སང་ཉིན་དབྱིན་ཡུལ་གྱི་ཕྱི་དྲོའི་ཆུ་ཚོད་ ༥ སྟེང་རྒྱལ་ས་ལོན་ཌོན་དུ། བོད་རིགས་བུ་མོ་ཆོས་དབྱངས་སྐྱིད་ལགས་བུད་མེད་འདུར་རྒྱུག་(Race Walk)ཞེས་པའི་ལུས་རྩེད་འགྲན་བསྡུར་ནང་མཉམ་ཞུགས་གནང་གི་ཡོད་པ་རེད།
རྩེད་མོ་དེ་དབྱིན་ཡུལ་གྱི་ཕྱི་དྲོའི་ཆུ་ཚོད་ ༥ སྟེང་རྒྱལ་ས་ལོན་ཌོན་གྱི་དཀྱིལ་དབུས་(The mall)ཞེས་པ་ནས་མགོ་འཛུགས་བྱ་རྒྱུ་ཡིན་པ་དང་། ཐེངས་འདིར་སྤྱི་ལེ་ ༢༠ (Km 20)ལ་རྒྱུག་རྒྱུ་ཡིན་སྟབས། རྒྱལ་མོ་ཝེཀ་ཊའོ་རེ་ཡཱའི་དྲན་རྟེན་(Queen Victoria Memorial) ཞེས་པར་སྐོར་བ་ཐེངས་ ༡༠ རྒྱག་རྒྱུ་ཡིན་འདུག
སང་ཉིན་གྱི་བུད་མེད་འདུར་རྒྱུག་འགྲན་བསྡུར་ནང་རྒྱལ་ཁབ་ ༣༣ གྱི་བུ་མོ་ལུས་རྩལ་བ་ ༦༡ ཙམ་འཛུལ་ཞུགས་བྱེད་ཀྱི་ཡོད་པ་དང་། དེ་དག་ཁྲོད་རྒྱ་ནག་གི་འཐུས་ཚབ་བུ་མོ་ ༣ ཡོད་པ་ལས་བུ་མོ་ཆོས་དབྱངས་སྐྱིད་ནི་ཨང་གསུམ་པ་དང༌། ཐེངས་འདིར་འཛུལ་ཞུགས་བྱེད་མཁན་ཡོངས་ལས་ཨང་ ༧ པར་ངོས་འཛིན་ཐོབ་ཡོད་འདུག
ཐེངས་འདིར་དབྱིན་ཡུལ་དུ་གནས་སྡོད་བོད་མི་ཚོས་ཁོང་མོ་རྒྱུག་སའི་གཞུང་ལམ་འགྲམ་ནས་དགའ་བསུ་ཞུ་རྒྱུ་ཡིན་འདུག་ལ། དེའི་སྐོར་གྱི་གསལ་བསྒྲགས་ཤིག་སྤེལ་ཡོད་པའི་ནང་། “ཚེས་ ༡༡ ཉིན་གྱི་དབྱིན་ཡུལ་གྱི་ཆུ་ཚོད་ ༣ སྟེང་བོད་མི་རྣམས་ཀྱིས་བོད་ཆས་གྱོན་ཞིང་བོད་ཀྱི་རྒྱལ་དར་བསྣམས་ཏེ། ཧའེ་ཌེ་པཀ་(Hyde Park) ཐད་གཏོང་བརྙན་ཡོལ་ཆེན་མོའི་འགྲམ་དུ་འཛོམ་རྒྱུ་དང༌། ཆུ་ཚོད་ ༥ སྟེང་བྷ་ཁིན་ཧེམ་རྒྱལ་ཁང་(Buckingham Palace)ལམ་འགྲམ་ནས་བོད་པ་རྣམས་བང་བསྒྲིགས་ཏེ་དགའ་འབོད་ཞུ་རྒྱུ་ཡིན” ཅེས་དང་། “དྲི་བ་ཡོད་ན། ༠༧༥༥༣༦༩༠༥༥༦ ཡང་ན། ༠༧༤༡༡༧༡༤༤༦༩ ལ་འབྲེལ་བ་གནང་རོགས” ཞེས་སོགས་བཀོད་འདུག
བོད་རིགས་བུ་མོ་ཆོས་དབྱངས་སྐྱིད་ལགས་ནི། ཕྱི་ལོ་ ༡༩༩༠ ཟླ་ ༡༡ ཚེས་ ༡༡ ཉིན་ཨ་མདོ་མཚོ་སྔོན་མཚོ་བྱང་ཁུལ་འདབ་བཞི་རྫོང་། ཝ་མགྱོགས་ཡུལ་ཚོ་མཚོ་བྱང་སྡེ་བ་རུ་སྐྱེས་ཤིང༌། ས་གནས་སློབ་ཆུང་ལོ་རིམ་ལྔ་པ་བར་བཏོན་རྗེས། ནུབ་མཚོ་མི་རིགས་བཅའ་སྡོད་སློབ་གྲྭ་རུ་འཛིན་རིམ་བདུན་པའི་བར་བཏོན་ཡོད། དེའི་རྗེས་མཚོ་སྔོན་ཞིང་ཆེན་ལུས་རྩལ་སློབ་གྲྭས་ཆེད་དུ་གདན་ཞུ་གནང་པ་ལྟར། ༢༠༡༠ ལོར་སློབ་གྲྭ་དེར་འཛུལ་ཞུགས་ཀྱིས་ལུས་རྩལ་ཐོག་དངོས་སུ་སྦྱོང་བརྡར་མགོ་འཛུགས་གནང་ཡོད་འདུག
