གཟའ་ཟླ་བའི་ཉིན་འབར་མའི་དམངས་གཙོ་དོན་གཉེར་བ་ལྕམ་ཨང་སན་སུའུ་ཀེས་ལོ་བཅུ་ཕྲག་གཉིས་ལྷག་གི་རྗེས་ཀྱི་ཨ་རིའི་གཟིཊ་སྐོར་ཐོག་མ་དེ་གནང་ཡོད་འདུག
ཕྱི་ཚེས་ ༡༧ ཉིན་འབར་མའི་དམངས་གཙོ་དོན་གཉེར་པ་ལྕམ་ཨང་སན་སུའུ་ཀེ་བཟང་བཙོན་ནས་གློད་གྲོལ་ཐོབ་རྗེས་ཐེངས་དང་པོར་ཨ་རིའི་ནང་གཟིཊ་སྐོར་དུ་ཕེབས་ཡོད་པ་དང་། ཐེངས་འདིར་ཉིན་གྲངས་ ༡༧ རིང་ཁོང་མོ་ཨ་རིའི་སྐོར་སྐྱོད་ཀྱིས་ཨ་རིའི་རྒྱལ་དོན་དྲུང་ཆེ་ཧེ་ལཱ་རེ་ཐུགས་གནང་འཕྲད་དང་། སྲིད་འཛིན་ཨོ་བྷ་མར་ཡང་ཐུག་འཕྲད་གནང་འཆར་ཡོད་འདུག
དེ་རིང་ཕྱི་ཚེས་ ༡༩ ཉིན་ལྕམ་ཨང་སན་སུའུ་ཀེ་ཡིས་ཨ་རིའི་གྲོས་ཚོགས་གསེར་གྱི་རྟགས་མ་འབུལ་བཞེས་གནང་ཡོད་པ་དང་། གཟའ་མིག་དམར་ཉིན་ཁོང་ཨ་རིའི་རྒྱ་དོན་དྲུང་ཆེ་དང་མཇལ་འཕྲད་སྐབས། ཁོ་མོས་འབར་མ་དང་ཨ་རིའི་འབྲེལ་ལམ་ཟབ་ཏུ་གཏོང་དགོས་པ་དང་། ད་ཆར་འབར་མའི་མང་ཚོགས་ཀྱིས་སོ་སོའི་མངོན་འདོད་སྒྲུབ་རྒྱུར་ནུས་པ་འདོན་བཞིན་ཡོད་སྟབས། ཨ་རིའི་གཞུང་གིས་འབར་མར་སྤྲད་པའི་འགོག་རྐྱེན་ཕྱིར་འཐེན་བྱ་རྒྱུའི་འབོད་སྐུལ་ཞུས་འདུག་ལ། རྒྱལ་དོན་དྲུང་ཆེ་ཧེ་ལཱ་རེ་ཡིས་ཀྱང་འབར་མའི་གཞུང་དང་ཁ་གཏད་ཚོགས་པ་གཉིས་ཕན་ཚུན་མཉམ་འབྲེལ་ཐོག་རྒྱལ་ཁོངས་ཆིག་སྒྲིལ་དང་། འདས་ཟིན་པའི་ཞེ་འཁོན་མེད་མར་བཟོས་ཏེ། འབར་མའི་བཅོས་སྒྱུར་ལ་ཤུགས་གནོན་རྒྱག་དགོས་པར་བརྗོད་འདུག
ལྕམ་ཨང་སན་སུའུ་ཀེ་ནི་ལོ་ ༢༠ ཙམ་གྱི་རིང་འབར་མའི་གཞུང་གིས་བཟང་བཙོན་དུ་བཅུགས་ཡོད་ཅིང་། ལོ་སྔོན་མར་ཁོང་གི་དམངས་གཙོ་ཚོགས་པའི་གྲོས་ཚོགས་འོས་བསྡུའི་རྒྱལ་ཁ་ཐོབ་རྗེས་གྲོས་ཚོགས་ཀྱི་འཐུས་མིར་འོས་འདེམས་བྱུང་ཡོད།
གསར་འགོད་པ། བནྡེ་སྐྱབས།
ང་ཚོ་བོད་ཀྱི་ཨང་སན་སུའུ་ཀེ་ལ། སུ་འདེམས་འོས་སམ། །ཁོང་ནི་དངོས་གནས་བློས་གཏོང་དང་དཔའ་མོ་མ་རེད་པེ། ལགས།
ལྷ་ལྕམ་མཆོག་ལ་བཀྲ་ཤིས་བདེ་ལེགས་གྲངས་མེད་ཡོད།