དབུ་མའི་ལམ་༧རྒྱལ་བ་རིན་པོ་ཆེ་སྐུ་སྒེར་གྱི་ལྟ་བ་རེད་དམ། བོད་མི་མང་གི་རེ་འདོད་དང་ལངས་ཕྱོགས་རེད།

ངས་དབུ་མའི་ལམ་ཞེས་པའི་ལངས་ཕྱོགས་འདིའི་ཐད་དུ། ཡུན་རིང་བོར་བསམ་བློ་གཏོང་ཁུལ་དང་བརྟག་དཔྱད་བྱེད་ཁུལ་བྱས་པ་ཡིན། ང་ལ་དོགས་པ་ཞིག་རང་བཞིན་གྱིས་སྐྱེ་ནས་འོང་བ་ནི། དབུ་མའི་ལམ་འདི། ༧རྒྱལ་བ་རིན་པོ་ཆེ་སྐུ་སྒེར་གྱི་ལྟ་བ་ཞིག་ཡིན་ནམ། བོད་མི་མང་གི་འཐབ་རྩོད་ཀྱི་ལངས་ཕྱོགས་དང་རེ་འདོད་ཅིག་ཡིན་མིན་དེ་གཉིས་རེད། གལ་སྲིད། ༧རྒྱལ་བ་རིན་པོ་ཆེ་སྐུ་སྒེར་གྱི་ལྟ་བ་དང་དགོངས་ཚུལ་གཅིག་པུ་ཞིག་ཆགས་ཡོད་ཚེ། དེ་ཡི་བདག་དབང་ཡོངས་རྫོགས་དང་འགན་འཁུར་༧རྒྱལ་བ་རིན་ཆེ་སྐུ་སྒེར་ལ་ཡོད་སྟབས། ༧རྒྱལ་བ་རིན་ཆེ་ཚང་གི་དབུ་ཁྲིད་པའི་རང་གི་གཞུང་དེ་ཡི་ལངས་ཕྱོགས་དང་ལྟ་ཚུལ་ལྟ་བུར་ངོས་བཟུང་དེ། རྒྱལ་བ་རིན་པོ་ཆེ་ཡིས་ཆབ་སྲིད་ཀྱི་ཐུགས་འགན་བཞེས་མཚམས་བཞག་ཉིན་དེ་ནས་མཚམས་འཇོག་དགོས་པ་ཞིག་ཆགས་ཀྱི་ཡོད་པ་ཡིན། དེ་ལྟར་མ་ཡིན་པར་དེ་ནི་བོད་མི་མང་གི་འཐབ་རྩོད་ཀྱི་ལངས་ཕྱོགས་དང་རེ་འདོད་གཉིས་ཀ་ཆགས་ཚེ་༧རྒྱལ་བ་རིན་པོ་ཆེ་ཚང་གི་ཆབ་སྲིད་ཐུགས་འགན་བཞེས་མིན་ལ་མ་ལྟོས་པར་བོད་མི་མང་གིས་ལངས་ཕྱོགས་དང་རེ་འདོད་དེར་བརྟན་པོ་དང་ཁ་གསལ་བོ། དྲང་པོ་དྲང་བཞག འཐབ་རྩོད་ཀྱི་ནུས་ཤུགས་གོང་མཐོར་གཏོང་དགོས་ཀྱི་ཡོད་པ་རེད། ད་ལྟའི་ཆར་བཙན་བྱོལ་བོད་མི་གཙོ་བའི་བོད་མི་ཆེས་མི་ཉུང་བ་ཞིག་གིས་མངོན་ལྐོག་གང་རུང་ནས་༧གོང་ས་མཆོག་སྐུ་སྒེར་གྱི་དགོངས་ཚུལ་དང་ལྟ་བ་ལངས་ཕྱོགས་ཤིག་ལ་ངོས་འཛིན་བྱེད་མཁན་ནི་ཉིན་རེ་ལས་ཇེ་མང་དུ་འགྲོ་བ་མཐོང་ཐོས་བྱུང་རྒྱུ་ཡོད་པ་དེ་ནི། བོད་མི་མང་གི་བདེན་པའི་འཐབ་རྩོད་ཀྱི་ནུས་ཤུགས་ཆུང་དུ་གཏོང་བ་དང་ནུས་མེད་ཅན་དུ་བསྒྱུར་བའི་ཉེན་ཁ་ཞིག་ཆགས་ཀྱི་ཡོད་པ་རེད། དབུ་མའི་ལམ་གྱི་མཐར་ཐུག་གི་མངོན་འདོད་ནི་ཀྲུང་གོ་མི་མང་སྤྱི་ཚོགས་རང་ལུགས་ཀྱི་སྒྲོམ་གཞིའི་ནང་ལོགས་ཀྱི་ཆེས་མཐོའི་རང་སྲིད་རང་སྐྱོང་ཚད་ལྡན་ཞིག་ཐོབ་པར་བརྩོན་ལེན་བྱེད་རྒྱུ་དེ་ཆགས་ཡོད་ལ། ཀྲུང་གོ་སྲིད་གཞུང་གིས་མངོན་འདོད་དེ་ཁས་ལེན་བྱས་པ་ཡིན་ན། བོད་མི་རྣམས་ཀྲུང་གོའི་རྒྱལ་དར་འོག་གིི་རང་སྲིད་རང་སྐྱོང་ཡིན་པའི་མངའ་སྡེ་གསར་བ་ཞིག་གི་ངོ་བོར་གནས་རྒྱུ་ཁས་ལེན་གནང་གི་ཡོད་པ་དེ་ཡིན། དེ་ལྟར་ཁས་ལེན་བྱེད་པར་གྲལ་སྒྲིག་བྱེད་མཁན་གྱི་བོད་མི་གང་ན་སུ་ཡོད་པ་དག་གིས། སྐད་ཆ་བཤད་སྟངས་དང་བསམ་བློ་གཏོང་སྟངས་ལ་འགྱུར་བ་གཏོང་དགོས་ཀྱི་ཡོད་པ་རེད། སྐད་ཆ་བཤད་ཕྱོགས་ནི་ང་ཚོའི་དགྲ་རྒྱ་མི་ཡིན་ཟེར་བ་དང་། ང་ཚོ་རྒྱ་ནག་མི་མང་དང་མཉམ་དུ་གནས་ཐབས་མེད་སྙམ་པའི་བསམ་བློ་གཏོང་ཕྱོགས་ལ་འགྱུར་བ་མ་བཏང་ཐབས་མེད་ཆགས་ཡོད། སྔ་ཕྱི་བར་གསུམ་དུ་བོད་མི་མང་གིས་བདེན་པའི་འཐབ་རྩོད་བྱེད་སའི་ཁ་གཏད་ནི། ཀྲུང་གོའི་སྲིད་གཞུང་གི་གཡོ་ཐལ་ཆེ་བའི་སྲིད་ཇུས་དང་འདྲ་མཉམ་མི་བྱེད་པའི་ལངས་ཕྱོགས་དེ་ཡིན་པ་ལས། རྒྱ་ནག་མི་མང་དུང་ཕྱུར་བཅོ་ལྔ་མ་ཡིན་པ་སེམས་དང་ཁ་མཐུན་པ་བྱས་ཏེ། ལས་འགུལ་དང་གཏམ་བཤད་གང་ཞིག་སྤེལ་སྐབས་ཀྱང་ཁ་གསལ་བོ་བཟོ་དགོས་པ་དང་རྒྱ་ནག་མི་མང་ལ་ཕོག་ཐུག་མ་ཤོར་བ་བྱེད་རྒྱུ་དེ་ནི་གལ་ཆེན་ནང་གི་དོན་ཆེན་ཆགས་ཡོད་པ་རེད། དཔེར་ན། རྒྱ་མི་གཅིག་གི་བོད་དོན་དུ་བདེན་པ་བརྗོད་པ་དང་བོད་མི་བརྒྱ་ཡིས་བོད་དོན་གླེང་བ་ལས། རྒྱ་ནག་གི་མི་གཅིག་གིས་བོད་མིའི་སྐྱིད་སྡུག་འཛམ་གླིང་ལ་སྒྲོག་པ་ཤུགས་ཆེན་པོ་ཆགས་ཀྱི་ཡོད་པ་ལྟ་བུ་ཡིན། གཞུང་དང་ཚོགས་པ་སྒྲིག་འཛུགས་ཁག་གིས་ཀྱང་། མི་མང་ལ་འཐབ་རྩོད་ཀྱི་ལངས་ཕྱོགས་དང་རེ་འདོད་གོ་བརྡ་འཕྲོད་པ་ཞིག་ཁ་ལག་གཉིས་ཀྱིས་གནང་དགོས་པ་དེ་ནི་ཆེས་མེད་དུ་མི་རུང་བའི་ཁ་ཚ་དགོས་གཏུགས་ཀྱི་གནད་དོན་ཞིག་ཆགས་ཡོད། ༧རྒྱལ་བ་རིན་པོ་ཆེ་ཚང་གི་བཀའ་སློབ་གང་གནང་བ། བོད་མི་གཙོ་བའི་འཛམ་གླིང་མི་མང་ལ། སྔ་ཕྱི་བར་གསུམ་དུ་ཕྱི་གསལ་ནང་གསལ་མཛད་དེ་གསུང་ཡོད་ཀྱང་། བོད་མི་རྣམས་ཀྱིས་(བོད་མི་ཚང་མ་འདིའི་ནང་དུ་མི་འདུ)ལངས་ཕྱོགས་དང་འཐབ་རྩོད་བྱེད་ཕྱོགས། བསམ་བློ་གཏོང་ཕྱོགས་དང་སྐད་ཆ་བཤད་ཕྱོགས་ལ་ཏན་ཏན་ནོར་འཁྲུལ་ཚབ་ཆེན་ཤོར་གྱི་མེད་འགྲོ་བསམ་གྱི་འདུག གལ་སྲིད། དབུ་མའི་ལམ་འདི་བོད་མི་མང་བརྒྱ་ཆ་དྲུག་ཅུའི་ལས་བརྒལ་བའི་ལངས་ཕྱོགས་དང་རེ་འདོད་ངོ་མ་ཆགས་ཀྱི་ཡོད་ཚེ། ཀྲུང་གོའི་རྒྱལ་དར་འཕྱར་ནས་རང་སྲིད་རང་སྐྱོང་གི་ཐོབ་ཐང་བརྩད་ཀྱང་རྒྱུ་མཚན་གང་དུའང་འགལ་མེད་ངེས་རེད། དེ་ལྟར་མ་ཡིན་པར། དབུ་མའི་ལམ་གྱི་འཐབ་རྩོད་འདི་༧རྒྱལ་བ་རིན་པོ་ཆེ་སྐུ་སྒེར་གྱི་དགོངས་ཚུལ་དང་ལངས་ཕྱོགས་ཤིག་ཡིན་ཚེ། བོད་མི་མང་གིས་རང་གི་འཐབ་རྩོད་ཀྱི་ལངས་ཕྱོགས་དང་རེ་འདོད་ཁ་གསལ་བོ་དང་མངོན་གསལ་དོད་པོའི་སྒོ་ནས་གླེང་རྒྱུ་དང་འཐབ་རྩོད་བྱེད་རྒྱུ་ནི་གལ་ཆེན་ཡིན་ལ། ༧རྒྱལ་བ་རིན་པོ་ཆེ་སྐུ་འཚོ་བཞུགས་སྐབས་སུ་གསལ་བོ་བཟོས་ན་ཡག་པ་ལས། ནམ་ཞིག་༧རྒྱལ་བ་རིན་པོ་ཆེ་མེད་དུས་སུ། ལེ་འདེལ་བྱེད་རྒྱུ་བྱུང་ན་ཧ་ལས་པའི་ཐབས་སྐྱོ་བོ་དང་། ཕྱིས་སུ་ང་ཚོས་དེ་འདྲ་བསམ་མེད