ད་ལོའི་ཕྱི་ཟླ་ ༣ ཚེས་ ༣ ཉིན་རྒྱ་ནག་ཅིང་སུའུ་ཐེ་ཀྲང་གྲོང་ཁྱེར་ནང་རྒྱལ་སྤྱིའི་ཨོ་རྩེད་འགྲན་ཚོགས་ཀྱི་སྔོན་འགྲོའི་འདེམས་སྒྲུག་འགྲན་བསྡུར་བྱས་སྐབས། རྒྱལ་ཁབ་ ༡༠ ཡི་འགྲན་ཞུགས་པ་ ༥༠༠ ལྷག་གི་ཁྲོད་བུ་མོ་ཆོས་དབྱངས་སྐྱིད་(Shenjie Qieyang)ལགས་ཀྱིས་ཨང་གསུམ་པ་བླངས་ཡོད་ཅིང༌། སྐབས་དེའི་ཨང་དང་པོ་ནི་ཧོང་ལེའུ་(Hong Liu)ཡིན་པ་དང༌། ཨང་གཉིས་པ་ཤིའོ་ཊི་ལུ་(Xiuzhi Lu)བཅས་ཡིན་ཞིང༌། ཐེངས་འདིའི་ལོན་ཌོན་ཨོ་རྩེད་སྟེང་དུ་ཁོང་ཅག་ ༣ འཛུལ་ཞུགས་བྱས་ཡོད་འདུག
དེ་སྔོན་ཆོས་དབྱངས་སྐྱིད་ཀྱི་རྐང་པར་རུས་པའི་ན་ཚ་ཞིག་ཕོག་སྟེ་ཟླ་བ་ ༣ ལྷག་རིང་སྦྱོང་བརྡར་གནང་མ་ཐུབ་པར་བསྐུ་མཉེ་དང་སྨན་བཅོས་སོགས་བྱས་ཏེ་ངལ་གསོ་བྱས་པའི་གནས་ཚུལ་ཡང་འདུག
བུ་མོ་ཆོས་དབྱངས་སྐྱིད་ལགས་ནི་བོད་པ་ཞིག་རྒྱལ་སྤྱིའི་ཨོ་ལིམ་པིག་ལུས་རྩེད་འགྲན་ཚོགས་སྟེང་ཞུགས་པའི་ལོ་རྒྱུས་ཀྱི་ཟིན་ཐོ་དང་པོ་དེ་ཆགས་ཡོད་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
དགའ་སྡུག་བཏང་སྙོམས་ཡིན།
རྒྱབ་ལྗོངས་མ་ཤེས་རྒྱལ་ཁ་ལོན་ཐལ་འདོད།།
ཕུགས་བསམ་མ་ངེས་ས་ལྡིང་གནམ་ལྡིང་གིན།།
ཟངས་ཀྱི་སྟེགས་མ་དེ་ལ་གཟེངས་བསྟོད་དེ།།
ངཟང་རྟག་མ་ཡིན་ངན་རྟགས་འབོད་པ་འདྲ།།
ཆོས་ཀྱི་དྲེད་པོར་བཤད་ལ་མཁས་པ་དང་།།
སྲིད་ཀྱི་རྨོངས་པོར་འུར་ལ་དགའ་བ་ཡིས།།
རང་གིས་རང་དོན་མེད་པར་བཟོ་བ་འདི།།
གདོང་བ་དམར་པོ་ཚང་གི་ནད་རྙིང་ཉིད།།
ཨོའོ་་་་་་ད་ལྟ་གནས་ཚང་རྒྱ་གར་ཁྱིམ་ཚང་གི་གྱད་རྩལ་བ། ཡོ་ཀཱེས་བཱར་དྷད་ཀྱིས། ཟངས་ཀྱི་རྟགས་མ་བླངས་ནས་རེ་བའི་ལག་པ་བཟུང་བའི་མི་འབོར་དུང་ཕྱུར་མང་པོའི་གཟི་བརྗིད་ཡར་ལ་བཏེགས་པར་བཀྲིས་བདེ་ལེགས།
བཀྲིས་བདེ་ལེགས། རྒྱུག་སོང་། བོད་ཀྱི་བོུ་ཆོས་དབྱངས་སྐྱིད་ཀྱིས་རྒྱུགས་སོང་།
ཚོགས་ལམ་ཟུར་ནས་བོད་ཀྱི་རྒྱལ་དར་བསྒྲེགས་ནས་དགའ་བསུ་ཀྱིས་དཔུང་རོགས་བསྟན་པའང་མཇལ་སོང་།
བུ་མོ་དེས་བོད་རིགས་ཀྱི་ལ་རྒྱ་དགུང་ལ་བཏེགས་སོང་།
རྒྱ་ནག་གི་ཨང་རིམ་གསུམ་པ་དང་། རྒྱལ་སྤྱིའི་ཨང་རིམ་བདུན་པར་ངོས་འཛིན་ཐོབ་པ་དེས། དེ་རིང་དགོང་མོར་མ་བསམ་ཟངས་ཀྱི་རྟགས་མ་བླངས་པ་ནི། ང་ཚོའི་རུས་རྐང་ལ་རིན་ཐང་དང་བརྩེ་གདེང་ཞིག་ཡོད་པར་དཔང་རྟགས་བྱས་པར་འདོད་དོ།།
གཉིད་སྐྱིད། རྨི་ལམ་བཟང་་་་་་་ཚེ་རིང་ཞིག བླ་མས་སྐྱོབས་ཤིག
ང་ཚོ་ནང་མི་ཚང་མ་གྲ་སྒྲིག་གིས་དགའ་བསུ་ཞུ་བཞིན་་་་་་་
ཧཧཧཧཧཧ་རྣམ་རྟོགས་རང་རེད་
ཤ་ཞེན་དང་ཞེན་ཁོག་ཆེ་བའི་སྤུན་ཟླ་ཚོ་ཁྱེད་ཚོའི་དངོས་ནས་ཁྲབ་སྟོན་ལེགས་པོ་ཞིག་གནང་གི་འདུག་ད། རྒྱ་ནག་ལ་རྒྱལ་ཁ་ཐོབ་ཆེད་ཤུགས་དེ་འདྲ་རྒྱབ་པ་སྙིང་ནས་དགའ་བསུ་ཞུ།
