དམིགས་བསལ་ཚོགས་ཆེན་ཐེངས་གཉིས་པའི་གྲུབ་འབྲས་སྐོར་གླེང་བ།

ཉེ་ལམ་དམིགས་བསལ་ཚོགས་ཆེན་ཐེངས་གཉིས་པ་མཇུག་བསྒྲིལ་བ་དང་བསྟུན་ཏེ། འདི་གའི་གསར་འགོད་པས་ཚོགས་ཆེན་གྱི་གྲུབ་འབྲས་དང་བསམ་ཚུལ་ཕྱོགས་བསྡོམས་སྙན་ཐོའི་ཐད། ཚོགས་བཅར་བ་ས་སྐྱའི་སྤྱི་འཐུས་པདྨ་འབྱུང་གནས་དང་མདོ་སྨད་སྤྱི་འཐུས་སྒྲོན་དཀར་སྐྱབས། དེ་མིན། ཚོགས་ཞུགས་ཐུབ་མེད་པའི་བཀའ་བློན་ཁྲི་ཟུར་བསོད་ནམས་སྟོབས་རྒྱལ་མཆོག་དང་བོད་ཀྱི་རྩོད་རྙོག་འདུམ་སྒྲིག་ཁང་གི་འགན་འཛིན་ཀརྨ་ལེགས་བཤད་བཅས་ལ་བཅར་འདྲི་ཞུས་ཡོད།

བཀའ་བློན་ཁྲི་ཟུར་བསོད་ནམས་སྟོབས་རྒྱལ་མཆོག་ལ་བཅར་འདྲི་ཁག་ཅིག་ཞུས།

དྲི་བ། དེ་རེབ་ཀྱི་དམིགས་བསལ་ཚོགས་ཆེན་ཐེངས་གཉིས་པའི་ཐོག་སྤྱི་ཡོངས་ནས་དགོངས་ཚུལ་གང་འདྲ་ཡོད་དམ།

ལན། སྤྱིར་བཏང་ང་ཚོགས་འདུར་བཅར་ཏེ་དམིགས་བསལ་རྣམ་དཔྱོད་བཏོན་རྒྱུ་མེད་ཀྱང་། ད་རེབ་དམིགས་བསལ་ཚོགས་ཆེན་གྱི་བརྗོད་གཞི་ཧ་ཅང་གལ་ཆེན་པོ་ཡིན་སྟབས། ཉིན་གཉིས་རིང་བཅར་ཐུབ་ན་བསམ་སྟེ་རེ་སྒུག་བྱས་ཀྱང་། གཟུགས་པོ་དྲག་སྐྱེད་མ་བྱུང་སྟབས་བཅར་ཐུབ་མ་སོང་། ཚོགས་འདུའི་གནས་ཚུལ་ཞིབ་ཚགས་པོ་ཞིག་ཤེས་མ་སོང་ཡང་། ངའི་རེ་བ་གཙོ་བོ། སྤྱིར་བཏང་བོད་པའི་གནས་སྟངས་ཕྱོགས་ཡོངས་ནས་བལྟས་པ་ཡིན་ན། འགལ་རྐྱེན་མང་པོ་དང་མཐུན་རྐྱེན་དཀའ་ལས་ཁག་པོ་ཆགས་བསྡད་པའི་གནས་ཚུལ་ཞིག་ཡིན་སྟབས། སྔར་དང་མི་འདྲ་བ་ཞིག་ཡོང་རྒྱུར་དཀའ་ལས་ཁག་པོ་རེད་བསམ་སོང་། གཙོ་བོ། བོད་ནང་རྒྱལ་གཅེས་ལྷག་བསམ་ཅན་དག་གིས་སོ་སོས་སྲོག་ལེགས་སྐྱེས་སུ་ཕུལ་ཏེ་བོད་རྒྱལ་ཁབ་དང་མི་རིགས་ཀྱི་དོན་དུ་སྙིང་སྟོབས་ཆེན་པོས་མཛད་རྗེས་བསྐྱངས་པ་དེ་མུ་མཐུད་གནས་ཐུབ་པ་ཞིག་དང་། བོད་ནང་གི་བོད་མི་དེ་དག་ལ་རྗེས་སུ་ཡི་རངས་བྱེད་པར་མཇུག་སྐྱོང་ཡོང་ཆེད་བསམ་ཚུལ་ཡོང་བའི་རེ་བ་བྱས་པ་ཡིན། ད་རེབ་ཀྱི་གྲོས་ཆོད་ནང་༸གོང་ས་མཆོག་ཐུགས་ཕམ་ཐད་ལྷ་དགོངས་དྭངས་གསལ་ཡོང་བའི་གྲོས་ཆོད་ཅིག་བཞག་འདུག ཉེ་ཆར་༸གོང་ས་མཆོག་གིས་ལ་དྭགས་སུ་བཀའ་སློབ་གནང་བ་དེ་ངས་མཐོང་བྱུང་། གནས་ཚུལ་དེའི་རིགས་གཙོ་བོ་ཐུགས་ཕམ་བཟོ་མཁན་དེས་ལྷ་དགོངས་དྭངས་གསལ་ཞུ་རྒྱུ་ཧ་ཅང་གལ་ཆེན་པོ་རེད་ལ། མ་འོངས་པར་གང་མགྱོགས་ཞུ་གི་རེད་བསམ་ཡོད། དེ་ལྟར་མ་བྱས་པ་ཡིན་ན་དྲིན་ལན་ལོག་འཇལ་དང་།  ཆོས་དང་འཇིག་རྟེན་གང་གི་ཐོག་ནས་ཀྱང་མ་འོས་པ་ཞིག་རེད། ༸གོང་ས་མཆོག་ལས་ལྷག་པའི་བོད་ལ་བཀའ་དྲིན་ཆེ་བ་ཞིག་རྒྱལ་མཆོག་སྐུ་ཕྲེང་བཅུ་བཞི་བར་བྱོན་པའི་ནང་སུ་གང་ཡང་བྱུང་ཡོད་པ་མ་རེད། ལྷག་པར་དུ་ང་ཚོའི་དུས་ཚོད་གཉན་འཕྲང་ཆེན་པོ་འདིའི་སྐབས་སུ་༸གོང་ས་མཆོག་གིས་བོད་ལ་མཛད་རྗེས་བཞག་པ་དེ་དེ་བོད་པ་ཙམ་དུ་མ་ཟད་འཛམ་བུ་གླིང་གིས་ཤེས་བསྡད་པ་ཞིག་རེད།

དྲི་བ། དམིགས་བསལ་ཚོགས་ཆེན་གྱི་མཐའ་མའི་རྒྱབ་གཉེར་སྙན་ཐོའི་ནང་བོད་མི་ཁྲིམས་ལུགས་མཁས་པ་དག་གིས་བོད་ནང་སྡུག་སྦྱོང་མནར་གཅོད་གཏོང་མཁན་རྒྱ་ནག་གི་མགོ་ཁྲིད་རྣམས་ཐེར་འདོན་གྱིས་རྒྱལ་སྤྱིའི་ཐོག་ཁྲིམས་གཏུགས་བྱ་རྒྱུའི་སྐོར་ཞིག་བཀོད་ཡོད་པ་དེར་དགོངས་ཚུལ་གང་འདྲ་ཡོད།

ལན། སྔོན་མ་ནས་རྒྱལ་སྤྱིའི་ཁྲིམས་ཁང་དུ་རྒྱ་ནག་གི་དཔོན་རིགས་ཁྲིམས་གཏུགས་བྱ་རྒྱུའི་སྐད་ཆ་མང་པོ་བྱུང་བ་རེད། ཉམས་ཞིབ་དང་ཞིབ་འཇུག་མང་པོ་བྱས་པ་རེད། དེ་འདྲ་བྱས་ཏེ་ཕན་ཐོགས་འདི་བྱུང་བསམ་པ་ཞིག་བྱུང་མ་སོང་། ད་ལྟ་ཡོང་གི་ཡོད་མེད་ངས་མི་ཤེས། རྒྱལ་སྤྱིའི་ཁྲིམས་དང་འགྲོ་སྟངས་མ་ཤེས་པ་ཡིན་ན་བཤད་རྒྱུ་དཀའ་ལས་ཁག་པོ་རེད། དེའི་རིགས་ལས་སླ་བོ་ཞིག་མ་རེད། དེ་ལས་བོད་ནང་རྒྱལ་གཅེས་ལྷག་བསམ་ཅན་དག་གིས་བསམ་དོན་འགྲུབ་ཆེད་ང་ཚོས་མུ་མཐུད་དེ་རྒྱལ་གཅེས་ལྷག་བསམ་ཞུམ་པ་མེད་པའི་ཐོག་འབད་བརྩོན་ཡོང་ཐབས་བྱས་ཏེ་ཁོང་ཚོའི་དམིགས་ཡུལ་འགྲུབ་ཐུབ་པར་བྱ་རྒྱུ་དང་། ཁོང་ཚོའི་ནང་མི་དང་ཉེ་འབྲེལ་ལ་ཐབས་ཤེས་འདྲ་མིན་གྱི་ལམ་ནས་རྒྱབ་སྐྱོར་རོགས་རམ་གནང་སྟེ། མུ་མཐུད་སེམས་ཤུགས་འཕར་ཐུབ་པ་བྱ་རྒྱུ་ཡོད་པ་རེད་བསམ་གྱི་འདུག ང་ཚོ་མི་མང་པོ་ཞིག་གིས་ང་ཚོས་བཙན་བྱོལ་ནས་རོགས་རམ་བྱེད་པ་ཡིན་ན། རྒྱ་མིས་ཅིག་ལབ་ཀི་རེད་ཟེར་གྱི་ཡོད་པ་རེད། དེ་ལབ་ཡ་ཡོད་པ་མ་རེད་བསམ་གྱི་འདུག ང་ཚོས་ག་རེ་བྱ་མིན་ཐག་གཅོད་མཁན་ང་རང་ཚོ་རེད། རྒྱ་མིའི་ག་རེ་ལབ་མིན་ལ་ལྟ་རྒྱུ་ཡོད་པ་མ་རེད། བོད་པའི་དོན་དག་བོད་པ་རང་གིས་བྱེད་དགོས་པ་རེད། བོད་ནང་ཡོད་མཁན་དང་བོད་ཕྱི་ན་ཡོད་མཁན་གཉིས་ཀ་བོད་ཀྱི་བདག་པོ་རེད། ཚང་མར་འགན་ཡོད་སྟབས་ཚང་མས་བྱེད་དགོས་པ་རེད།

དྲི་བ། སྙན་ཐོའི་ནང་རྒྱལ་གཅེས་དཔའ་བོ་དཔའ་མོ་རྣམས་ལ་དྲན་རྟེན་ཁང་དང་། གནས་ཆེན་ཁག་ཏུ་བསྔོ་སྨོན། ཉིན་བརྒྱ་དུས་གཅིག་ཏུ་ལས་འགུལ་སྤེལ་དགོས་པ་སོགས་བཀོད་ཡོད་པའི་ཐད་དགོངས་ཚུལ་གང་འདྲ་ཡོད་དམ།

ལན། ང་ཚོ་ནང་པ་སངས་རྒྱས་པ་ཡིན་སྟབས། ཚོགས་བསགས་དགེ་སྦྱོང་བྱས་ཏེ་ལས་དོན་འགྲུབ་པ་དེ་ནང་པ་སངས་རྒྱས་པའི་ཆོས་ཀྱི་ནང་དུ་གསུངས་ཡོད། འདས་སོང་རྣམས་ཀྱི་བསམ་དོན་དང་གསོན་པོ་རྣམས་ཀྱི་རེ་བ་འགྲུབ་ཆེད་མཆོད་འབུལ་བྱ་རྒྱུ་ཧ་ཅང་གལ་ཆེན་པོ་རེད། དེའི་ཐོག་གནས་ཆེན་ཁག་ཏུ་རིས་སུ་མ་ཆད་པའི་བླ་ཆེན་དབུ་བཞུགས་ཐོག་འཁུར་བླངས་ཏེ་མཆོད་འབུལ་གནང་རྒྱུ་གལ་ཆེན་པོ་རེད། གཞི་རྒྱ་ཆེ་བའི་ལས་འགུལ་དེ་ག་རེ་ཡིན་མིན་ཤེས་ཀྱི་མེད། འགྲོ་སོང་མང་པོ་བཏང་སྟེ་དཀའ་ལས་བརྒྱབ། འབྲས་བུ་མ་ཐོན་པ་ཡིན་ན་རྒྱུ་མཚན་ཡོད་པ་མ་རེད། གཙོ་བོ་དབུ་ཁྲིད་རྣམ་པར་རག་ལས་ཡོད། ཁོང་ཚོས་བརྟག་དཔྱད་ཞིབ་འཇུག་བྱས་ཏེ་ལས་འགུལ་སྤེལ་རྒྱུ་གལ་ཆེན་པོ་རེད། རྩ་བའི་ང་རང་ཚོ་བྱེད་རྒྱུ་མེད་ན་མ་གཏོགས་བྱེད་དགོས་པའི་དུས་ལ་སླེབས་ཡོད། ལས་འགུལ་སྐབས་གཞུང་མང་མཉམ་རུབ་བྱ་རྒྱུ་ཧ་ཅང་གལ་ཆེན་པོ་རེད། རྒྱལ་སྤྱིའི་ས་གནས་གཞན་དུ་རང་ལུས་མེར་བསྲེཊ་བཏང་བའི་གནས་ཚུལ་ལ་རྒྱབ་སྐྱོར་ཚད་མཐོ་བོ་རག་པ་དང་ང་ཚོར་མ་རག་པ་དེ་ང་ཚོའི་ཕྱག་ལས་གནང་སྟངས་ལ་ནོར་འཁྲུལ་ཤོར་ཏེ་བྱུང་བ་ཞིག་མ་རེད། གཙོ་བོ་རྒྱལ་སྤྱིའི་ཁོར་ཡུག་གི་ཆ་ནས་རྒྱ་ནག་ལ་བསྟུན་མཁས་བྱ་དགོས་ཆགས་པ་དང་། རྒྱལ་ཁབ་ཁག་གིས་ཀྱང་སོ་སོའི་ཁེ་ཕན་ཨང་དང་པོར་བཞག་ཏེ་ལས་ཀ་བྱེད་ཀྱི་ཡོད། བོད་པ་ནུས་མེད་ཡིན་སྟབས་རོགས་པ་བྱས་ཀྱང་ཁོང་ཚོར་ཁེ་ཕན་རག་རྒྱུ་མེད་པ་ཤེས་ཀྱི་ཡོད། དེར་བརྟེན། ལོ་གཞོན་པ་ཚོར་ཤེས་ཡོན་ཡར་རྒྱས་དང་། ལྷག་པར་དུ་རྒྱལ་སྤྱིའི་ཤེས་ཡོན་ཐོག་ཡར་རྒྱས་གཏོང་རྒྱུ་ཧ་ཅང་གལ་ཆེན་པོ་ཆགས་ཡོད།

