ཞི་བའི་འཐབ་རྩོད་དང་ཞི་བའི་གོམ་བགྲོད་ཀྱི་ཁྱད་པར་གླེང་།
ངའི་བསམ་བློ་ཡུན་རིང་བཏང་བ་ལས་ཐོན་པའི་ཞི་བའི་འཐབ་རྩོད་ཀྱི་བསྐོར་ལ། དེ་སྔ་ཡང་བསམ་ཚུལ་ཁ་ཤས་སྤྱི་ཚོགས་ནང་དུ་སྤེལ་མྱོང་ན་ཡང་། དུས་ད་ལྟ་ཡང་བོད་མི་ཆེས་མི་ཉུང་བ་ཞིག་གིས་ངའི་ཞི་བའི་འཐབ་རྩོད་དང་ཞི་བའི་གོམ་བགྲོད་བར་གྱི་ཁྱད་པར་ཤེས་ཀྱི་མེད་པའི་བསམ་ཚུལ་ཡང་ཡང་གོ་རྒྱུ་འདུག་པར་བརྟེན། སླར་ཡང་ངས་འདི་ནས་ཞི་བའི་འཐབ་རྩོད་དང་ཞི་བའི་གོམ་བགྲོད་བར་གྱི་ཁྱད་པར་ངོ་སྤྲོད་ཅིག་བྱས་ན་བསམ་བྱུང་། ཞི་བའི་གོམ་བགྲོད་ནི། ཞི་བའི་འཐབ་རྩོད་ཀྱི་སྡེ་ཚན་བྱེ་བྲག་བ་ཞིག་ཆགས་ཡོད། སྡེ་ཚན་འདི་ལ་ཞུགས་པ་ནི། ཞི་བའི་འཐབ་རྩོད་ཁྲོད་ཀྱི་ཆ་ཤས་ཤིག་བླངས་པ་མ་གཏོགས། ཞི་བའི་འཐབ་རྩོད་ལ་དངོས་སུ་ཞུགས་མེད་པ་རེད། དཔེར་ན། ངའི་བརྩེ་བའི་མ་ལོ་དང་ནུ་མོ་གཉིས་ལྟ་བུ་རེད། ཁོ་གཉིས་ཞི་བའི་གོམ་བགྲོད་ལ་ཞུགས་པ་ལས་ཞི་བའི་འཐབ་རྩོད་ལ་ཞུགས་མེད་པ་ནི། ཞི་བའི་གོམ་བགྲོད་ལ་བར་ཆད་བྱུང་བ་དང་མཚམས་འཇོག་དགོས་བྱུང་དེ། སྔར་སོང་གཞིར་བཞག་གི་རང་གི་འཚོ་བ་སྒེར་ལ་ཞུགས་ཆོག་པ་དང་ཞུགས་ཀྱི་ཡོད་པ་དེ་ཡིན། ཞི་བའི་གོམ་བགྲོད་པས་གང་ནས་འགོ་བརྩམ་པ་ནས་དེ་ནས། ས་གང་ཞིག་བར་དུ་འགྲོ་དབང་བྱུང་བ་དེ་ཡི་བར་དུ་གོམ་བགྲོད་གནང་རྗེས། བཙན་བྱོལ་ནང་གི་ལས་འགུལ་གཞན་དག་འདྲ་བར་ཕྱི་ནུར་བྱེད་པ་དང་དགོས་དབང་ཡིན་མིན་གང་ལྟར་ཡང་། མཚམས་བཞག་ན་པ་ཆོག་པ་ཡིན། དེ་དང་ཁྱབ་འཇུག་དེ་ལ་དགོས་འདུན་དང་ཞུ་སྐུལ་ཡོད་པ་ལས་དམ་བཅའ་དང་བློས་གཏོང་མེད་ཅེས་བཤད་ཆོག་པ་ཡིན་དུས། ཞི་བའི་གོམ་བགྲོད་ནི་ཞི་བའི་