ཟླ་འདིའི་ཕྱི་ཚེས་ ༢༩ ཉིན་གཞིས་ཀ་རྩེ་བཀག་ཉར་ཁང་གིས། རྒྱ་གར་ནང་ལོ་ཤས་རིང་སློབ་སྦྱོང་བྱས་རྗེས་ཕྱིར་འགྲམ་བརྒྱུད་དེ་བོད་ནང་ལོག་མཁན་གྱི་བོད་མི་ ༡ དང་། འདི་ལོའི་ལོ་མགོར་དུས་འཁོར་དབང་ཆེན་ཞུས་པ་དང་། རྒྱ་གར་དང་བལ་ཡུལ་གྱི་གནས་ཆེན་ཁག་ལ་མཇལ་རྗེས། ཤར་ཁུམ་བུ་བརྒྱུད་བོད་ནང་ལོག་མཁན་གྱི་བོད་མི་ ༡༠ བཅས་ཁྱོན་མི་ ༡༡ ། འགྲམ་དང་ནང་པ་ལ་མཐའ་མཚམས་དམག་མིས་འཛིན་བཟུང་བྱས་རྗེས་གཞིས་རྩེར་བཀག་ཉར་ཁང་དུ་རྩིས་སྤྲོད་ཀྱིས། ཟླ་ ༣ དང་ཉིན་ ༡༥ རིང་ངལ་རྩོལ་བསྒྱུར་བཀོད་བྱས་པ་དང་ཁོང་ཚོའི་ལག་འཁྱེར་ཆ་ཚང་གཞུང་བཞེས་བཏང་རྗེས། ཉེ་ལམ་ཕྱིར་བལ་ཡུལ་ནང་ཕྱིར་ཕུད་བཏང་ཡོད་འདུག
ཐེངས་འདིར་རྒྱ་ནག་གཞུང་གིས་ཕྱིར་ཕུད་བྱས་པའི་བོད་མི་དེ་དག་དིང་རི་རྫོང་ཁོངས་ཀྱི་གྲོང་གསེབ་ཁག་ཅིག་ནས་ཡིན་འདུག་ལ། ཕྱི་ཚེས་ ༣༠ ཉིན་ཁོང་ཚོ་བལ་ཡུལ་གྱི་ཧུའུ་རོང་ཞེས་པའི་འགྲོ་བ་མིའི་ཐོབ་ཐང་ཚོགས་པ་དང་། མཉམ་འབྲེལ་རྒྱལ་ཚོགས་སྐྱབས་བཅོལ་ལྟ་རྟོག་ལས་ཁུངས་བཅས་ཀྱིས་རོགས་རམ་འོག བལ་ཡུལ་བོད་མི་སྣེ་ལེན་ཁང་དུ་རྩིས་སྤྲོད་བྱས་ཡོད་ཀྱང་། ཁོང་ཚོ་མང་ཆེ་བ་བོད་ནང་གཏན་སྡོད་བྱེད་མཁན་ཡིན་པ་དང་། དེའི་ཁྲོད་ཀྱི་བོད་མི་ ༦ ལ་བོད་ནང་བཟའ་ཟླ་བུ་ཕྲུག་ཡང་ཡོད་སྟབས། ད་ལྟའི་ཆར་ཕྱིར་བོད་ནང་ལོག་མ་ཐུབ་པའི་དཀའ་ངལ་ནང་ལྷུང་ཡོད་འདུག
གནས་ཚུལ་ཤེས་རྟོགས་བྱུང་བྱ་ལྟར་ན། འདི་ལོའི་ལོ་མགོ་ནས་བཟུང་རྒྱ་གཞུང་གིས་རྒྱ་གར་དང་བལ་ཡུལ་ནང་གཉེན་འཕྲད་ཡོང་སྟེ་ཕྱིར་ལོག་མཁན་གྱི་བོད་མི་ཚོ་གང་བྱུང་འཛིན་བཟུང་བཀག་ཉར་བྱས་ཡོད་པ་མ་ཟད། ཟླ་འདིའི་ཕྱི་ཚེས་ ༢༣ ཉིན་རྒྱ་གར་དང་བལ་ཡུལ་ནང་གཉེན་འཕྲད་དུ་ཡོང་སྟེ། ཕྱིར་བོད་ནང་ལོག་མཁན་གྱི་བོད་མི་ ༥ ལྷ་རྩེ་དང་དིང་རི། འགྲམ་བཅས་ས་གནས་ཁག་ཏུ་འཛིན་བཟུང་གིས། ཟླ་བ་ ༤ ལྷག་རིང་གཞིས་ཀ་རྩེར་བཀག་ཉར་བྱས་རྗེས་ཕྱིར་བལ་ཡུལ་ནང་ཕྱིར་ཕུད་བྱས་ཡོད།
གསར་འགོད་པ། དོན་གོ
་་་་་ཁྱོན་མི་ ༡༡ ། འགྲམ་དང་ནང་པ་ལ་མཐའ་མཚམས་དམག་མིས་འཛིན་བཟུང་བྱས་རྗེས་གཞིས་རྩེར་བཀག་ཉར་ཁང་དུ་རྩིས་སྤྲོད་ཀྱིས། ཟླ་ ༣ དང་ཉིན་ ༡༥ རིང་ངལ་རྩོལ་བསྒྱུར་བཀོད་བྱས་པ་དང་ཁོང་ཚོའི་ལག་འཁྱེར་ཆ་ཚང་གཞུང་བཞེས་བཏང་རྗེས། ཉེ་ལམ་ཕྱིར་བལ་ཡུལ་ནང་ཕྱིར་ཕུད་བཏང་ཡོད་འདུག ་་་ཟེར་ན།
ག་རེ་ཟེར་བགྱིད་ཡོད་རེད། དེ་ཚོའི་རིགས་ཀྱི་ལག་འཁྱེར་ངོ་བཤུས་འཁྱེར་ནས་རྒྱ་གཞུང་ལ་ཁྲིམས་རྩོད་བྱེད་ཐུབ་པ་དགོས། དེ་ནི་བཙན་བྱོལ་སྒྲིག་འཛུགས་དང་གཞོན་ནུ་ཚོགས་པ་སོགས་ཀྱིས་ཀྱང་མི་འཇོན་པ་ཨ་ཡོད་སྙམ་ལགས། །