སྤྱི་འཐུས་ཚོགས་ཟུར་ས་སྐྱའི་སྤྱི་འཐུས་པདྨ་འབྱུང་གནས་ལགས་སུ་བཅར་འདྲི་ཁག་ཅིག་ཞུས།

 དྲི་བ། དམིགས་བསལ་ཚོགས་ཆེན་ཐེངས་གཉིས་པ་ཚོགས་པའི་གྲུབ་འབྲས་ཐོག་གཟིགས་ཚུལ་གང་འདྲ་ཡོད་དམ།

ལན། སྤྱི་ཡོངས་ཀྱི་ཐོག་ནས་ད་རེབ་ཀྱི་དམིགས་བསལ་ཚོགས་ཆེན་ཡག་པོ་བྱུང་སོང་བསམ་གྱི་འདུག ནམ་རྒྱུན་དྲ་རྒྱ་དང་སྤྱི་ཚོགས་ནང་ཚོགས་འདུ་ཚོགས་ཏེ་གྲུབ་འབྲས་ཐོན་རྒྱུ་མི་འདུག་ཅེས་སྐད་ཆ་ཅིག་བཤད་བསྡད་ཀྱི་ཡོད།  དེ་ཚོའི་གྲས་དེ་དངོས་ཡོད་གནས་ཚུལ་ཞིག་ཆགས་ཀྱི་མི་འདུག  ད་ལྟའི་བར་སྔ་རྗེས་ཚོགས་འདུ་ཚོགས་པ་ལས་ལག་ལེན་རྩ་བ་ཉིད་ནས་བསྟར་མ་ཐུབ་པ་དེ་མ་ཐུབ་པ་རང་རེད། དེ་འདྲའི་གནས་ཚུལ་མང་པོ་ཡོང་གི་རེད། གྲོས་ཆོད་དེ་དག་བཀའ་ཤག་དང་འབྲེལ་བ་ཡོད་པའི་རིགས་བཀའ་ཤག་དང་། སྤྱི་འཐུས་དང་འབྲེལ་བ་ཡོད་པའི་རིགས་སྤྱི་འཐུས་ཀྱིས་གནང་གི་ཡོད་པ་རེད། གང་ལྟར་ཐུབ་པ་དེ་དག་ལག་ལེན་བསྟར་ཡོད་པ་རེད། ད་རེབ་ཀྱི་དམིགས་བསལ་ཚོགས་འདུའི་ནང་ང་ཚོ་བོད་པའི་སྤྱི་ཚོགས་ནང་བྱེད་དགོས་པ་དོན་ཚན་ ༡༧ དང་རྒྱལ་སྤྱིའི་ནང་གནང་དགོས་པ་དོན་ཚན ༧། ཨེ་ཤ་ཡའི་ནང་གནང་དགོས་པའི་དོན་ཚན་ ༨ བཅས་ཡོད་པ་རེད། དེ་དག་ལ་སྤྱི་ཡོངས་ནས་བལྟས་ཡོང་དུས་མང་པོ་ཞིག་ང་ཚོའི་གནང་བསྡད་པ་རང་རེད། ཡིན་ནའང་། རྗེས་མར་ལས་འགུལ་དེ་འདིས་བྱས་པ་རེད་ཟེར་བ་ཙམ་མ་ཡིན་པར། ཚོགས་བཅར་བ་ ༤༣༢ ཚང་མས་མོས་མཐུན་ཐོག་གནང་བ་ཞིག་ཡིན་སྟབས། ལས་འགུལ་དེ་རྩོམ་པའི་སྐབས་སུ་ནུས་པ་ཆེན་པོ་ཡོད་པ་རེད་བསམ་གྱི་འདུག  ཡིན་ནའང་། རེ་ཟུང་གང་འདྲ་བྱས་ཏེ་ལག་ལེན་བསྟར་མིན་བཤད་ཤེས་ཀྱི་མ་རེད། ལྷག་པར་དུ་རྒྱ་ནག་གཞུང་ལ་འབོད་སྐུལ་བྱས་པའི་རིཊ་དེ། ད་ལྟའི་བར་འབོད་སྐུལ་བྱས་ཀྱང་ཉན་ས་རེད་བསམ་པ་ཞིག་མི་འདུག  རྒྱ་ནག་གི་ལངས་ཕྱོགས་དང་མཁྲེགས་འཛིན་གྱི་སྲིད་ཇུས་ལ་འགྱུར་བ་མ་བཏང་བར་དུ། རྒྱ་ནག་གཞུང་ལ་ལབ་མ་ལབ་མེད་པའི་སྣང་ཚུལ་འདུག རྒྱ་ནག་གཞུང་གིས་ཉན་རྒྱུ་མ་རེད་ཅེས་ང་ཚོ་ཁ་བཙུམ་ནས་མི་འདུག་པར། སུན་པོ་བཟོ་རྒྱུ་ང་ཚོའི་ལས་འགན་རེད།  ང་ཚོས་ཁ་ཐུག་དང་རྒྱལ་སྤྱིའི་སྒྲིག་འཛུཊ་ཁག དེ་མིན་རྒྱ་ནག་དང་འབྲེལ་བ་ཡོད་པའི་སྟོབས་ཆེན་རྒྱལ་ཁབ་བརྒྱུད་ནས་དུས་ནས་དུས་སུ་བོད་ནང་གི་བོད་ནང་གི་ཛ་དྲག་གནས་སྟངས་མཁོ་སྤྲོད་བྱ་རྒྱུ་གལ་ཆེན་པོ་རེད། ད་རེབ་ཀྱི་གྲོས་ཆོད་དེ་དག་སྤྱི་འཐུས་རྒྱུན་ལས་ནས་དོན་ཚན་རེ་རེ་བཞིན་གོ་བསྡུར་གནང་རྗེས། སྤྱི་འཐུས་དང་བཀའ་ཤག་བཅས་འབྲེལ་ཡོད་སོ་སོར་བགར་ཏེ་དུས་ཡུན་ངེས་ཅན་ཞིག་གི་ནང་ཚར་དགོས་པའི་ལམ་སྟོན་ཞིག་དགོས་ཀྱི་རེད་བསམ་གྱི་འདུག

