ད་ནངས་བོད་རང་བཙན་སློབ་ཕྲུག་ཚོཊ་པ་དང་ངྷ་ས་ས་གནས་གཞོན་ནུ་གཉིས་ཀྱིས། རྒྱ་ནག་མགོ་ཁྲིད་གསར་པ་ཞི་ཅིན་ཕིན་གྱིས་མ་འོངས་པར་བོད་དོན་ཐག་གཅོད་དགོས་པའི་གསལ་འདེབས་ཀྱི་ལས་འགུལ་ཞིག་སྤེལ་སོང་།
དེ་རིང་ཕྱི་ཚེས་ ༣ ཉིན་གྱི་སྔ་དྲོའི་ ༡༡།༣༠ ཐོག་བོད་རང་བཙན་སློབ་ཕྲུག་ཚོགས་པ་དང་ངྷ་ས་ས་གནས་གཞོན་ནུ་ཐུན་མོང་གི་གོ་སྒྲིག་འོག བཞུགས་སྒར་ངྷ་རམ་ས་ལའི་ཁྲོམ་གཞུང་དུ་མ་འོངས་རྒྱ་ནག་སྲིད་འཛིན་ཞི་ཅིན་ཕིན་གྱི་སྣང་བརྙན་འཁྲབ་སྟོན་དང་། འདི་ལོའི་ཕྱི་ཟླ་ ༡༡ པའི་ཚེས་ ༨ ཉིན་ནས་རྒྱ་ནག་དམར་ཤོག་ཚོགས་པའི་ཚོགས་ཆེན་ཐོག་དཔོན་རིགས་བརྗེ་བསྒྱུར་བྱས་ཏེ། ཞི་ཅིན་ཕིན་རྒྱ་ནག་གི་དཔོན་རིགས་ཐེངས་ལྔ་བར་བསྐོ་བཞག་གཏན་ཁེལ་བྱུང་ཡོད་པ་ལྟར། མ་འོངས་པར་ཁོས་རྒྱ་ནག་གཞུང་གིས་མི་ལོ་ ༦༠ ཉེ་བའི་རིང་བོད་ཐོག་མཁྲེགས་འཛིན་གྱི་སྲིད་ཇུས་ལག་བསྟར་བྱས་ཏེ། བོད་མི་མང་པོ་འཛིན་བཟུང་དང་བཙོན་འཇུག དམར་གསོད་བཏང་བ། བོད་མི་མང་པོ་ཞིག་གིས་རང་ལུས་མེར་བསྲེགས་གཏོང་དགོས་པའི་ཛ་དྲག་གི་གནས་སྟངས་ཆགས་ཡོད་པའི་དཀའ་ངལ་ཐོག་མར་སེལ་རྒྱུ་དང་། རྒྱ་ནག་གིས་བོད་ཐོག་འཛིན་པའི་ནོར་འཁྲུལ་ཅན་གྱི་སྲིད་ཇུས་ལ་བསྐྱར་ཞིབ་བྱས་ཏེ། ཞི་བ་དང་གྲོས་མོལ་གྱི་ལམ་ནས་བོད་དོན་མྱུར་དུ་ཐག་གཅོད་བྱ་དགོས་པའི་སྐོར་གྱི་གསལ་འདེབས་ལས་འགུལ་ཞིག་སྤེལ་སོང་།
ལས་འགུལ་ཐོག་བོད་རང་བཙན་སློབ་ཕྲུག་ཚོགས་པའི་ཚོགས་མི་འཇིཊ་བྲལ་ལགས་ཀྱིས། དབྱིན་ཡིག་གི་ལམ་ནས་ཐེངས་འདིའི་ལས་འགུལ་ཀྱི་སྐོར་གསར་འགོད་གསལ་བསྒྲགས་གནང་བ་དང་། བོད་རང་བཙན་སློབ་ཕྲུག་ཚོགས་པའི་ས་གནས་ཚོགས་གཙོ་རྡོ་རྗེ་ཚེ་བརྟན་ལགས་ཀྱིས། ས་གནས་མི་དམངས་དང་ལས་འགུལ་བར་ཧིན་བོད་གཉིས་ཀྱི་ལམ་ནས་ལས་འགུལ་ངོ་སྤྲོད་ཀྱི་གཏམ་བཤད་གནང་རྗེས། བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་ཐེངས་འདིའི་ལས་འགུལ་དེ་ནི། ཟླ་རྗེས་མའི་ནང་འཚོགས་འཆར་ཡོད་པའི་རྒྱ་ནག་དམར་ཤོག་ཚོགས་པའི་ཚོགས་ཆེན་ཐོག ཞི་ཅིན་ཕིན་རྒྱ་ནག་གི་མགོ་ཁྲིད་བསྐོ་བཞག་གནང་གཏན་ཁེལ་ཡོད་པའི་སྐབས་འདིར། སྔོན་བརྡའི་ཚུལ་དུ་ཁོ་རྒྱ་ནག་གི་མགོ་ཁྲིད་ཆགས་སྐབས་ཐོག་མར་བོད་ཀྱི་གནད་དོན་ཐག་གཅོད་བྱ་དགོས་པའི་བརྡ་ལན་སྤྲོད་ཀྱི་ཡོད་སྐོར་དང་། གལ་སྲིད། མ་འོངས་པར་ཁོང་མགོ་ཁྲིད་ཆགས་སྐབས་བོད་དོན་ཐག་གཅོད་མ་བྱས་པ་ཡིན་ན། ཁོང་གི་སྲིད་འཛིན་གྱི་ལས་དོན་ལ་དཀའ་ངལ་དང་འགོག་རྐྱེན་མང་པོ་ཞིག་འཕྲད་སྲིད་སྐོར་སོགས་ཀྱི་གཏམ་བཤད་བཅས་གནང་སོང་།
ཐེངས་འདིའི་གཞུང་འབྲེལ་མིན་པའི་ཚོགས་པ་གཉིས་ཀྱི་གོ་སྒྲིག་བྱས་པའི་ལས་འགུལ་དེ། བཞུགས་སྒར་ངྷ་རམ་ས་ལ་གཙོས་ཡུ་རོབ་རྒྱལ་ཁབ་ཁག་དང་ཨ་རི། ཨོ་སི་ཊོ་ལི་ཡ་བཅས་ས་གནས་ཁག་མང་པོའི་ནང་ཡོད་པའི་བོད་རིགས་དང་། བོད་དོན་རྒྱབ་སྐྱོར་ཚོགས་པ་ཚང་མས་ཉིན་བརྒྱ་དུས་གཅིག་ཏུ་སྤེལ་གྱི་ཡོད་འདུག་ལ། དེ་རིང་རྒྱ་གར་གྱི་ཉིན་རྒྱབ་ཆུ་ཚོད་ ༢ པ་དང་། རྒྱ་ནག་གི་ཕྱི་དྲོའི་ཆུ་ཚོད་ ༥ བའི་ཐོག་དྲ་རྒྱའི་བརྒྱུད་ལམ་ནས་དམིགས་བསལ་གསར་འགོད་གསལ་བསྒྲགས་ཤིག་སྤེལ་གྱི་ཡོད་འདུག
གསར་འགོད་པ། དོན་གོ
