གཟའ་མིག་དམར་ཉིན་ཨ་རིའི་མངའ་སྡེ་ཨོ་ཧེའོ་ཡི་ནང་། ཨ་རིའི་སྲིད་འཛིན་འོས་མི་གཉིས་ཀྱིས་ཉིན་ཧྲིལ་བོར་སྲིད་འཛིན་འོས་བསྡུའི་གཏམ་བཤད་ལས་འགུལ་ཚ་ཚ་འུར་འུར་སྤེལ་འདུག
ཕྱི་ཚེས་ ༢༦ ཉིན་ཨ་རིའི་མངའ་སྡེ་ཨོ་ཧེའོ་(Ohio) ཡི་ནང་ཨ་རིའི་སྲིད་འཛིན་འོས་མི་ལས་ཐོག་སྲིད་འཛིན་ཨོ་བྷ་མ་དང་། སྤྱི་མཐུན་ཚོགས་པའི་འོས་མི་རོམ་ནའེ་གཉིས་ཀྱིས་སླེབས་ལ་ཉེ་བའི་སྲིད་འཛིན་འོས་བསྡུའི་སྐོར་ལ། སོ་སོའི་ས་ནས་ཉིན་ཧྲིལ་བོར་སྐོར་སྐྱོད་ཀྱིས་གཏམ་བཤད་ལས་འགུལ་ཚ་ཚ་འུར་འུར་ཞིག་སྤེལ་ཡོད་པ་དང་། ཉིན་དེའི་གཏམ་བཤད་ལས་འགུལ་ཐད་ནས་གསར་ཁང་མང་པོ་ཞིག་གིས་མངའ་སྡེའི་མང་ཚོགས་ཁྲོད་འོས་མི་སུ་ལ་རྒྱབ་སྐྱོར་ཡོད་མེད་ཀྱི་བསམ་ཚུལ་བསྡུས་པའི་ནང་། གསར་ཁང་ཁག་གི་བསམ་ཚུལ་ཆ་སྙོམས་ལས་ཨོ་བྷ་མར་བརྒྱ་ཆ་ ༩ མང་པ་ཐོབ་ཡོད་འདུག
ཨོ་ཧེའོ་མངའ་སྡེ་ནང་འོས་བསྡུའི་འཐུས་ཚོགས་(electoral college) ༡༨ ཡོད་འདུག་ལ། ད་སྔའི་ཨ་རིའི་སྲིད་འཛིན་འོས་བསྡུ་དག་གི་བྱུང་རིམ་ནང་ཨོ་ཧེའོ་མངའ་སྡེའི་ནང་གི་རྒྱལ་ཕམ་ནི་མཐའ་མའི་ཁྱོན་ཡོངས་ཀྱི་སྲིད་འཛིན་འོས་བསྡུའི་རྒྱལ་ཕམ་ཞིག་ཏུ་འགྱུར་བཞིན་ཡོད་སྟབས། ཨོ་བྷ་མ་ལོ་འདིའི་ནང་ཨོ་ཧེའོ་མངའ་སྡེ་ནང་ཐེངས་ ༡༣ ཙམ་དང་། རོམ་ནའེ་ཐེངས་ ༡༠ ལ་སྐོར་སྐྱོད་བྱས་ཡོད་འདུག
ད་ཆར་ཨོ་ཧེའོ་མངའ་སྡེའི་དཔལ་འབྱོར་གྱི་གནས་བབ་ཅུང་འཕེལ་རྒྱས་དང་། སྤྱིར་ཨ་རིའི་རྒྱལ་ཡོངས་ཀྱི་ལས་མེད་བརྒྱ་ཆ་ ༨།༣ ཡིན་ཡང་། ཨོ་ཧེའོ་མངའ་སྡེའི་ནང་གི་ལས་མེད་ནི་བརྒྱ་ཆ་ ༧།༢ ལ་མར་ཆག་ཡོད་པ་བཅས་ཀྱིས། མངའ་སྡེའི་མི་མང་གིས་ཨོ་བྷ་མར་ཅུང་དགའ་བོ་བྱེད་ཀྱི་ཡོད་འདུག
གསར་འགོད་པ། བནྡེ་སྐྱབས།