དྲི་བ། ད་རེབ་སྙན་ཐོའི་ནང་མི་རིགས་འཐབ་རྩོད་ཀྱི་འཕྲལ་ཕུགས་ལ་གཞིགས་ཏེ་ཕྲུ་གུ་མང་པོ་གསོ་སྐྱོང་བྱ་རྒྱུ་དང་། ཕྲུ་གུ་གསུམ་ཡོད་པ་རྣམས་ལ་གཞུང་ངོས་ནས་ལྟ་རྟོག་གནང་དགོས་སྐོར་བཀོད་པ་དེ་ལག་ལེན་ཡོང་ངམ།

ལན། སྤྱིར་བཏང་བོད་པའི་སའི་རྒྱ་ཁྱོན་དང་མི་འབོར་བསྡུར་ན་མི་འབོར་ཧ་ཅང་ཉུང་ཉུང་རེད། ཡིན་ནའང་ང་ཚོ་ཡང་འཛམ་གླིང་ནང་གནས་བསྡད་ཡོད་སྟབས། དེའི་འགྲོས་དང་བསྟུན་ནས་འགྲོ་དགོས་པ་ཞིག་རེད་བསམ་གྱི་འདུག མང་པོ་ཞིག་གིས་ཕྲུ་གུ་སྐྱེས་ཀྱི་ཡོད་ཀྱང་། ཕྲུ་གུ་སྐྱེས་ཏེ་འབྲས་བུ་ཡོད་པ་ཞིག་གི་ཐོག་འཇོག་ཐུབ་པ་ཞིག་དགོས་པ་རེད། ཕྲུ་གུ་མང་པོ་སྐྱེས་ཏེ་སློབ་གྲྭར་གཏོང་མ་ཐུབ། མ་འོངས་པར་མདུན་ལམ་མེད་བསྡད་པ་ཞིག་ཆགས་ན་ཕན་ཐོགས་མེད། ཕ་མ་སོ་སོའི་དངོས་ཡོད་ཀྱི་དཔལ་འབྱོར་གནས་སྟངས་ལ་གཞིགས་ཏེ་ཚད་བཟོས་པ་རེད་བསམ་གྱི་འདུག  མི་འབོར་ཉུང་ཉུང་ཡིན་པ་དེ་ཛ་དྲག་གནས་ཚུལ་ཅིག་རེད། དེ་སོ་སོའི་ངོས་ནས་གནང་རྒྱུ་ཞིག་རེད་བསམ་གྱི་འདུག  ཕྲུ་གུ་གསུམ་ལས་མང་བ་སྐྱེས་བ་ཡིན་ན་གཞུང་གི་ངོས་ནས་གཟིགས་རྟོག་གནང་རྒྱུ་ཡག་པོ་རེད་བསམ་གྱི་འདུག

དྲི་བ། རྒྱབ་གཉེར་སྙན་ཐོའི་ནང་བོད་པ་ཁ་ཆེ་བ་དང་འབྲེལ་ལམ་འཛུགས་རྒྱུ་དང་ལྷོ་ཤར་ཨེ་ཤ་ཡའི་མི་མང་ལ་འབྲེལ་ལམ་འཛུགས་ཕྱོགས་སྐོར་ཞིག་བཀོད་ཡོད་པ་དེར་གཟིགས་ཚུལ་གང་འདྲ་ཡོད་དམ།

ལན། འཛམ་གླིང་ནང་ཆོས་ལུགས་མང་པོ་ཡོད་པའི་ནང་ནས་ཁ་ཆེ་ཆེ་ཤོས་རེད། ང་རང་ཚོས་ཁ་ཆེ་དང་འབྲེལ་བ་བྱ་རྒྱུ་དེ་གནད་འགག་ཆེན་པོ་རེད། དེར་བརྒྱུད་ལམ་ཞིག་འཚོལ་དགོས་ཀྱི་ཡོད་སྟབས། ང་ཚོས་བོད་པའི་ཁ་ཆེ་བ་ཚོ་དང་༧གོང་ས་མཆོག་བརྒྱུད་དེ་ཁ་ཆེའི་བླ་ཆེན་སོགས་ལ་འབྲེལ་བ་མང་པོ་ཞིག་ཡོང་གི་ཡོད་པ་རེད། དེ་༸གོང་ས་མཆོག་དང་མཉམ་དུ་འབྲེལ་ལམ་རྒྱུན་མཐུད་བྱ་རྒྱུ་ཧ་ཅང་གལ་ཆེན་པོ་རེད་བསམ་གྱི་འདུག ལྷག་པར་དུ་དེ་རིང་ཁ་སང་ཁ་ཆེ་དང་ནང་པའི་བར་རྙོག་དྲ་ཞིག་ཡོང་གི་ཡོད། དེའི་རིགས་དེ་ཉེན་ཁ་ཆེན་པོ་ཆགས་ཡོད་སྟབས། འབྲེལ་བ་གསར་འཛུགས་དང་རྒྱུན་འཁྱོངས་བྱ་རྒྱུ་གལ་ཆེན་པོ་རེད།

དེ་བཞིན། ལྷོ་ཤར་ཨེ་ཤ་ཡའི་ནང་གི་རྒྱ་རིགས་དང་འབྲེལ་བ་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། ང་ཚོ་བོད་ཆོལ་ཁ་གསུམ་གྱི་ས་ཡོངས་རྫོགས་རྒྱ་ནག་གཞུང་གིས་བཙན་བཟུང་བྱས་ཡོད་པ་རེད། རྒྱ་ནག་གི་ད་ལྟའི་གཞུང་དེ་ག་དུས་ཡིན་ཡང་གནས་ཐུབ་པ་ཞིག་མ་རེད། རྒྱ་ནག་གཞུང་དེ་རྒྱ་ནག་མི་མང་གིས་ཡིན་དགོས་པ་རེད་ལ། དངོས་ནས་མི་མང་གི་གཞུང་ཞིག་ཆགས་པའི་རེ་བ་བྱེད་ཀྱི་ཡོད། ད་ལྟའི་གཞུང་དེ་ཚོགས་པ་བྱེ་བྲག་པ་ཞིག་གིས་རྒྱ་ནག་མི་མང་འཁུར་བསྡད་ཡོད་པ་རེད་མ་གཏོགས། མི་མང་ལ་རང་དབང་སོགས་གང་ཡང་མེད་སྟབས། ད་ལྟའི་རྒྱ་ནག་ནང་དངོས་ཡོད་གནས་ཚུལ་ཤེས་མཁན་ཧ་ཅང་ཉུང་ཉུང་རེད། གཞན་ཕར་ཞོག་འཛམ་གླིང་སྤྱི་ཡོངས་ཀྱིས་༸གོང་ས་མཆོག་ཞི་བདེའི་དེད་དཔོན་ཞིག་ལ་ངོས་འཛིན་གནང་གི་ཡོད་ཀྱང་། རྒྱ་ནག་ནང་དུ་༸གོང་ས་མཆོག་ཟེར་དུས་སྡུག་ཅག་ཅིག་ཡིན་པར་རྒྱ་ནག་གཞུང་གིས་བཟོས་ཡོད་པ་རེད། ངོ་མ་ག་རེ་ཡིན་མིན་རྒྱ་ནག་མི་མང་གིས་ཤེས་ཐུབ་པར་བཟོ་རྒྱུ་ང་ཚོའི་ལས་འགན་རེད། དེའི་ཐད་གཞུང་གི་བྱེད་ཐུབ་པ་གཞུང་དང་། གཞུང་འབྲེལ་མ་ཡིན་པའི་ཚོགས་པ་དང་མི་སྒེར་བཅས་ཀྱིས་གནང་དགོས་པ་རེད། རྒྱ་སྐད་ཡག་པོ་ཤེས་མཁན་ཚོས་སྒེར་ངོས་ནས་ཀྱང་གནང་དགོས་པ་རེད།

