ཉེ་ཆར་བྷེལ་ཇམ་ནང་གི་སྨད་རྒྱུད་གྲྭ་རྒྱུན་ཚོའི་གོ་སྒྲིག་འོག ཨན་ཁྲི་ཝར་ཕན་གྲོང་ཁྱེར་དཔེ་མཛོད་ཁང་དུ་བསྔོ་སྨོན་ཚོགས་མཆོད་ཅིག་གནང་ཡོད་འདུག
དེ་རིང་ས་དཀར་བཀྲ་ཤིས་ལགས་ཀྱིས་གནས་ཆུལ་བཏང་འབྱོར་བྱུང་བར། ཟླ་སྔོན་མའི་ཕྱི་ཚེས་ ༣༡ ཉིན་ཡུ་རོབ་རྒྱལ་ཁབ་བྷེལ་ཇམ་དུ་གནས་སྡོད་སྨད་རྒྱུད་གྲྭ་རྒྱུན་ཐུན་མོང་གི་གོ་སྒྲིག་འོག བོད་རིགས་འདུས་སྡོད་མང་ཤོས་ཡོད་པའི་ཨན་ཁྲི་ཝར་ཕན་གྲོང་ཁྱེར་དཔེ་མཛོད་ཐོག་ཁང་དུ་སྐྱབས་གནས་དགེ་འདུན་པ་ཁག་ཅིག་དབུ་བཞུགས་ཐོག སྦར་སིལ་དོན་གཅོད་དངོས་གྲུབ་རྡོ་རྗེ་ལགས་གཙོས་ས་གནས་བོད་རིགས་ཚོགས་པའི་རྒྱན་ལས་དང་མང་ཚོགས་ ༢༠༠ ཙམ་ལྷན་འཛོམས་ཀྱིས་བསྔོ་སྨོན་མཆོད་འབུལ་དང་། མཛད་སྒོའི་སྟེང་སྐུ་ཚབ་དོན་གཅོད་ལགས་ཀྱིས་སྨད་རྒྱུད་གྲྭ་རྒྱུན་ཐུན་མོང་གིས་དཔར་སྐྲུན་བྱས་པའི་ ༼རིས་མེད་ཐུབ་བསྟན་རྒྱས་བའི་ཞལ་འདོན་ཕྱོགས་སྒྲིག་༽ཅེས་པའི་དཔེ་དེབ་དབུ་འབྱེད་གནང་འདུག
གོ་སྒྲིག་པས་བརྗོད་པ་ལྟར་ན། མཆོད་འབུལ་དེ་ནི་བོད་ནང་རང་གི་ཚེ་སྲོག་མཆོད་འབུལ་གནང་གི་ཡོད་པར་བརྟེན། དམ་པ་ཁོང་རྣམ་པའི་མཛད་རྗེས་ལ་རིན་ཐང་ཆེན་པོས་དྲན་གསོ་དང་། གདུང་སེམས་མཉམ་སྐྱེད། བོད་མིའི་སྐྱིད་སྡུག་མཉམ་མྱོང་། འདས་གསོན་གཉིས་ལ་ཕན་ཆེད་གོ་སྒྲིག་བྱས་པ་ཞིག་ཡིན་སྐོར་གསལ་ཡོད་འདུག
གསར་འགོད་པ། བནྡེ་སྐྱབས།