ང་རང་དབྱིན་ཇིའི་རྒྱལ་ས་ལོན་ཊོན་དུ་ཡོད། ཨོ་ལིམ་ཕིག་གི་རྩེ་མོའི་འཛིན་བྱང་ཉོས་ཡོད་མཁན་ཞིག་ཡིན། དེ་རིང་ང་ཚོའི་ཤ་ཁྲག་གཅིག་པའི་བུ་མོ་ཆོས་དབྱངས་སྐྱིད་ལགས་རྒྱུག་རྩལ་ནང་ཞུགས་ཀྱི་ཡོད་པ་རེད། མི་མང་པོ་ཞིག་གིས་ས་གནས་ཧ་གོ་གི་ཡོད་ས་མ་རེད། དབྱིན་སྡོད་བོད་མི་ཚོ་དང་རྒྱལ་ཁབ་གཞན་དག་ནས་ལྡད་མོར་ཡོངས་མཁན་མང་པོ་ཞིག་གིས་སྐད་ཆ་འདྲི་ཞིག་འདུག རྒྱུག་རྩལ་འགྲན་ས་ The mall ས་གནས་འདི་རེད། བོད་པ་མང་ཚོགས་འཛོམས་ས་ Hyde Park ཟེར་བ་དེ་རེད། ཁོང་མོ་རྒྱུས་རྩལ་འགྲོ་བཞིན་པའི་སྐབས་སུ་བོད་པ་ཚོས་བོད་ཆས་གྱོན་པ་དང་། ཁ་བཏགས་བཟུང་སྟེ་ Buckingham Palace ཟེར་བ་འདི་ནས་སྒུག་སྡོད་དགོས་པ་རེད། ལམ་ཁ་དེ་ནས་ཆོས་དབྱངས་ལ་དགའ་བསུ་དང་(ཤུགས་བརྒྱོབ་)ཅེས་སྐད་འབོད་གནང་དགོས་པ་རེད།
ངས་གཤམ་འོག་ཏུ་དེ་རིང་རྒྱུག་རྩལ་བགྲོད་ལམ་གྱི་ས་ཁྲའི་འབྲེལ་ཐག་བཏང་ཡོད། བོད་མི་ཚོས་འདི་ལ་གཟིགས་ནས་ཕེབས་པར་རོགས་ཞུ།།།
http://www.london2012.com/mm/Document/Documents/General/01/25/71/53/RaceWalkcourseGTW_Neutral.pdf
རང་གི་ལྟ་ཕྱོགས་སྨྲ་བར་རང་དབང་ཡོད་རྟེན། ཚིག་ཁ་ཤས་ཤིག་ཤོར་གྱིན་འདུག བོད་ཀྱི་བུ་མོ་འདི་ལ་དོན་དངོས་ཀྱི་རོག་དན་བྱེད་བརྩིས་ཡོད་ན། བོད་ཀྱི་རྒྱལ་དར་ཁྱེར་ནས་ཁོ་མོའི་བདེ་འཇག་ལ་བར་ཆད་མ་གཏོང་རོག ང་ཚོའི་ཀླད་མེད་དག་གིས། བོད་ནང་ལ་ཡོད་པའི་བོད་པ་སུ་གང་ལ་དེང་ཕྱིན་གོ་སྐབས་འདི་འདྲ་རག་པའི་ལམ་འགག་མེད་པ་བཟོ་བརྩིས་བྱེད་པ་འདི་ནི། ཕྱོགས་ཞེན་བླུན་པོ། མདུན་མཐོང་གི་མིག་བུ་གཉིས་ཆར་མེད་པའི་གསལ་བཤད་བྱས་མི་འདུག་གམ། ང་ཚོས་དགའ་བསུ་ཞུ་ལོས་དགོས་ཀྱང་། ལྟ་རྒྱ་དང་མཐོང་རྒྱ་ཆེ་ཙམ་དང་། ལུས་རྩལ་སོགས་རང་ཆས་ཀྱིས་སྒྱུ་རྩལ་མངའ་བ་འདི་དག་ལ་དོན་དངོས་ཀྱི་རོག་དན་བྱེད་རྩིས་ཡོད་ན་ཁོ་ཅག་ལ་བར་ཆད་མ་བཟོ་ཞེས་པའི་ཚིག་འདི་མི་འདོད་བཞིན་དུ་ཤོར་སོང་།
ལབ་རྒྱུ་གླེང་རྒྱུ་ཉུང་ན་དགའ།
ཟ་རྒྱུ་འཐུང་རྒྱུ་མང་ན་སྐྱིད་།
ཁ་བདེ་ལུས་འཁུག་མིན་བཟང་།
བོད་མོ་ཁོང་ལ་བཀྲ་ཤིས་བདེ་ལེགས་གྲངས་མེད་ཞུ
བུད་མེད་འདིའི་མིང་བྱང་ལ་བོད་མིང་ཆོས་དབྱིངས་སྐྱིད་ཟེར་བྲི་ཡོད་ན་ཐང་། མིང་ཡང་བོད་མིང་མི་སྤྱོད་པ་འདིས་ཁོ་མོའི་བོད་གཤིས་དང་ལར་ཞེན་ཇི་འདྲ་ཡོང་མེད་དེ་ཡང་ཐེ་ཚོམ་གནས་སུ་ལྷུང་། དེ་ཡང་བཙན་དབང་འོག་ཡོད་ཙང་ཁག་མེད་ཟེར་ནས་ཁག་འཇོག་རྒྱུ་ཡིན་ནམ།
