མེ་ཌེ་སིན་དུ་མེ་ལྕེ་སྐོར་སྐྱོད།

འདི་ལོའི་ཕྱི་ཟླ་ ༩ བའི་ཚེས་ ༢ ཉིན་ནས་བཟུང་བོད་མི་མང་སྤྱི་འཐུས་ལྷན་ཚོགས་ཀྱིས་སྣེ་འཁྲིད་པའི་བདེན་པའི་མེ་ལྕེ་བྱང་ཨ་རི་དང་ཡུ་རོབ་བཅས་སུ་སྐོར་སྐྱོད་བྱེད་བཞིན་པ་ལྟར། ཁ་སང་ཕྱི་ཚེས་ ༢༠ ཉིན་བྱང་ཨ་རིའི་ཁུལ་གྱི་བདེན་པའི་མེ་ལྕེ་ཝེ་སི་ཀོན་སིན་གྱི་གྲོང་ཁྱེར་མེ་ཌེ་སིན་དུ་འབྱོར་ཡོད་ཅིང་། སྐབས་དེར་( UW) གཙུག་ལག་སློབ་གྲྭའི་དཔེ་མཛོད་ཆེན་མོའི་མདུན་ཐང་དུ་གྲོང་ཁྱེར་སྤྱི་ཁྱབ་ཇོ་ཕུ་རི་སི་མཆོག་དང་།  ས་གནས་སྤྱི་མཐུན་ཚོགས་པའི་ཚོགས་གཙོ་ཁམས་ལུང་སྤྲུལ་སྐུ་མཆོག་གིས་གཙོས་བའི་འཐུས་མི་ལྷན་རྒྱས་དང་། གཞུང་འབྲེལ་མིན་པའི་ཚོགས་པ་ཁག་གི་ཚོགས་འཐུས་མི། དགེ་འདུན་པ།  སློབ་ཕྲུག་དང་མི་མང་བཅས་མི་ ༢༡༠ ལྷག་འདུ་འཛོམས་ཐོག་ཕེབས་བསུ་མཛད་སྒོ་ཚོགས་པ་མ་ཟད། གྲོས་ཚོགས་ཚོགས་ཁང་བར་གོམ་བགྲོད་ཀྱིས་སྐོར་སྐྱོད་བྱས་ཡོད་འདུག

ཁ་སང་གི་མཛད་སྒོའི་ཐོག་གྲོང་ཁྱེར་སྤྱི་ཁྱབ་ཇོ་ཕུ་རི་སི་མཆོག་གིས་གཙོས་སྐུ་མགྲོན་རྣམ་པ་དབུ་བཞུགས་ཐོག བོད་རྒྱལ་ཁབ་ཆེན་པོའི་རྒྱལ་གླུ་དང་ཨ་རིའི་རྒྱལ་གླུ  བདེན་ཚིག་སྨོན་གསུང་འདོན། བོད་བསྟན་སྲིད་ཆེད་རང་སྲོག་བློས་གཏོང་གནང་བའི་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་གུས་འདུད་བཅས་གནང་རྗེས། ས་གནས་བོད་རིཊ་སྤྱི་མཐུན་ཚོགས་པའི་ཚོགས་གཙོ་མཆོག་གིས་དེར་སྐུ་མགྲོན་དང་མི་མང་ལ་བདེན་པའི་མེ་ལྕེའི་སྐོར་སྐྱོད་ཀྱི་དམིགས་ཡུལ་ངོ་སྤྲོད་གཏམ་བཤད་གནང་ཡོད་པ་དང་། གྲོང་ཁྱེར་སྤྱི་ཁྱབ་ཇོ་ཕུ་རི་སི་མཆོག་གིས་རྒྱ་གཞུང་གིས་བོད་ཐོག་འཛིན་པའི་ཡ་ང་སྙིང་རྗེ་མེད་པའི་སྲིད་ཇུས་ལག་བསྟར་བྱས་ཏེ། བོད་མི་ས་ཡ་གཅིག་ལྷག་གི་ཚེ་སྲོག་ཤོར་ཡོད་པ་དང་།  འདས་པའི་ལོ་ཤས་རིང་བོད་ནང་བོད་མི་ལྔ་བཅུ་ང་གྲངས་གིས་བསྟུད་མར་རང་ལུས་མེ་རུ་བསྒྲོན་པའི་གནས་ཚུལ་བྱུང་བ་དེ་དག་བཟོད་དཀའ་བའི་གནས་སྟངས་ཤིག་ཆགས་ཡོད་སྟབས། རྒྱ་ནག་གཞུང་གིས་གང་མགྱོགས་ནོར་འཁྲུལ་ཅན་གྱི་སྲིད་ཇུས་མཚམས་འཇོག་བྱ་དགོས་པའི་རེ་སྐུལ་བཅས་ཀྱི་གཏམ་བཤད་གནང་འདུག  

དེའི་རྗེས་ས་གནས་གཞོན་ནུའི་ཚོགས་གཙོ་དང་དང་བོད་རང་བཙན་སློབ་ཕྲུག་ཚོགས་པའི་རྒྱུན་ལས་བཅས་རིམ་པས་གཏམ་བཤད་གནང་གྲུབ་རྗེས། དེར་ཡོད་བོད་མི་དང་བོད་དོན་རྒྱབ་སྐྱོར་བ་ཚོས་༸གོང་ས་མཆོག་སྐུ་པར་མཐོང་གྲོལ་རིན་པོ་ཆེ་དང་བདེན་པའི་མེ་ལྕེ། རང་ལུས་མེར་བསྲེཊ་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་སྐུ་པར་བཅས་འཕྱར་ཏེ། གྲོས་ཚོགས་ཚོགས་ཁང་བར་གོམ་བགྲོད་དང་ཡིག་ཆ་འགྲེམས་སྤེལ། བོད་དོན་རྒྱབ་སྐྱོར་གྱི་མཚན་རྟགས་བསྡུ་རུབ་བཅས་གནང་ཡོད་འདུག

གནས་ཚུལ་མཁོ་སྤྲོད་པ། གཅན་ཡེ་རྒྱམ།