མདོ་སྨད་སྤྱི་འཐུས་སྒྲོལ་དཀར་སྐྱབས་ལགས་སུ་བཅར་འདྲི་ཁག་ཅིག་ཞུས།

དྲི་བ། ད་རེབ་དམིགས་བསལ་ཚོགས་ཆེན་ཚོགས་པའི་གྲུབ་འབྲས་ཐོག་སྤྱི་ཡོངས་ནས་གཟིགས་ཚུལ་གང་འདྲ་ཡོད་དམ།

ལན། ཐེངས་འདིའི་དམིགས་བསལ་ཚོགས་ཆེན་གྱི་གྲུབ་འབྲས་ཀྱི་ཐད་ནས་གཞི་རྩའི་ཡག་པོ་བྱུང་སོང་བསམ་གྱི་འདུག བརྗོད་གཞི་སོ་སོ་ལ་དཔག་པའི་མི་མང་གི་བསམ་ཚུལ་དེས་སྲིད་ཇུས་ལ་འགྱུར་བ་ཐེབས་པ་དེ་འདྲ་མིན་ཡང་། མ་འོངས་པར་བཀའ་སྤྱི་གཉིས་ཀྱི་དགོངས་པའི་དཔྱད་གཞིར་གལ་ཆེན་ཆགས་ཡོད་པ་རེད་ལ། ད་རེབ་མི་མང་ལ་རང་ཉིད་ཀྱི་བསམ་ཚུལ་དང་རང་ཉིད་ཀྱི་ལྟ་བ་ལངས་ཕྱོགས། ལྷག་པར་དུ་རང་ཉིད་ཀྱི་བོད་ནང་གི་ཛ་དྲག་གི་གནས་སྟངས་ལ་འགན་འཁུར་བའི་ཐོག་ནས་ག་རེ་བྱ་དགོས་མིན་དང་། འདི་དང་འདི་བྱེད་དགོས་ཞེས་བསམ་ཚུལ་འདོན་སའི་སྡིངས་ཆ་ཆེན་པོ་ཞིག་བསྐྲུན་པ་དེ་ཧ་ཅང་རྩ་ཆེན་པོ་རེད། སྡིངས་ཆ་དེ་བསྐྲུན་པ་དང་མཉམ་དུ་བསམ་ཚུལ་གང་ཡོད་པ་དེ་བསླེབས་སོང་། ད་ལྟའི་བར་ང་རང་གཞུང་མང་ཚོགས་ཆེན་ཐེངས་གཉིས་དང་། དམིགས་བསལ་ཚོགས་ཆེན་ཐེངས་གཉིས་བཅས་སུ་ཆ་ཤས་ལེན་པའི་གོ་སྐབས་བྱུང་བ་ལས། ད་ལོའི་མི་མང་གི་བསམ་ཚུལ་གླེང་སྟངས་དང་སེམས་ཚོར་བཤད་སྟངས་དེ་དོན་དག་རང་གི་སྟེང་འབབ་ཆེ་བ་ཞིག་དང་། མཇུག་མཐའི་གྲུབ་དོན་ཡང་སྔོན་མ་ལས་ཡག་པོ་བྱུང་སོང་བསམ་གྱི་འདུག

དྲི་བ། དམིགས་བསལ་ཚོགས་ཆེན་སྟེང་གི་བསམ་ཚུལ་ཕྱོགས་བསྡོམས་ཀྱི་སྙན་ཐོ་དེ་ལག་ལེན་བསྟར་ཐུབ་མིན་ཐོག་དགོངས་ཚུལ་གང་འདྲ་ཡོད་དམ།

ལན། ད་རེབ་ཀྱི་བརྗོད་གཞི་ཆེན་པོ་གསུམ་གྱི་ནང་ནས་བོད་པ་རང་གི་སྤྱི་ཚོགས་ནང་ལས་འགུལ་ག་རེ་སྤེལ་དགོས་ཀྱི་ཡོད་མེད་ཐོག་ཚོགས་ཆུང་ཚང་མས་རྒྱབ་སྐྱོར་དེ་ཙམ་ཞིག་ཐོབ་ཡོད་ས་མ་རེད་ལ། སོ་སོའི་ནང་ཚུར་འབབ་རྒྱུ་དེ་ཙམ་ཞིག་འབབ་ཐུབ་མེད་པའི་ཚོར་བ་བྱུང་སོང་། རྒྱ་གར་གཙོས་ལྷོ་ཤར་ཨེ་ཤ་ཡ་དང་རྒྱལ་སྤྱིའི་ནང་ལས་འགུལ་སྤེལ་ཕྱོགས་ཐད་ནས་དགོངས་ཚུལ་གསུང་མཁན་སོ་སོའི་ངོས་ནས་བརྗོད་གཞིའི་ཐོག་བཤད་ཡོང་དུས་གནད་འགག་རང་གི་ཐོག་བབས་ཐུབ་འདུག་བསམ་སོང་། ང་རང་ཉིད་ཀྱི་ངོས་ནས་ལྷོ་ཤར་ཨེ་ཤ་ཁུལ་གྱི་ནང་པའི་རྒྱལ་ཁབ་ཁག་གི་ཆོས་ལུགས་དབུ་ཁྲིད་ཚུར་ངྷ་སའི་ཆོས་ལུགས་ཀྱི་སྡིངས་ཆའི་ཐོག་གདན་ཞུ་དང་། ཁོང་ཚོ་བརྒྱུད་ནས་ཨེ་ཤ་ཡའི་ནང་པའི་རྒྱལ་ཁབ་ཁག་ལ་བོད་དོན་དྲིལ་བསྒྲགས་བྱ་རྒྱུ་དེ་སྔོན་མའི་ཚོགས་ཆེན་ཁག་ཏུ་མ་བྱུང་བ་དང་། ལས་འགུལ་གྱི་ཐབས་ལམ་གསར་བ་ཞིག་དང་དམིགས་བསལ་བ་ཞིག་ཏུ་མཐོང་སོང་། གྲུབ་དོན་སྙན་ཐོ་བསྡོམས་རྒྱག་སྐབས་ཟགས་སོང་བའི་ནང་ནས། ཨེ་ཤ་ཡའི་མཐུན་ཕྱོགས་རྒྱལ་ཁབ་ཁག་དང་མཉམ་འབྲེལ་ཐོག་རྒྱ་ནག་ལ་གནོན་ཤུགས་སྤྲོད་རྒྱུའི་ལམ་ཁ་ཞིག་ཡོད་པ་དེ་འདྲ་ཞིག་འདུག་ཀྱང་། མཐའ་མའི་སྤྱི་བསྡོམས་སྐབས་ཆ་ཚང་བསླེབས་མ་ཐུབ་པའི་གནས་སྟངས་ཆགས་སོང་། ང་རང་གི་ངོས་ནས་དོན་ཚན་དེ་ལག་ལེན་བསྟར་ཐུབ་པ་ཞིག་དང་རྣམ་པ་གསར་བ་ཞིག  ལྷོ་ཤར་ཨེ་ཤ་ཡའི་རྒྱལ་ཁབ་ཀྱི་ལས་འགུལ་ནང་གལ་ཆེན་པོ་རེད་བསམ་སོང་།