བོད་མིང་ལ་ཆོསདབྱངས་སྐྱིད་དང་རྒྱ་མིང་Shenjie Qieyangཡིན་འདྲ་གང་ལྟར་བུ་མོ་ཁོང་ལ་མི་དགའ་བའི་རྣམ་འགྱུར་སྟོན་དགོས་དོན་མེད་། འོན་ཀྱང་ཆབ་སྲིད་ཐད་ནས་བཤད་ན་བོད་མོ་འདིའི་རྒྱ་ཁོངས་སུ་ཞུགས་ཞིང་དགྲ་བོའི་དར་དམར་འཕྱར་ནས་འཛམ་གླིང་མི་མང་གི་མིག་མདུན་ལ་བོད་རྒྱ་ཁོངས་ཡིན་པའི་གསལ་བསྒྲགས་འདིར་ངེད་རང་གི་བལྟས་ན་འོས་བབ་ཡོད་པ་ཞིག་མཐོང་མ་སོང་། དེ་བས་ཤེས་དགོས་ངེས་ཞིག་ལ་དེང་སྐབས་བོད་ནང་ཆེས་ཛག་དྲག་གི་གནས་སྟངས་ཡོད་པ་དང་དམིགས་བསལ་ཨ་མདོ་རྔ་བ་རང་ནས་དེ་རིང་བར་བོད་མི་ག་ཚོད་གཅིག་གི་རང་ལུས་མི་བསྲེད་གཏང་བ་ཞིབ་ཏུ་བསམ་བློ་བཏང་ན་དགའ་བསུ་ཞུ་འོས་མིན་དེ་དངོས་ཡོད་གནས་ཚུལ་ཡིན་ཙང་འདིར་དྲན་བཀུར་ཞུས་པ་ཙམ་ཡིན་། སྤྱིར་བོད་མི་མང་ཆེ་བས་གསེར་ཀྱི་རྟགས་མ་རྒྱ་དགྲེ་དེ་དག་ལ་རག་པ་མཐོང་དུས་སེམས་ལ་མ་དགའ་བ་སྐྱེ་གི་འདུག། ལྷག་དོན་རྒྱ་དགྲེ་དེ་ཚོ་ལ་ཐོབ་པ་ལས་ཨ་རི་སོགས་ནུབ་ཕྱོགས་རྒྱལ་ཁབ་དག་ལ་ཐོབ་ན་དགའ་བ་འཚོ་གི་འདུག འདི་ནི་གནས་ལུགས་ཅིག་དང་བསམ་བློའི་འཆར་སྣང་ཞིག་ལ་འབྲེལ་ཆོག་གི་རེད་དེ་དངོས་ཡོད་ནི་དངོས་ཡོད་རང་ཡིན་པས་བདེན་པ་ཡིན་མིན་ལ་ཞེན་ཁོག་གི་དཔྱད་ཞིབ་གནང་འོས་པ་ཞིག་མ་རེད་། ཁེ་ཕན་དང་གོ་གནས་ལ་མ་གཟིགས་པར་རང་མི་རིགས་ལ་ཞེན་པ་དཀར་པོའི་རང་མདངས་དང་དགོས་པ་མཐོང་ན་རང་ལུས་མེ་མཆོད་འབུལ་མཁན་རྒྱལ་གཅེས་དཔའ་བོ་དེ་དག་གི་ལ་རྒྱ་དང་རེ་བ་ཇེ་བཞིན་ཕུགས་བསམ་གི་ཕྱོགས་རྒྱབ་སྐྱོར་ཀྱི་ཐ་ན་རྣམ་འགྱུར་ཙམ་ཞིག་སྟོན་པ་དེ་རེད་།
དབྱིན་ཡུལ་གྱི་བོད་པ་ཚོས་བུ་མོ་འདི་ལ་བར་ཆད་ཅིག་བྱེད་ན་ཐང་གི། དེ་ལྟར་བྱེད་ནའང་ཁ་ཐུག་ལ་ཐད་ཀརསོང་སྟེ་གསར་འགོད་བརྒྱུད་ལམ་ལ་རྗེས་ནས་གཏོང་བ་ལས་སྔོན་ལ་གསར་འགོད་བརྒྱུད་ལམ་ལ་གཏོང་བ་ནི་ཡག་པོ་མ་རེད། རྒྱ་ནག་གིས་ཅིག་བྱས་ན་ཚར་བ་རེད། དེའི་ཕྱིར། དེ་དག་གི་བྱེད་སྟངས་དེ་ཡག་པོར་མ་མཐོང་། ལས་འགུལ་སྤེལ་ནའང་དགོས་པ་དགག་བྱ་ལ་ལྟ་དགོས།
རང་གཤིས་དྲང་མོ་མེད་ན་་་དྲང་བདེན་གྱི་སློང་མོ་བའི་མགོ་བརྗོད་འདི་རང་གི་སྐེ་ལ་བཏགས་ཏེ་འཛམ་གླིང་དུ་སློང་མོར་ཇི་ཙམ་ཆས་ཀྱང་ཕན་འབྲས་འཐོན་གྱི་མ་རེད་་་་ལོ་་་་
ཆོས་དབྱངས་སྐྱིད་ཀྱི་གནས་ཚུལ་ཞིབ་ཕྲ་འདི་ན་འདུག http://neytramo.blogspot.in/2012/08/blog-post.html
ཁྱེད་ཀྱི་བོད་ཀྱི་བུ་མོ་ཆོས་དབྱིངས་སྐྱེད་ཀྱི་གནས་ཚུལ་གསལ་པོ་འབྲེལ་རྗོད་བྱེད་པ་དགའ་པོ་བྱུང་ཡིན་ནི་ཨོ་རྩལ་འགྲན་བསྡུར་ནང་ན་བོད་ཀྱི་བུ་མོ་གཞན་ཞིག་ཡོད་སྐད་འདུག་པས་གལ་སྲིད་ཡོད་པ་ཡིན་ན་ཁྱེད་ཀྱི་ཅི་ཕྱིར་འདིར་འབྲིས་རྗོད་བྱེད་མ་ཐུབ་པ་ཡིན་ནམ་གལ་སྲིད་ཨོ་རྩལ་ནང་བོད་མི་གཞན་ཡོད་པ་ཡིན་ན་ཁྱེད་ཀྱིས་གནས་ཚུལ་གཅིག་མཚུངས་སུ་དགོས་རོག་གནང་ཞུ་རྒྱུ་ཡིན།
