ཁ་སང་གཟའ་ཉི་མའི་ཉིན་བྷན་བོད་རིགས་མཐུས་མིས་བཀོད་སྒྲིག་འོག བསམ་བློ་བརྗེ་རེས་དང་སྤོབས་པ་མཉམ་སྐྱེད་ཅེས་པའི་བགྲོ་གླེང་འདུ་འཛོམས་ཤིག་ཚོགས་ཡོད་འདུག
ཟླ་འདིའི་ཕྱི་ཚེས་ ༢༡ ཉིན་བྷན་བོད་རིགས་མཐུས་མིས་བཀོད་སྒྲིག་འོག སུད་སིའི་རྒྱལ་ས་བྷན་གྱི་སློབ་གྲྭ་ཆེན་མོའི་ཉེ་འགྲམ་ཨ་ལའེ་པཱ་པཱ་ཟ་ཁང་ནང་བོད་མི་ ༧༠ ལྷག་འདུ་འཛོམས་ཀྱིས། བོད་ཀྱི་སྤྱི་ཚོགས་བར་གྱི་འབྲེལ་ལམ་གོང་འཕེལ་གཏོང་ཕྱོགས་ཞེས་པའི་བརྗོད་གཞིའི་ཐོག་དུས་ཡུན་ཆུ་ཚོད་ ༢ རིང་བགྲོ་གླེང་ཚོགས་འདུ་ཞིག་ཚོགས་ཏེ། བོད་ནང་བོད་མི་ ༥༦ ལྷག་གིས་རང་ལུས་མེར་བསྲེགས་བཏང་ཡོད་པ་ལྟར། ཁོང་རྣམ་པས་ཕྱི་སྡོད་བོད་མི་ཚོར་རེ་བ་དང་ཡིད་ཆེས་བྱས་ཏེ་རང་ཉིད་ཀྱི་བུ་ཕྲུག་དང་བཟའ་ཟླ་སོགས་ཤུལ་དུ་བཞག་ནས། བོད་ལ་རང་དབང་མེད་པ་དེ་འཛམ་གླིང་མི་མང་ལ་བརྡ་ལན་གསལ་བོ་སྤྲོད་ཆེད་སོ་སོའི་ཚེ་སྲོག་མཆོད་མེར་ཕུལ་ཡོད་སྟབས། ང་ཚོ་ཕྱི་སྡོད་བོད་མིའི་ངོས་ནས་ཀྱང་བརྡ་ལན་དེ་མཉམ་འབྲེལ་རྒྱལ་ཚོགས་གཙོས་རྒྱལ་སྤྱིའི་སྤྱི་ཚོགས་ཐོག་སྐྱེལ་ཐུབ་རྒྱུར་མི་མང་ཚང་མའི་ངོས་ནས་ཤུགས་རྒྱག་དགོས་སྐོར་གླེང་སློང་ཤུགས་ཆེན་བྱུང་ཡོད་འདུག
འདི་གར་གནས་ཚུལ་བཏང་འབྱོར་བྱུང་བ་ལྟར་ན། བགྲོ་གླེང་ཚོགས་འདུ་དེའི་ཐོག་ཚོགས་ཞུགས་པ་ཚོས་བོད་ཀྱི་སྤྱི་ཚོགས་ཡར་རྒྱས་གཏོང་ཐབས་དང་རང་ཉིད་ནས་འགན་ཅི་ལྟར་ལེན་དགོས་མིན་གྱི་ཕྱོགས་ནས་བསམ་ཚུལ་སྤེལ་རེས་གནང་ཡོད་པ་མ་ཟད། ཚོགས་ཞུགས་པ་མང་པོ་ཞིག་གིས་ཚོགས་པ་སོ་སོའི་ངོས་ནས་ལངས་ཕྱོགས་དང་ལྟ་བ་བརྟན་པོ་འཛིན་དགོས་པ་གལ་ཆེན་ཡིན་པ་དང་། འོན་ཀྱང་། མི་མང་ངོས་ནས་ལངས་ཕྱོགས་དང་ལྟ་བའི་ཕྱོགས་སུ་མ་ལྷུང་པར་ཚོགས་པ་གང་ཞིག་གིས་ལས་འགུལ་སྤེལ་བ་ཡིན་ནའང་། དེར་སོ་སོ་བོད་མི་ཞིག་ཡིན་པའི་འདུ་ཤེས་ཀྱི་སྟེང་ནས་མཉམ་ཞུགས་བྱེད་དགོས་པའི་བསམ་ཚུལ་བཏོན་ཡོད་འདུག
བསམ་བློ་བརྗེ་རེས་དང་སྤོབས་པ་མཉམ་སྐྱེད་ཅེས་པའི་བགྲོ་གླེང་འདུ་འཛོམས་དེ་ནི། སུད་སིར་གནས་སྡོད་བོད་རིགས་གཞོན་སྐྱེས་འགའི་ངོས་ནས་བོད་མི་འདུས་སྡོད་ཀྱི་སྤྱི་ཚོགས་ཁག་ནང་གོ་སྒྲིག་གནང་བཞིན་ཡོད་པ་དང་། ད་ལྟའི་བར་སུད་སིའི་མངའ་སྡེ་མི་འདྲ་བ་ནང་སྔ་ཕྱིར་བགྲོ་གླེང་འདུ་འཛོམས་ཐེངས་ལྔ་སྤེལ་ཡོད་འདུག