དྲི་བ། གཞུང་མང་ཛ་དྲག་ལས་འགུལ་ཚོགས་ཆུང་འཛུགས་རྒྱུ་དང་གཞུང་སྒེར་གྱི་སྒྲིག་འཛུགས་དང་མཉམ་རུབ་ཀྱིས་བོད་དོན་ལས་འགུལ་སྤེལ་ཕྱོགས་དང་། ཐའེ་ཝན་གཙོ་བོར་གྱུར་བའི་ཨེ་ཤ་ཡའི་ནང་ལས་འགུལ་སྤེལ་ཕྱོགས་ཐད་ཁོང་གིས། 

ལན། གྲོས་ཆོད་འདི་ཚོགས་ཆུང་ཚང་མའི་ནང་ཤུགས་ཆེན་པོ་གླེང་སྟབས་རང་བཞིན་གྱིས་བསླེབས་སོང་། ང་རང་གི་ངོས་ནས་སྔོན་མའི་གཞུང་མང་ཛ་དྲག་ལས་འགུལ་ཚོགས་ཆུང་གིས་འགྲོ་སོང་ཕོན་ཆེན་བཏང་བ་དེ་སྤྱི་འཐུས་རྣམ་པ་ཕྱོགས་སྐྱོད་ཐོག་སོང་འདུག་སྟབས། ཡང་བསྐྱར་ཚོགས་ཆུང་ཞིག་བཙུགས་པ་ཡིན་ན། དམིགས་བསལ་ལས་ཀ་ཐོལ་པ་ཞིག་མི་འདུག་བསམ་གྱི་འདུག ལྷག་པར་དུ་དེ་བཙུགས་ཏེ་བོད་ནང་གི་གནས་ཚུལ་དམིགས་བསལ་རག་པ་ཞིག་དང་བོད་ནང་ནུས་པ་ཤུགས་ཆེན་པོ་འཐོན་ཐུབ་པ་ཞིག་ཡོང་གི་མ་རེད་བསམ་སོང་། སྤྱི་ཡོངས་ནས་མང་ཚོགས་ཀྱི་སེམས་ཚོར་ཐོག་ནས་བཤད་པ་དེ་གལ་ཆེན་པོ་ཡིན་ཡང་། ལས་ཀ་རང་གི་ཐོག་ནས་འགྲོ་སོང་ཕོན་ཆེན་པོ་འགྲོ་བ་ལས། གྲུབ་འབྲས་དམིགས་བསལ་བ་ཞིག་ཐོན་རྒྱུ་མ་རེད་བསམ་གྱི་འདུག

ཐའེ་ཝན་གཙོ་བོ་གྱུར་བའི་ཨེ་ཤ་ཡའི་ནང་བོད་དོན་དྲིལ་བསྒྲགས་དང་ལས་འགུལ་སྤེལ་ཕྱོགས་དེ། ནམ་རྒྱུན་ང་རང་དང་འབྲེལ་བ་ཡོད་པའི་བོད་ནང་གི་མཐོ་རིམ་ལས་བྱེད་ཁག་ཅིག་གིས་ཀྱང་། ད་ལྟའི་བོད་ནང་གི་མི་མང་ཚོ་ཤེས་ཡོན་ཡོད་མེད་ལ་མ་ལྟོས་པར་ཆབ་སྲིད་གོ་རྟོགས་ཀྱི་ཆ་ནས་རྒྱ་ནག་མི་མང་དང་བསྡུར་ན་ཚད་མཐོན་པོར་བསླེབས་བསྡད་ཡོད་སྟབས། རྒྱ་རིགས་མི་མང་གི་སེམས་ཁམས་ལེན་ཐབས་ལ་འབད་རྒྱུ་དང་། དེ་ཡང་བོད་ཕྱི་ནང་གཉིས་སུ་གནས་པའི་བླ་ཆེན་ཁག་དང་གྲྭ་བ། ལས་བྱེད་བཅས་ཀྱིས་འགན་འཁུར་ཏེ་རྒྱ་རིགས་ཚོར་བོད་ཀྱི་གནས་སྟངས་འགྲེལ་བཤད་ཡག་པོ་ཞིག་རྒྱག་དགོས་པ་དང་། ལྷག་པར་དུ་རྒྱ་ནག་གི་དམིགས་བསལ་སྲིད་འཛིན་ས་ཁུལ་སོགས་སུ་བརྒྱུད་ལམ་གྱི་ཐོག་ནས་སྡིངས་ཆ་བཟོས་ཏེ་རྒྱ་ནག་མི་མང་གི་སེམས་ཁམས་འགུག་ཐབས་དང་། གོ་རྟོགས་སྤེལ་རྒྱུ་ཧ་ཅང་གལ་ཆེན་ཡིན་པའི་སྐོར་གླེང་གི་འདུག ད་ལྟའི་ཆར་བཙན་བྱོལ་ནང་འབྲེལ་བ་ལས་ཁུངས་སོགས་ལས་ཁུངས་ཁག་ཅིག་ཡོད་པ་དེ་མ་འོངས་པར་རྒྱ་ཆེ་རུ་བཏང་སྟེ་རྒྱ་ནག་མི་མང་ལ་བོད་དོན་དྲིལ་བསྒྲགས་དང་གོ་རྟོགས་སྤེལ་རྒྱུ་ཧ་ཅང་གལ་ཆེན་པོ་རེད། དེ་བཞིན། རྒྱ་གར་ནང་ལ་མཚོན་ནའང་། མི་མང་གིས་བོད་ཀྱི་གནད་དོན་ཧ་གོ་རྒྱུ་གལ་ཆེན་པོ་ཆགས་ཡོད་པ་རེད། ད་ལྟའི་ཆར་རྒྱ་གར་ནག་གཉིས་ཀྱི་ས་མཚམས་ཀྱི་རྩོད་རྙོག་དེ་བོད་ཀྱི་གནད་དོན་དང་ཐད་ཀར་འབྲེལ་བ་ཆགས་ཡོད་པ་དང་། བོད་ཀྱི་གནད་དོན་མ་སེལ་བ་ཡིན་ན་ས་མཚམས་ཀྱི་དཀའ་རྙོག་དེ་སེལ་ཁག་པོ་ཆགས་ཡོད། དེའི་ཐད་ཚོགས་འདུའི་ནང་བོད་པའི་སིལ་ཚོང་བའི་ས་གནས་ཁག་དང་རྒྱ་གར་ཡུལ་སྐོར་བ་ཡོང་སའི་ས་གནས་ཁག  རྒྱ་གར་དང་བོད་པའི་དགོན་སྡེ་ཁག་སོགས་སུ་སྟབས་བདེའི་འགྲེམས་སྟོན་ཁང་གསར་འཛུགས་ཀྱིས་བོད་དོན་དྲིལ་བསྒྲགས་བྱ་རྒྱུའི་ལས་འགུལ་དེ་གལ་ཆེན་པོར་མཐོང་སོང་།

