རང་ལུས་མེར་བསྲེགས་གནང་འདུག

དེ་རིང་སླར་ཡང་གཙོད་དགོན་པའི་གཡས་འགྲམ་དུ་བོད་མི་ཞིག་གིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་འདུག

ད་ལྟ་རང་གནས་ཚུལ་འབྱོར་བ་ལྟར་ན། དེ་རིང་བོད་ནང་གི་ཆུ་ཚོད་ ༡ ཡོལ་ཙམ་ལ་མདོ་སྨད་གཙོད་དགོན་པའི་གཡས་ངོས་ཟུར་མཆོད་རྟེན་ཉེ་འགྲམ་དུ། གཙོད་ཁ་སོག་འབྲོང་ལྕེ་སྡེ་བའི་རྟ་མགྲིན་རྡོ་རྗེ་ཞུ་བ་ཞིག་གིས་རྒྱ་གཞུང་ལ་ངོ་རྒོལ་གནང་སྟེ་རང་ལུས་མེར་བསྲེགས་ཀྱིས་སྐུ་གྲོངས་ཡོད་དུག་ལ། རྒྱལ་གཅེས་དཔའ་བོ་རྟ་མགྲིན་རྡོ་རྗེ་ལགས་ནི། རྗེ་གུང་ཐང་རིན་པོ་ཆེ་སྐུ་ཕྲེང་བདུན་པའི་ཡུམ་གྱི་ཨ་ཕ་ཡིན་འདུག

བོད་ནང་གི་ཆུ་ཚོད་ ༣ ཙམ་གྱི་སྟེང་འདས་པོའི་སྐུ་ཕུང་རང་ཁྱིམ་དུ་གདན་འདྲེན་ཞུས་ཏེ། གཙོད་དགོན་པའི་དགེ་འདུན་པ་རྣམ་པ་འདུ་འཛོམས་ཀྱིས་བསྔོ་སྨོན་གསུང་བཞིན་ཡོད་པ་དང་། ས་ཁུལ་དེའི་ཡུལ་མི་མང་པོ་འདས་པོ་ཁོང་གི་ཁྱིམ་དུ་སོང་སྟེ་སྐུ་ཕུང་ལ་ཁ་བཏགས་སྒྲོན་བཞིན་ཡོད་འདུག ད་ལྟ་དགོན་པའི་མཐའ་འཁོར་དུ་རྒྱ་གཞུང་གིས་དམག་མི་དང་ཉེན་རྟོག་པ་མང་པོ་འགྲེམས་འཇོག་གིས་ལྟ་རྟོག་བྱས་ཡོད་པ་མ་ཟད། དགོན་པའི་ཉེ་འགྲམ་དུ་མང་ཚོགས་ཀྱི་འགྲོ་བསྐྱོད་ལའང་བཀག་སྡོམ་བྱེད་བཞིན་ཡོད་འདུག