འཐབ་རྩོད་ནང་གི་ལས་འགུལ་ཞིག་ལ་ངོས་འཛིན་པ་ལས། ངའི་བསམ་པ་དང་གླེང་བཞིན་པའི་འཐབ་རྩོད་ཅིག་ཆགས་མེད། ཞི་བའི་གོམ་བགྲོད་ནི་མདོར་ན་དྲིལ་བསྒྲགས་ཤིག་ཆགས་ཡོད་པ་དེ་ཡིན། དྲིལ་བསྒྲགས་ནི་དུས་ཚོད་དང་སྐབས་ལ་བསྟུན་དགོས་ཀྱི་ཡོད་པ་རེད། དེ་བཞིན་དུ་ངས་ཞི་བའི་གོམ་བགྲོད་ནི་ལ་ཞུགས་བློ་ཡོད་མཁན་རྗེས་སོར་ཕེབས་མཁན་རྣམས་ལ་གསལ་བོ་ཞུ་འདོད་པ་ནི། ཞི་བའི་འཐབ་རྩོད་པ་བྱེད་དམ། ཞི་བའི་འཐབ་རྩོད་ཀྱི་ཆ་ཤས་སུ་གཏོགས་པ། ཞི་བའི་གོམ་བགྲོད་པ་བྱེད། དེ་གཉིས་ཀྱི་འདམ་ག་དང་རང་དབང་སྐྱེ་བོ་སྒེར་སོ་སོ་ལ་ཡོད་པ་ལས། ངས་ནམ་ཡང་དེ་ལ་སྟངས་འཛིན་བྱེད་མི་སྲིད་པ་དེ་ཡིན། མཚམས་འདི་ནས་ཚང་མའི་སེམས་ནང་དུ་ཞི་བའི་འཐབ་རྩོད་ཁྲོད་ཀྱི་ཞི་བའི་གོམ་བགྲོད་པའི་སྐོར་དེ་འདྲ་ཞིག་རེད་འདུག འོ་ན། ཞི་བའི་འཐབ་རྩོད་པ་ག་འདྲ་ཞིག་ཡོད་དམ་སྙམ་གྱི་ཡོད་ངེས་རེད། ཞི་བའི་འཐབ་རྩོད་པ་བྱེད་པར་མེད་དུ་མི་རུང་བའི་དོན་དག་གཉིས་ཡོད། གཅིག དམ་བཅའ་ཡིན། གཉིས་པ། བློས་གཏོང་ཡིན། འདི་གཉིས་མེད་པར་ཞི་བའི་འཐབ་རྩོད་པ་ཞིག་ཡོང་ཐུབ་མེད། དེས་ན་དམ་བཅའ་ཇི་འདྲ་ཞིག་འཇོག་དགོས་མིན་དེ་ལ་ཐུག་ཡོད། དམ་བཅའ་ནི། ཞི་བའི་འཐབ་རྩོད་ལ་ཞུགས་མཁན་སྐྱེ་བོ་སྒེར་རང་ཉིད་ནས་“ངའི་དམ་བཅའ་འཇོག རང་གིས་རང་ལ་དམ་བཅའ་འཇོག བོད་ལ་རང་དབང་དང་ཞི་བདེ་མ་ཐོབ་བར། ༧གོང་ས་མཆོག་ཕྱིར་རང་ཡུལ་ལ་མ་ལོག་པར། བོད་རྒྱ་ཞི་འགྲིག་ཡོང་བའི་ཆེད་དུ། ངས་ཞི་བའི་འཐབ་རྩོད་ཁྲོད་ནས་མ་ཤི་བར་དུ་རང་ནུས་ཡོད་ཚད་ཀྱིས་རང་གི་ལུས་ངག་ཡིད་གསུམ་བོད་མིའི་སྤྱི་དོན་ལས་སྒེར་དོན་མི་བྱེད„ཅེས་བོད་