གཟའ་ཕུར་བུའི་ཉིན་རྒྱ་གར་བྱང་ཤར་ཨ་སམ་ནང་གྲངས་ཉུང་མི་རིགས་གཉིས་བར་བསྐྱར་དུ་འཁྲུག་རྩོད་བྱུང་སྟེ། མི་མང་པོར་ཤི་རྨས་ཚབས་ཆེན་བཟོས་ཡོད་འདུག
དེ་རིང་ཞོགས་པ་རྒྱ་གར་བྱང་ཤར་ཨ་སམ་(Assam) མངའ་སྡེའི་ནུབ་ཁུལ་བྷག་སཱ་(Baksa) རྫོང་ཁོངས་སུ། ས་གནས་གྲངས་ཉུང་མི་རིགས་གཉིས་བར་བསྐྱར་དུ་འཁྲུག་རྩོད་བྱུང་ཡོད་ལ། སྐབས་དེར་ས་གནས་ཉེན་རྟོག་པ་དང་དམིགས་བསལ་དམག་དཔུང་གིས་མི་མང་སྟེང་མེ་མདའ་བརྒྱབ་སྟེ་འཁྲུག་རྩོད་འགོག་ཐབས་བྱས་ཡོད་སྟབས། བྷེ་ཇེ་བྷེའི་ཚོགས་གཙོ་ནེ་ཊེན་(Nitin Gadkari) གྱིས་མངའ་སྡེ་གཞུང་གི་བྱ་སྤྱོད་དེར་སྐྱོན་བརྗོད་དང་། འཁྲུག་རྩོད་དེའི་རྒྱབ་ལྗོངས་ན་རྒྱལ་ཁབ་གཞན་གྱི་ཐེ་ཇུས་ཡོད་ཚུལ་བརྗོད་འདུག
ཐེངས་འདིའི་འཁྲུག་རྩོད་དེ་ནི་ཉེ་སྔོན་ཤི་རྨས་ཚབ་ཆེན་གྱི་འཁྲུག་རྩོད་ལ་གཞུང་གིས་ཞི་འཇགས་བཏང་སྟེ། མི་མང་རྣམས་སོ་སོའི་ནང་དུ་འགྲོ་དགོས་པའི་དུས་ཆད་རྫོགས་རྗེས་ཀྱི་ཉིན་གཉིས་པར་བྱུང་ཡོད་ལ། འཁྲུག་རྩོད་ཀྱི་ཐོག་མའི་བྱུང་རྐྱེན་ནི། ཟླ་སྔོན་མའི་ནང་ངོ་ཐག་མ་ཆོད་པའི་མི་ཁག་ཅིག་གིས་བྷོ་ཌོ་(Bodo) གྲངས་ཉུང་མི་རིགས་ཡིན་པའི་གཞོན་སྐྱེས་ ༤ དམར་གསོད་བཏང་པའི་གནས་ཚུལ་བྱུང་སྟབས། ཟླ་སྔོན་མའི་ཚེས་ ༢༠ ཉིན་ཨ་སམ་མངའ་སྡེའི་ཀོག་རཱ་ཇར་(Kokrajhar) དང་ཆེ་རང་(Chirang) རྫོང་གཉིས་ནང་། བྷོ་ཌོ་བ་ཚོས་གོང་གི་དོན་རྐྱེན་དེ་ས་གནས་ཁ་ཆེ་བ་ཚོ་དང་འབྲེལ་བ་ཡོད་པར་བརྗོད་དེ། ཁ་ཆེ་བ་ཚོར་དྲག་རྒོལ་བྱས་པ་ནས་ས་གནས་གྲངས་ཉུང་མི་རིགས་གཉིས་བར་གྱི་རྩོད་རྙོག་ཅིག་ཏུ་གྱུར་ཡོད།