གསར་འགྱུར་འདི་དུས་ཐོག་ཆར་པ་རེད། རྩོམ་སྒྲིག་པ་མཆོག་ལ་ཐུགས་རྗེ་ཆེ་ཞུ་འདོད་བྱུང་། བོད་པའི་བུ་མོ་འདི་ཐེངས་འདིར་རྒྱ་ནག་གི་སྐུ་ཚབ་བྱས་ཏེ་འགྲན་བསྡུར་ནང་ཞུགས་ཀྱི་ཡོད་མེད་ལ་མ་ལྟོས་པར། བོད་པའི་བུད་མེད་ཅིག་ཨའོ་ལིམ་ཕིག་ལུས་རྩལ་འགྲན་བསྡུར་ནང་ཞུགས་ཐུབ་པ་ཙམ་གྱིས་གཟི་བརྗིད་ཆེན་པོ་ཞེ་དྲག་རེད།
དེ་ནས་གསར་འགྱུར་འབྲི་སྟངས་ཀྱི་ཐད་ནས་ཀྱང་ཧ་ཅང་ཚད་ལྡན་རེད། ཁ་གསལ་གོ་བདེ། དོན་དག་ཚང་མ་ཚང་བསྡད་པ་ཞིག་རེད། རྒྱལ་སྤྱིའི་ཨའོ་ལིམ་ཕིག་གི་རྩེད་འགྲན་ལ་མཚོན་ན། རྒྱལ་ཁབ་གཅིག་པོ་མ་ཡིན་པར་རང་སྐྱོང་གི་ངོ་བོར་ཡོད་པའི་ལུང་པ་དང་། དམིགས་བསལ་སྲིད་འཛིན་ས་ཁུལ། དེ་བཞིན་མི་རིགས་དང་ལུང་པ་བྱེ་བྲག་པ་དེ་འདྲ་ཡང་ཡོད་པ་རེད། ཁོང་ཚོས་སོ་སོའི་སྐུ་ཚབ་ཅིག་ཨའོ་རྩེད་ནང་འཛུལ་ཞུགས་བྱེད་ཀྱི་ཡོད་ཚེ་སྔོན་ཚུད་ནས་ཁྱབ་བསྒྲགས་ཤུགས་ཆེན་པོ་བྱེད་པ་དང་། གསར་འགོད་པ་ཚོས་ཉི་མ་ཉི་མ་བྱས་ཏེ་རྗེས་འདེད་བྱེད་གི་རེད། འགྲོ་ཆག་ཉལ་འདུག་ཚང་མ་སོ་སོའི་མི་མང་ལ་གནས་ཚུལ་ཁྱབ་སྤེལ་བྱེད་གི་རེད། དེ་བཞིན་མི་དམངས་ཀྱི་ངོས་ནས་ཀྱང་དོ་སྣང་དང་གདེང་འཇོག་ཆེན་པོས་ལྟ་ཉན་བྱེད་གི་རེད། ཡིན་ནའང་བོད་པའི་སྤྱི་ཚོགས་ནང་ད་བར་གྲགས་འགུལ་གང་ཡང་མེད་པར་སྣང་མེད་བཏང་བ་རེད། འདི་ཐབས་སྐྱོ་བོ་ཞེ་དྲག་རེད། བོད་ནང་ལ་ཁག་ཡོད་པ་མ་རེད་དམིགས་སུ་བཀར་ཏེ་ག་གེ་ཅིག་བྱེད་དབང་ཡོད་པ་མ་རེད། བཙན་བྱོལ་ནང་གི་གསར་འགྱུར་བརྒྱུད་ལམ་ཁག་ནས་ཀྱང་ད་བར་མ་ཤེས་མདོག་མདོག་གིས་ཡ་མེད་བཏང་བ་རེད། འདི་དངོས་གནས་བྱས་ན་འགྲོ་སྟངས་ཏག་ཏག་བསྡད་ཡོད་པ་མ་རེད། འདི་ལས་ལྷག་གི་གནས་ཚུལ་ག་རེ་ཞིག་འཚོལ་བསྡད་ཡོད་པ་ཧ་གོ་མ་སོང་།།
དྲང་བདེན་གྱི་སློང་བ་ཟེར་མཁན་ལགས། འུ་ཚང་གི་སྐུ་དྲག་མི་དྲག་ཕལ་ཆེ་བས་རང་འདོད་ལྟར་ཕྱིའི་རྒྱལ་ཁབ་གཞན་གྱི་མི་སེར་བཟོས་ཚར་འདུག འོ་ན། དེ་དག་གིས་རྒྱལ་ཁབ་གང་དེར་མགོ་བཏེགས་ཞུས་ཚར་བར་བརྗོད་རྒྱུ་ཡིན་ནམ། བོད་ནང་གི་བོད་མི་ཚོ་ནི་རྒྱའི་བཙན་འོག་ན་ཡོད་ཙང་རྒྱའི་མིང་མི་འཁུར་རང་འཁུར་རེད། ཁོ་ཚོར་ཐབས་ཤེས་གཞན་ཡོད་པ་མ་རེད། ཁྱོས་སྐད་ཆ་དྲང་མོར་སྐད་ཆ་བཤད་འདོད་ཡོད་ན། རང་འདོད་ཀྱིས་རང་ཁེ་དོན་གཉེར་གྱི་ཆེད་དུ་རྒྱལ་ཁབ་ལ་མགོ་བཏེགས་ཞུས་ཟིན་པ་འུ་ཚོའི་རིགས་ཐེར་འདོན་གྱིས་༸གོང་ས་མཆོག་ནང་བཞིན་བཙན་བྱོལ་བ་ཞིག་གི་མིང་ཁུར་འདུག་རོགས་ཞེས་སྐུལ་རོགས།
རྒྱལ་སྤྱིའི་ཨོ་རྩེད་འགྲན་བསྡུར་དུ་ཞུགས་མཁན་གྱི་བོད་པའི་ལུས་རྩེད་པ་ཐོག་མ།
ཆོས་དབྱངས་སྐྱིད་ཀྱི་འགྲན་ཞུགས་ཨང་རྟགས་ནི། ༡༣༨༧ རེད།
འགྲན་ཞུགས་སྐབས་ཀྱི་མིང་དབྱིན་ཡིག་ཐོག QIEYANG Shenjie ལྟར་བྲིས་འདུག