བོད་ཀྱི་རྩོད་རྙོག་འདུམ་སྒྲིག་ཁང་གི་འགན་འཛིན་ཀརྨ་ལེགས་བཤད་ལགས་སུ་བཅར་འདྲི་ཁག་ཅིག་ཞུས།

དྲི་བ། ཐེངས་འདིའི་དམིགས་བསལ་ཚོགས་ཆེན་གྱི་གྲུབ་འབྲས་ཐོག་སྤྱི་ཡོངས་ནས་གཟིགས་ཚུལ་གང་འདྲ་ཡོད་དམ།

ལན། ད་རེབ་ཚོགས་ཆེན་གྱི་མིང་ལ་དམིགས་བསལ་ཚོགས་ཆེན་ཞེས་འབོད་ཀྱི་ཡོད་སྟབས། དོན་དག་གལ་ཆེན་པོ་གཅིག་རང་གི་ཐོག་ག་རེ་བྱེད་དགོས་མིན་དང་ག་རེ་བྱ་ཐུབ་མིན། ག་རེ་བྱ་རྒྱུ་ཡིན་མིན་བཅས་ཀྱི་ཐོག་ཚོགས་པ་རེད། རྩ་བའི་དམིགས་བསལ་ཚོགས་ཆེན་ཚོགས་ཐུབ་པ་ཙམ་གྱིས་རྒྱལ་སྤྱི་དང་། ལྷག་པར་དུ་རྒྱ་ནག་དམར་བོའི་སྲིད་གཞུང་བཅས་མང་པོ་ཞིག་ལ་དོ་སྣང་དང་ཆེ་མཐོང་བསླེབས་པའི་གོ་སྐབས་ཞིག་ཆགས་ཡོད་པར་ང་རང་གིས་ངོས་འཛིན་བྱེད་ཀྱི་ཡོད། ཡིན་ནའང་། ད་རེབ་དམིགས་བསལ་བོད་ནང་གི་ཛ་དྲག་གི་གནས་སྟངས་དང་། ལྷག་པར་དུ་བོད་ནང་རང་གི་གཅེས་པའི་ལུས་སྲོག་མཆོད་མེར་ཕུལ་བ་དེའི་ཐད་ང་ཚོས་ག་རེ་བྱ་དགོས་པ་རེད་ཅེས་ཚོགས་ཡོད་སྟབས། ང་རང་གིས་ལས་འགུལ་སྤེལ་ཕྱོགས་དང་གྲུབ་འབྲས་དམིགས་བསལ་ཞིག་ཐོན་པའི་རེ་བ་བྱས་ཀྱང་། དེ་འདྲའི་དམིགས་བསལ་བ་ཞིག་འཐོན་མ་སོང་བསམ་ཡོད། བོད་མིའི་སྒྲིག་འཛུགས་ཀྱི་བཅའ་ཁྲིམས་དོན་ཚན་འོག་ཚོགས་པ་གཞིར་བཟུང་གིས་བཀའ་བསྡུར་ལྷུག་པོ་ཞིག་དང་། དོན་དང་ལྡན་པ་ཞིག་བྱུང་མི་འདུག་བསམ་སོང་། ལྷག་པར་དུ་ལས་འགུལ་སྤེལ་ཕྱོགས་ཀྱི་ཐད་ནས་བོད་ནང་ཧ་ཅང་ཛ་དྲག་ཆགས་ཡོད་ཀྱང་། ཚོགས་ཆུང་མང་པོ་ཞིག་གི་ནང་སྐད་ཆ་རྙིང་པ་རང་འཁུར་ཡོང་སྟེ། ལངས་ཕྱོགས་དང་ལྟ་བ་སོགས་ཀྱི་ཐོག་དུས་ཚོད་མང་པོ་ཞིག་བཏང་བསྡད་སྟབས། ང་ཚོའི་ལས་འགུལ་སྤེལ་བཞིན་པ་དང་། བོད་མིའི་སྒྲིག་འཛུགས་དང་སྤྱི་སྒེར་མང་པོ་ཞིག་ལ་ཡོད་བཞག་པ་དེའི་ཐོག་ནུས་པ་ཆེ་རུ་གཏོང་དགོས་ཞེས་པ་མ་གཏོགས། དམིགས་བསལ་འདི་བྱས་ཏེ་རྒྱལ་སྤྱིའི་ནང་འགུལ་ཀྱོག་གཏོང་ཐུབ་པ་བྱ་རྒྱུ་ཡིན་ཟེར་བ་ཞིག་བྱུང་མ་སོང་། བོད་ནང་གི་གནས་སྟངས་ལ་ལྟ་བ་དང་ལངས་ཕྱོགས་དགོས་ཀྱི་མེད་སྟབས། དེར་ང་ཚོས་གང་འདྲ་བྱ་མིན་ཐོག་ནུས་པ་དེ་ཙམ་ཞིག་ཐོན་ཐུབ་མེད་པ་དེ་གསལ་བོ་རེད།

དྲི་བ། ད་རེབ་དམིགས་བསལ་ཚོགས་ཆེན་ཐོག་རྒྱབ་གཉེར་སྙན་ཐོ་ཞིག་བཏོན་ཡོད་པ་དེའི་ཐོག་དགོངས་ཚུལ་གང་འདྲ་ཡོད་དམ།