ཟླ་འདིའི་ཕྱི་ཚེས་ ༡༣ ཉིན་ ༧གོང་ས་མཆོག་གིས་ཨ་སམ་མངའ་སྡེའི་ནང་འཁྲུག་ཟིང་དམར་གསོད་ཀྱི་དོན་རྐྱེན་ལ་ཐུགས་ཕམ་ཡོད་པའི་བཀའ་གནང་ཡོད་པ་མ་ཟད། རྒྱ་གར་མི་མང་གིས་ངེས་པར་དུ་ཆོས་ལུགས་འཆམ་མཐུན་དང་འཚེ་མེད་ཞི་བའི་ལྟ་གྲུབ་ཉམས་ལེན་བྱ་དགོས་པ་དང་། རྒྱ་གར་ནི་ལོ་ངོ་སྟོང་ཕྲག་རིང་འཚེ་མེད་ཞི་བ་དང་ཆོས་ལུགས་འཆམ་མཐུན་གྱི་རིག་གཞུང་ལྡན་པའི་རྒྱལ་ཁབ་ཅིག་ཡིན་པ་དེ། ཚང་མས་ངེས་ཤེས་དང་ཉམས་ལེན་བྱ་དགོས་སྐོར་གསུངས་འདུག
ཨ་སམ་ནང་གི་རྩོད་རྙོག་དེ་རིམ་བཞིན་བྷང་ལོར་དང་པུ་ནེ། མོམ་བྷའེ་སོགས་རྒྱ་གར་གྱི་གྲོང་ཁྱེར་གཞན་ཁག་ནང་ཁྱབ་སྟེ་ཤི་རྨས་ཀྱི་འཁྲུག་རྩོད་རིགས་བྱུང་ཡོད་པ་དང་། ད་སྔ་འཁྲུག་རྩོད་ཀྱི་རྐྱེན་པས་མི་ ༧༧ ཙམ་དམར་གསོད་ཐེབས་ཡོད་ལ།ཨ་སམ་ནང་འཁྲུག་རྩོད་བྱུང་ཡུལ་ས་གནས་ཁག་ནས་ཡུལ་མི་ ༤༠༠༠༠༠ ཙམ་ས་གནས་དང་གྲོང་ཁྱེར་གཞན་དག་ནང་བྲོས་བྱོལ་དུ་ཕྱིན་ཡོད་འདུག
ཨ་སམ་མངའ་སྡེ་མི་འབོར་སྤྱིའི་བརྒྱ་ཆ་ ༥ ལྷག་བྷོ་ཌོ་གྲངས་ཉུང་མི་རིགས་ཆགས་ཡོད་པ་དང་། མངའ་སྡེ་ནང་བྷོ་ཌོ་གྲངས་ཉུང་མི་རིགས་ས་ཡ་ ༡།༢ ཡོད་པའི་ཁྲོད་བརྒྱ་ཆ་དགུ་བཅུ་ཧིན་རྡི་དང་། ལྷག་མ་རྣམས་ཡི་ཤུ་དང་གདོད་མའི་ཆོས་ལུགས་ལ་དད་མོས་བྱེད་མཁན་ཆགས་ཡོད་འདུག
གསར་འགོད་པ། བནྡེ་སྐྱབས།
ཟེར་འགོད་པ་ལ་ཞུ་རྒྱུ། བྷོ་ཌོ་གྲངས་ཉུང་མི་རིགས་ལ་མི་འབོར་ས་ཡ་ ༡།༢ ཡོད་པ་དེ་ཁ་ཆེ་རེད་དམ། ད་ལྟ་རྩོད་གཞི་འདི་རྒྱ་གར་ལྷོ་ཕྱོགས་ཁ་ཆེ་ཚོའི་བར་ཡང་ཁྱབ་ཡོད་སྐད། འདྲ་དཔར་འདིའི་ནང་ན་ཁ་ཆེ་རེ་གཉིས་མཐོང་བཞིན་འདུག འདི་གང་ཡིན་ནམ།