ད་ལོའི་ཕྱི་ཟླ་ ༡ ཚེས་ ༢༣ ཉིན་ཏེ་རྒྱ་ནག་གི་དཔྱིད་གསར་དུས་ཆེན་ཉིན་རྔ་པ་རྫོང་རྨེའུ་རུ་མའི་ཞང་ཐོག་ནས་མི་མང་བརྒྱ་ཕྲག་བརྒལ་བས་ངོ་རྒོལ་སྐད་འབོད་བྱས་སྐབས་༸གོང་ས་མཆོག་གི་སྐུ་པར་ལག་ཏུ་བཟུང་ནས་མི་མང་གི་སྣེ་ཁྲིད་པའི་ཉེས་མིང་འོག་རྨེའུ་མ་ཞང་རུ་ཆེན་དང་པོའི་དཔལ་ལྡན་ཚང་གི་མག་པ་ལོ་བརྒྱ། རང་ལོ་ ༣༣ ཡིན་པ་ཁོང་ལ་ལོ་ ༤ བཙོན་འཇུག་ཁྲིམས་ཐག་བཅད་ཡོད་འདུག
དཔྱིད་གསར་དུས་ཆེན་རྗེས་ལོ་བརྒྱ་དང་རྒྱལ་གཅེས་དཔའ་བོ་གཅོད་པ་ལགས་སོགས་ཉིན་དེའི་ ངོ་རྒོལ་སྐབས་ཀྱི་མི་སྣ་གཙོ་བོ་སྐོར་ཞིག་རྒྱ་གཞུང་གི་ཉེན་རྟོག་མི་སྣས་ཐེངས་ འགར་རྩད་གཅོད་བྱས་ཀྱང་བྲོས་བྱོལ་བྱས་སྟབས་ལག་སོན་བྱུང་མི་འདུག་ཀྱང་། རྗེས་སུ་ལོ་བརྒྱ་རྨ་ཆུ་རྫོང་སྨད་མ་ཞང་ནས་འཛིན་བཟུང་གིས་རྔ་པ་རང་སྐྱོང་ཁུལ་གྱི་ལྟེ་གནས་འབར་ཁམས་ནས་ཟླ་བ་ཁ་ཤས་རིང་བཀག་ཉར་འོག་མནར་གཅོད་མང་པོ་མྱངས་མཐར། འབར་ཁམས་ནས་ལོ་ ༤ བཙོན་འཇུག་ཁྲིམས་ཐག་བཅད་དེ་སི་ཁྲོན་མེན་ཡང་བཙོན་ཁང་དུ་བསྐྱལ་ཡོད་འདུག
ཁོང་ལ་ཁྲིམས་ཐག་གཅོད་སྐབས་འབྲེལ་ཡོད་ནང་མི་སོགས་ལ་བརྡ་ལན་གང་ཡང་མ་སྤྲད་པར་ཁྲིམས་འཛིན་མི་སྣས་གང་འདོད་ལྟར་ཁྲིམས་ཐག་བཅད་ཡོད་འདུག ད་ལྟ་ཤུལ་དུ་ཁོང་གི་བཟའ་ཟླ་དང་ཕྲུ་གུ་ ༣ ། རྒས་གཅོང་ནད་མནར་འོག་ཡོད་པའི་བཟའ་ཟླའི་ཕ་མ་གཉིས་བཅས་ཡོད་འདུག
དེ་མིན་རྨ་ཆུ་རྫོང་སྨད་མ་ཞང་བྲག་ཐོ་རུ་ཆེན་གྱི་གྲུ་ཐོག་སྡེ་བའི་སུ་དྷི་ཚང་གི་བུ་ཚེ་རིང་༼གདུགས་ དཀར་༽ཡང་ལོ་བརྒྱ་དང་མཉམ་དུ་སྐབས་ཐོག་དེར་འཛིན་བཟུང་བྱས་ཏེ། རྗེས་སུ་རྔ་པ་རང་སྐྱོང་ཁུལ་གྱི་ལྟེ་གནས་འབར་ཁམས་ནས་ལོ་བརྒྱ་སྦས་སྐུང་བྱས་པའི་ཉེས་མིང་འོག་ལོ་ ༢ ཀྱི་བཙོན་འཇུག་ཁྲིམས་ཐག་བཅད་བཙོན་འཇུག་བྱས་ཡོད་ཀྱང་ཞིབ་ཕྲའི་གནས་ཚུལ་ཤེས་རྟོགས་མ་ཐུབ།
དེ་བཞིན། ལོ་བརྒྱ་དང་ཕ་མ་གཅིག་པའི་སྲིང་མོ་བྱམས་པ། རང་ལོ་ ༣༨ ཡིན་པ་ཁོ་མོ་དཔྱིད་གསར་དུས་ཆེན་ཉིན་འཛིན་བཟུང་གིས་ཟླ་བ་གཅིག་ལྷག་བཀག་ཉར་བྱས་རིང་གཅར་རྡུང་མནར་གཅོད་དྲག་པོ་བཏང་བར་བརྟེན། དེང་སྐབས་ད་རུང་དྲག་སྐྱེད་མ་བྱུང་བར་རང་ཁྱིམ་དུ་ནད་མནར་འོག་ལྷག་ཡོད་ཅིང་། ཁོ་མོར་ཕྲུ་གུ་ ༣ ཡོད། ལོ་བརྒྱ་དང་ཁོའི་སྲིང་མོ་བྱམས་པ་གཉིས་ཀྱི་ཕ་མིང་ལ་མཛུག་པོ་དང་། མ་མིང་ལ་རིག་ལི་བཅས་ཡིན་འདུག
འབར་ཁམས་ཁྲིམས་ཁང་གིས་ལོ་ ༤ ཡི་ཁྲིམས་ཐག་བཅད་དེ་སི་ཁྲོན་མེན་ཡཱང་བཙོན་ཁང་དུ་བཅུག་ཡོད་པའི་ལོ་བརྒྱ་ལགས།།
ད་ལོའི་ལོ་གསར་རྗེས་རྒྱ་གཞུང་གིས་འཛིན་བཟུང་བྱས་ཏེ་ཟླ་འགའི་རིང་གཅར་རྡུང་ཚད་མེད་བཏང་མཐར་ཀློད་གྲོལ་བཏང་ཡང་། ད་ལྟ་ནད་གཅོང་དུ་གྱུར་ཡོད་པའི་ལོ་བརྒྱ་ལགས་ཀྱི་ཕ་མ་གཅིག་པའི་སྲིང་མོ་བྱམས་པ།
གནས་ཚུལ་གཏོང་མཁན། གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་།