མི་སྒེར་རང་ཉིད་ལ་དྭང་བླང་གི་དམ་བཅའ་བརྟན་པོ་དགོས་པ་དེ་ཡིན། བློས་གཏོང་ནི། ཞི་བའི་འཐབ་རྩོད་ལ་ཞུགས་མཁན་གྱི་སྐྱེ་བོ་རང་ཉིད་ཀྱིས“ཉི་མ་དེ་རིང་ནས། ངའི་ལུས་ངག་ཡིད་གསུམ་བོད་མིའི་རང་དབང་དང་ཞི་བདེ། རྒྱ་བོད་ཞི་འགྲིག ༧གོང་ས་ལྷ་མིའི་རྣམ་འདྲེན་རང་ཡུལ་དུ་ཆིབས་བསུ་ཞུ་ཆེད། ལུས་ངག་ཡིད་གསུམ་པོ་བློས་གཏོང་བྱེད་ཀྱི་ཡིན་ལ། དེ་རིང་ནས་ང་བོད་མི་ས་ཡ་དྲུག་གི་བདེ་སྡུག་གླེང་བ་དང་ཞི་འབོད་ཀྱི་མི་ཞིག་ཡིན་པ་ལས་སྒེར་དོན་གཉེར་མཁན་གྱི་མི་དེ་མི་བྱེད་ཅེས་སེམས་བསམ་པའི་དཀྱིལ་ནས་བློས་གཏོང་གི་བསམ་བློ་དེ་རྙེད་དགོས་པ་མ་ཟད། ཐ་ན་ཚེ་སྲོག་ལ་གཏོར་རྒོལ་བྱེད་མཁན་གྱི་མདུན་དུ་སླེབས་ཀྱང་། རང་ཉིད་ལ་བོད་མི་རིགས་ཀྱི་བདེན་པ་མཐའ་གསལ་བྱེད་པའི་འགན་ཁུར་ཡོད་པའི་ཞི་བའི་འཐབ་རྩོད་པ་ཡིན་པས་ར་སྤྲོད་བྱེད་ཐུབ་མཁན་ཞིག་ཡིན་དགོས་པ་དེ་ཡིན། མདོར་ན་ཞི་བའི་འཐབ་རྩོད་ནི། རང་གི་ལུས་ངག་ཡིད་གསུམ་གྱི་བོད་དོན་བདེན་མཐའ་མ་གསལ་བར་དང་ཡང་ན་རང་ཉིད་མ་ཤི་བར་དུ། ཞི་བའི་འཐབ་རྩོད་བྱེད་རྒྱུ་དེ་ཡིན། མཐའ་དོན། ངའི་ཞི་བའི་འཐབ་རྩོད་ཀྱི་གྲུབ་འབྲས་སོན་མིན་དེ་ནི། སྤྱིར་བཏང་གི་ཕལ་བའི་མི་ང་གཅིག་པུའི་གྲུབ་ཐུབ་པ་ཞིག་ཡིན་པར་ངས་ནམ་ཡང་གླེང་མེད་ལ། དེ་ལྟར་འོང་བ་ཞིག་ཀྱང་ཆགས་མེད། ཡིན་ཡང་། ངས་རང་ཉིད་བོད་ལ་སྐྱེས་པའི་བོད་མི་དཀྱུས་མ་ཞིག་གི་ཐེགས་ཚད་ཀྱི་འགན་འཁྲི་འདི་འཁུར་ཡོད་ཅེས་པ་མཉམ་དུ་ངས་གང་བཤད་པ་ལས་ངས་གང་ཞིག་བྱེད་པའི་འགུལ་བསྐྱོད་ལ་ཞིབ་དུ་བརྟག་པར་འཚལ།། ༢༠༡༢/༨/༢༥ཉིན་བལ་ཡུ་བཙོན་ཁང་ནས། དྲུང་ཡིག་དོན་ལྡན་ནས།
