འདི་ལོའི་ཕྱི་ཟླ་ ༩ ཚེས ༡ ཉིན་རྒྱ་ནག་གཞུང་གིས་ཁམས་སྐྱེ་རྒུ་མདོ་འཁྲི་འདུ་རྫོང་ཉ་མཚོ་ཟིལ་དཀར་དགོན་པའི་དགེ་འདུན་པ་ ༥ འཇུ་བཟུང་བཙོན་འཇུག་བྱས་ཡོད་པ་ལྟར། ཉེ་ལམ་མཚོ་སྔོན་ཞིང་ཆེན་ཟི་ལིང་གྲོང་ཁྱེར་གྱི་ཁྲིམས་ཁང་ཞིག་གིས་ཁྲིམས་རྩོད་པ་དང་ནང་མི་ཉེ་འབྲེལ་སོགས་ཅི་ཡང་མེད་པའི་ཐོག རྒྱ་ཆེན་སྡེ་པའི་ཕ་བརྩོན་འགྲུས་དོན་ལྡན་གྱི་བུ། ཉ་མཚོ་དགོན་པའི་རང་ལོ་ ༤༥ ཡིན་པའི་གྲྭ་བསོད་ནམས་ཤེས་རབ་ལགས་ལ་ལོ་ ༢ དང་། རྒྱ་ཆེན་སྡེ་བའི་ཕ་བརྩོན་འགྲུས་བློ་ལྡན་དང་མ་དབང་མོ་སྒྲོལ་མ་གཉིས་ཀྱི་བུ། རང་ལོ་ ༤༤ ཡིན་པའི་གྲྭ་བསོད་ནམས་དབྱིག་གཉེན་ལགས་ལ་ལོ་ ༢ བཅས་ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག
ད་ལྟའི་ཆར་སྐབས་དེར་རྒྱ་གཞུང་གིས་ཁོང་གཉིས་དང་མཉམ་དུ་འཇུ་བཟུང་བྱས་པའི་གེ་ཤིང་སྡེ་བའི་ཕ་རྟ་རྒྱལ་དང་མ་པདྨ་མཚོ་གཉིས་ཀྱི་བུ། རང་ལོ་ ༣༠ ཡིན་པའི་གྲྭ་བློ་བཟང་སྦྱིན་པ་དང་། མཁར་རོང་སྡེ་བའི་ཕ་ཨ་ཐུབ་དང་མ་སྒྲོལ་དཀར་གཉིས་ཀྱི་བུ། རང་ལོ་ ༢༥ ཡིན་པའི་གྲྭ་ཚུལ་ཁྲིམས་སྐལ་བཟང་། དེ་བཞིན། འདི་ལོའི་ཕྱི་ཟླ་ ༡༠ ཚེས་ ༡ ཉིན་འཇུ་བཟུང་བྱས་པའི་གེ་ཤིང་སྡེ་བའི་ཕ་བསམ་ཡག་དང་མ་ཚེ་དབང་པདྨ་གཉིས་ཀྱི་བུ། གྲྭ་བསྟན་འཛིན་ཤེས་རབ་བཅས་གསུམ་ད་ལྟའི་ཆར་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་པ་མ་ཟད། ཉེན་རྟོག་པ་དང་གཞུང་གི་ལས་བྱེད་ས་གནས་སུ་ཡོང་སྟེ་དགོན་གྲོང་གཉིས་ལ་འདྲི་བརྩད་དང་། ས་གནས་མི་མང་གི་འགྲོ་འོང་ལ་བཀག་སྡོམ་ནན་མོ་བྱེད་ཀྱི་ཡོད་འདུག
ད་ངོ་མ་ཡིན། བོད་ནང་གི་མི་དེ་ཚོར་སེམས་ཤུག་དང་ལ་རྒྱལ་ནི་བློ་ཡུལ་ལས་འདས་པ་འདྲ་རེད། ཡིན་ཡང་ཁྲིམས་ལུགས་དྲང་བདེན་མེད་པའི་དབང་གིས་་ང་ཚོར་བཤད་ས་གང་ཡང་མི་འདུག །
སྙིང་རྗེ། བོད་ནང་གི་སྤུན་ཟླ་ཚོས་ག་དུས་ཡིན་ན་སྡུག་རྐྱང་རྐྱང་མྱོང་བསྡད་འདུག