བཅས་ཀྱིས་མེ་གསོད་ཡོ་ཆས་སྤྱད་དེ་ཁོང་གི་ལུས་སྟེང་གི་མེ་བསད་རྗེས་རྔ་པ་རྫོང་སྨན་ཁང་དུ་འཁྱེར་ཡོད་འདུག

རྔ་པའི་སྨན་ཁང་དུ་ཆུ་ཚོད་ཕྱེད་ཀ་ཙམ་གྱི་རིང་བསྡད་རྗེས། ས་གནས་གཞན་ཞིག་ཏུ་འཁྱེར་ཡོད་འདུག་ལ། སྐབས་ཐོག་དེར་དངོས་སུ་མཐོང་མཁན་ཞིག་གིས། གྲྭ་བློ་བཟང་ཚུལ་ཁྲིམས་ལགས་སྐབས་དེར་གྲོངས་མེད་པ་དང་། ཁོང་གིས་མེ་ལྕེའི་དབུས་ནས་སྐད་འབོད་བྱས་ཡོད་ཀྱང་ཚིག་འབྲུ་གསལ་པོ་གོ་མ་སོང་ཞེས་བརྗོད་འདུག

གྲྭ་བློ་བཟང་ཚུལ་ཁྲིམས་ལགས་ནི། རྔ་པ་རྫོང་གཅའ་ཞང་རྭ་རུ་བའི་རྗའ་དར་ཚང་གི་མ་སྒྲོན་དཀར་སྐྱིད་ཀྱི་བུ་ཡིན་འདུག་ལ། ཆུང་བའི་དུས་ནས་རྔ་པ་ཀིརྟི་དགོན་པའི་ཆོས་སྒོར་ཞུགས་ཡོད་པ་དང་།  ༢༠༠༨ ལོར་རྒྱ་གཞུང་ཉེན་རྟོག་པས་དགོན་པའི་ནང་ནས་འཛིན་བཟུང་གིས་གཅར་རྡུང་མནར་གཅོད་དྲག་པོ་བཏང་ཡོད་འདུག ཁོང་ཐོས་བསམ་གླིང་གྲྭ་ཚང་གི་རྟགས་རིགས་འཛིན་གྲྭ་ཡིན་པ་དང་། ལོ་སྔོན་མའི་ནང་རང་ལུས་མེར་བསྲེཊ་ཀྱིས་འདས་གྲོངས་སུ་གྱུར་པའི་རྒྱལ་གཅེས་དཔའ་བོ་བློ་བཟང་ཕུན་ཚོགས་དང་འཛིན་གྲྭ་གཅིག་པ་ཡིན་འདུག ཁོང་རྒྱུན་དུ་ལག་རྩེད་སྤོ་ལོ་རྩེད་རྒྱུར་དགའ་མོས་ཆེན་པོ་ཡོད་མཁན་ཞིག་ཡིན་པར་མ་ཟད། རྔ་པའི་ནང་གི་ལག་རྩེད་སྤོ་ལོའི་རུ་ཁག་ཅིག་གི་ཚོགས་མི་ཡང་ཡིན་འདུག

གསར་འགོད་པ། དོན་གོ