ཉེ་ཆར་པའོ་ཞིས་ལའེ་ཡི་དམར་ཤོག་ཚོགས་མིའི་ཐོབ་ཐང་ཕྱིར་བསྡུ་བྱས་ཡོད་པ་དང་། དེ་ནི་པའོ་ལ་ཉེས་ཁྲིམས་གཅོད་རྒྱུའི་སྔ་ལྟས་ཡིན་པར་བརྗོད།
ཟླ་འདིའི་ཕྱི་ཚེས་ ༢༦ ཉིན་ཉི་ཧོང་དང་ཀོ་རུ་ཡའི་གསར་འགྱུར་ཚགས་པར་གྱིས་གནས་ཚུལ་སྤེལ་པ་ལྟར་ན། པའེ་ཏའེ་ཧི་ཚོགས་འདུའི་ཐོག་རྒྱ་གཞུང་དམར་ཤོག་རྒྱུན་ལས་དཔོན་རིགས་ཚོས། དེ་སྔའི་རྒྱ་ནག་ཁྲུང་ཆིན་གྲོང་ཁྱེར་དམར་ཤོག་དྲུང་ཆེ་པའོ་ཞིས་ལའེ་ཡི་དམར་ཤོག་ཚོགས་མིའི་ཐོབ་ཐང་ཕྱིར་བསྡུ་བྱ་རྒྱུ་ཐག་གཅོད་བྱུང་ཡོད་པ་མ་ཟད། ད་ལྟ་པའོ་ཡི་རྒྱ་ནག་རྒྱལ་ཡོངས་མི་དམངས་འཐུས་མིས་ཐོབ་ཐང་ཡང་ཕྱིར་བསྡུ་བྱ་འཆར་ཡོད་འདུག
སྲིད་དོན་དབྱེ་ཞིབ་པ་དག་གིས། སྤྱིར་དམར་ཤོག་ཚོགས་མིའི་ཁྲོད་ནས་ཕྱིར་ཕུད་པ་དེ་ནི་རྒྱ་གཞུང་དམར་ཤོག་སྒྲིག་འཛུགས་ཀྱི་ཉེས་པ་ཚབས་ཆེན་གྱི་གྲས་ཡིན་སྟབས། པའོ་ཞིས་ལའེ་ལ་བཙོན་འཇུག་ཁྲིམས་ཐག་གཅོད་རྒྱུ་ཡིན་པའི་རྣམ་འགྱུར་ཅིག་ཡིན་པའི་ངོས་འཛིན་བྱ་བཞིན་ཡོད་འདུག པེ་ཅིན་གྱི་རང་དབང་གསར་འགོད་པ་ཀའོ་ཡུས་ཀྱིས། “པའོ་ཞིས་ལའེ་དམར་ཤོག་ཚོགས་མི་ནས་ཕྱིར་ཕུད་བྱས་པ་དེས། ཁོ་ལ་བཙོན་འཇུག་ཉེས་ཁྲིམས་གཅོད་རྩིས་ཡོད་གསལ་པོ་རེད། ཡིན་ནའང་། ཁྲིམས་བཤེར་གོ་རིམ་ཁྲོད་མུ་མཐུད་རྙོག་ཟིང་ཆེན་པོ་ལྷག་སྲིད་སྟབས། རྒྱ་གཞུང་གིས་སྐབས་ ༡༨ ཚོགས་འདུའི་རྗེས་ལ་སྣུར་སྲིད་པ་རེད།” ཅེས་བརྗོད་ཡོད་པ་རེད།
དེ་བཞིན། རྒྱ་ནག་མཐོ་རིམ་དཔོན་རིགས་ཚོར་འབྲེལ་ཡོད་ཀྱི་མི་སྣ་ཞིག་གིས་གསར་ལམ་ཁག་ཏུ། ཉེ་སྔོན་པའེ་ཏའེ་ཧི་ཚོགས་འདུའི་སྐབས། ཅཱང་ཙེ་མཱིན་ཤོག་ཁག་གིས་པའོ་ཞིས་ལའེ་ལ་ཉེས་པ་ནན་མོ་གཅོད་རྒྱུར་ངོ་རྒོལ་བྱས་ཡོད་ཀྱང་། ཧུའུ་ཅིན་ཐའོ་གཙོས་ཐཱུན་ཤོག་ཁག་གི་ཁ་གཏད་གཅོག་ཐུབ་མེད་པ་མ་ཟད། སྐབས་བཅོ་བརྒྱད་པའི་དམར་ཤོག་དཔོན་རིགས་གསར་བ་འདེམས་སྒྲིག་འཐབ་རྩོད་ཁྲོད་དུའང་། ཐཱུན་ཤོག་ཁག་གིས་སྟོབས་ཤུགས་ཆེ་ཤོས་འཛིན་ཐུབ་ཡོད་པ་དང་། སྐབས་ ༡༨ ཚོགས་འདུ་མ་ཚོགས་སྔོན་གྱི་རྒྱ་གཞུང་དབུས་དམར་ཤོག་འཐུས་མིའི་ཚོགས་འདུའི་ཐོག ཐོག་གཅོད་དེ་དག་ཕྱིར་བསྒྲགས་བྱ་རྒྱུ་ཡིན་སྐོར་བརྗོད་ཡོད་འདུག