་ཀྱང་། ང་ཚོའི་བླ་མའི་བཀའ་གསུང་ལ་གྱེན་ལོག་བྱེད་མ་ཐུབ་པ་འདྲ་བོ། དེ་འདྲ་བཤད་པ་དང་དྲན་ནས་གླེང་ཕྱོགས་བཟོས་ན་ནི། བོད་མི་རིགས་ཀྱི་འཐབ་རྩོད་ལངས་ཕྱོགས་ཁྲོད་ཀྱི་ངོ་ཚ་དང་བོད་མི་རིགས་ཀྱི་རྐང་འདྲེན་དུ་གྱུར་བ་རེད། བོད་མི་རྣམས་ཀྱིས་གསལ་བོ་ཤེས་དགོས་པ་ཞིག་ནི། བོད་མིའི་འཐབ་རྩོད་བྱེད་ཕྱོགས་དང་བླ་མར་དད་གུས་བྱེད་ཕྱོགས་ལོགས་ཀ་ཡིན་དུས། གཅིག་ཏུ་མ་བསྲེས་པ་ཞིག་དགོས་ཀྱི་ཡོད། དབུ་མའི་ལམ་ལ་དངོས་ནས་བོད་མི་མང་གི་མངོན་འདོད་དང་ལངས་ཕྱོགས། རེ་འདོད་བཅས་བཟུང་ཡོད་ཚེ། བོད་མི་རྣམས་གང་དུ་གནས་ཤིང་འཚོ་བའི་རྒྱལ་ཁབ་དང་ཡུལ་གྲུ་དེ་ནས། དབུ་མའི་ལམ་དང་མཐུན་པའི་འཐབ་རྩོད་དང་གཏམ་གླེང་། འབྲེལ་འདྲིས་བྱེད་ས་གཙོ་བོ་ནི་རྒྱ་རིགས་ཤེས་ཡོན་པ་དང་རྒྱ་རིགས་མི་མང་ཆགས་ཡོད་ལ། བོད་ཀྱི་གནད་དོན་ནི་ཀྲུང་གོའི་སྲིད་གཞུང་གིས་བསྒྲགས་པ་ལྟ་བུ་ཞིག་མ་ཡིན་པར། མི་རིགས་འདྲ་མཉམ་གྱི་ཁེ་དབང་འཐབ་རྩོད་ཅིག་དང་བོད་མི་རིགས་ཀྱི་ཆོས་ལུགས། སྲོལ་རྒྱུན་ལེགས་བྱུང་། སྐད་དང་ཡི་གེ་དར་སྤེལ་བྱེད་ཆོག་པ་བཅས་ཀྱི་འགྲོ་བ་མིའི་བདག་དབང་བདག་ཐོབ་ཀྱི་རྩོད་ལེན་ཞིག་ཡིན་པ་ངོ་སྤྲོད་དང་སྦྲགས། བོད་མི་རིགས་ཀྱི་འཐབ་རྩོད་ནི་ཁ་ཞེ་གཉིས་མེད་ཀྱིས་འཚེ་བ་མེད་པ་དང་མི་རིགས་གཞན་ཕམ་པར་རྒྱག་འདོད་ཀྱི་སྒེར་སེམས་ཁོ་ནའི་འཐབ་རྩོད་ཅིག་མ་ཡིན་པར། འགྲོ་བ་མིའི་རིགས་ལྷན་སྐྱེས་ཀྱི་ཐོབ་ཐང་དང་འགྲོ་བ་མི་རྣམས་སྤུན་ཟླ་ལྟ་བུའི་འདུ་ཤེས་ཀྱི་ཕྱུག་པའི་རླབས་ཆེ་བའི་ཞི་བའི་འཐབ་རྩོད་ཅིག་ཡིན་པ་ཤེས་སུ་འཇུག་དགོས། དེ་ལྟར་བྱེད་མ་ཐུབ་པར། དབུ་མའི་ལམ་ནི་༧རྒྱལ་བ་རིན་པོ་ཆེ་སྐུ་སྒེར་གྱི་གནད་དོན་དང་དགོངས་ཚུལ། ༧གོང་ས་མཆོག་གི་སྐུ་སྒེར་གྱི་ལྟ་གྲུབ་ལྟ་བུར་འདོད་ཡོད་ཚེ། མངོན་ལྐོག་མེད་པར་མདུན་ལ་ཐོན་འོང་ནས། “ངས་བོད་མི་རིགས་ཀྱི་འཐབ་རྩོད་ལ་བཟུང་བའི་རྣམ་འགྱུར་དང་ལངས་ཕྱོགས་འདི་ཡིན”སྐད་གསེང་མཐོན་པོའི་སྒོ་ནས་བསམ་གླེང་སྤྱོད་གསུམ་ལ་བརྩོན་དང་ཨ་མའི་བུ་དང་། གངས་ཅན་བོད་ལ་ཤ་ཚ་བ་དང་སྙིང་ཉེ་བ་ཡིན། དེ་མིན་བདག་པོ་མེད་པའི་རླུང་ནང་གི་སྐད་ཆ་དེ་དག་གང་སར་མ་སྟོར་བར་བོད་མིའི་ཆིག་སྒྲིལ་མཉམ་གནས་ཀྱི་འཐབ་རྩོད་ལ། རྒྱུ་དངོས་སྦྱོར་གསུམ་གང་ཞིག་གཏོང་འཕོད་ཀྱི་ཡོད་ན། རང་ཉིད་བོད་ལ་སྐྱེ་བའི་འགན་འཁྲུ་དང་འགྲོ་བ་མི་ལ་སྐྱེ་བའི་འདྲ་མཉམ་གྱི་འདུ་ཤེས་གཙང་མ་དེ་ཉིད། བདེན་པའི་དྲུང་ནས་མ་བརླག་པ་གནོངས། ཟུར་གནོན། ༧རྒྱལ་བ་རིན་པོ་ཆེ་དང་བོད་མིའི་བར་གྱི་འབྲེལ་བ་དངོས་ནས་གང་ཡིན་ནམ་ཞེས་པའི་དྲི་བ་འདིར་བོད་མི་རྣམས་ཀྱིས་ལན་ཡག་པོ་ཞིག་འདེབས་རན་རེད། ངའི་བསམ་ན་དྲི་བ་གཉིས་ལས་མེད། གཅིག་ནི་བླ་སློབ་ཀྱི་འབྲེལ་བ་རེད། དེ་ལྟར་ཁས་ལེན་མཁན་རྣམས་ཀྱིས་“བླ་མའི་ཅི་གསུང་ཆོས་”ཟེར་བའི་དོན་དག་ཤེས་ངེས་རེད། གཉིས་པ་དེ་ནི། དཔོན་འབངས་ཀྱི་འབྲེལ་བ་རེད། དེ་ལྟར་འདོད་མཁན་དག་གིས་“རྒྱལ་བའི་བཀའ་ལ་ལན་གཅིག་”ཟེར་བའི་ནང་དོན་ལ་བསམ་བློ་གཏོང་རན་རེད། ལྷག་པར་ཏུ་དབུ་མའི་ལམ་ནི། ༧རྒྱལ་བ་རིན་པོ་ཆེས་སྐུ་ཚེ་གང་བོར་དཀའ་ལས་བརྒྱབས། བརྟག་དཔྱད་རབ་དང་རིམ་པ་བྱས་པ་ལས་འཁྲུངས་པའི་རླབས་ཆེ་བའི་མི་རིགས་ཤིག་གི་ཆེད། རྩལ་དུ་བཏོན་གནང་བའི་འཐབ་རྩོད་བྱེད་ཐབས་ཤིག་ཆགས་ཡོད་པ་མ་ཟད། མི་རིགས་སུས་རྒྱབ་སྐྱོར་བྱས་ཀྱང་བྱེད་བདེ་བ། རྒྱལ་ཁབ་སུས་བལྟས་ཀྱང་འགྲོ་བ་མིའི་འདྲ་མཉམ་གྱི་བདག་དབང་ཞིག་ཆགས་ཡོད་པ་དང་། མི་རིགས་སུ་དང་རྒྱལ་ཁབ་དེ་ཡི་དབུ་ཁྲིད་སུས་རྒྱབ་སྐྱོར་དང་སྐད་ཆ་བཤད་དགོས་བྱུང་ན་བཤད་བདེ་བ་དང་དོན་སྙིང་ལྡན་ཞིང་རླབས་ཆེ་བ། མི་རིགས་སུའི་བདེ་སྡུག་ལ་འཕོག་ཐུག་བཟོ་མི་དགོས་པའི་སྲིད་ན་དཀོན་པའི་འཚེ་མེད་ཞི་བའི་འཐབ་རྩོད་དང་ཞི་བའི་སྙིང་སྟོབས་ཤུགས་ཤིག་ཆགས་ཡོད་པ་དེ་ཡིན། འོན་ཀྱང་། དུས་རྒྱུན་བོད་མིའི་བཤད་སྲོལ་ལ། “ལྷ་ཡོད་སར་འདྲེ་ཡོད་”ཅེས་པ་ལྟར། མ་བརྟག་མ་དཔྱད་པར་གཡམ་རྒྱུགས་བྱེད་པར་དགའ་མཁན་དག་ལ་མཚོན་ན། “ཁ་ཚོད་ཡོད་ཀྱི་ནང་ནས་ཚིག་ཚོད་མེད་”ཡོང་རྒྱུར་ངོ་ཚ་མེད་པའི་བྱེད་སྟངས་དེ་ནི་རླུང་ནང་གི་འུར་ལྟ་བུ་ཡིན་པ་བསམ་ཡོད། ཀུན་གྱིས་ཤེས་གསལ་ཡིན་དུས། རིགས་དེ་ཡི་སྐད་ཆ་ལ་བདག་པོ་རྒྱག་རན་མེད་པ་ཤེས་གསལ་ཆགས་ཡོད་ཀྱང་། དཀྲོགས་གཏམ་ལ་དགའ་བའི་མི་དེ་ཡི་རིགས་ཀྱི་གཏམ་ལ་རིན་ཐང་མེད་པར་གད་སྙིགས་ཁྲོད་གཡུགས་རྒྱུ་བརྗེད་མི་རུང་ངོ་ཞེས་སྐུལ་ལྕགས་བྱེད་འདོད་བྱུང་། མཐའ་དོན། མི་རིགས་སུ་འདྲ་ཞིག་ཡིན་ཡང་། རང་གི་མི་རིགས་ཀྱི་རིག་གཞུང་། སྐད་དང་ཡི་གེ ཡ་རབས་གོམ་གཤིས་དང་སྲོལ་རྒྱུན་ལེགས་བྱང་ལ་དགའ་བ་ནི་ནོར་འཁྲུལ་གཏན་ནས་མིན་ལ། དེ་ཡི་ཆེད་འབད་འབུངས་ལྷོད་མེད་བྱེད་པ་ནི་མི་རིགས་དེར་སྐྱེ་བའི་འགན་འཁྲི་ཆགས་ཡོད་སྟབས། ངས་ཀྱང་རང་མི་རིགས་ཀྱི་འགན་འཁྲི་ཐེགས་ཚད་ཅིག་ཕྲག་པར་བླངས་པ་དེར་དགེ་མཚན་ལས་ནོར་འཁྲུལ་གཏན་ནས་ཤོར་མེད་པར་སྤོབས་པ་དང་རེ་འདོད་མ་བརླག་པའི་སྒོ་ནས་སེམས་ཀྱི་སྟོབས་དང་བཅས་ངོས་འཛིན་བྱེད་ཀྱི་ཡོད།།           དྲུང་ཡིག་དོན་ལྡན་ནས།