Hong Liu , Xiuzhi Lu དང་། ཆོས་དབྱངས་སྐྱིད། Choe-yang Kyi ལ། Shenjie Qieyang བྲིས་ན་སེམས་ལ་ག་འདྲ་ཅིག་ཤར་བགྱིད་འདུག་གམ། བོད་རིགས་ཚོ། བོད་མོ་ཆོས་དབྱངས་སྐྱིད་ལགས་ལ་གསེར་གྱི་རྟགས་མ་ཐོབ་པར་ཤོག །
དེ་རིང་རྒྱ་ནག་གི་ཁོང་སུ་ཞུགས་མཁན་བོད་མོ་འདིར་དགའ་བསུ་ཞུ་འདོད་མེད་། ལོ་རྒྱུས་ཐོག་ཁོང་ནི་བོད་རིག་རྒྱལ་ཚོང་བ་ནག་ཉེས་ཆེས་ཤོས་དེ་སྲིད་། འདས་ཟིན་པའི་ལོ་ཟླ་བགྲང་ན་མི་ལོ་༥༠ཡི་རིང་རང་བཙན་ཤོར་བའི་བོད་ལ་ནམ་ཡང་རང་བཙན་ཐོབ་མི་སྲིད་པའི་གཏམ་ངན་ཞིག་སངས་རྒྱས་ཀྱི་ལུངས་བསྟན་གནང་ཡོད་ན་མ་གཏོགས་ང་ཚོའི་སྤོགས་པ་ཞུམ་ཏེ་དགྲ་བོ་རྒྱ་ནག་ལ་འགོ་རྟག་ཞུ་མི་འོས་། བོད་མོ་འདིའི་ལས་དབང་གང་ཞིག་ཡིན་རུང་ཕུགས་བསམ་དང་ལ་རྒྱ་ཡོད་མེད་ལ་མ་སྟོས་པ་ཁོང་གི་དེ་རིང་འཛམ་གླིང་མི་མང་འདུན་རྒྱ་ཁོང་སུ་དཔའ་ངར་ཆེ་པོའི་མཉམ་ཞུགས་བྱེད་པ་དེ་རེད་།
མེས་པོས་མགོ་བོ་བཅོམ་པའི།
དར་དམར་རྒྱབ་ཏུ་འཁྱེར་བའི།
འཛམ་གླིང་ཨོ་རྩལ་གླིང་གི
བོད་མོ་ཆོས་དབྱངས་སྐྱིད་ལ།
ཤ་དང་རུས་པའི་སྟེང་ནས།
རྒྱལ་ཁ་ལེན་པ་སྨོན་ནོ།
མ་འོངས་དུས་རབ་གསར་པར།
གངས་སེང་ངར་མའི་དར་ཆེན།
ཁྱེད་ཀྱི་ཕྱག་ཏུ་བཞེས་ནས།
མགོ་ནག་བོད་པའི་གྲགས་པ།
ས་སྟེང་འགྲོ་བ་ཡོངས་ལ།
འདྲེན་པའི་ཕོ་ཉར་གྱུར་རེ།
བཅས་དགའ་སྐྱོ་འདྲེས་མའི་སེམས་པས་བསྐུལ་སྤེལ་བའོ།
ཅོལ་ཆུང་གི་མིག་ཟུང་འཁོར་ཡུལ།།
གུང་ཁྲན་གྱི་སྒྱུ་མའི་རྩེད་སྤྱད།།
བོད་པ་འགའི་གླེན་རྟགས་སྟོན་ཡུལ།།
ལག་སྟོང་དུ་ཕྱིར་ལོག་བྱེད་པ།།
རྒྱ་རྒན་ཚོས་སྔ་ནས་དཔག་ཡོད།།
ཁྲག་རྒྱུན་དེ་བོད་དང་གཅིག་ཀྱང་།།
སེམས་པ་དེ་རྒྱ་ལ་དགའ་བས།།
རྩེད་འགྲན་དེར་བཅུག་པ་ཙམ་མོ།།
ང་ཚོ་བོད་ཀྱི་བུད་མེད་རྒྱལ་སྤྱིའི་རྩེད་འགྲན་དུ་ཐོག་མར་ཞུགས་ཐུབ་པ་འདི་ལ་བཀྲ་ཤིས་བདེ་ལེགས་ཡང་ཡང་ཞུ། བུ་མོ་ཆོས་དབྱངས་སྐྱིད་རྒྱལ་བ་ལ་རེ་སྨོན་ཞུའོ།།
ཡིན་ཡང་། ཕྱི་སྡོད་བོད་མི་ཚོས་བུ་མོ་མོ་རང་གི་མདུན་ལམ་ལ་གནོད་མ་སྐྱེལ་ན་བཟང་ངོ་། རྒྱལ་དར་ཁྱེར་ཏེ་དགའ་བསུ་ཞུ་མཁན་ཡོང་རྩིས་ཡོད་པ་གོ་ཐོས་བྱུང་བ་དེ་བདེན་ན་མ་འོངས་བོད་པ་ཚོས་རྩེད་འགྲན་འདིའི་རིགས་ལ་ཞུགས་ས་རག་ན་འགོག་རྐྱེན་དུ་འགྲོ་ངེས་པས། ཆབ་སྲིད་ཀྱི་ངོ་བོར་སྒྱུར་ན་བཟང་རྟགས་ཤིག་མ་མཐོང་ངོ་། །
དྲ་གྲོགས་རིག་གྲོལ་ལགས། ཁྱོད་ཀྱི་རེ་སྐུལ་དེར་ཞིབ་འཇུག་བྱེད་ཁུལ་གྱིས་རྒྱལ་ཁབ་ཅུ་གྲངས་ཤིག་གི་ཆུ་ཚོད་གཤམ་དུ་བཀོད་ཡོད།
དབྱིན་ཇིའི་རྒྱལ་ས་ལོན་ཌོན། ཚེས་ ༡༡ ཉིན་གྱི་ཕྱི་དྲོའི་ཆུ་ཚོད་ ༥།༠༠
རྒྱ་གར་རྒྱལ་ས་ལྡི་ལི། ཚེས་ ༡༡ ཉིན་གྱི་དགོང་དྲོའི་ཆུ་ཚོད་ ༩།༣༠
བོད་ཀྱི་རྒྱལ་ས་ལྷ་ས། ཚེས་ ༡༡ ཉིན་གྱི་མཚན་གུང་ཆུ་ཚོད་ ༡།༠༠
ཨ་རིའི་རྒྱལ་ས་ཝ་ཞིན་ཊོན། ཕྱི་ཚེས་ ༡༡ ཉིན་གྱི་ཉིན་གུང་ཆུ་ཚོད་ ༡༢།༠༠
ཁེ་ན་ཌའི་རྒྱལ་ས་ཨོ་ཊི་ཝ། ཕྱི་ཚེས་ ༡༡ ཉིན་གྱི་ཉིན་གུང་ཆུ་ཚོད་ ༡༢།༠༠
ཨོ་སི་ཊི་ལེ་ཡའི་རྒྱལ་ས་ཁན་བྷེ་རཱ། ཕྱི་ཚེས་ ༡༢ ཉིན་གྱི་ཐོ་རངས་ཆུ་ཚོད་ ༢།༠༠
སུད་སའི་རྒྱལ་ས་བྷེན། ཕྱི་ཚེས་ ༡༡ ཉིན་གྱི་ཕྱི་དྲོའི་ཆུ་ཚོད་ ༦།༠༠
འཇར་མན་གྱི་རྒྱལ་ས་བྷར་ལན། ཕྱི་ཚེས་ ༡༡ ཉིན་གྱི་ཕྱི་དྲོའི་ཆུ་ཚོད་ ༦།༠༠
ཧྥ་རན་སིའི་རྒྱལ་ས་ཕ་རེ་སི། ཕྱི་ཚེས་ ༡༡ ཉིན་གྱི་ཕྱི་དྲོའི་ཆུ་ཚོད་ ༦།༠༠
བྷལ་ཇམ་རྒྱལ་ས་སྦར་སིལ། ཕྱི་ཚེས་ ༡༡ ཉིན་གྱི་ཕྱི་དྲོའི་ཆུ་ཚོད་ ༦།༠༠
ཉི་ཧོང་རྒྱལ་ས་ཊྲོག་ཁེའོ། ཕྱི་ཚེས་ ༡༡ ཉིན་གྱི་མཚན་གུང་ཆུ་ཚོད་ ༡།༠༠
ཐེ་ཝན་གྱི་རྒྱལ་ས་ཐེ་པེ། ཕྱི་ཚེས་ ༡༡ ཉིན་གྱི་མཚན་གུང་ཆུ་ཚོད་ ༡།༠༠།
བཅས་སུ་འཁེལ་འདུག་མོད། ཡིན་ནའང་རྒྱལ་ཁབ་སོ་སོའི་རྒྱལ་ས་གཞིར་བཟུང་རྩིས་ཡོད་སྟབས། མངའ་སྡེ་དང་གྲོང་འཁྱེར་འགའ་རེ་ནང་གཅིག་མཚུངས་མིན་པ་དེ་འདྲ་ཡང་ཡོད་སྲིད་པ་རེད།
དྲ་གྲོགས་བཙན་བྱོལ་བ་ལགས། ཁྱོད་ཀྱི་རེ་སྐུལ་དེའི་སྐོར་ལ་ཉེ་ལམ་ཨོ་རྩེད་མགོ་འཛུགས་གནང་མ་ཐག་ནས་གནས་ཚུལ་འཚོལ་སྒྲུབ་བྱས་ཀྱང་། ད་བར་བུ་མོ་ཤི་ལོག་སྒྲོལ་མའི་སྐོར་གྱི་གནས་ཚུལ་གཅིག་ཀྱང་རེག་མ་སོང་། ཕལ་ཆེར་ཁོང་མོ་ཐེངས་འདིའི་ལོན་ཌོན་ཨོ་རྩེད་ནང་ཞུགས་མེད་པ་འདྲ།
བུ་མོ་འདིའི་སྐོར་གྱི་བཅར་འདྲིའི་གློག་བརྙན་ལ་གཟིགས་འདོད་ཡོད་ན་འདི་ལ་ཕེབས་རོགས།
http://www.qhtb.cn/shipin/xiezhen/2012-05-05/362.html
བོད་པའི་བུ་མོ་ཆོས་དབྱངས་སྐྱིད་ཐེངས་འདིར་ལོན་ཊོན་ཨོ་ཚོགས་ནང་ཞུགས་ཐུབ་པ་བྱུང་བ་དེ་བོད་མི་ས་ཡ་དྲུག་གི་སྤོབས་པ་ཡིན་ལ། ཡང་སྒོས་བོད་པའི་བུད་མེད་རྣམས་ཀྱི་གཟི་བརྗིད་དང་ལ་རྒྱ་རེད།
གངས་ཅན་བོད་ཀྱི་བུ་མོ་ཆོས་དབྱངས་སྐྱིད་ལགས།ཁྱོད་ཀྱིས་དཀའ་སྡུག་གང་མང་ལ་གདོང་ལེན་ཁྱད་བསད་བྱས་ཏེ།སྦྱང་བརྩོན་མི་དམན་པ་བྱས་པའི་ནུས་རྩལ་རྣམས་ངོམས་པའི་དུས་ལ་བབ་པས་ཤུགས་རྒྱོྒྱོྒྱོབས་ཤིག ཁྱོད་ལ་རིགས་མཐུུན་སྤུན་ཀུན་ཀྱིས་ལྷག་བསམ་རྣམ་དག་གིས་རྒྱབ་སྐྱོར་བྱེད་བཞིན་ཡོད།གངས་རིའི་བུ་མོ་ཆོས་དབྱངས་སྐྱིད་རྒྱལ་བར་སྨོན།
ཨོ་རྩལ་འགྲན་བསྡུར་གྱི་རྩེད་མོའི་ཐོ་གཞུང་ནང་དུ་སང་ཉིན་གྱི་འདུར་རྒྱུག་འགྲན་བསྡུར་དེ་ནང་རྒྱ་ནག་གི་བུད་མེད་གསུམ་འདུག དེ་དག་གི་མིང་ལ་ Hong Liu , Xiuzhi Lu , Shenjie Qieyang སོགས་འཁོད་འདུག