ལན། དམིགས་བསལ་ཚོགས་ཆེན་ཐོག་གི་གླེང་སློང་མིང་པོ་ཞིག་དམིགས་བསལ་ཚོགས་ཆེན་ནང་གནང་རྒྱུ་ཞིག་མ་རེད། རྒྱལ་ཡོངས་ཚོགས་ཆེན་གྱི་ཐོག་ང་ཚོའི་ཆོས་དང་རིག་གཞུང་གང་འདྲ་བྱ་དགོས་མིན་དང་། ནུས་པ་གང་ཞིག་ཆེ་རུ་གཏོང་དགོས་མིན་གླེང་སྟེ་ཁྱབ་ཆེན་པོ་དང་ཡུན་རིང་པོའི་གནས་ཚུལ་ཐོག་གོ་བསྡུར་གནང་དགོས་པ་རེད།  ད་ལྟའི་བར་ང་རང་བཅར་མ་མྱོང་ཡང་དེིའི་རིགས་གླེང་རྒྱུའི་གོ་སྐབས་མང་པོ་འདུག ད་རེབ་བོད་ནང་གི་ཛ་དྲག་གི་གནས་སྟངས་ཐོག་འགུལ་ཀྱོག་ཅིག་དང་རྒྱ་ནག་ལ་བརྡ་ལན་ཞིག་སྤྲད་དེ་བསམ་བློ་གཏོང་གཞི་ཞིག་འཇོག་དགོས་པ་རེད། ལས་འགུལ་དེ་དག་ཕུགས་རྒྱང་རིང་པོའི་ལས་འགུལ་ལྟ་བུ་དང་། དོན་དག་ཐོག་བསླེབས་མ་ཐུབ་པར་བཀྲམས་བསྡད་པའི་རྣམ་པ་ལས། སང་ཉིན་དང་གནངས་ཉིན་ག་རེ་བྱ་མིན་དང་། ཟླ་བ་གཅིག་ནང་དང་ཟླ་བ་གཉིས་ཀྱི་ནང་ག་རེ་བྱ་མིན་སོགས་ཀྱི་ལམ་སྟོན་གསལ་བོ་ཞིག་དགོས་པ་རེད། དེ་འདྲའི་ལམ་སྟོན་མེད་པ་ཡིན་ན་བོད་ནང་གི་ཛ་དྲག་གནས་སྟངས་བསྐྱབ་རྒྱུ་དཀའ་ལས་ཁག་པོ་རེད། བོད་ནང་རང་ལུས་མེར་བསྲེགས་མི་ ༥༤ ལ་བསླེབས་བསྡད་ཡོད་པ་རེད། དམིགས་བསལ་ཚོགས་ཆེན་ཚོགས་ཏེ་ད་ལྟའི་བར་ལས་འགུལ་འདི་ཡིན་ཞེས་པ་ཞིག་བྱུང་མ་སོང་།

དྲི་བ། དམིགས་བསལ་ཚོགས་ཆེན་གྱི་སྙན་ཐོ་ཁག་མ་འོངས་པར་ལག་བསྟར་གནང་ཕྱོགས་གང་འདྲ་ཡོད་དམ།

ལན། ད་ལྟའི་བར་དམིགས་བསལ་ཚོགས་ཆེན་ཐེངས་གཉིས་དང་། རྒྱལ་ཡོངས་ཚོགས་ཆེན་ཐེངས་གཉིས་ཚོགས་པ་རེད། ད་ལྟའི་བར་ང་རང་ཉིད་ལས་ཀའི་ངོ་བོའི་ཆ་ནས་བོད་མིའི་སྤྱི་ཚོགས་ཀྱི་གང་སར་བསླེབས་བསྡད་མཁན་ཞིག་ཡིན་པའི་ཆ་ནས། དམིགས་བསལ་ཚོགས་ཆེན་ཐེངས་དང་པོ་དང་ཐེངས་གཉིས་པ་བསྡུར་བ་ཡིན་ན། མི་མང་ནང་འགྱུར་བ་ཆེན་པོ་ཞིག་ཐེབས་འདུག དམིགས་བསལ་ཚོགས་ཆེན་ཐེངས་དང་པོ་ཚོགས་པའི་སྐབས། ཚོགས་བཅར་བས་འཚང་ཁ་བརྒྱབ་སྟེ་གོ་སྐབས་མ་རག་པའི་གནས་ཚུལ་བྱུང་བ་རེད། བགྲོ་གླེང་རབ་དང་རིམ་པ་གོ་སྒྲིག་བྱས་ཏེ་མི་མང་ནང་རེ་བ་དང་ཡིད་ཆེས་ཆེན་པོ་བྱས་པ་རེད། སྐབས་དེའི་གྲོས་ཆོད་རིམ་པའི་ཐོག་ལས་ཀ་བྱས་ཡོད་ཀྱང་གནང་སྟངས་ཀྱི་ཐོག་ནས་འགྱུར་བ་མ་བཏང་བ་ཡིན་ན། ག་ལེར་དམིགས་བསལ་ཚོགས་ཆེན་དང་རྒྱལ་ཡོངས་ཚོགས་ཆེན་གྱི་ནུས་པ་ཉམས་འགྲོ་བཞིན་འདུག ཚོགས་བཅར་བའང་ཉུང་དུ་འགྲོ་བཞིན་འདུག བོད་པའི་སྤྱི་ཚོགས་ནང་བཀའ་མོལ་མང་པོ་ཞིག་རང་བཞིན་གྱིས་ལྷག་ཡོང་གི་ཡོད། ཚོགས་འདུ་ཚང་མར་ཁྲིམས་ཀྱི་ནུས་པ་ཡོད་པ་ཞིག་བཟོ་དགོས་པ་ཆགས་ཀྱི་མེད་ཀྱང་། དམིགས་བསལ་ཚོགས་ཆེན་ལྟ་བུར་མཚོན་ན། བཙན་བྱོལ་བོད་མི་གནས་སྡོད་ཚང་མའི་སྐུ་ཚབ་ཡོང་སྟེ་མི་མང་གི་བསམ་ཚུལ་སྤུངས་ཡོད་སྟབས། མ་མཐར་ཡང་གྲོས་ཚོགས་ནང་བཀའ་བསྡུར་དང་གྲོས་ཆོད་ཀྱི་ལམ་ནས་ཁྲིམས་ཐོག་ནས་བྱེད་དགོས་པ་གང་ཡིན་མིན་དང་། གཞུང་འབྲེལ་མིན་པའི་ཚོགས་པ་ཁག་ལ་ག་རེ་གོ་སྒྲིག་གནང་དགོས་མིན། འཛིན་སྐྱོང་བཀའ་ཤག་དང་གྲོས་ཚོགས་ཀྱིས་གང་གནང་དགོས་མིན་ཐོག་གོ་བསྡུར་ཐག་གཅོད་ཅིག་གནང་དགོས་པ་རེད་དྲན་ཡོད། ལྷག་པར་དུ་མ་འོངས་པར་གྲོས་ཆོད་ཁག་ལས་གནང་མ་ཐུབ་པ་གང་དང་གནང་ཐུབ་པ་གང་ཡིན་མི་མང་ལ་གསལ་བོར་བཟོ་རྒྱུ་གལ་ཆེན་པོ་རེད།

གསར་འགོད་པ། དོན་གོ

༼ བོད་ཀྱི་དུས་བབ་སྤྱིའི་འདོན་ཐེངས་ ༥༦༩ ལས་འདིར་བདམས་བཀོད་བྱས།༽