ང་རང་ཐེངས་འདིར་ཆེད་དུ་ཡོ་རོབ་འཇར་མ་ནེའི་ཨའོ་ལིམ་ཕིག་གི་ལུས་རྩལ་ལ་ལྟ་རུ་ཡོང་བ་ཡིན། ཡོ་རོབ་ཁུལ་ནས་བོད་རིགས་མང་ཚོགས་གང་ལ་གང་འཚམས་ཤིག་འབྱོར་འདུག མང་པོི་ཤིག་གིས་བོད་པའི་བུ་མོ་ལུས་རྩལ་བ་ཁོང་མོ་བརྩད་འཚོལ་གནང་གི་འདུག ཁ་ཤས་ཀྱིས་མཐོང་སོང་རབས་ཀྱང་ཤོད་ཀྱི་འདུག སང་ཉིན་ཕལ་ཆེར་མོ་རང་ལ་ཐུག་གི་རེད་དྲན་གྱི་ཡོད། ངས་བསམ་ན་ཕྱི་ལོགས་ཀྱི་བོད་མི་ཚོ་ཁོང་མོར་དངོས་སུ་ཐུག་འཕྲད་བྱས་ན་ཡག་པོ་ཡོང་གི་མ་རེད་དྲན་ཡོད། ཕྱི་ལོག་གི་བོད་མི་ཚང་མ་སོང་ནས་བོད་ཆས་གྱོན་ནས་དགའ་དགའ་སྤྲོ་སྤྲོའི་སྐད་འབོད་གནང་སྟེ་ཁོང་མོ་ལ་སེམས་ཤུགས་སྤར་རྒྱུ་དེ་ཧ་ཅང་གལ་ཆེན་ནང་གི་དོན་ཆེན་རེད་བསམ་གྱི་འདུག
གསར་འགོད་པས་ཤི་ལོག་སྒྲོལ་མའི་སྐོར་ལ་ཡང་གང་མགྱོགས་འགོད་ཐུབ་པའི་རེ་བ་ཡོད། གང་ལྟར་བོད་མི་ཞིག་ཡིན་ཕྱིན་རྒྱལ་སྤྱི་རྩེད་འགྲན་ནང་ལ་ཚུད་པ་ལ་སེམས་གཏིང་ནས་དགའ་བསུ་ཞུ།
བཀླགས་ཡིན། མཐོང་སོང་། བོད་རིགས་རེད། བོད་པ་རེད། བོད་པ་ཡིན་ན་བོད་པ་ཞེས་ཐད་ཀར་མི་འབྲི་བར་དེའི་བར་དུ་རིགས་ཤེས་འབྲི་དགོས་དོན་ཅི་རེད།
ད་ཐང་བོད་མི་རིགས་འདིའི་ལས་བསོད་དང་རླུང་རྟ་ལ་ཐུགས་བསྡད་ཡོད་པས། བོད་རྩམ་ཟན་ཡོད་ཚད་ནས་རང་རང་གི་ཁ་རྗེ་དབང་ཐང་རྣམས་ཕྱོགས་གཅིག་དུ་སྡོམས་པའི་མཐུ་ལ་བརྟེན་ནས་བུ་མོ་ཆོས་དབྱངས་སྐྱིད་རྣམ་པར་རྒྱལ་བར་མཛོད།
མཐུ་བོ་ཆེ་དག་གི་གདོང་གྲོགས་མཛོད།།།།
ངེད་ཚོས་བཙན་བྱོལ་བས་བོད་ཆས་གྱོན་ནས་དགའ་བསུ་དང། སེམས་ཤུགས་ཕར་རྒྱུར་རམ་འདེགས་ལས་ཆབ་སྲིད་རྣམ་པ་མི་མངོན་ན་ལེགས། བུ་མོ་ཆོས་དབྱིངས་རྒྱལ་གྱུར་ཅིང།
དབྱིན་ཇིའི་རྒྱལ་ས་ལོན་ཌོན་གྱི་སང་ཉིན་གྱི་ཆུ་ཚོད་ 5:00 དེ་རྒྱ་གར་དང་། ཨ་རི། བོད། བལ་ཡུལ། སྦེལ་ཇམ། ཧྥ་རན་སི། འཇར་མཱ་ནེ་སོགས་ཀྱི་ཆུ་ཚོད་ག་ཚོད་ལ་འཁེལ་གྱི་ཡོད་པ་ཤེས་མཁན་ཡོད་ན་འདིར་འགོད་ཐུབ་ན་ཧ་ཅང་གལ་ཆེན་རེད་ལགས།
འདིའི་སྐོར་གྱི་གནས་ཚུལ་རགས་རིམ་རས་ཁ་སྔོན་ནས་གོ་སོང་། ཡིན་ནའང་འདི་ལྟ་བུའི་ཞིབ་རྒྱས་ཤིག་དེ་རིང་བར་ཀློག་རྒྱུ་མ་བྱུང་བས། རྩོམ་སྒྲིག་པ་མཆོག་གིས་ཁ་གསལ་བོ་དང་དོན་འདུ་བ་ཞིག་འཁོར་པར་ཐུགས་རྗེ་ཆེ་ཞུ་བཞིན་ཡོད།
ཆོས་དབྱངས་སྐྱིད་རྣམ་པར་རྒྱལ་གྱུར་ཅིག་་་་་་་་་་་་་་་་་་་་
བོད་པ་ཡོད་ཚད་ཀྱིས་རེ་བའི་མིག་ཟུང་ཁྱེད་ལ་ཕྱོགས་བཞིན་ཡོད་ན་ཁྱེད་ཉིད་ཅིས་ཀྱང་རྒྱལ་བར་སྨོན། བསམ་དོན་འགྲུབ་པར་སྨོན། བར་ཆད་མེད་པར་སྨོན། རྒྱལ་ལོ་རྒྱལ་ལོ་བོད་ཀྱི་བུ་མོ་ཆོས་དབྱངས་སྐྱིད་རྒྱལ་ལོ་་་་་་་་་་་་་་་་་་་་་་་་་་་་་་་་་་་་་།
ཆོས་དབྱངས་སྐྱིད། རྒྱལ་གྱུར་ཅིག
ཤུགས་བརྒྱབ་་་་་་་་་་་་་་་་་་་་་་་་་་་་་་་་་་་་་་་་